《夾出一個她》: 第三十四集-澄叔與茵妍（上）
老闆：「夜雨凍嘅時候就會出現。」
-
我：「雨點投射到照片中。」
-
老闆：「回頭似是夢，無法彈動。」
-
希逸：「迷住凝望你，褪色照片中。」
-
我：「啊！像花雖未紅。」
-
老闆：「如冰雖不凍。」
-
楚翹：「對著我日語說話。」
-
阿妹：「可惜我聽不懂。」
-
我：「喂！你哋唔好破壞呢個咁有feel嘅畫面啦！」
-
楚翹：「呢啲先啱你哋㗎嘛！」
-
老闆：「冇晒feel，散band！」
-
老闆娘：「係呢！點解你哋咁想知老闆嘅恩人嘅？」
-
楚翹：「睇下老闆嘅恩人係點，偷下師。」
-
老闆娘：「你哋記唔記得我叫咩名？」
-
我：「茵妍囉！」
-
老闆娘：「咁你哋仲估唔到？望下塊牌匾。」
-
希逸：「欣然為你服務，唔通欣然就係取自諧音『茵妍』？」
-
老闆娘：「Bingo！」
-
老闆：「其實老闆娘就係我嘅恩人。」
-
我：「嘩！原來答案就係咁近在咫尺。」
-
老闆：「係你哋估唔到啫！」
-
楚翹：「澄叔，你教下班𡃁仔點溝女啦！」
-
我：「你追老闆娘定老闆娘追你㗎？」
-
老闆娘：「作為女仔梗係要留返啲矜持啦！唔係點留住澄叔嘅心呢？」
-
老闆：「乜唔係你追我先嘅咩？」
-
老闆娘：「喂喂喂！唔可以喺小朋友面前講大話㗎！」
-
老闆：「咁你又約我出街？」
-
老闆娘：「見你咁慘，冇人約，我咪蝕底啲，當陪下你囉！」
-
老闆：「真係多謝你喎。」
-
楚翹：「快啲講下你哋啲愛情史啦！」
-
老闆：「好耐好耐好耐之前……」
-
老闆娘：「講童話故事咩？」
-
我：「講故事梗係要啲氣氛㗎啦！澄叔繼續啊！」
------
（澄叔回憶錄）
-
22年前，我就好似你哋嘅年紀咁，青春無限，當時嘅我係一個童軍嚟，喺某次出去參加童軍訓練班入面，我識咗一個女仔，而呢個女仔，就係而家喺我隔離嘅茵妍喇！
-
呢個班咁啱編咗茵妍係同我同隊嘅，我哋雖然唔係見過好多次，印象中好似得兩日就完咗個訓練班。當時嘅我同茵妍只不過喺大家嘅生命入面擦過，完全冇任何交情嘅，即係上堂之前打個招呼，落堂講句再見就算嗰啲嚟嘅。
-
直至中七嗰年，我有日去公共圖書館借書，我見到有個女仔唔夠高攞書櫃最高嗰層嘅書，作為一個風度翩翩嘅男士，梗係拔刀相助，上前幫手啦！緣份呢啲嘢真係話嚟就嚟，原來唔夠高嘅女仔正正就係茵妍！
-
我幫佢拎咗本書落嚟，望一望封面，原來係當時嘅著名作家-Rachel所寫嘅《共的迫奶》，作為一個文青，呢啲咁出名作家梗係有追開啦！咁我透過呢個作家寫嘅書，就開始同茵妍搭訕。
-
傾傾下得知，原來茵妍係第一次睇Rachel啲作品，作為Rachel嘅忠實fans，我就梗係同茵妍分享下呢個作家寫嘅小說，順便介紹埋《共的迫奶》第二集嘅故事。正正因為呢個作家，打開咗我哋嘅話匣子，我記得我哋係傾咗好耐，傾到圖書館閂門，要圖書館管理員趕我哋走先走。
-
離開咗圖書館之後，已經入夜時分，茵妍就話不如食埋晚餐先。我就建議去太安樓食，因為呢度咁多年都係出名食嘢。有個女仔唔介意同你單獨食嘢喎。就算佢話食西餐、去鋸扒，你都話冇問題啦！
-
去到太安樓，我哋俾一間串燒店吸引咗，嗰間串燒店啲沙嗲醬真係好香，我哋兩個就入去坐低嗌嘢食。
-
嗌完嘢食之後，啲串燒冇耐就送到。我夠膽講，呢間嘢整嘅串燒係我人生食過最好食嘅串燒，啲肉醃得好香，配埋沙嗲醬，夾到爆。老闆嗰陣時見到我哋食得咁滋味就同我哋傾陣計。喺傾計中得知，原來老闆係馬來西亞人，所以啲串燒整得好正宗。傾咗一陣，我發覺老闆應該諗住同我哋吹水吹到食完嘢，但佢望到我嘅表情，應該知道「阻人溝女尤如殺人父母」呢個道理，所以佢都好識做咁唔阻住我哋傾計。
-
作為一個紳士，食完飯梗係要送人返屋企啦！返屋企嘅途中梗係繼續傾計，加深認識下對方咁。當中都做埋最重要嘅嘅，就係抄牌喇！以前邊似而家可以上網起人底啊！係要靠自己把口親自問，要好大勇氣㗎！
-
抄完牌，電話又有喇！梗係每晚都煲電話粥啦！嗰陣時我哋一放假就傾通宵，不知幾正，以前冇WhatsApp，梗係要用電話慢慢傾㗎啦！我哋除咗夜晚煲電話粥之外，當然仲有寫下信，做下筆友，有時啲心事唔方便用電話講，就用紙筆寫低自己嘅心事咁樣。
-
持續咗通宵煲電話粥、做埋筆友，持續咗個幾月之後，我就開始約茵妍行街、睇戲、食飯。雖然我哋唔同學校，星期六大家都要返童軍，一個禮拜得星期日可以見面，但大家都會抽時間一齊聚會。大家都相識咗咁耐，都發現大家嘅興趣原來都差唔多，都係鍾意睇書、睇戲，而我就搵咗一日約佢去長洲玩，然後乘機表白啦。當然佢都答應咗我，唔係而家佢就唔會喺度啦！
-
正式拍拖之後，我哋都已經係大學生喇！經濟能力始終都唔係好好，所以我哋有時會慳錢，唔去食高級嘢，反而去太安樓食嗰間串燒店，因為嗰度平得嚟又好食，順便回憶下第一次邂逅嘅經過。
-
食咗咁多次，老闆都同我哋開始熟落，就開始教我哋兩個燒串燒，我哋有時都去呢度返下parttime，一路拍拖，一路賺下生活費。
-
老闆都年事已高，開始唔方便打理間鋪頭，佢見到我哋平時放假都會嚟幫手，同埋被我哋兩個認真做嘢嘅樣打動，就想轉讓俾我哋打理。接手呢間餐廳，傳承呢個正宗馬來西亞串燒。
-
（待續 To be continued）
IG：chingchingstory