《夾出一個她》: 第四十九集-男朋友配對協會
阿妹：「見唔到啊！」
-
我：「出少句聲當幫忙啦！」
-
楚翹：「今晚我實搞鳩你，你小心啲，打直入鋪頭，打橫出返鋪頭。」
-
我：「唉！仆街喇今鋪。」
-
慧妍：「快啲氹返楚翹姐啦，人哋嬲嬲豬喇！」
-
我：「多得阿妹唔少，真係雷隊友嚟。」
-
阿妹：「冇辦法，佢哋咁靚，好難唔心動㗎嘛。」
-
安琪：「得喇得喇！再講真係冇得再食彥哥嘅手勢喇！」
-
我：「翹B，唔好嬲啦！我冇對佢哋心動㗎，係阿妹自己FF咋。」
-
楚翹：「你話，點解佢哋咁靚都冇仔呀！」
-
我：「原來你唔係嬲我㗎！咁我安全嚕。」
-
楚翹：「我係嬲點解佢哋咁可愛都冇男朋友囉！」
-
我：「原來係咁咋，嚇死人咩。我哋好似上次希逸同阿妹咁，做多次架兩，幫安琪同慧妍咪得囉。」
-
安琪：「個個都拍拖，唔通我都想冇拖拍嘅咩？」
-
楚翹：「幫緊你，幫緊你，我哋一定會幫你嘅。」
-
慧妍：「我真係好驚我喺呢個學生時期溝唔到仔。」
-
阿妹：「我哋大把青春啦！而家先中三下學期，仲有三年時間吖！」
-
慧妍：「最驚就係三年入面都仲搵唔到仔啫。」
-
安琪：「你知唔知學生時期冇拖拍真係一種遺憾嚟，你哋唔會明白㗎喇！」
-
我：「我哋之前咪都係單身，點會唔理解你嘅苦況呢啫！」
-
希逸：「總之我哋一定幫你哋出pool㗎啦，不成功，不收費。」
-
慧妍：「靠你哋幫拖㗎喇！」
-
阿妹：「都要靠你哋努力先得嘅，自己幸福，自己爭取呀嘛！」
-
安琪：「唔知啲仔仔咩樣嘅呢？」
-
我：「咁你有咩要求先？」
-
安琪：「起碼要高、大大隻隻、有愛心、錫我、仲要玩得嘅。」
-
慧妍：「我就要識煮飯嘅、肯做家務、會負責任嘅。」
-
安琪：「仲要有錢嘅，超級有錢嘅。」
-
我：「呢個要求，真係好難match到喎，你又冇條件，人哋好難揀你㗎喎。」
-
安琪：「啱啱先讚完我哋靚女，而家又話唔得。」
-
我：「雖然男仔揀女朋友九成都係睇樣，但冇才華都唔得嘅。」
-
楚翹：「彥B，咁你當初揀我係咪因為靚女先呢？」
-
我：「咁就梗係㗎啦！唔通貪你貼地咩？」
-
楚翹：「仆你個街啦！」
-
我：「唔靚都唔要你啦！」
-
楚翹：「如果之後老咗，樣衰咗，你仲要唔要我？」
-
我：「我咁靚仔，到時飛咗你，換個新嘅。」
-
楚翹：「你夠膽唔要我，你嘅下場會好淒慘。」
-
我：「聽住先啦！可能你飛我呢！」
-
楚翹：「冇可能，我最愛彥B㗎喇！」
-
我：「咁我都係最愛你㗎啦！點會飛你呢！」
-
安琪：「兩位唔好借啲意喺度放閃，閃死我哋啲單身狗喇！」
-
楚翹：「哎吔！唔好意思囉！」
-
慧妍：「翹姐好串喎。」
-
楚翹：「梗係，啲單身狗咁sad，唔串佢哋唔得㗎嘛，反正遲啲你哋出埋pool就冇得串㗎啦。」
-
安琪：「吔屎啦你。」
-
希逸：「咁啊！除咗有錢呢個要求做唔到之外，我諗我哋學校有人選啱你哋嘅要求。」
-
安琪：「邊個？唔啱心水要退貨㗎。」
-
希逸：「你放心啦！我要報答肥哥同大嫂嘅撮合之恩，一定會幫你哋嘅。」
-
我：「我哋都係搞個時間俾你哋自己相處啫，最主要都係睇你哋兩個點做。」
-
阿妹：「到時你哋真係要識做喇！機會係靠自己爭取㗎。」
-
慧妍：「得啦！我哋唔會俾個筍盤流走嘅。」
-
安琪：「有冇相睇下可以先睹為快呢？」
-
希逸：「留返個神秘感俾你哋，所以到時先知。」
-
慧妍：「挑！懶神秘。」
-
我：「吹水還吹水，唔好食咁耐，你哋聽朝仲要考試，唔好咁夜。同埋希逸記得洗碗，我哋走先喇！」
-
安琪：「你哋兩個去邊啊？」
-
我：「落去返工囉，唔係邊到有錢開飯啫。」
-
慧妍：「喺邊度返工？都係樓下嗰間宵夜鋪？」
-
我：「係吖！樓下返工又方便，又輕鬆。」
-
安琪：「你哋夠唔夠精神第二朝返學㗎？」
-
希逸：「梗係夠啦！肥哥由中一開始就已經打機打通宵，返學先瞓。」
-
慧妍：「吓！唔夠瞓對身體唔好㗎！同埋唔諗住讀大學咩？」
-
我：「放心，我夠瞓嘅，你見到我連黑眼圈都冇就知我精神啦！至於讀大學就免了，首先屋企冇錢，而且自己冇興趣讀書。」
-
安琪：「唔通諗住燒串燒燒一世咩？」
-
我：「梗係唔係啦！我嘅目標係燒燒下串燒，識個有錢婆，然後娶佢，然後下半生食軟飯，做軟飯皇。」
-
楚翹：「有邊個有錢人睇中你呢個窮貴吖？」
-
我：「哈哈！唔知呢？可能有啩。」
-
楚翹：「咁呢個有錢婆真係要去洗眼，連你咁樣衰都啱。」
-
慧妍：「都唔知彥哥有咩條件吸引富婆先得㗎？錢又冇、才能更加冇。」
-
我：「我有嘅係靚仔，亦都有燒串燒嘅才華，呢啲筍盤，世上都係得一個。」
-
慧妍：「你哋快啲返工啦！我驚再聽彥哥啲『偉論』會對靚仔會有誤解。」
-
楚翹：「我都係快啲帶走病人，費事洗你哋腦。」
-
我：「我呢啲係事實嚟㗎！你哋聽我解釋先啦！」
-
楚翹：「快啲啦！唔好荼毒我啲女。」
-
我：「喂呀！我無辜㗎。」
-
「嘭！」
-
楚翹拉咗我出門口，然後……拉我去到lift口，我就好似一隻俾主人拖緊嘅狗仔咁，好彩而家係夜晚食飯時間，冇人睇到呢個尷尬嘅場面，如果唔係，肯定臭名遠播。
-
（待續 To be continued）
IG：chingchingstory