《夾出一個她》: 第五集- 你的選擇

阿妹：「我都會揀自由，仲留喺嗰度咩！」
-
楚翹：「所以你哋明白點解我要離家出走啦！」
-
我：「當然明白啦，而家香城嘅自由都漸漸俾鄰國剝削緊啦！咁你每日生活喺圍牆之下，全天候都俾人監視，你點走㗎？」
-
楚翹：「我同屋企人講約咗朋友去海馬公園玩，佢哋俾咗幾千蚊我去消費。之後我趁佢哋唔覺意偷偷哋攞晒自己嘅積蓄同個人物資走。」
-
阿妹：「你都幾大膽喎！如果我係你，我應該都唔夠膽，繼續會留喺封閉嘅國度生活。不過你唔驚佢哋會跟蹤你咩？」
-




楚翹：「其實都驚㗎，所以我冇攞部電話走，我淨係攞咗啲個人物資同錢走。哪管他扣查嚴令，會暫停，我路程。」
-
阿妹：「你真係好叻，唔驚強權。係呢，你點識我阿哥，唔通你哋兩個真係情侶嚟？」
-
楚翹：「啋過你！你諗多咗喇！我同你阿哥真係朋友嚟㗎。如果我同浚彥拍緊拖就唔會分開房瞓啦！哈哈！」
-
我：「歐陽小姐唔好亂咁講嘢，你係咪想死？」
-
阿妹：「阿哥，你塊面好紅喎！你係咪暗戀楚翹吖？係就認咗佢啦，記住「蘇州過後冇艇搭」呢個道理吖！歐陽浚彥。」
-




我：「多…多事啦你。我哋真係唔係情侶嚟。至於我點識楚翹呢。件事就係咁嘅，記唔記得嗰日幫你去筲箕灣天悅拎啲美甲產品嘅。咁拎完之後，行行下就見到有間夾公仔嘅鋪頭寫住「夾出一個她」，充滿好奇心嘅我就入錢去夾，最後就夾咗楚翹返嚟喇！」
-
阿妹：「阿哥，講大話都講一個好啲㗎喇！點會夾咗個女仔呢！之後仲要跟你返屋企？你照下鏡先啦，你又唔係靚仔、又冇錢喎。」
-
我：「你..你咁講都得嘅，我好樣衰咩？楚翹你評下理。」
-
楚翹：「阿妹，你阿哥講得冇錯，我真係夾返嚟嘅。」
-
阿妹：「咩話！？」
-




楚翹無視咗我嘅提問，繼續講。
-
楚翹：「雖然離家出走嘅時間都係住喺賓館，但一個人獨自生活都覺得有啲唔安全，始終都想有人依靠嘅。我開頭有諗過去社交網絡發佈貼文求收養，不過驚遇到啲立心不良嘅人、同埋屋企人嘅追蹤。所以我就去天悅租部夾公仔機，就寫夾女朋友喇！我做台主可以決定開門時間，我就可以睇下邊個去夾，啱心水就跟佢走喇！」
-
我：「咁你「經營」咗夾公仔鋪幾耐？」
-
楚翹：「都個幾禮拜㗎！你都知㗎喇，呢個商場又細、又冇嘢睇，所以冇乜人行。入得呢個商場都係老人家多，後生仔點會入嚟啦！。」
-
我：「楚翹，咁你執到啦！有個咁靚仔嘅人夾走你，你要去還神吖！」
-
楚翹：「慳啲啦你！」
-
阿妹：「你離家出走之後係咪冇返過學？」
-
楚翹：「當然冇啦！費事屋企人去學校搵我，而且我每日都去開鋪，睇下遇唔遇到有心人去夾走我。」




-
我：「楚翹，時間都差唔多喇，你係咪一齊返工㗎！」
-
楚翹：「係吖！等我一陣，我換完衫就得㗎喇！好快！」
-
喺楚翹嚟咗嘅呢兩日內，屋企嘈咗好多，亦都比之前充滿咗歡樂。我哋兩個除咗食飯之外都好少傾計。不過楚翹嚟咗，令我同阿妹講嘢嘅次數多咗。究竟楚翹係咪拉近我同阿妹嘅關係呢？
-
（待續 To be continued）

IG：chingchingstory