《夾出一個她》: 第四十六集-阿妹的姊妹（上）
安琪：「出街食都唔健康，多味精得嚟而且又貴。」
-
慧妍：「你現時自己唔肯做飯，悶極時自己就浪漫唔到。」
-
阿妹：「我啋過你，我有仔㗎。我而家有希逸BB煮飯俾我食㗎！」
-
希逸：「吓！我都唔識煮嘢食嘅，餐蛋麵得唔得？」
-
我：「你都係得閒就跟我學煮餸，我唔想我阿妹以後都係食餐蛋麵過下半生。」
-
阿妹：「希逸你去學煮嘢食啦！我要做大小姐。」
-
安琪：「真係服咗你！」
-
我：「得希逸一個可以承受阿妹啲大小姐脾氣㗎咋。」
-
慧妍：「彥哥，你都縱佢唔少啦！」
-
我：「阿哥縱阿妹係正常嘅，鬼叫佢咁可愛咩？」
-
楚翹：「喂！喺女朋友面前講第二個女仔，你想點？」
-
我：「咁人哋真係抵錫呀嘛！」
-
慧妍：「彥哥真係妹控嚟。」
-
楚翹：「咁我係咩？」
-
我：「你係我嘅。」
-
楚翹：「如果我同阿妹跌落水，你會救邊個？」
-
［楚翹問咗一個答乜都死嘅問題，好彩……］
-
我：「救咗你先，話晒阿妹識游水。」
-
［係吖，阿妹識游水吖，我可以避開一劫喇！］
-
楚翹：「哼！算你啦！各位Ladies今晚想食咩？」
-
安琪：「無所謂，不過彥哥夜晚係咪要返工？」
-
楚翹：「係呀！我同彥B一齊返工。」
-
慧妍：「咁不如煮啲簡單啲嘅，你哋就唔使預備得咁辛苦。」
-
希逸：「不如打邊爐？又唔使預備，求其揼啲嘢食落去，熟咗就食得。」
-
我：「好提議喎！冷冰冰食返啲熱嘢都唔錯。」
-
楚翹：「各位Ladies有冇意見？」
-
安琪：「我哋最鍾意打邊爐㗎喇！」
-
我：「有冇特別嘢唔食？」
-
慧妍：「我哋係好女仔嚟，唔揀飲擇食㗎！」
-
安琪：「我哋鍾意食麻辣湯底，要雞子。」
-
希逸：「打邊爐已經熱氣，仲要麻辣湯底，唔驚生暗瘡咩？」
-
慧妍：「驚咩吖！我哋生暗瘡都係咁靚！」
-
阿妹：「好厚面皮喎！因住食完生返幾粒吖，不過你有冇暗瘡，我都咁鍾意。」
-
慧妍：「抵錫！」
-
我：「都唔知點解你哋啲女人咁鬼鍾意食雞子？明明雞子咁難食。」
-
安琪：「雞子嘅好，你唔會明白㗎喇！食完對身體好補㗎。」
-
我：「你哋女人補咩？你哋都冇嘅。」
-
慧妍：「啲精華好補，食完皮膚會好彈滑㗎。」
-
希逸：「又唔見我哋啲皮膚好滑。」
-
楚翹：「因為你哋唔食囉！」
-
我：「真係好難食呀嘛！」
-
阿妹：「唔理你哋兩條茂利食唔食啦！總之我哋四位Ladies要食啦！我哋上去先，你哋兩個自己去買嘢食啦！」
-
希逸：「梗係我哋買啦！點敢叫你哋幾個去街市買嘢呀！」
-
我：「希逸你屋企有冇多個gas爐？」
-
希逸：「有呀！做咩？」
-
我：「一個爐點夠六個人食，去你屋企攞多個先。」
-
安琪：「你哋兩個唔好執番梘，會痛㗎。」
-
希逸：「痴孖根，搞都唔搞gay啦！」
-
慧妍：「能拍拖邊個想轉gay。」
-
安琪：「過去做人太孤獨，開始對狗打飛機。」
-
我：「嘩！你哋好核突啊！著住校服喺巴士上面講啲核突嘢，好彩你哋唔係我間學校，唔係整衰晒我哋學校啲校風。唉！突然有啲後悔咗俾你哋去我屋企食飯。」
-
希逸：「就算幾單身都唔會對狗打啦！邊有引誘吖！」
-
安琪：「挑，你哋唔會講嘅？」
-
希逸：「講，我哋當然會講啦！但唔會著住校服、喺條街到大搖大擺咁講囉。」
-
我：「我記得呢句說話，好似楚翹定阿妹都有咁話我哋兩個。」
-
阿妹：「大家都係同一間學校，講嘅嘢梗係差唔多啦！」
-
希逸：「怕咗你哋班鹹濕婆，我哋去買嘢先。」
-
「Bye.」
-
同四位大小姐分道揚鑣之後，我同希逸就先去希逸屋企攞爐，希逸順便放低背囊換埋衫，然後到屋企對面嘅西灣河街市買餸。當然我哋冇執番梘啦！
-
返到屋企，四位大小姐已經開咗張麻雀枱「決戰四方城」，當中嘅戰況戰況相當激烈。四位嘅面色都相當難睇，好似就嚟輸咁。突然坐東位嘅安琪大嗌「自摸，海底撈月！」。對於打麻雀毫無興趣，亦都一竅不通嘅我，雖然睇唔明點打，但都好似隱約咁見到安琪係食糊嘅。
-
安琪：「磅水啦咁多位。」
-
楚翹：「咁都俾你到食糊先好嘢。」
-
慧妍：「仲要雙番東喎，真係好運。」
-
一班大小姐繼續喺麻雀枱「游乾水」嘅時候，我同希逸就準備今晚打邊爐嘅食材。
-
我：「食得喇！收枱啦！」
-
「係！」
-
阿妹：「今晚正喎。」
-
我：「今晚梗係正啦！啲餸咁豐富，包大家鍾意。」
-
希逸：「唔啱食夜晚就落去『燒夜店』食串燒啦！」
-
我：「佢哋聽日要考試㗎！」
-
安琪：「係囉！我哋係好學生嚟㗎！」
-
希逸：「好學生考試前係打麻雀嘅，我今日真係大開眼界。」
-
慧妍：「等自己個腦清晰啲，唔好俾其他雜念打擾。」
-
希逸：「聽日考數學咩？」
-
阿妹：「聽日考中文。」
-
希逸：「關打麻雀咩事？你話聽日考數學要訓練思維就話啫。」
-
阿妹：「嘿！你吊頸都要唞氣，何況溫書呢？」
-
希逸：「你啱！不如今晚玩夜啲囉！」
-
我：「我同楚翹要落去返工㗎。」
-
阿妹：「希逸講到聽日好似唔使考試咁。」
-
（待續 To be continued）
IG：chingchingstory