［愛情甜故前傳--無糖純愛］曾經嘅我地，都係兩條平行線⋯: 15. 好近好幸運！

葉子朗行到過嚟嘅時候依舊都冇咩反應，面無表情咁將啲嘢放低之後然後坐低

等陣先…我宜家坐緊呢個位…唔係葉子朗個位嚟咩！

我順勢低頭一睇望向櫃桶，櫃桶中書本吧面頭剛好放本琴日派嘅功課簿，上面寫咗呢個座位嘅主人嘅名同班別學號

「真係葉子朗個位嚟！」我喺心中興奮咁吶喊着，同時即刻扮咩事都冇一樣望向前面，本來放喺枱面上嘅雙手頓時用嚟掩着臉，掩住忍唔住嘅笑意，「天呀…我係咪發緊夢呀？」

我偷偷地用手掐自己嘅臉頰





痛！痛…痛…痛…唔係發緊夢呀！我坐緊個位真係葉子朗㗎！嘩～我咁幸福得唔得㗎？

上天你對我真好呀！宜家就算要我日日上歷史堂都冇問題呀～

「打開書第四十二頁，開始上堂啦。」楊sir企喺電腦前，開出咗power point，然後又望下大家，睇下大家係咪都已經開晒書，「好啦，今堂我地會講堆上次未講完嘅課題，上次我地講到…」

喺我嘅視野裹，只有葉子朗一個人，除咗葉子朗之外，好似都見唔到其他嘢

葉子朗比我高，所以就算係坐喺度都一樣比我高，簡單嚟講就係佢會擋到我睇前面黑板，但係葉子朗宜家側住身住，所以基本上佢呢一刻係冇擋到我，再加上宜家都係睇緊power point，所以冇所謂啦





話說回來，坐呢個位完來都幾好，我之所以咁講唔係因為我坐緊嘅呢個位係葉子朗本來嘅座位，我之所以話呢個位幾好，係因為呢個位係喺課室中間嗰行，上堂嗰陣睇黑板都睇得清楚啲

我坐開嗰個位喺課室嘅最側邊，上堂睇黑板有時有啲辛苦…特別係反光嗰陣，真係咩都睇唔到

葉子朗突然間郁咗兩郁，然後一下子轉身望向我，我比佢突發嘅轉身嚇咗一跳

唔通我整到佢？冇理由呀…我都冇郁到張枱，又冇踢到佢張櫈

「幫我喺櫃桶拎本歷史筆記。」葉子朗講道





我耷低頭伸手入去櫃桶，搵到本歷史科用嘅筆記，然後抽咗出嚟遞比佢

葉子朗拎咗之後就擰番轉身，望番向前面

我托住頭望向螢幕，但更多嘅係用眼尾嘅餘光偷瞄葉子朗

中意一個人…到底係咩感覺？或者係心臟喺強而有力咁跳動着嘅同時要偷偷摸摸地將心動嘅感覺傳到大腦，全身上下每一條神經線都因為佢而突突跳動着

暗戀一個人，就係怕佢知但又怕佢唔知，望住佢嘅背影同時又唔敢直接望向佢，所以嘅動作同眼神都變得小心翼翼，怕一個唔留神就會比對方察覺到自己藏喺心底嘅心思

我偷偷耷低頭，拎住原子筆，筆頭輕輕地喺簿上掃過，但又忍唔住偷偷抬眼望佢

葉子朗比我高，就算只係望喺度望住佢嘅背影，我都已經覺得佢好高大，或者可能因為我唔算太高啦，我都係156~158cm左右，葉子朗高我半個頭左右，大概170cm啦

但我期望自己可以高到164cm左右，但我今年先中三啫，仲有得高嘅～





「陣間落堂我會收你地嘅筆記簿check，你地記得寫齊啲嘢先交，計分㗎。 抄唔切、未抄晒嘅話就問身邊嘅同學借嚟抄番。」楊sir突然咁講令大家都頓時抬起頭望佢，班房裏嘅氣氛都開始有啲嚴肅同緊張起嚟

身邊嘅同學頓時竊竊私語起嚟，睇下邊個抄好晒已經

「我會比時間你地抄番，不過要等我講堆呢兩頁power point先。」楊sir見大家咁緊張，滿意地笑道

我聽到楊sir講完之後，偷偷瞄咗葉子朗一眼，佢好淡定咁坐喺度，睇嚟佢都唔會打算抄

就算佢係要抄番，都唔會係問我借嚟抄啦…

我一早就抄好晒所有嘅筆記，喺歷史當抄筆記練到嘅skills就係寫字要快、睇得要快、記得要快

眼睇、腦記、手寫，上到嚟中三學到嘅抄筆記技巧，我宜家抄筆記都好快㗎～





「好啦，講完啦，淨低嘅時間比大家抄番筆記啦！」楊sir將power point同螢幕閂上，然後拎堆教科書行到去老師枱坐低

我都抄好啦…我可以做咩呀宜家？坐到落堂？唉…通常呢啲時候都會有好多人問我會筆記嚟抄

正當我咁諗嘅時候，葉子朗轉身望向我

「可唔可以…借你嗰本比我抄…？」

佢問我借筆記嚟抄…？我、我冇聽錯呀嘛？佢問我借筆記嚟抄呀…？

佢居然會問我借筆記…我心裏超興奮的！

「哦，好呀。」我點一點頭，然後將我嗰本筆記推前比佢








IG Link: https://www.instagram.com/nd_cotttoncandy/?hl=zh-tw

回應link: https://docs.google.com/forms/d/e/1FAIpQLScB_-FcIiKv9bnDe_pWTFd9B7sEtdiGEnKZoJeq5rjmK9JUZA/viewform?usp=sf_link