《如果你見到呢段字，救我！》: 【安吉金視覺】-3

「睇你個樣，都應該記翻曬所有事。」既係德利明，亦係許文安嘅人對我講。

「你仲好意思出現係我面前？你呃咗我！」我打算上前打佢洩憤。

「你打我無用㗎，呢個只係遊戲世界，我唔會覺得痛，我真身係現實世界。」佢態度比以前更加討厭。

「你害到我咁，到底仲想點？」我唯有放棄打佢嘅念頭

「你今次害到我就真！就係因為你突然覺醒，有翻自主思想，唔單止唔受玩家控制，喺玩家儲存遊戲之後繼續活動，仲開始激發其他人覺醒！





你知唔知玩你嗰個人係幾有錢？佢個仔勁鐘意玩呢個遊戲，正正因為你唔受控制，搞喊佢個仔，所以佢嬲到打去遊戲公司投訴！仲話以後都唔投資去我間公司。

原先上頭話下個升我，咁樣比你搞一搞，佢而加叫我過翻去間公司搞翻掂，要我好好負責！」

原來係咁，咁就解釋到點解我之前控制唔到自己，原因就係玩家控制緊我做嘢。

但我起初都唔會傷害自己，直到許文安出現作故事呃我之後，怪事就陸續出現，好似仲未解釋得到。

「So？關我咩事？」我對佢嘅事唔感興趣。





「哼，死到臨頭你仲咁好氣。算，反正你一陣就會消失，咁就搞掂件事。話時話，我真係要多謝你，本身好大工作壓力，見到你咁信個喪屍故，又精神分裂咁，真係睇到我好心涼。」

「所有怪事都係你搞出嚟？」睇嚟，佢就係始作俑者。

「係啊，我鐘意咁玩。

原先個細路玩得咁正常，淨係識翻工翻學，結婚生仔到終老。

識玩一定係玩死你㗎啦，不過普通燒死嗰啲又太無聊，所以我就計劃慢慢折磨你，慢慢整死你。





我先借用咗其中一個角色，再控制佢嚟接近你，慢慢引導你相信我，到你相信我之後，我再要求你生存落去，咁就可以確保你一定唔會輕易死。

之後我安排自己死一次，令你對所有人都起疑心，一步一步咁擊潰你。唔止要你係生理上受苦，燒死餓死咁普通，我更加要你精神上受盡折磨，咁不攻自破，可以令你自己整死自己。」佢語氣不可一世，就好似非常回味折磨我嘅過程，簡直係不折不扣嘅變態。

「所以，無間斷工作同密室，都係你搞出嚟？」我繼續追問。

「點啊？係咪好成功呢？我自己最滿意你開完雪櫃發現無得食嘅部分，以為自己有生存希望，但最後都係落空，你崩潰嘅心情真係開心到我訓著都笑醒。

你知唔知折磨一個人嘅最高境界係點？

係令佢以為自己有希望，然後再推佢落谷底。

所以我每一次都會留條命比你，你永遠都唔會燒死、餓死，雪櫃門係我特登開，令你誤以為有得食，密室嘅門都係我開翻，等你聽到自己個女點諗你，以為一切可以完結，但又會發現老婆送綠帽比你。

呢一切係幾咁完美，幾咁成功。





可惜時間所限，無得玩你太耐，否則我唔會咁快表明真實身分。」

聽到之後，我心情反而好平靜，無太嬲佢嘅感覺，始終一開始係自己信錯人。既然佢應承會照顧我屋企人，咁我都走得安落。

然而，我只係唔明佢點解佢咁憎我，又或者好似佢所講，壓力大到想揾人發洩，而嗰個人就係我。

「我明白曬，亦都無嘢再想問，你鐘意就處治我。」我無慾無求地說。

「洗你提？但你唔想知自己屋企人點咩？」

「你唔係話會提供住宿比佢哋咩！」我激動咁講。

「呃咗你咁多次，你真係每次都信到十足十㗎喎。我點會咁做啊傻仔，係都比自己先啦，我同咗你屋企人講，你食安眠藥自殺啦，佢哋攞曬啲錢幫你安葬。





我諗而加.....應該乞食緊，再唔係就比人捉咗入嚟，不過你都就嚟要被刪除，唔會再有機會見到佢哋㗎啦哈哈哈哈。」

「你個賤人！」佢呃我、搞我唔緊要，但佢明明應承幫我屋企人！

「夠鐘啦程凱天，喔，我係咪要叫你安吉金先啱呢？Anyway，再見啦哈哈哈哈。」話罷，許文安消失咗，然後我亦都郁唔到，就好似之前一樣。

唔係，我同以前唔同，係安吉金教我，只要堅持，就會有希望。