[無糖故]我既女神係樂隊既主音: 第八章

上完上晝堂，我一如以往咁去搵西成食晏。

「喂西成，出去食野啦。」我行去Ｂ班班房。

「OK～」西成陪我行去canteen。

「話時話西成，你識唔識人係玩bass架？」

「鼻屎？玩咩鼻屎。」





「好撚好笑喎，講緊貝斯呀，低音結他呀。」

「夾band果啲？ehh，我地b-grade有條友好似係夾band嘅，聽講佢係玩貝斯嘅。」

「真係？介紹黎識下丫，我依家搵緊人夾band啊，差個BASSIST咋。」

「ok嘅，但係條友中四，個人仲有啲神神化化咁。」

「點解咁講？」





「條友好少出聲，雖然打波幾勁，但好少同我地傾計，籃球隊入面都冇乜freind。」西成R一R頭，「簡單啲黎講，係個毒撚。」

「哦..你可唔可以幫手問下佢玩咩位？」

「吓，我好少同佢傾計架喎。」

「咁呀，一係你話比我知佢讀咩班，叫咩名，我一陣過去搵佢啦。」

「OK嘅，條友4B班，全名叫袁立暉，我地都係叫佢立暉。」





「袁立暉呀..食完飯我就去搵佢啦。」

－－－－－－－－－－－－－－－－－－－－－－－－－－－－－－－－－－－－－－－－－－－－－

食完飯之後，我地行上四樓，我入左Ｂ班。

「唔該，我想搵袁立暉。」我問一問門口隔離條友。

「立暉呀？ehh，果邊果個。」佢指一指遠處，一個短頭髮，低頭做緊功課嘅男仔。

我行過去，拍一拍條友。「你係咪袁立暉？」

佢望一望我，「係呀..咩事？」佢聲音有啲低沉。

「冇，姐係呢，我就3A班嘅，依家搵緊人夾BAND，我又聽講我個籃球隊friend西成講話你係玩bass嘅，唔知你有冇興趣加入我地？」





「吓..我係有玩過下嘅，但好耐冇彈喇喎..」

「唔緊要啦，我地都冇話急住夾，如果你真係有興趣嘅，依家pick up返都未遲。」我勸立暉加入，「我地依家係差一個bassist咋。」

「咪煩我啦，好多野做呀。」

正想我想繼續勸佢嘅時候，突然聽到慧把聲。

「喂阿頌，我有野搵你呀。你上黎4B做咩？我都係聽西成講先知你上左黎。」慧行左過黎。

「做咩事？我依家搵緊bassist啊。」

「bassist？呢位？」慧望一望立暉。





「係呀，我勸緊佢加入呀。有咩陣間先講啦。」我細細聲同慧講。

「呢位同學你係咪玩bass？你可唔可以加入我地？」慧即刻行過去立暉隔離，勸佢加入。

「吓？呢位女同學都係夾band架？」立暉望住我同我講。

「吓係呀，」我望一望立暉，「仲要係主音黎架。」

「女仔做主音？又幾得意喎。」立暉望住慧笑左一笑。「其實我都ok嘅，你比個聯絡方法我啦。我加入再搵你地。」

「係咁就唔該哂你喎，我比我MSN你啦。」我即刻拎張紙出黎寫低我MSN，比左立暉。

「咁就齊人啦。好野！」慧喺我耳邊細細聲講，我都望住佢淺淺一笑。

「就咁啦，我仲要做功課呀。」立暉收左我張紙之後，就繼續做佢嘅功課。





「終於齊人夾BAND啦。」我輕輕握一握拳。

－－－－－－－－－－－－－－－－－－－－－－－－－－－－－－－－－－－－－－－－－－－－－

果晚，我用MSN搵左傑仔。

「喂傑仔，我地搵齊人夾BAND啦。你黎緊呢幾日有冇一日係得閒大家團員見下面？」

「估唔到你咁快搵齊人喎，但係黎緊呢幾日呀我好多日都要補習喎，最近得閒日子都要去到三月九號。」

「去到咁遠呀？今日二月十九咋喎。」

「係呀。三月九日星期五，我果日唔使補，放學去啦。」





「咁我幫你問下啦。」

「唔該哂，掰。」

「掰。」

我即刻MSN搵立暉。

「HELLO。」

「HI。」

「黎緊三月九號，唔知你得唔得閒？我地樂隊想喺果日見一見面。」

「OK。」

「唔該哂你，掰掰。」

「8」

估唔到條友咁少出聲，就連MSN都應得咁hea。

我拎部電話出黎，打左比阿齊。

「喂？Hello我係星期六小巴果位。」

「哦..做咩事？」

「唔知你黎緊三月九號得唔得閒？星期五黎，我地隊員想喺果日約出黎見一見面。」

「OK呀。你到時call我啦。咁你諗住喺邊度見面？」

「ehh，你住邊頭？我地就你都ok。」

「唔使就黎就去咁麻煩，學校音樂室啦。」

「學校音樂室？你係我地學校架咩？」

「吓係呀。我成日唔返咋嘛，好死唔死今日返左學，又比我喺4B見到你。」

「你FORM4架？我真係未見過你喎。」

「係呀，雖然我今年都17歲，但係上年缺席次數太多，留左班。依家讀緊4E。」

「你上次話同考公開試嘅朋友夾BAND..講緊我地學校啲人？」

「係呀，佢地就黎考會考啦。」

「真係估唔到喎。咁即係我地五個都係學校入面嘅，又會咁橋嘅。」

「有時啲野就係咁橋。冇野我就收線啦。」

「冇野啦。掰掰。」

「掰。」

「睇黎真係上天安排架啦，哈。」我笑左一笑，拎起枝結他黎練。「我都要趕喺果日之前練好啲結他。」