［愛情甜故前傳--無糖純愛］曾經嘅我地，都係兩條平行線⋯: 16. 我只見到他

葉子朗拎咗我本筆記，然後放喺佢自己個位度抄

我啲字佢應該睇到呀可？我抄得都幾整齊，佢應該睇得明

「芷諾，我想借你嗰本呀！」坐我隔離嗰個女同學拍一拍我

「唔好意思呀…我嗰本借咗比葉子朗…」我有啲抱歉咁講道

「咁好啦…」佢扁一扁嘴，然後搵另一個人借筆記





葉子朗會問我借筆記，我真係超好彩，但其實葉子朗點解會揀問我借？

我好奇咁望向前面，望下葉子朗附近坐咗咩人，啱啱調位嗰陣淨係顧住自己開心，都冇留意葉子朗附近坐咗咩人

坐葉子朗附近嘅幾乎都係女仔係咩事？不過明明葉子朗可以問其他人借，但佢問我，係咪代表我對佢嚟講有啲咩唔一樣？定係佢覺得坐佢附近嘅女仔中我同佢最熟？

佢附近都係女仔，佢會唔會同其他女仔熟㗎？我唔想佢同其他女仔熟…如果佢同咗其他女仔熟嘅話，可能就會多咗女仔中意佢，可能佢會中意咗第二個…

但其實中意邊個，係佢嘅自由嚟，我冇干涉嘅權利…





如果你問我對葉子朗有幾中意，咁我諗我答唔到你，因為我都唔清楚我有幾中意佢…我會在意佢呀，我會不自覺咁就留意咗佢，當我見到佢嘅時候，佢身邊嘅人好似都會自動被blur咗一樣…

其實拍拖嘅感覺真係好好，有人珍惜你，在意你，著緊你…但係宜家嘅我真係唔太適合拍拖，所以我冇打算會有同葉子朗表白嘅一日…

當你親眼見到你中意嘅人背叛你嘅時候，由嗰一刻開始對你而言，愛情…彷佛只係一種把戲…我冇辦法相信愛情，縱使我對葉子朗動了心，但呢個並非喺我可以管理到嘅範圍內，所以我冇辦法令自己唔去諗唔去心動

我耷低頭做自己嘢，反正本來要做嘅嘢都已經一早做好咗，所以我可以做自己嘢

我右手拎住原子筆，枱面上放着另一科嘅筆記簿，我看似真係做緊其他嘢咁，但其實呢一刻嘅我完全冇辦法將心冷靜落嚟…





「葉子朗嘅背影好好睇…」我喺心中默默講道，「個子高高的，後頸上嘅頭髮都唔太長，短短地而且齊尾，感覺上好整潔企理…」

我仍然會不自覺咁望向葉子朗嘅背影，但我唔敢完全抬起頭望佢，我只係敢偷偷地抬眼，眼起頭不起咁望佢

「佢笑起嚟一定好好睇…」我喺心中試着幻想佢笑起嚟嘅樣，但可惜我冇見過佢開朗咁笑嘅樣，所以比較難想像佢笑得開朗嘅表情，而且葉子朗成日都擺出一副好cool嘅模樣…

「叮噹叮噹…叮噹叮噹～」

轉堂嘅鐘聲響起，趁另一堂嘅老師未嚟，楊sir就先收咗大家嘅筆記

「大家將筆記傳出嚟啦！應該都抄晒㗎啦係咪？」楊sir一邊講，一邊街去門口第一行嗰邊等收簿

坐我後面嘅男同學將佢本簿傳上嚟比我，然再將佢嗰本傳上去比葉子朗，葉子朗一次過將三本簿傳出去

唉…咁就完咗歷史堂，又要番去自己個位度坐啦…一諗到呢度就有啲失落…，要番到自己位之後又繼續上下一堂





我企起身行番去自己個位坐低，葉子朗起身轉身行去後一個位坐

佢坐低之後向我呢邊望咗一眼，剛好我又望向佢嗰邊，對上視線嘅一剎那，我頓時移開了視線

「佢係咪知道咗我望佢？」我喺心中緊張咁講道，喺心裏左思右想，「點算呀？佢係咪留意到？但佢應該係咁啱望過嚟啫，所以應該唔會察覺到啲咩嘅～諗多咗啫…諗多咗啫…」

我一直耷低頭望住枱面，然後假裝自然咁樣望向櫃桶拎出下一堂嘅課本同筆記，我唔敢抬頭係因為擔心我又會不自覺咁望向葉子朗嗰邊，如果佢仍然望住呢邊嘅話，咁佢可能就會察覺到我其實一直留意住佢

去到午膳嘅時候，今日靜愉唔喺度，咁就唯有我自己一個人食飯啦～我都習慣咗靜愉唔喺度嘅日子㗎啦～

我自己一人由四樓行到落去小食部買飯，買飯嗰條對真係好長，我排隊嗰陣喺度諗到底陣間要食咩好

「食B餐瑞士雞翼飯好，定食C餐炒飯好？」我猶疑不決地望住今日嘅午餐餐牌，學校嘅午餐餐牌每一日都唔一樣，避免大家食嚟食去都係同一樣嘢食到厭





前面嘅人一直變少，我愈行愈前，仲有一個就到我嘅時候我都係未諗到食咩好，所以我決定…跟直覺！

「阿妹食咩呀？」「B餐。」

喺阿姨問嘅同時我瞬間回答道，咁樣就唔洗為食咩而煩惱

阿姨將一個喺飯蓋上寫咗B餐嘅飯盒遞比我，我另外仲要多咗一包嘢飲，今日飲蘋果汁

我拎住飯盒行去小食部後面嘅座位坐低食，我坐低同時拎起蘋果汁，一邊將飲管插入去同時望向出面嘅籃球場




IG Link: https://www.instagram.com/nd_cotttoncandy/?hl=zh-tw





回應link: https://docs.google.com/forms/d/e/1FAIpQLScB_-FcIiKv9bnDe_pWTFd9B7sEtdiGEnKZoJeq5rjmK9JUZA/viewform?usp=sf_link