《如果你見到呢段字，救我！》: Day 7-8

Day 7

自從我覺醒，以及提高警覺性之後，發現自己嘅記憶能力越嚟有改善。相信好快，我就可以攞翻身體嘅主導權，同埋記得過去所發生嘅點點滴滴。

Day 8

突發！突發！突發！

今日隔離屋搬咗個新鄰居，仲邀請附近嘅人嚟開Party，我當然係趁住機會去同佢Soical下。





我不斷提點自己，要問佢關於呢個地方嘅事，今次一定要搶翻控制權嚟問，唔可以好似之前咁。

加上，我懷疑係呢個地方逗留越耐，被同化、控制嘅情況就會越嚴重。

雖然我都算逗留得耐，但唔知點解醒覺咗。點都好，咩方法都要試下。

出奇地，另一個我好似消失咗咁，我可以任意控制身體，唔通我已經攞翻主導權？

我同佢握手示好，打算問佢之前住邊，並且慢慢引導佢懷疑呢度。





「正常」嚟講，佢對過去嘅印象係好模糊，唔會記得。希望咁樣可以喚醒佢，令佢自覺咁發現異狀。

始終我唔敢直接斷言呢個世界有古怪，亦都怕對方唔信，反而篤我灰。

點知，佢居然一開口就話：

「救命，我好快就會死。」

我呆咗呆，無諗過佢會咁同我講，我追問：「你咁後生點解會死？同埋，點解你會同我講？」





今次到佢疑惑：「點解我要同你講？咁都仲要問？

因為，我同你一樣，都係知道真相嘅人，得你先幫到我。

啊，唔記得介紹，我叫做德利明。

至於點解我會死，一陣先解釋。

而加要好好招呼客人，否則會引起懷疑。」最後一句，佢講得特別細聲。

等待期間，我坐係梳化，睇佢點應付客人。

德利明一時煮嘢食、一時就同人跳舞、一時圍爐傾計，氣氛非常高漲熱鬧。唯獨我一人坐係梳化，顯得格格不入。

無幾耐，有人主動埋嚟同我講嘢，





係我第一次有意識咁同人進行對話。

對方係一個混血青少年，身型高高瘦瘦，外貌標青，仲Gel咗頭。睇落可以迷倒唔少少女，死啦，我個女會唔會中招？

「Susu，My name is John。你平時鐘意做啲咩？」Susu？佢講嘢係咪有鄉音？叫我做叔叔？乜我好老咩！

雖然嬲嬲地，但正經事要緊，我都係答啲正路答案。

「我平時？打下機咋。」我試探佢。

佢露出討厭嘅眼神，雙手做出推開人嘅手勢：「Oh no，我唔鐘意你呢種人。」

我即時感受到彼此嘅好感度下降，同時，佢都燃點起我嘅怒火。





「講咩啊你！打機得罪你？」我即時對John開火。

「喂！你語氣好啲喎！樣衰就唔好講嘢啦！」死𡃁仔竟然話我樣衰？

當我想反駁嘅時候，德利明即刻埋嚟阻止我，叫我坐翻低。而其他人照樣做自己嘅事，完全無因為我同John嘅爭執影響到。

John自己亦若無其事咁行開咗，走去同其他人Soical。

咁啱，個Party結束咗。

德利明即時同在場所有人握手以及攬攬講再見，所有人都離開咗佢間屋，除咗我。

「呼，無謂人終於走曬。

等等，時候唔早，不如你翻去先？」





我等咗咁耐，佢乜都無交代就趕我走？

佢好似知道我唔滿意，所以加多句：「鄰居得閒嚟我屋企玩同傾計，都係正常不過嘅事？」

「嗯，當然。」我握手之後離開。

點解我會咁順攤？

當佢提及正常不過嘅字眼，就好似暗示一啲嘢咁，所以，我決定聽佢講。