[無糖故]我既女神係樂隊既主音: 第十章

四月九日，復活節假嘅第一日。陰天。

Pentaship嘅第二次練習。

雖然今日唔使返學，下午三點嘅學校都有唔少人返左黎，有啲打波，有啲溫書。

我就拎住我把木結他行返學。

一去到音樂室，一個人都冇。





呢個當然，因為我地約嘅時間係四點，我專登早左一個鐘頭黎練習。

呢一個月黎，我從來都冇白費每一日。

我搵個位坐低，開始彈起前奏。

http://www.youtube.com/watch?v=uWxIAW5gwd4
.
.
.




「讓我有個美滿旅程 讓我記著有多高興

讓我有勇氣去喊停 沒有結局也可即興

難堪的不想 只想痛快事情 時間尚早 別張開眼睛

長路漫漫是如何走過 寧願讓樂極忘形的我

離時代遠遠 沒人間煙火 毫無代價唱最幸福的歌...」
.




.
.
我望一望窗外嘅飛鳥，我感覺到好舒服。

「依家，可能係『我的快樂時代』。」我笑左一笑。

我返前面，發覺音樂室嘅門打開左。

「我黎嘅時候冇閂門咩？」正當我想行近睇下嘅時候，我望到門外企左一個女仔。

係阿敏。

「阿敏？你點解喺度架。」我有啲詫異。

「早幾日聽Michelle講你地今日又會練習，我就梗係要過黎睇啦。」阿敏行入音樂室。





「但係，我地約四點架喎。」

「你夠早左返黎啦。」阿敏搵個位坐低，「我喺屋企冇野做咪過黎先囉，點知就一黎音樂室就見到你自彈自唱緊，咪廢事入黎打搞你囉。」阿敏望一望我，「估唔到你自彈自唱又幾charm架喎。」

「其實我不嬲都咁charm，係你平時留意唔到姐。」件事都過左就黎兩個月，我已經冇再對阿敏有咩非分之想，只係當佢朋友。

「想唔想聽多首？一個月以黎我唔止練左一首架。」我問阿敏。

「梗係好啦。我洗耳恭聽。」阿敏撥一撥佢嘅長髮。

「咁我黎架喇喎。」我擺好結他，預備開始。

「HELLO EVERYBODY！」突然，一把聲傳出，我一望，係阿齊。





「HELLO阿頌，阿敏。」阿齊今日著左件灰色背心，披一件深紫色皮褸，揹左個紅色背囊，一睇就知係ROCK友。

「你又會咁早嘅。」我。

「今日冇乜野做，咪早啲過黎打下鼓囉，我都差唔多幾個星期冇打喇。」阿齊行入樂器室，搬個drum set出黎。

「話時話，你可唔可以solo一段鼓黎睇下。」自從上次練習見識過阿齊嘅功力之後，一直想搵佢solo一次比我睇。

「solo鼓？你估我yoshiki咩。哈。」阿齊笑一笑。

「露幾手黎睇下啦。」我。

「MAYBE LATER。」齊冇理到我，喺背囊拎左兩份譜出黎。「你趁依家睇下份譜好過啦，我地陣間練呢兩首。」

「東京事變？難度十足喎，我地第二次夾就玩東京事變啲歌？」我拎起兩份譜黎睇，兩首都係東京事變嘅歌。





「我地主音係女仔丫嘛，梗係搵返啲女性做主唱嘅樂隊嘅歌啦。」阿齊除左件皮褸，「何況，我地要快啲進步架嘛。」

「OK..」我望住手上兩份極為複雜嘅譜，開始練習。

「擺低你把木結啦，入去拎把電結黎彈。」阿齊指一指樂器房，「夾BAND冇電結他點得。」

「但係我未玩過電結他喎。」我有啲顧慮。

「木結他同電結他其實分別不大，試左先講。JUST TRY！」阿齊。

「OK..I WILL TRY。」我行入樂器室，拎左電結他同音箱出黎。

「黎啦。試下。」阿齊。





我駁好線之後，輕輕一掃枝電結他。

「感覺同木結他好大分別喎，」我握緊枝電結他，「但我會盡快學識架喇。」

「HELLO。」突然，門口傳來慧把聲。

我一睇，見到慧同立暉一齊返左黎。

「咦？你地做咩一齊返嘅？」阿敏問。

「我返返下學校撞到立暉，咪一齊返囉。」慧，「係呢傑仔呢？」

「喺度喺度！岩岩去左廁所，SORRY！」門後傑仔突然出現。

「咁就齊人啦，我地ATM第二次練習開始啦咁。」我拎起枝電結他，阿齊亦都將啲譜比左佢地。

「你今日用住木結他先定點？」阿齊望一望我。

「電啦。反正都係要練，依家練啦。」我掃一掃把電結他。

「咁好啦，大家依家睇下譜練習下，我地一個鐘頭後試一次啦。」阿齊坐返埋位。

「咁我地練邊首先？」傑仔拎起兩份譜。

「呢首先啦，剩低果首，黃昏果陣練好FEEL啲。」阿齊指住左邊果份。

「OK。但我練習下先。」傑仔拎住份譜行過去鋼琴度。

「呢兩首歌風格都比較慘淡、失落，今日主角係你呀鋼琴手，加油啦。」阿齊望住傑仔講。

「都幾岩今日個天氣喎，天陰陰咁。」立暉拎起枝BASS，望一望窗外灰暗嘅天空。

「慧你睇下啲歌詞啦，我知道椎名林檎啲歌詞不嬲好深，所以我印埋假名架喇，你OK呀可。」阿齊比左份歌詞慧，「呢度係佢嘅performance，比你參考下啦。」阿齊打開notebook，click入YOUTUBE。

「大家加油啦。」阿齊拍一拍手，鼓勵一下我地。

－－－－－－－－－－－－－－－－－－－－－－－－－－－－－－－－－－－－－－－－－－－－－

「...」
「...」
「...」

一個鐘話咁快就過去。

「OK未？」阿齊望一望我地。我地四人同時點頭。

「咁我開始喇喎。」慧深呼吸一下。

http://www.youtube.com/watch?v=V0ejNgb2-gw(東京事変 - 私生活)
.
.
.
「酸素と海とガソリンと沢山の気遣いを浪費している
(浪費了氧氣、海洋、汽油以及許多的關懷)

生活のため働いて僕は都会を平らげる
(為了生活而工作的我 將城市夷為平地)

左に笑うあなたの頬の仕組みが乱れないように
(不要為了撇向左方的微笑 令你的臉龐的結構變得凌亂)

追い風よさあ吹いてくれよ 背後はもう思い出
(順風啊 為我吹拂吧   背後已成過往回憶)

向かい風まで吸い込めたらやっと新しくなる...
(如果深吸一口迎面吹來的風 我亦會終將蛻變...)」
.
.
.
(中文翻譯由上網參考外加自己翻譯) 
. 
. 
. 
...後尾聽慧講，呢首歌講嘅大約係「一個人，為左病臥在床嘅伴侶，每日雖然都有忙碌嘅工作，但係只要見到伴侶，都會將辛苦拋諸腦後。默默陪伴喺伴侶身旁嘅主角，慢慢意識到佢嘅伴侶即將離去，依依不捨嘅主角甚至想追隨佢嘅伴侶，之不過，佢嘅伴侶總係叫主角自己一個生活落去。」

慧當時嘅唱腔，即使係當時唔瞭解首歌講咩嘅我都感覺到果種不捨嘅感覺。當我一次又一次聽到慧唱歌嘅時候，我都會愈黎愈覺得呢個女仔相當厲害。佢每唱完一次歌，我都久久不能平復。

「我地個主唱真係有返一定水準喎，雖然我唔係第一次聽你唱歌，但你今次個表現真係好到令我幾驚訝。」阿齊稱讚慧。

「咁點？我地依家係咪練埋第二首？」傑仔。

「好呀你地依家預備啦。我地六點四十分開始。」阿齊望一望手錶。

「六點四十分？點解特別要呢個時間嘅？」阿敏。

「六點四十分太陽開始落山。」阿齊望一望窗外，「日落嘅時間練呢首歌簡直一流。」

「咁好啦。我地依家預備啦。」立暉望一望份譜，開始練習。

我望一望手錶，五點二十分。

－－－－－－－－－－－－－－－－－－－－－－－－－－－－－－－－－－－－－－－－－－－－－

六點四十分，夕陽西下。

天空染成一片黃色。

「開始未？」阿齊慢慢已經好似做左領導嘅角色。

我地亦都輕輕點一點頭。

「咪住先！」阿敏突然插嘴，「等我影低你地練習先，比你地做參考。」阿敏拎起部相機，一陣佢就豎起拇指示意ok。

阿齊向傑仔打一打眼色，示意可以開始。

慧再一次深呼吸。

http://www.youtube.com/watch?v=60tEEOWCdv8(東京事変 - 落日)
.
.
.
「君は産まれ僕に出会い 春を憂い秋を見た
(你出生於世上與我相遇 走過了春天的憂鬱 一起見證了秋天)

記憶を辿る過程であどけない君の写真に
(追溯當時記憶的過程中 你的照片顯得帶點天真無邪)

認めたのは僕が所詮 季節すら知らない事
(而我認知到我的無知 即使季節變化也一無所知)

現在では声を失くした 君だけが映す月花
(如今你已失去聲音 月光只映照著無聲的你)

『当てにならないことばかり』って
(『一切都不可以信任』)

嘆いたこの舌の根でさえも
(連悲嘆著的唇舌)

乾く前に期待を仄めかす
(在乾涸之前也透露出期待)

まるで手応えの得られぬ夜
(完全得不到回應的這個夜晚)

また一つ小さく冷えていく生命を抱いた...
(又懷抱著一個細小寒冷的生命...)」
.
.
.
(中文翻譯由上網參考外加自己翻譯) 
. 
. 
. 
呢首歌，表達嘅野可以話係岩岩果首歌嘅相反，「私生活」表達嘅係終於別離所以不捨，「落日」表達嘅係偶然重逄反而失落。

夕陽透過半落嘅窗簾，投射落慧嘅身上。望住呢個情境，我突然有啲心酸。

可能慧演繹得太好，我代入左落首歌到。

我地六個喺練習完之後都喺度拍掌。

呢啲掌聲，包含住鼓勵、讚嘆、認同、肯定。

喺呢個情況，我有啲感動。

能夠成為結他手，能夠認識到咁多位隊友...

實在太美好喇。