《夾出一個她》: 第四集-首富的女兒
我：「你唔想講都唔緊要㗎，每個人都有自己嘅祕密㗎嘛。」
-
楚翹：「唔緊要啦，又唔係啲咩世紀大祕密。係呢，話時話你哋知唔知邊個係顏廣勝？」
-
阿妹：「我知，香港首富顏廣勝呀嘛！」
-
楚翹：「實不相瞞，我就係顏廣勝個女。」
-
我：「咪玩啦！你點會係顏廣勝個女吖！」
-
呢個時候，楚翹喺銀包攞咗張相出嚟。張相就係楚翹同香港首富顏廣勝同佢老婆李香蘭嘅合照。
-
我：「你真係顏廣勝個女？」
-
楚翹：「呃你有錢賺咩？」
-
我：「咁住豪宅、餐餐大魚大肉唔好咩？出入有司機接送幾好吖！咁點解要離家出走嘅？」
-
楚翹：「咁你有冇試過成個月冇見父母吖？」
-
我：「咁我都有幾年冇見父母嚕！」
-
楚翹：「啊唔好意思，提起你嘅傷心事㖭！」
-
我：「唔緊要，你繼續啦！我習慣咗㗎喇。」
-
楚翹：「咁你都知佢哋係大忙人嚟㗎喇。佢哋三日唔埋兩日就出去公幹。一個禮拜得一、兩日喺屋企，而且佢哋喺屋企都忙住搞生意，所以我哋好少傾計。基本上，大家聚埋一齊嘅時間只係得食飯嗰陣時，食完飯大家都各自返房做自己嘢。」
-
我：「咁你咪冇乜家庭溫暖囉！」
-
楚翹：「都係㗎！不過我保母全天候照顧我，而且保母成日同我傾計，又肯聽我講心事㖭！所以我好鍾意我保母㗎！」
-
我：「聽你咁講，其實都唔錯吖！雖然缺咗啲家庭溫暖，但起碼都有人陪你傾計吖！」
-
阿妹：「係呢，我雖然未體驗過有錢人家嘅生活，不過我睇電視劇「流心風暴」啲演員食飯嗰陣時要好講求餐桌禮儀，咁你屋企係咪都一樣㗎？」
-
楚翹：「係吖，我哋平時喺屋企食飯都要好似去啲高級餐廳咁。佢哋話咁樣係訓練我第時去見客要有嘅禮儀喎。不過我覺得喺屋企普普通通食餐飯都要跟足餐桌禮儀真係好麻煩，明明喺屋企就應該要放鬆啲㗎嘛。」
-
我：「呢層你可以放心，呢度食飯係唔使講啲咩餐桌禮儀嘅，食得舒服就得㗎喇！」
-
楚翹：「我都知，啱先食飯見到阿妹翹腳坐就知啦！」
-
阿妹：「失禮晒㖭！」
-
楚翹：「哈哈！唔緊要啦，其實麻甩系嘅女仔都幾受人歡迎㗎！」
-
阿妹：「係咩？真係㗎？咁點解我而家都冇男朋友嘅？」
-
我：「慳啲啦歐陽蕊心，你收皮啦！」
-
阿妹：「妖！你食屎啦，你把口咁臭抵你冇女朋友。」
-
我：「你份人咁mean點會有男朋友吖！」
-
阿妹：「冇男朋友唔緊要，我有阿哥照顧我。」
-
我：「你諗下好喇！」
-
楚翹：「你哋兩兄妹真係好搞笑吖！」
-
阿妹：「楚翹，你唔使理嗰個衰鬼阿哥。咁你平時喺大屋有啲咩做？電視情節話啲有錢人成日都游水，你係咪都成日游水㗎？」
-
楚翹：「我好鍾意游水㗎，而且游水係我嘅專長嚟，之前老竇仲特登請游泳健將万刀甲教我游水，所以我學得好快。我有時都代表香港去參加啲游水比賽㗎！仲攞過唔少獎㖭！」
-
我：「你就好啦，要乜有乜！真係幸福。」
-
楚翹：「邊度好吖！每次想同朋友出街都要經過父母嘅批准。佢哋嘅規矩多多。例如一定要喺夜晚六點前返屋企啦、又唔俾企喺街邊食嘢喎。有一次同朋友出街，諗住企喺街邊食嘢冇人知啦！點知返到屋企俾阿媽插咗一餐。去到呢個時候，我先知佢哋會派人監視我。所以我就決定離家出走。」
-
我：「對唔住，我收返之前嗰句。雖然咁樣嘅生活係比較幸福但冇自由。咁我寧願過返啲普通生活算。我雖然冇大魚大肉、冇專車接送嘅生活，但我有嘅係自由。」
-
楚翹：「咪係囉，咁你寧願要隨傳隨到、要乜有乜嘅幸福，定優哉悠哉自由吖？」
-
（待續 To be continued）
IG：chingchingstory