《夾出一個她》: 第二十集-三十分鐘的約會
我：「呢個故事就真係水蛇春咁長…」
-
［自己永遠想隱藏傷勢，但現實往往向疤痕揭露］
-
我：「嗰陣時嘅我去到170磅，係一個大肥仔嚟，個個同學都嗌我肥哥。我記得我當時追緊一個同班女同學。表白之後，女仔話嫌我肥就拒絕咗我。同日，有個籃球隊隊長都向女同學表白，佢哋仲喺埋一齊㖭。自此之後，我就俾同學叫做綠帽肥哥。亦都因為呢個名，我決定減肥，每日去跑步、做唔同嘅運動。最後就減到而家咁樣喇！」
-
阿妹：「阿哥你點解當時唔同我講呢件事嘅？」
-
我：「咁尷尬嘅事梗係唔同你講啦！」
-
楚翹：「咁而家仲有冇見嗰個女仔？」
-
我：「佢連續六年都係同我同班，真係越大越靚。」
-
楚翹：「有冇搞錯，喺我面前講第二個女仔！係咪想死？」
-
希逸：「阿嫂你可以放心，個女仔已經有男朋友㗎喇！」
-
楚翹：「你哋返學唔會尷尬嘅咩？」
-
我：「還好啦！唔好提啲傷心事喇！起筷啦！」
-
希逸：「各位，不如玩個IQ題？」
-
阿妹：「好吖！我最鍾意IQ題，我好醒目㗎！」
-
希逸：「有一班科學家搭飛機，有個癲嘅科學家將個馬桶掉落街，點解佢要咁做？」
-
阿妹：「唔知喎！點解呢？」
-
希逸：「因為佢真係癲嘅。」
-
阿妹：「咁都得，再嚟再嚟！」
-
希逸：「點樣將隻大笨象塞入雪櫃？」
-
阿妹：「呢條就簡單啦，打開雪櫃，放隻大笨象入去，閂返雪櫃門。」
-
希逸：「咁又點樣將長頸鹿放入雪櫃呢？」
-
阿妹：「你係咪當我低能㗎，打開雪櫃門，拎隻大笨象出嚟，放隻長頸鹿入去，閂返雪櫃門。」
-
希逸：「算你叻啦，咁獅子開森林大會，邊個會缺席？」
-
阿妹：「唔知喎？係咪老虎？」
-
希逸：「唔係！答案係長頸鹿，因為仲喺雪櫃入面。」
-
阿妹：「咁茅㗎，再嚟過。」
-
希逸：「有一日，有個獵人想過河，但河流有好多鱷魚，咁點算？」
-
阿妹：「呢個簡單啦，攞槍殺晒咪得囉！」
-
希逸：「錯！啲動物去晒森林大會，河流梗係冇動物啦！」
-
阿妹：「你玩晒啦，再嚟多條。」
-
希逸：「最後長頸鹿打開雪櫃門，離開咗雪櫃，正去森林大會，最後死咗，點解會死呢？」
-
阿妹：「因為溫差大。」
-
希逸：「唔係。」
-
阿妹：「因為佢凍死咗？」
-
希逸：「都唔係。答案係因為啱先有個癲佬喺飛機將個馬桶揼落街。」
-
阿妹：「無聊。」
-
希逸：「無聊你又笑。」
-
阿妹：「我笑你係因為你講出嚟唔會笑。」
-
希逸：「咩吖！我好認真㗎！」
-
阿妹：「認真地做戇鳩事呀嘛！」
-
希逸：「戇鳩你又笑？」
-
阿妹：「我最鍾意啲戇鳩嘅人㗎喇。」
-
希逸：「我又諗到一個IQ題，你估下我鍾意啲咩類型嘅女仔？」
-
阿妹：「唔知呢？」
-
希逸：「好似你嘅女仔。」
-
阿妹：「你啲filrt人技術唔掂喎！」
-
希逸：「梗係啦！我咁大個仔都係第一次咋！」
-
唔得！唔得！個氣氛真係好尷尬，希逸啲笑話完全唔好笑，阿妹又辦事不力。我哋要進行plan B。
-
我：「係喎，今晚希逸喺度瞓，我同楚翹落去樓下超級市場買定啲宵夜先。」
-
希逸：「唔使啦！陣間我返屋企攞衫，順便買埋咪得囉！」
-
楚翹都知希逸同阿妹嘅氣氛實在太尷尬，要留返啲獨處時間俾佢哋。
-
楚翹：「你返屋企都要時間啦，返得嚟呢度，樓下啲鋪頭都閂晒門啦！我同浚彥而家落去買啦。」
-
希逸：「咁好啦，我同阿妹喺度打住邊爐先，你哋落去拍拖啦！」
-
阿妹：「咁仲好，唔使食閃光彈。」
------
我：「頂！尷撚到你呢！希逸真係唔掂㗎喎！」
-
楚翹：「其實有冇諗過係你嘅問題？」
-
我：「何以見得？」
-
楚翹：「一個係你最親嘅人，一個係同你最friend嘅，佢哋兩個就係因為你而尷尬，蕊心驚你唔鍾意希逸同佢拍拖，令你難做；希逸就因為驚太進取溝阿妹而令你唔鍾意，如果你嬲咗佢，到時佢就真係朋友又冇，女朋友都冇。」
-
我：「你都啱嘅，咁而家就留啲私人時間俾佢哋啦！」
-
楚翹：「我哋順便行下街，拍下拖咁囉！」
-
我：「咁好啦！」
------
我：「我返嚟喇！」
-
阿妹：「阿哥吖！我有啲好消息想同你分享，就係我哋喺埋一齊咗喇！」
-
希逸：「肥哥你唔開心咩？」
-
我又驚又喜，驚嘅就係無理由我同楚翹落咗街半粒鐘都冇，佢哋就喺埋一齊；喜嘅就係，阿妹終於都唔使做電燈膽，阻住我同楚翹喇！
-
阿妹：「阿哥你唔想我同希逸拍拖咩？做咩眼濕濕嘅？」
-
我冇出聲，我直接…直接攬住希逸。
-
我：「多謝你收養我呢個煩膠阿妹，以後就多多關照喇！妹夫。」
-
阿妹：「使唔使講到咁遠吖！」
-
（待續 To be continued）
IG：chingchingstory