《如果你見到呢段字，救我！》: 【安吉金視覺】-1
【安吉金視覺】
時間倒退，返回安吉金發現德利明未死嘅一刻。
「點解會係你？你唔係死咗嘅咩？到底發生咩事？」我唔敢相信自己雙眼。
「哈哈哈，你真係同以前一樣咁天真可愛，不愧為我好朋友。」
「以前？我哋唔係識咗好短時間咋咩？唔通我哋係喪屍時間已經識大家？」
「救命，你仲信呢個故事？你聽清楚啦，呢度係遊戲世界，所有嘢都係虛擬㗎！」
「我唔信，我點知你幾時講真，幾時講假，可能今次先係假！」好亂，我分唔到咩係真咩係假。
「你唔信？咁我證明比你睇。」德利明拍咗一下手，突然間，有十個德利明嘅分身憑空變出嚟。
......咁或者係佢識變魔術，或者係失傳已久嘅分身術？
「變魔術？你有冇咁蠢啊？」點解佢會知我諗咩？
然後，佢再攞塊鏡照我個樣，佢有咩用意？咪住先，點解我忽然變咗光頭？發生咩事？我惶恐咁摸自己頭頂。
「呢度嘅一切都係虛擬，只要我想，我可以變一百個自己出嚟，我要你死就死，要你無頭髮又得，有頭髮都得！」德利明態度非常囂張。
如今，我再無藉口唔相信德利明，佢所講嘅都係屬實：「咁你究竟想點？既然你話呢度係遊戲世界，咁我只不過係一個遊戲人物姐，點解你要搞住我！」
「我問你想點就真啊！你搞到成個遊戲一片混亂，全部都係Bug，你令到我好麻煩啊！」
「我又做咗啲咩？係你自動出現㗎！」我討厭佢將所有責任推卸去我身上。
「唉，睇嚟真係要比你恢復記憶先得。」
「你講咩......話？」有一大串嘅畫面不斷湧入腦海，我終於記得翻曬所有發生嘅事。
我唔係遊戲角色，
我唔係叫安吉金。
我真名係程凱天，
我本來係有血有肉嘅人類嚟。
係我眼前嘅，亦唔係咩德利明，佢係我昔日嘅好朋友，許文安。
我曾經有一排係雙失青年，唔單止失業，仲有失戀。
當時，我只有二十幾歲，屋企等住我開飯。畢業之後，我雄心壯志咁去揾工，但一份工都無人肯收，連面試機會都無，無業嘅狀態更加維持咗成年，無可奈何之下，我連洗碗都做埋。
係經濟能力極差之下，連女朋友都放棄我，佢話唔想自己咁後生就要跟著我挨世界，我理解佢諗法，從來都無怪過佢，怪就怪我自己唔爭氣。
其實佢已經算好，願意堅持咗半年先放棄，換轉係我嘅話，一早飛咗對方。
但過咗排，我身心都挨唔住。為咗節衣縮食，我不斷翻工做嘢賺錢，每日翻到屋企訓三個鐘，之後又起身翻夜更。幾個月嚟，我一日只係食一餐，又無錢見朋友食嘢同玩。
我曾經諗過跳海自殺，死咗幾好，一了百了，唔洗諗咁多，但我最後都係打消念頭。我唔捨得屋企人、朋友，仲有我嘅前度，我應承過自己，賺到錢之後，一定要揾翻佢。
喺我過住不分日夜嘅顛倒生活之後，我收到一個電話，係我中學時期嘅好朋友許文安，佢約我見面聚舊。
「我最近翻工好忙，應該抽唔到時間見面啦。」我打算推咗約會。
「翻工？你揾到咩工？」
「Part time 咋，暫時Full time 揾唔到啊。」人大咗，自自然然就會想留翻啲自尊比自己，唔想講曬所有嘢比人聽。
「Part time嘅話我朋友公司請人喎，幾高薪㗎，你要唔要試下？Full time 就暫時幫唔到你。」
「好喎我有興趣！做咩㗎？」
「約出嚟講啦，我請食飯。」
如是者，我哋約出嚟見面食飯。
許文安外表無咩變化，但著衫方面有品味咗，會執正自己先出街，佢以前明明好求其，而加居然有咁大變化。
「喂！做咩著到咁型嘅？唔似你喎。」
「人靠衣裝嘛，簡單易明嘅道理嚟。」上到社會大學之後，好似身邊嘅人同事都變得唔一樣。
「點啊，你而加撈緊咩。」我主動詢問。
「係一間Pr公司做緊散仔咋，不過阿頭話我有潛質，肯搏嘅話就一定會上位。」佢眼神充滿住渴求同名利。
「有份筍工，老細又咁睇好你，幾好啊。不如講下我份Part time？」我始終都係心急新工內容。
「知你心急㗎啦，嗰間公司係做遊戲嘅，咁佢哋就想揾人做遊戲測試，但為咗保密遊戲內容，所以唔會公開招募，只會透過人傳人嘅方式去揾。」
「遊戲公司請人，即係我要玩遊戲？定係設計後製，但我唔識呢啲喎。」
「叫得你當然係簡單筍工，你只要幫個遊戲做測試就得㗎啦，完成就即時收錢，有三萬。」
「三萬咁正？」
「無呃你。」
於是，我係許文安嘅推薦之下，成功獲得高薪荀工。
份工非常簡單，一啲都唔複雜。唯一要挑剔嘅係需要簽保密協議。
而我要做嘅職責非常容易，只係戴上VR頭套，係遊戲裏面聽佢哋指示就可以，搞掂就即刻收得工。坦白講，公司職員無當我係同事，反而似客人多啲，不過當時無為意太多，有錢收就夠。
我重重覆覆做咗好幾次，有咗筆錢之後，生活改善咗好多，有翻個人時間，至少唔會好似以前咁辛苦。
過咗一排，許文安揾翻我，表示遊戲公司打算請長工，問我有冇興趣，人工一個月十萬，佢仲我講，公司福利包括會幫我揾埋屋住，甚至揾埋女朋友！
十萬咁多喎，福利就可有可無嘅，但聽落真係好正，就好似幫我安排曬所有嘢。不過重點都係人工，人工高我當然應承啦！