《如果你見到呢段字，救我！》: Day 4-6

Day 4

今日全日都努力去留意身邊嘅事，我注意到，「自己」係分為兩個部分。

一，「我」係無意識咁去做嘢，例如係翻工食嘢，通常係滿足自己嘅需求。呢個情況下，我都會有情感，但嗰種感受好假，就好似皮笑肉不笑嘅感覺。

二，我係某啲時段會回復意識，通常第一個諗法就係去打機同睇電視，其次就係同老婆仔女傾計，最後先係寫日記。

而最近，我越嚟越有意識去做自己想做嘅事，雖然好快會無咗回事，但起碼我回復意識嘅時間長咗。



要形容嘅話，類似係我攞住PS4打機，但㩒極手制都無反應，得個角色自己活動。

而加，我個手制開始郁得翻，可以慢慢控制，但有時都會失衡，不過叫做有進步，希望可以維持落去。

Day 5

今日我放咗佢就工之後，居然無好似平時咁去食嘢沖涼，反而係直落Club去飲酒作樂、撩女仔同埋彈下吉他。

雖然我好想控制意識去問人嘢，可惜另一個「我」嘅意志更加強大，之後我就失去意識。



我只係隱約記得，「自己」不停係度Flirt後生女，好快我哋熟咗，仲要求埋佢成為我女朋友，然後我帶咗佢翻屋企，之後嘅事亦都唔洗講......

點知，

老婆竟然翻屋企！

我感受到佢要嚟揾我，同時另一個「我」亦好似默許我去控制身體。於是我即刻搶翻主導能力，馬上著翻好衫，出去攬住老婆，同佢講啲無聊嘢，打發佢注意力。

好好彩咁佢完全無起疑心，呢個時候，女朋友起咗身，完全無視老婆存在，打算嚟錫我。



我嚇到即刻跑入廁所，先避開到呢個危機。女朋友見我走咗，就無繼續去煩我，反而同我老婆Say hi 傾計。

之後，我又失去意識，變咗另一個我控制，「我」仲同佢哋3個講得好開心，仨人變埋朋友，老婆仲叫佢多啲上嚟。

......我無嘢講。

Day 6

繼尋日發生嘅三角關係之後，又有好心寒嘅事發生。

今日我同樣無意識咁煮緊晚餐，出面咁啱有朋友行過，咁我就走去同佢打招呼，再邀請對方入屋。

起初佢自言自語，但無意識之下嘅我當然唔理佢，繼續煮嘢食。

過咗無耐，佢突然係廳大叫：「我要去廁所！」之後就坐係梳化訓覺，好似無事發生過。



後來，我煮好嘢食，就發現地下有灘水，當時以為係自己倒瀉水，好自然咁抹翻乾就算，最後無咗回事。

而加諗翻，就覺得有好多疑點出現。

點解佢要大叫，而自己唔去廁所呢？

點解地下會有水呢？明明我都無攞過水。

呢一切都會唔會有答案？