愛戀心惶惶: 第二章: 偶遇！突如其來的戰書！

見到佢面帶笑容，猶如花開燦爛嘅樣，心都安樂返啲。我最討厭，就係啲唔識笑嘅女仔。

「啊~啊~」討完美人歡喜嘅我打咗個喊露，之前就瞓返。

「韻余琛！」馬miss怒聲呼喝。

「 明白~一個月都係我當值吖嘛。」我隨便敷衍幾句就瞓着。
...

...





「喂~喂~你條友仔今日又咁好瞓嘅。」煩人嘅啊斑又嘈醒咗我。

「你比我好好瞓餐飽得唔得啫？」我抹一抹眼，滿口怨氣道。

　我望一望空蕩蕩嘅房間，再望向手錶，發覺原來一早過咗放學時間。

「走喇。」我連忙提起斜揹袋準備歸途。

「照舊？」啊斑說。





「嗯，天台等，同記住帶埋...」我話口末完，啊斑就好似支火箭咁飛奔走咗。

「籃球啊...」我無奈咁講完就離開託管所。

回家途中我不停深思緊，

點解，依個世界咁多麻煩...

雖然我只係個十三、四歲，顯然係個乳臭未乾、未見盡世事嘅死仔，但我問心無愧係個幾厭世嘅人。





但係，我無在意自己點解會如此討厭依個世界，或者學香港人話齋－慣咗啦。

算啦，無謂諗咁多，亦可能係我諗多咗。

我用力一腳踢走腳前嘅汽水鑵，舒發一下心中嘅納悶。

「哇啊~」突然傳嚟一聲猶如小猫驚醒般嘅大叫。

「對...對唔住啊！你有無整親？」我連忙向對方道歉，並喺心裡準備好面臨一頓責罵。

「你...就係瞓咗成日嗰個？」聞言，我瞬間挺起原本低着準備挨罵嘅身子。

而係我面前嘅，正正係嗰位新嚟嘅詩璇。





「...」我地見到對方後一時間啞口無言，令到場面有啲凍結。

我有啲驚訝，但驚訝嘅地方唔係在於我巧遇到佢，而係佢對我嘅第一印象竟然係咁...
「嗯...」失望嘅我隨便應咗吓，然後就轉身走人。

反正我已經無乜興致同佢玩「剛好遇見你」依啲老套情節，況且我有事在身，無謂浪費時間。

可惜世事難料，本以為同佢嘅緣分到此為止。

...

...

「你啲gag會唔會太～爛～啊～～～」當我走遠之際，詩璇意想不到地大嗌咗哩句說話。





依句說話由耳朵傳送到去大腦嘅一刹那，我有啲唔甘心，但可能因為佢過份直率嘅關係，我有啲想笑。而依一笑除咗係因為佢直率嘅性格之外，亦係我對自己嘅自嘲。

當我轉身想望向詩璇時，發現佢一早已經消失得無影無蹤。剩低嘅，只得番凍得彷似冷嘲緊我嘅空氣。

「我果然係個不通世事嘅細路仔。」我默默道出，再次自嘲起嚟。

詩璇嘅一句說話，或多或少激起咗我嗰份年少旺盛嘅心。

然而由依一刻起，我覺得厭煩嘅世界逐漸被增添咗唔少色彩。

依個歷程猶如漫長嘅戰爭一樣，被某個人下嘅一份戰書引起。

「我會贏㗎！睇住嚟啦！」我仰天長嘯，彷彿某個人可以聽到。