《如果你見到呢段字，救我！》: 【安吉金視覺】-2
今次同樣都要簽文件，奇怪嘅係，公司要求我帶埋出世紙證明、銀行存摺、住址證明等文件。
雖然唔理解原因，但我都按照指示做，將所有文件帶齊過去。
「程凱天先生，你可以入嚟。」職員指示我入去，點知，監督我簽約嘅竟然係許文安。
「點解會係你？」我無諗過佢會係度出現。
「今日係你簽約大日子嘛，我當然要見證呢一刻，你係咪帶齊曬嘢？」
「係啊，但仲未有人同我講要做啲咩喎，到底我要做咩？」
「你有冇諗過，有一日我哋可以想要咩就有咩，唔洗擔心生活，永遠自由自在。」許文安無視我提問。
「呢度香港喎，邊有咁可能，外國就話有可能姐，如果生活係咁簡單，我哋就唔洗咁做到不似人形啦。
係喎，你仲未話我知份工係要做咩。」
「咁緊張做咩喎，簽咗份文件先，我又唔會呃你。」
係嘅，佢一直幫我咁多，我做咩會咁多疑？
於是，我就攞起份合約仔細觀察。
「唔洗望啦，咪又係嗰啲嘢。」許文安㩒低我份合約。
「合約嘅嘢，都係睇清楚啲好」我重新攞起合約，總係覺得佢想阻止我。
佢見我咁堅持，就打消咗念頭，由我去睇。
我端詳地閱讀文件上內容，開頭都正正常常，但尾段有幾句細字：
本人自願參加本遊戲並成為首輪測試者。
本人願意承擔本遊戲的所有風險。
本人同意及明白自己的身分會被使用。
「咩身份會被利用？咩遊戲？我唔係嚟翻工㗎咩？」
「我係講真，只要你一簽名，你就可以自由自在咁生活，想要咩就有咩，唔洗再擔心。」許文安仍然無答我問題。
「你一日唔講清楚，我都係唔會簽。」我堅決地說。
佢歎一口氣，然後向我解釋：「你並唔係要翻咩工，而係要成為虛擬角色，係虛擬世界生活。
其實係虛擬世界生活真係好正，你都自己測試過，入面唔差㗎。」
「咁身分會被使用係咩一回事？」
「咁係因為你已經變成虛擬人物，身分對你嚟講都無用，既然係咁，不如交比其他人。」
「我係唔會簽。」我決定離開，我情願係現實生活挨生挨死，都唔要係虛無嘅假世界生存。
「咁你有冇諗過你屋企人，佢哋需要你賺錢養家，只要你簽，佢哋每個月都會收到十萬。」許文安點會知我家事？
「我嘅家事唔洗你理，我自有分數。」我準備開門走人。
「乜你真係覺得你有得揀咩？你一走，你同你屋企人都會被人搞。」
「你講咩？」我暫且聽佢講。
「既然都講到呢個地步，我都唔怕向你坦白。
呢一個唔係普通虛擬世界，而係將真人嘅性格、記憶等量化成數據，再投放入虛擬世界之中。呢一點，你已經知道。
但你有冇諗過，點解會有呢個世界出現？」
「唔知。」我無興趣答佢問題，我只係想知道來龍去脈。
「因為你哋都係社會嘅包袱。
你哋又窮又廢，對社會完全無貢獻，我哋要嘅係進步，係人才，係錢。
你哋三樣都無，仲要我哋幫翻你轉頭，但喺呢個偽善社會底下，我哋只可以扮到好樂意好積極咁幫助你哋，完全唔介意。
而事實上，係政府眼中，你哋從來都係眼中釘。
不過，而加終於有個好方法可以解決你哋。
只要將你哋變曬做虛擬人物，社會上就會無曬窮人，啊，仲有班未死嘅廢老，唔洗再比床位同錢佢哋睇病，而你哋係世界亦會應有盡有，唔洗用我哋嘅資源，仲唔係兩全其美嘅辦法？」
「即係話，我哋都係被遺棄嘅人？」
「其他人我唔知，但我，許文安就一向對你好好，其他測試者就只會有十萬。不過你係我朋友，所以我會同政府嗰邊講，叫佢哋比間靚屋你屋企人，定時亦會有錢收，咁你唔洗擔心佢哋啦。
一句講曬，簽定唔簽？」許文安沾沾自喜。
我好討厭比人睇穿底牌同威脅嘅感覺，我根本就無話事權，可以做嘅，就只有服從。
「我簽。」我屈服於強權之下。
簽完之後，許文安話要帶領我去另一個地方，搞掂埋就走得。我趁呢個時間，追問更多細節：「佢哋係會點樣將我放入虛偽世界，我都係唔明。」
「簡單啲講，你會好似靈魂出竅咁，肉身係虛殻，靈魂進入虛擬世界，由於你嘅主要記憶會量化成數據，所以你係入面會有記憶。」
「我哋到。」佢熟悉咁按下房間密碼。
嗰間房放置咗好多電子裝置，當中已經有十多人戴住奇怪嘅頭盔係床上訓著咗。
我把握時間再問：「你唔係做Pr咩，點解政府嘅嘢你都知得咁清楚。」
許文安無理我，走去問其中一位職員：「進行成點？」
「進展好順利，完咗最後一輪就可以正式開始，估計下星期可以推出測試版比人玩。」
「比人玩？我哋唔係去虛擬世界生活咩？」我插嘴。
「問夠啦程凱天，你係時候訓覺。」突然間有人係背後捉實我，強行為我戴上頭盔，再打一枝針。
「救命啊！」我不斷掙扎想走，同時視線漸漸變得模糊，有強烈嘅睡意。
朦朧之間，我聽到許文安把聲：「頭先真係浪費咗好多時間，好彩趕得切。我今次唔衰得㗎嘛，難得有咁好嘅機會比我上位，我當然要做到最好，搞掂咗呢單，我仲唔賺到笑？」
「程凱天，今次真係多謝你，本來我仲差一個人先夠數，咁啱係名單上見到你個名，於是就揾你嚟填數。
就算我第日發咗達都會記得你個名，不過你唔會記得我㗎啦，好好享受被人玩嘅感覺啦。」
呢一切，對我嚟講都係尋日發生嘅事，無諗過，世界已經唔同咗。