《如果你見到呢段字，救我！》: 【第三身視覺】

【第三身視覺】

「女，你睇緊咩啊？」雅貽媽媽行入房間，睇下七歲大嘅女兒係度做緊咩。

「我睇完係圖書館借翻嚟嘅書，書架明明寫住係笑話嚟，但成個故事好慘，都唔好笑嘅。」雅貽扁嘴。

「等媽咪睇下，係咩書嚟㗎？」媽媽邊翻閱書本，一邊查看書籍類別。

「本書叫《瘋人日記》？搞錯啊，爸爸咁都比你借呢啲書，睇壞你點算。





咦，呢度寫住個種類係悲傷喎，應該係啲人亂咁放先會咁。」媽媽指住書籍類別嘅位置，展示比雅貽書睇。

「係喎，真係悲傷故事，唔怪得睇到咁唔開心啦。」

「真係有咁慘咩？等媽媽睇過。」

單單係睇故事嘅開首，媽媽已經恥笑同批評好幾次：「邊有人咁蠢㗎，好地地仲搞咁多事，好好地歎埋過半世咪夠囉，搞咁多事為乜。」

「哈，抵死啦！明知會死仲聽落去，自己攞嚟，人蠢真係無得救。」





「我都估到喪屍病毒係假㗎啦，邊有可能會有咁嘅事，唔會信囉，佢自己先係有問題嗰個！」

最後，雅貽媽媽作出咁嘅評價：「又真係幾好笑，唔怪得啲人會擺錯。」

「明明主角先係受害嗰個，點解你仲要笑佢？」雅貽唔理解媽媽心態，反而認為媽媽嘅說話好冷血，聽到有啲心寒。

「你講咩話？」

恰好，雅貽嘅爸爸放工翻到屋企。





「唔好講住啦，爸爸翻嚟啦，快啲睇下佢。」

「係。」

雅貽一踏出房門，就見到爸爸手上多咗一份禮物，佢心情雀躍咁衝上前：「咩嚟㗎！係咪送比我？」

爸爸笑意盈盈，將禮物交去雅貽手上：「你上次考試有全級第三嘛，呢份係爸爸送比你嘅禮物嚟，獎勵你讀書咁叻女，快啲拆嚟睇下。」

「好！」雅貽帶著期待緊張嘅心情拆開禮物。

斜 一則特別新聞報導：政府表示今年嘅貧窮及人口老化問題得以控制、解決，對於未來經濟前景更加明朗樂觀。

「又開電視？都話電視播啲嘢好毒，唔好成日睇。」雅貽爸爸一邊對老婆講，一邊攞搖控熄電視。

「得啦得啦。」對方求其敷衍。





「哇，係我想玩好耐嘅電腦遊戲！」雅貽興奮大叫。

「爸爸特登去買㗎，店員仲話過咗成年都係好受歡迎。

嚟，等爸爸幫你安裝咗先，你想唔想睇下我點整？」雅貽點頭後，佢哋兩個就一齊入房。

安裝期間，爸爸同雅貽閒聊：「點啊，上次你借嗰本《瘋人日記》好唔好睇？」

「我以為佢係笑話書嚟，點知原來好慘㗎！」雅貽講完之後有啲後悔，擔心爸爸同媽媽一樣，會講出冷血嘅說話。

點知，爸爸嘅回應出乎佢預料之外。

「雅貽識貨喎。





爸爸都有睇，睇完之後好鬱悶，要過幾日先平復到心情。」

「咩叫鬱悶？」

「鬱悶嘅意思，就係好似有塊好大好大嘅石頭壓住心口，無論做咩都提唔起精神，心情好低落。」

「但媽媽睇完無呢種感覺，佢仲話幾好笑，點解嘅？」

雅貽爸爸苦笑：「有啲書，唔係人人都睇得明㗎。

不過，雅貽睇得明已經好叻㗎啦，大個咗之後，你要一直保持住呢顆心，唔好改變。」

「知道。」

雅貽爸爸成日都對佢講好多好難明嘅說話，今次都亦唔例外，但雅貽相信，佢總會有日明白箇中含義。





「安裝好啦！你快啲試下，但你係咪真係識點玩㗎？洗唔洗爸爸幫你？」

「我緊係知啦！我啲同學成日玩㗎，佢哋話玩法係由玩家，即係我控制同製造唔同嘅遊戲角色，為佢哋創造獨一無二嘅人生。

聽講好得意㗎，角色同我哋一樣，又要食嘢又要去廁所，哎呀我唔同你講啦，我要玩啦！」

爸爸無奈地望住個女，感歎道：「有時候，我真係分唔清楚，到底係人玩遊戲，定遊戲玩人。」