《夾出一個她》: 第十九集-邊爐家族（下）
------（楚翹視覺）------
-
浚彥落咗去同未來妹夫一齊去買餸嘅時候，我就幫阿妹化個靚妝準備釣金龜。
-
阿妹：「我好驚希逸唔鍾意我吖！」
-
我：「點會呢，你咁靚，化返個淡妝仲靚。」
-
阿妹：「如果希逸有女朋友咪好尷尬。」
-
我：「浚彥咪話佢冇女朋友囉！你唔使擔心喎。」
-
阿妹：「唔知吖！我好緊張吖！」
-
我：「唔使緊張，做返自己就得㗎喇。」
-
阿妹：「平時又唔敢約希逸出街，驚佢唔鍾意我。」
-
我：「我敢寫包單，如果你約佢，佢唔出嚟，我就同浚彥分手。」
-
阿妹：「使唔使玩咁大吖！」
-
我：「我唔玩咁大，你又點會信呢？」
-
阿妹：「得喇得喇！總之今晚不成功，不收隊。」
-
我：「阿妹出pool計劃-正式開始。」
-
阿妹：「好好好！」
-
睇到呢度，你係咪好奇怪點解我同浚彥好似夾咗口供咁呢？我哋將時間推返去尋晚甜蜜洗碗時間先。
-
---（浚彥視覺）---
-
我：「我聽日想你幫我啲嘢。」
-
楚翹：「咩事？」
-
我：「是咁的，希逸鍾意阿妹你知㗎啦！阿妹鍾意希逸你都知㗎啦！不過佢哋其實唔知大家都鍾對方，所以我哋應該幫佢哋手。」
-
楚翹：「你想我點幫手？」
-
我：「我識咗希逸咁多年，亦都做咗蕊心嘅阿哥咁多年。佢哋平時喺電話傾計就叻，現實對住異性就變咗鵪鶉，所以我哋要令佢哋有獨處時間。」
-
楚翹：「睇嚟你真係好想佢哋一齊喎！」
-
我：「梗係啦！佢哋咁夾，不過就係差臨門一腳咋嘛。」
-
楚翹：「放心啦，我會配合你㗎！」
-
我：「如果阿妹問你啲嘢，記得俾信心佢。」
-
楚翹：「我識做㗎喇！媒人阿哥。」
-
我：「咁你咪係我嘅媒人BB囉！」
-
楚翹：「衰鬼。」
--------
我：「各位食得喇！」
-
阿妹：「嘩！好豐富吖！咦！呢粒唔係雞子嚟咩？點解會喺度㗎？」
-
希逸：「係吖，知你鍾意食，特登去買㗎！」
-
阿妹：「你都鍾意食雞子？」
-
希逸：「我同你阿哥一樣，超級無敵憎雞子，不過你鍾意食呀嘛，我咪去買囉！」
-
阿妹：「你真係知我心，好過阿哥，要踢佢去先肯買。」
-
希逸：「買雞子真係要好大勇氣㗎！見你鍾意食先買。我都好驚食雞子，不過我可以同浚彥訓練食雞子。」
-
我：「唔好踢我落水喎。」
-
阿妹：「你呢個假期有冇人約吖？不如你夜晚上嚟一齊食飯？」
-
希逸：「我冇人約吖！問下阿哥介唔介意先啦！」
-
我：「無時無刻都無任歡迎。」
-
楚翹：「咁你聽日夜晚就上嚟食飯喇喎。」
-
希逸：「係嘅，大嫂。」
-
阿妹：「好嘢！終於唔使自己一個人食閃光彈。希逸，你要多啲上嚟吖！」
-
希逸：「梗係會啦！我都唔想你一個人食晒啲閃光彈。係呢，我屋企人去咗旅行，不如大家聽晚去我屋企食晚餐？」
-
阿妹：「好喎！我去拆你屋企先。」
-
希逸：「驚你吖！」
-
我：「咁多位，我有個大膽嘅諗法，不如我哋聽晚去希逸屋企瞓，做一個staycation吖？」
-
希逸：「好提議喎，我屋企有Switch同PS4吖！」
-
我：「我屋企夠有唔同嘅board game。不如你今晚喺呢度瞓，聽日到我哋去你屋企瞓一晚。」
-
阿妹：「正喎！楚翹你點睇吖？」
-
楚翹：「冇問題吖！我最緊要有浚彥嘅啫。」
-
希逸：「就咁話啦，我食完嘢返屋企執下屋先，順便攞衫。」
-
我：「使乜返去攞衫吖！著我嗰啲咪得囉。」
-
希逸：「肥哥你係咪玩嘢吖！」
-
我：「我咪同你講唔好開我朵囉！」
-
楚翹：「點解你叫肥哥嘅？」
-
我：「你夠膽講，你今晚唔使旨意有得瞓。」
-
阿妹：「希逸，你唔使驚我阿哥㗎！呢度有我同楚翹罩住你，你好安全㗎！」
-
希逸：「睇嚟你啲地位冇晒喇喎！」
-
我：「𡃁仔，凡事留一線，日後好相見吖！」
-
楚翹：「乜以前浚彥好肥㗎咩？」
-
阿妹：「唔係好肥，係好撚肥，你係唔會見過一個人可以肥到咁。」
-
我：「有冇咁誇張吖！」
-
阿妹：「梗係冇誇張啦，你初中嗰陣時成170磅喎，之後你突然話減肥先減到而家咁。」
-
楚翹：「你之前點解會去減肥嘅？」
-
阿妹：「係囉！你都冇同我講，你嗰陣時係咪失戀吖！」
-
希逸：「佢應該係想去溝女嘅啫？」
-
我：「希逸唔好呃佢哋啦！係，嗰陣時我俾女飛，失咗戀，仲戴埋頂綠帽。」
-
（待續 To be continued）
-
睇完故事之後不妨畀個like支持我，同埋請大家多多支持澄澄故事台。
-
（本章節經已上載至澄澄故事台Instagram、紙言、TBC、Penana同埋網站專頁）
IG：chingchingstory