[無糖故]我既女神係樂隊既主音: 第九章

三月九日。

練左接近一個月嘅結他，加上老豆不時嘅教導，我嘅技術亦都有明顯嘅進步。

「練咁耐，今日終於有機會夾一夾BAND。」我笑左一笑，梳洗完就返學。

行左冇耐，我都唔知好彩定唔好彩，比我撞到阿敏，仲要撞到正一正，唯有過去打招呼。

「HI...阿敏。」我揮一揮手。





「HELLO。早晨呀阿頌。」佢對著我笑左一笑。「聽Michelle講，你地今日放學喺音樂室夾band喎，我
可唔可以黎睇架。」

「吓？梗係得啦。」

「我都想睇下你呢個牧童笛都唔識吹嘅人點樣彈結他。哈哈。」

「你咪真係當我咁廢先得架，其實我識吹架，係覺得牧童笛太幼稚先唔玩咋嘛，點同結他。」

「扮野啦你！」





「講真架。包你睇到我彈結他個樣嚇一跳。」

「係至好講呀。唔好令我失望，好似果日咁。」

「吓？你講乜呀。」

「...冇野喇，夾band加油啦，嘻嘻。」阿敏笑左一笑。

「呢個當然啦。」我都笑一笑回應。





我望一望阿敏。自從果次誤會之後，我都好少咁樣同佢吹水，好似有我地之間有層隔膜咁。但係今日，
我又感覺到我同阿敏嘅關係回復返之前咁。

可能呢個關係對我地黎講先係最好。我心諗。

－－－－－－－－－－－－－－－－－－－－－－－－－－－－－－－－－－－－－－－－－－－－－

成日上嘅堂，我同慧都係咁講今日放學夾band嘅野，完全冇聽到書。我睇得出慧好期待今日夾band嘅事。

雖然我都係。

「噹、噹、噹...」

終於放學。我同慧同傑仔即刻過去音樂室，阿敏都跟左過黎睇。





一去到音樂室，已經見到立暉同阿齊企左喺門口。

「等你好耐喇。」阿齊望一望阿敏，「估唔到有觀眾添喎。」

「話時話，你地有冇諗到今日夾咩歌？」我問一問阿齊。

「一早諗左喇。簡直完全適合今日呢個日子。」阿齊笑一笑，打開左音樂室度門。

「今日係咩特別日子？有關於呢一日嘅歌？」慧。

「一聽到三月九日呢個日子，我即刻諗起呢首歌。」阿齊喺書包拎左部notebook出黎。

「咩歌？」我。





「三月九日。歌名就係三月九日。」阿齊打開部notebook，出現左一首叫三月九日嘅歌嘅日文歌詞。

「主音小姐，聽阿頌講你識日文，歌詞方面應該難唔到你啦。」阿齊望住慧講。

「都OK嘅。」慧望一望啲歌詞，表示OK。

「結他譜，BASS譜，鋼琴譜我都有齊喇。」阿齊喺書包拎出三份譜，分別比左我、立暉同傑仔。「大家可以先睇下佢地係點perform，睇完之後就去練習。」阿齊開左YOUTUBE。

「LET'S DO THIS BABY！」阿齊笑左一笑，就去樂器房拎啲樂器出黎。

我望住結他譜，握一握拳，拎起枝結他開結彈。

預備左一個鐘後，練習正式開始。

「預備好未。」阿齊雙手拎住鼓棍，望一望我地四個。





「ok。開始啦。」我地4個示意ok。

「加油呀。」阿敏坐喺我地前面，做我地唯一嘅觀眾，為我地打氣。

http://www.youtube.com/watch?v=3tOAWI4uyTw(原唱レミオロメン live版)
.
.
.
「流れる季節の真ん中で ふと日の長さを感じます
(在流逝的季節之間   偶爾感覺到時間的長度)

せわしく過ぎる日々の中に 私とあなたで夢を描く
(在忙碌的每一天中   我和你一起編織著夢想)





3月の風に想いを乗せて   桜のつぼみは春へと続きます
(3月的風乘載著感情 櫻花的花蕾到了春天就會持續綻放)

溢れ出す光の粒が 少しずつ朝を暖めます
(透過樹葉映照出來的陽光   稍微把朝早變得和暖)

大きなあくびをした後に 少し照れてるあなたの横で
(打了一個大大的呵欠   稍微有點害羞的你站在我的旁邊)

新たな世界の入口に立ち 気づいたことは 1人じゃないってこと
(站在通往新世界的入口   我注意到我並不是孤單一人)

瞳を閉じれば あなたが   まぶたのうらに いることで
(閉上雙眼   你的身影出現在我的眼眸之中)

どれほど強くなれたでしょう    あなたにとって私も そうでありたい
(我會變得有多堅強呢？   對你而言，我也希望著同樣的事情.....)」
.
.
.
(中文翻譯由上網參考外加自己翻譯) 
. 
. 
. 
雖然呢次係我地第一次嘅練習，但感覺上我地都幾合拍。

「拍拍拍拍拍...」阿敏不停拍手掌，「好精彩呀！你地個個都嘅表現都好好呀。」阿敏笑住讚我地，表示欣賞我地嘅演出。

「多謝。」慧笑左一笑，我望到佢又有啲眼濕。

「唔使咁感動嘅。呢個只係開始咋。」我拍一拍慧嘅膊頭。

「今日就練到呢到先啦，我有啲野做。搵日再練過啦。」阿齊將鼓棍擺埋一邊。「GOOD SHOW BABY！」阿齊對住我地舉起手指公。

「YOU TOO。」我用返手指公回應佢，阿齊笑一笑就走左。

「估唔到你手結他又真係唔錯喎。」我擰轉頭，見到阿敏對住我微笑。「果然冇令我失望。」

「梗係啦，哈。」我笑一笑。

「我係估唔到慧演繹男性主唱嘅歌都唱得幾好，顯示出第二個風格。」立暉擺低左枝bass，搵個位坐低左。「你做主唱我心服口服。」

「話時話你手bass都真係幾好架喎。」我望一望佢。

「哈。其實我覺得我地入面，performance最好嘅係鼓手。」立暉望一望冇人坐嘅drum set。

「我都覺，佢手鼓真係帶領住我地演出。」傑仔表示同意。

「證明我冇搵錯人啦。哈。」我放低枝結他。「既然我地嘅鼓手都走左，我地今日就練到呢到先啦。大家想幾時再練過？」

「考完統測，放復活節假期間先再練啦好唔好？」傑仔。

「ok。到時再約啦咁。」慧同意。

「咁姐係四月先再練？」我。

「我冇所謂呀。」立暉。

「咁一於咁話啦。」我醒起一啲野。「話時話，你地覺得我地隊band個名叫咩好。」

「改名呢啲野我唔多掂喎。」傑仔擰一擰頭。

「唔好搵我呀。我份人冇乜創意。」立暉都表示諗唔到。

「慧同阿敏你地點睇？」我問佢地兩個女仔。

「不如叫『ETERNITY』啦，喻意你地可以永遠咁夾BAND丫嘛。」阿敏提議。

「嗯...相比永恆，我更想講比人地知我地『五個人』嘅野...」慧。

「咁不如叫『Pentaship』啦。」我提議，「Penta解五個人咁解，ship就好似friendship咁，證明我地嘅友誼。」

「....」佢地全部人都冇反應。

「做咩呀，好爛呀？諗過囉。」我覺得有啲唔好意思。

「唔係呀。OK呀。」慧笑左一笑。「Pentaship幾好呀，人地容易記得我地個名。」

「個名唔錯呀。」傑仔笑左一笑。

「咁就決定左架喇喎。WE ARE PENTASHIP！」我興奮大叫。

「感覺有啲柒喎。」傑仔細聲一句。

我地五個即刻開心到笑逐顏開。

Pentaship，三月九日正式成立。