《如果你見到呢段字，救我！》: Day 1-3

Day 1

係我講述之前，先介紹自己。

我個名係安吉金，已經係中年人士，但我有錢有樓，做到高層又有老婆仔女，社會標籤我呢類人為離地中產，我亦都唔介意你咁形容我。

我住嘅地方係獨立屋，不但止有2層，仲好大添，鐘意就自己揸車，想去邊就去邊，簡直係夢寐以求嘅生活。

Oops ，唔覺意就炫耀緊自己添。





我想講表達嘅係，正常情況下，我應該乜都唔理，好好享受生活。

但係，呢度生活嘅氣氛好古怪，就連我都不知不覺咁同化。

每日嘅生活就係起身、翻工、放工、食嘢同沖涼，話就話有老婆同仔女，但我同佢哋都無乜交流，同獨居無乜分別。

仲有，唔單止老婆成日唔係屋企，個女仲帶啲唔同男仔翻嚟。每當我想問下個女帶咩男仔，就會即刻無咗件事，分心做其他事，到我記得嗰時，已經係個男仔同我講再見。

我應該覺得奇怪，





但我無，

到底點解會咁？

直覺話比我知，呢件事唔簡單。


Day 2

今日無乜事發生，但我開始去留意一啲「正常」嘅事。





意思即係，一啲所謂「正常」嘅事，其實一啲都唔正常。

就例如我會不斷煮嘢食，不過煮完係唔會食。

但我完全無感覺，唔當係一回事，仲不斷咁重複去做。

我嘗試回憶之前發生過嘅事，但全部都好模糊。

Day 3

今日全日都做緊其他事，完全無記憶要寫日記，只係見到本簿先記得要寫。

我嘗試睇翻自己寫過嘅嘢，發現有好多都已經唔記得咗。





我推測，呢本日記就代表住我嘅潛意識，警覺住自己，呢一個地方有古怪，令所有人變成咁樣。

一旦我見唔到呢本簿，或者警覺性低咗，就會好快忘記曬所有事，變翻一個無靈魂、壞咗嘅人。

由聽日起，我要嘗試搶翻自己嘅控制權同意志！