［愛情甜故前傳--無糖純愛］曾經嘅我地，都係兩條平行線⋯: 14. 我是幸運女孩方芷諾！

我拎住包嘢飲上番課室，去到差唔多夠鐘早會嘅時候都見唔到靜愉我就知道

靜愉今日係唔會番學…佢又要逃學啦…我都已經習慣咗靜愉唔喺度嘅日子㗎啦～

早會完咗之後，我地跟住班嘅列隊上番課室，行上樓梯嘅時候我抬起頭望，葉子朗就係前面，佢嘅學號比我前，因為喺學校係男仔嘅學號行先，女仔行後

我同葉子朗之間就只係相隔咗四個人，佢上到平台位轉彎嘅時候，我啱啱好差唔多上到平台，呢個角度完全係可以見到葉子朗

嘻嘻…Lucky～





葉子朗平日都係一副吊兒郎當嘅樣子，我一直都冇咩點留意佢其實，最近可能係同班半年以嚟我第一次留意到葉子朗呢個人

我之前一直冇留意佢唔係因為佢冇存在感，相反地佢喺班上嘅存在感其實都幾大，因為你每日都會至少聽到唔同嘅老師叫佢個名幾次，唔係問佢有冇交功課就係問佢補做番份功課未

壞學生嘅存在感通常先係最大，因為老師都會注意到佢，不過其實咁樣都幾好，至少喺老師叫佢嘅時候我就可以扮到好自然咁光明正大望佢

番到班房坐低之後，我又不自覺地望向葉子朗

突然間覺得靜愉唔番學都係一件好事，因為佢冇番而空咗落嚟嘅座位，令我望向葉子朗嘅時冇遮冇擋





放學番到去之後一定要話比靜愉知先得，但佢一定會串我，話我有異性冇人性

「Venus，幫我收通告。」Miss Yiu望向我講道

係啵…今日有通告要交，我琴晚有冇比我媽簽琴呢？

一話收通告，即刻有好多隻手喺我隔離伸出嚟，明明行兩步都可以，但偏偏都要傳埋一疊咁樣交比我

「唔該。」我收咗前面位遞比我嗰幾張，然後轉身收後面位遞過嚟嗰兩張，「唔該…」





我望向我右邊斜後嘅嗰個人，又要轉身收佢手上拎住嗰幾張，唔知葉子朗嗰張喺唔喺度呢？希望佢冇交到比佢，咁我就可以借啲意行過去

「唔該。」我接過佢手上嘅數張通告，一望番自己個位坐好嘅時候，第一個反應就係要睇下有冇葉子朗嗰張通告

但我唔可以做得咁明顯，唯有都要照一邊剔名一邊邊留意住會唔會有佢嘅通告

「Yes！冇佢嗰張！」喺心中帶着小激動地通道，我拎起收咗番嚟嘅通告、點名紙同堆筆企起身去追其他未交通告嘅人交通告

先由我嗰邊追起，然後再行過去門口嗰邊追起，我問完一個又一個，終於去到葉子朗

「你有冇通告？」我有啲小緊張，心中又有啲小激動咁問道

「冇。」葉子朗望一望我，搖搖頭

我喺點名紙佢嘅名隔離寫咗個「X」然後就行去另一個未交通告嘅同學嘅座位，雖然唔算係搭到嘴傾計，不過總好過冇嘢講呀





陣間第一堂上歷史堂，其實呢科唔係悶，只係因為教嗰個人嘅問題啫，楊sir把聲又沉，講嘢嗰陣都冇咩抑揚頓挫，平過地平線…而且佢仲為我地特登編咗個歷史堂座位

唉…打鐘啦，我拎堆我啲歷史書同筆記就起身行去歷史堂我坐嗰個位度，我坐中間嗰行第三個位

見到楊sir入嚟，就已經覺得好攰，聽堆佢用佢把低沉無起伏嘅聲線講嘅早晨就仲攰

「呢個位大家都坐咗三個月啦，今堂我地就調個位，等大家有機會坐下其他位係咪？」楊sir一入到課室就行去電腦枱前面喺度整嚟整去，開個新編嘅座位表出嚟比大家睇，「大家搵到自己個新位之後就過去坐啦。」

唔知楊sir係咪太得閒，所以成日都可以有時間幫大家編一個新嘅座位表，宜家坐緊個位都幾好呀…做咩無端端又要調位…等等！

新嗰個座位表…我坐後咗兩個，我前面係葉子朗！？

天呀…你對我真係好呀～你一定係因為知道我中意佢，所以特登令楊sir編一個新嘅座位表啦！





我心中愉悅地捧住書同筆記仲有筆袋行去新嘅座位坐低，葉子朗行到去我前面嘅座位，然後將啲嘢放低喺枱面然後坐低

「你叫我嚟緊仲點專心聽書呀？」我喺心中吶喊道

淨係望住葉子朗個背影，我感覺到我都要望到入晒神啦，以後嘅歷史堂真係仲得了嘅！？我感覺到我要愛上歷史堂啦！以後嘅歷史堂我都會過得好開心




IG Link: https://www.instagram.com/nd_cotttoncandy/?hl=zh-tw

回應link: https://docs.google.com/forms/d/e/1FAIpQLScB_-FcIiKv9bnDe_pWTFd9B7sEtdiGEnKZoJeq5rjmK9JUZA/viewform?usp=sf_link