《夾出一個她》: 第三集-二加一等於嘈
我就同楚翹簡單咁講返之前雙親因為交通意外而喪生，所以每日都要去宵夜鋪返工。
-
通常啲人聽完我嘅自述之後，都係講「節哀順變」嗰啲十大公廁說話。但楚翹竟然講…
-
「呢幾年真係辛苦你喇！又要返工、又要兼顧學業。不過唔緊要啦！嚟緊嘅日子我會同你一齊分擔。」
-
「好多謝你啊！咁多年嚟都冇人明白我嘅感受，從來冇人咁安慰我」
-
話口未完，我突然喺街上喊咗出嚟，我頓時軟弱無力，搭住楚翹膊頭爆喊，就好似將呢幾年嘅辛酸喊晒出嚟。
-
楚翹：「你已經好叻㗎喇。以後有咩事，我都會同你一齊，我會陪你度過任何難關㗎。」
-
中間發生咗啲咩事，我唔係好記得。我淨係記得楚翹尋晚做咗我嘅樹窿，聽咗我好多呢幾年嘅辛苦事。我哋傾到天光，返到屋企之後大家沖完涼就各自返房瞓。
-
瞓得好夢正酣嘅時候，阿妹無啦啦喺我耳邊嘈。
-
阿妹：「阿哥啊！我好肚餓啊！煮個麵俾我食啦！」
-
我：「你自己煮啦！我好眼瞓啊！」
-
楚翹：「浚彥！其實我都有啲肚餓吖！」
-
聽到楚翹把聲之後，我即刻彈醒。
-
我：「得，冇問題，你想食咩，我煮俾你食。」
-
阿妹：「阿哥你有冇搞錯，淨係應楚翹，而家唔要我喇，我喊㗎！」
-
我：「你慢慢喊飽佢啦！」
-
楚翹：「你哋兩兄妹真係好搞笑吖！」
-
一覺瞓醒，已經係晏晝兩點。喺屋企hea多一陣就要落宵夜鋪返工。
-
我：「係呢楚翹，你想食咩吖？我煮俾你食吖！」
-
楚翹：「我食咩都無所謂，頹廢餐蛋麵都得㗎！」
-
阿妹：「阿哥，我要食意大利燴飯。」
-
我：「歐陽蕊心小姐，乜我有問你咩？」
-
阿妹：「我唔理，我要食你煮嘅意大利燴飯。楚翹，你一定要試下，阿哥整嘅意大利飯真係好正㗎！食咗包你返唔到轉頭！」
-
楚翹：「好吖！我都要試下大廚整嘅意大利燴飯先！」
-
阿妹：「歐陽生，連楚翹都話想試，你唔係唔去整呀嘛？」
-
我：「唉！真係服咗你哋兩位公主。」
-
-
-
楚翹：「嘩！好味喎！拍得住出面意大利餐廳啲水準！」
-
我：「好普通啫，今次有啲失手，硬咗啲。」
-
楚翹：「但真係好好食吖！我要食多碗！」
-
阿妹：「我都話㗎啦，阿哥整嘅意大利飯係最好食㗎！」
-
我：「係呢楚翹，仲未問你讀邊間中學㖭？我係讀小西灣嶺怡中學，而阿妹係讀筲箕灣西中學。」
-
楚翹：「乜咁啱嘅，我同阿妹一樣，都係讀筲箕灣西中學喎，平時返學唔見你嘅！」
-
阿妹：「咁你讀中幾㗎？我讀form3，阿哥讀form6。」
-
楚翹：「我都係讀form6㗎，今年畢業喇。阿妹，你真係要對你阿哥好啲呀，佢又要返學、又要溫書、夜晚仲要去返工，好辛苦㗎！係呢，浚彥啊！你唔驚因為返工，而冇時間溫DSE咩？」
-
我：「我從來都唔擔心自己嘅成績，因為我不嬲都唔鍾意讀書。咁你係咪真係每日都陪我去返工㗎？你唔使溫書咩？你都就嚟要考DSE喎。」
-
楚翹：「我當然會繼續返工，唔會辜負老闆對我嘅期望嘅。我都唔係讀書嘅材料嚟嘅，而且我都唔鍾意讀書。呢度嘅「填鴨式教育 」實在太誇張喇，迫到我太辛苦，所以我都放棄咗自己嘅學業嚕！」
-
喺餐飯入面，楚翹都冇講尋晚嘅事。尋晚嘅事就係成為我哋兩個之間嘅祕密，永遠都唔會講出嚟，收埋喺心底。
-
食完飯之後，阿妹突然問：
-
阿妹：「係呢！點解你會離家出走嘅，尋晚你未講啊！」
-
最怕空氣突然安靜…
-
（待續 To be continued）
IG：chingchingstory