《如果你見到呢段字，救我！》: Day 9

Day 9

睇嚟我嘅控制權已經攞翻，我全日都可以控制到自己，做自己想做嘅事。

而我最想做嘅事係，

刷牙。

一直以嚟，我都無意識去刷牙，今日終於可以好好咁清潔牙齒。





點知，我發現屋企居然無牙刷，唯有用水漱口就算。

不過都叫做有個小發現，就係我啲牙齒都幾乾淨，仲無蛀牙添。

做完正經事之後，我連早餐都唔食、請埋長假就走去揾德利明。

「終於訓夠？等咗你好耐。」佢開門比我入屋。

「訓夠啦，不過我仲未食嘢，介唔介意借個廚房比我用？」一唔食嘢就覺得全身無力，好辛苦。





之後，我一邊食嘢，一邊聽佢講。

係德利明講秘密之前，佢一而再再而三咁問我：「因為我知道真相，所以會死。

如果你決定要聽，就會同我一樣，連命都無。」

當佢提及到連命都無嗰時，我的確猶豫同考慮咗一陣，始終我咁有錢靚仔，英年早逝會好可惜。

不過諗深一層，可能佢係想考驗我先咁講。





機會過咗，就好難再擁有。

點都要話有曬心理準備！

「你講啦，我好想知道真相。」

「好。」佢露出意味深長嘅微笑。

聽嘅過程當中，我終於知道......

食嘢唔應該聽秘密！

皆因我聽到噎親幾次，幾乎以為自己會食嘢噎死。

如果就咁死咗就真係好唔抵。





講翻正題先，佢補充咗好多關於呢個社區、呢個世界嘅資訊同真相。

「外面嘅人，已經死曬。」佢好平靜咁講。

「咳咳咳咳，你講咩話？咩外面？」相反，我噎到狂咳。

「你冷靜啲，慢慢聽我講。

正確嚟講，佢哋仲有生命，但佢哋唔係人。

出面嘅人已經中曬喪屍病毒，佢哋無咗人嘅意識，只係漫無目的咁行屍走肉，見人就咬。

其實一開始，係可以控制到疫情，亦唔應該發展成咁。





早前經已有小道消息，傳言W地爆發緊病毒，恐怖到令人失去意識，做出一啲奇怪同重複嘅事，但無人相信，仲被批評為破壞社會秩序混亂。

過咗三個月，官方證實消息正確，更強調疫情控制得非常妥當，市民無需擔心，可以照常生活。

消息傳出後嘅一兩日，網上又流傳一段直播片段，見到患者漫無目的咁活動，同喪屍一樣。周遭已經見到附近一個人都無，得翻未變成喪屍嘅屍體，非常荒涼。

拍片者描述全國已經中曬喪屍病毒，只係差在未爆發，佢哋呢度係重災區，亦係爆發嘅源頭，幾乎所有人被咬，或者早期染病死咗。

而佢自己就一向獨居同少出街，亦成日買好多杯麵罐頭等糧食係屋企，所以可以挨到今時今日。不過，而加嘅糧食經已食曬，佢無辦法唔走出嚟，亦打算用直播嘅形式去提醒全球嘅市民，呢一種病毒可怕到可以滅絕人類。

『 一定要記住呢點：去到今時今日，去到呢個地步，唔係天災，係人禍。

唔好再相信官方消息，啊，應該咁講，當啲官方消息係口不對心嘅女人就得。』

佢講完呢句之後，就唔小心踢到個汽水罐，被喪屍發現咬死咗......





Well，至少佢感受過咩叫言論自由。

官方即時封鎖呢段片流出，可惜太遲。網絡上已經有人翻譯成多國語言，並且流傳到全世界。」

「等等......太多資訊，我要消化下，比少少時間我。」實在太瘋狂，就好似漫畫電影情節一樣誇張。

如果係真嘅話，點解呢度無淪陷？啲喪屍唔識入嚟咩？佢又點會知道咁多事？

我對於德利明嘅說法有懷疑，但先保留落嚟，等佢講曬再質問對方。

「Ok......你繼續。」我深一深呼吸，嘗試令到腦部運作得好啲。

德利明繼續講解：「 我只係講咗三分一進度咋，你聽曬先慢慢問問題啦，我會逐一解釋。





頭先講到震撼全球嘅影片啦，其實最令人注目嘅並唔係佢演講，而係佢死狀。

雖然，每人都好震驚喪屍活生生咁出現於現實世界，但大家都認為，唔發生係自己地區就毋須擔心。

只要唔係發生係自己身上，即使世界發生大事都好，係社交平台寫句唉、點解會咁等表達自己關注中嘅感慨過後，就會忘記得一乾二淨。

針唔吉到肉，係永遠都唔識痛。

呢種人，係最無知、最短視。

不過，無知愚眛嘅人往往會得到教訓。」佢故意停頓，凝造緊張氣氛。

「唔好懶緊張，快啲講埋落去。」我不屑咁講。

「喂，你破壞曬個氣氛。

事實上，喺官方未公佈消息之前，喪屍病毒已經潛伏係好多人身上。

由於病徵唔明顯，而唯一可以分辨到嘅，就係患者雙手會出現好深嘅青筋，當青筋生到去頸以上，佢哋就會病發。

症狀就係無意識咁活動，一星期後身亡。

當時無人重視，根本唔知呢個病毒嘅資料、傳播性有幾高，而患者一早就逃離到其他國家，大量傳播病毒。

起初，患者最多病發死亡，而唔會變成喪屍。

後來，喪屍病毒疑似同其他病毒混合，繼而變種，令患者死而復生，變成喪屍。

但變為喪屍嘅時間就因人而異。

直到半年後，佢哋先意識到問題嚴重性，但一切已經太遲。

大量喪屍重生，攻陷人類社會。

不過，並唔係全世界都咁蠢，總會有人做好準備，學識自己救自己。

U國有一隊頂尖嘅科學家團隊，佢哋由W地爆發疫症初期，就得到政府提供資金同資料比佢哋去研發解藥，避免人類滅種。

唯獨病毒變種嘅速度太快，雖則成功研發出解藥，但功效只會得一半。

解藥可以令喪屍有翻人類意識，唯一缺點係，人類意識僅能夠恢復大概10%到，大部分時間，都會好似喪屍病毒初期咁，無意識咁活動。」

「等......等陣，唔好話比我聽，我哋就係死過翻生嘅喪屍？

所以，我先會長時間控制唔到自己，係個病累事？」我完全無諗過，世界曾經一片混亂，而呢度就好似平行世界一樣。

「Exactly 。

一方面，我哋擁有喪屍氣味，即使佢哋有日殺到埋身，佢哋都只會以為我哋係同類，唔會傷害人。

另一方面，人類可以用另一方式生存、繁衍後代。」

「我都係唔明，例如點解我會對呢啲事無記憶，你知道真相又點解會死？」我開始覺得混亂。

突然，腦海湧現一啲零碎、模糊嘅影像，我見到自己為咗保護家人而被喪屍攻擊。

「發生咩事？」我揉揉眼睛。

德利明苦笑回應：「恭喜你，由後日開始，你將會不斷面對死亡。

頭先你應該見到一啲畫面？嗰啲就係你生前最後見到嘅景象。

當你知道咗自己曾經係喪屍嘅真相，你生前嘅記憶就會重新激活，同時間，解藥會失效，你會咁不自覺、無意識咁一直自殺。」

得知真相後，突然覺得好虛無。

我無諗過事情係咁複雜，人類幾乎滅種，自己死完又要死多次，好無力，好似無嘢可以做到。

如果我選擇逃避、無視，係咪仲可以繼續享福？

個頭越諗越痛......

「我唔信！」

當下嘅我失去理性，接受唔到自己將死嘅事實，一下子就跑翻屋企，將自己笠係張被入面，不知不覺就訓著咗。