《夾出一個她》: 第三十五集-澄叔與茵妍（下）
始終呢個決定都關乎我哋下半生嘅去向，而且我哋兩個都有各自嘅夢想，所以大學畢業之後先再諗下。
-
幾年後，大學畢業，我同茵妍傾咗幾日，大家都決定要幫手承傳呢種風味，但接手間鋪同時代表咗要放棄咁多年為自己鋪排嘅夢想埋事業。
-
轉讓間鋪頭之前，我哋都仲係情侶關係，但我想將來同茵妍發展更長遠嘅關係，亦都想俾個承諾佢，會照顧佢一生一世，會同佢一齊生活，會一齊打理間串燒店。
-
於是我有一日約佢去愉景灣玩，當日晏晝天空好靚，晴空萬里，我哋周圍行，順便傾下將來嘅路。
-
日落西斜，太陽就好似鹹蛋黃咁，既黃又金，夕陽反射海平面，海面閃閃生輝。我哋喺沙灘漫步，左耳就聽到微風吹過樹葉嘅聲，而右耳就係輕微嘅海浪拍打聲，相映成趣。
-
正當太陽同地平線呈水平時，我就喺褲袋攞出準備多時嘅結婚戒指求婚。有靚聲坐鎮、有靚景嘅把持、更加有靚仔嘅襯托，茵妍梗係應承咗我啦！
-
一個月後，簽完紙，行埋禮之後，間鋪頭亦都正式轉讓俾我哋，我哋就將間鋪頭個名改為「燒夜店」，「燒夜店」梗係玩食字「宵夜」啦！同時我哋都係承傳串燒，所以就用呢個名。
-
至於牌匾「欣然為你服務」就係啱先你哋見到嘅十三叔，佢為咗慶祝我哋接手咗間鋪頭，於是就送咗塊牌匾，寓意我哋嘅服務質素，係好欣然咁為各位食客服務。
-
同時亦都取自茵妍個名嘅同音字，要我唔好忘記呢個肯陪我嘅恩人；一個放棄自己嘅夢想、放棄自己嘅工作，而去幫我嘅一個女人。「每一個成功嘅男人，背後都有個女人」，呢句真係好啱。
-
（澄叔回憶錄完）
------
阿妹：「估唔到澄叔咁多年前係一個文青喎！」
-
老闆：「嗰陣時溝女邊度好似你哋，撳個電話就可以識女仔。以前想溝女，一係運動叻，一係文學勁。論運動，我就唔得嘅，我手手腳腳都唔協調，所以唯一可以做嘅就係睇唔同小說，借住啲小說情節同啲女女搭下訕。」
-
老闆娘：「嘩！原來你啲文學細胞假㗎！我就係當初鍾意你夠文學feel先揀你。」
-
老闆：「揀咗就冇得返轉頭㗎喇！」
-
我：「原來澄叔咁識溝女，早知就叫你過兩招俾我哋啦！」
-
老闆：「世侄，溝女最緊要咩？就係膽大、心細、面皮厚。膽大，即係要豁出去，踏前咗一步先。心細，即係要心思細密，要諗下女仔鍾意啲咩。面皮厚，即係失敗都唔好灰心，要鍥而不捨。」
-
我：「就算個女仔話唔好，都唔放棄？」
-
老闆：「溝女就係要堅持，要打動人哋個心。」
-
希逸：「但圖書館幫手攞書呢啲咁老土嘅情節都可以吹得到嘅。」
-
老闆娘：「雖然呢個情節真係好老土，但呢個係真事。」
-
老闆：「呢啲就係緣份，緣份到了就自然會有。」
-
我：「你哋咁有緣份，有冇興趣寫個故事，叫《澄叔與茵妍的邂逅》？」
-
老闆：「故事就睇得多，但真係未自己落手寫個故事？但呢個故事會唔會太悶？」
-
老闆娘：「唔好教壞細路啦！佢啲溝女招式真係好老土㗎！追我嗰陣時又心急喎！你哋兩個教返佢溝女就真。」
-
老闆：「我啲溝女技巧簡直一流㖭啦！唔係點溝你！」
-
老闆娘：「我見你冇人要先格硬接受你咋！平時連約人出街都唔敢。而家得米，就教人咩溝女最緊要膽細、心大、面皮薄。」
-
老闆：「係膽大、心細、面皮厚。」
-
老闆娘：「你好似三樣條件都冇。」
-
老闆：「咁你肯定唔了解我喇！」
-
老闆娘：「識咗你二十幾年，你諗咩，我都知啦！」
-
老闆：「咁你知唔知我最鍾意聽咩歌？」
-
老闆娘：「陳柏宇囉！你成日喺屋企播陳柏宇啲歌，我倒返轉唱都得。」
-
老闆：「我最鍾意嘅係聽你美妙嘅歌聲。」
-
老闆娘：「收皮啦你！成日搞埋啲唔好笑嘅爛gag。」
-
老闆：「咁你又笑？」
-
老闆娘：「我費事落你面啫。」
-
老闆：「你擺明好笑先笑啦！識咗你咁多年，你嘅笑點我又點會唔知呢？」
-
老闆娘：「你柒咗嗰陣時咪就係最搞笑囉！」
-
楚翹：「你哋真係好sweet。」
-
阿妹：「教下我哋點樣可以keep住有新鮮感啦！」
-
老闆：「想keep住，其實可以得閒整蠱下對方，送啲小禮物俾對方。」
-
老闆娘：「不如我而家送份小禮物俾你？」
-
老闆：「好吖！」
-
老闆娘：「嗱！雞子串燒一串。」
-
老闆：「唔要嘅禮物有冇得退？」
-
老闆娘：「落咗order嘅嘢就冇得退㗎喇！呢個規矩你訂嘅。」
-
老闆：「哎！今次真係自己捉蟲。不過，規矩係死，人係生嘅，咁就改規矩啦！」
-
老闆娘：「你唔係諗住搬龍門呀嘛！」
-
老闆：「有咩問題，呢度我揸旗，梗係我話事。」
-
老闆娘：「講，你頭上面嗰六隻字係咩？」
-
老闆：「欣然為你服務。」
-
老闆娘：「冇錯，咁我問各位。各位客人，請問你哋覺得澄叔應唔應該食雞子呢？」
-
我：「簡直係應該啦！作為男人，梗係要好腰、好腎啦！」
-
希逸：「男人連呢啲少少恐懼都接受唔到，點做大丈夫呢！」
-
老闆：「啱先我哋三個先出生入死，而家就拋棄我？」
-
我：「好兄弟有事，梗係送佢一程啦！」
-
希逸：「咪係囉！使乜幫！自己解決啦！」
-
老闆：「今日嘅仇恨我會記住，到時你哋女朋友逼你哋食雞子，我都唔會保你哋兩個。」
-
楚翹：「我哋不如燒多幾串啦！反正你哋兩個講到咁簡單。」
-
（待續 To be continued）
IG：chingchingstory