【真人真事改篇】《有一種距離，是HKU和IVE仔的距離。》/《初戀2000天》: 第十六章下 「如無力挽回要懂得放手 逝別了的人再不可擁有」 〈無力挽回〉

https://www.youtube.com/watch?v=SnTZjs8pJXI
第十六章下 
         回到家，桌上擺滿飯菜，鼓汁蒸鱔、粉絲蒸象拔蚌、炒回鍋肉⋯⋯全都是Jessie最愛的菜，要是以前的Jessie肯定馬上坐到桌前，拿起筷子來吃。
         可是，現在的Jessie根本沒有胃口。
         「寶貝，今日攰唔攰呀？我煲咗你最鍾意嘅蕃茄湯，飲咗暖下個胃先食飯啦。」Jessie母親拿着兩碗湯從廚房走出來，「Alan呢？」
         「佢話約咗人，唔得閒。」實際上，Jessie問都沒有問過。
         「喔，你老竇都話夜D先返，唔洗等佢，留比佢得啦喎，快D趁熱食啦！」Jessie母親拿起筷子，夾了塊白鱔放在Jessie碗裏。
可是，過了好一陣子，Jessie還未碰過碗裏的飯菜。




         平日黏家的Jessie最近愈來愈少回家，現在還對桌上的飯菜毫無興趣，讓Jessie的母親覺得好不奇怪。
         於是，Jessie母親開始乘機旁敲側擊起來，說：「最近好忙呀？成日唔返屋企，你睇下你，無湯水滋潤下，下巴尖晒，個樣都殘埋，陰公囉。」
         吃貨Jessie的臉從來都是圓圓的，可是現在卻瘦削了不少。
         「係呀，好多功課、測驗要做。」Jessie喝着碗裏的湯說道。
         考DSE的時候，Jessie都沒有瘦下來，幾份功課怎可能讓她瘦了一圈？Jessie的母親不太相信Jessie的話。
         「真係剩係咁？咁點解你唔食餸呀？都係你最鍾意食架喎。」Jessie母親繼續問道。
         「我慢慢食姐。」心虛的Jessie馬上夾起碗裏的白鱔放進嘴裏，嘗試偽裝自己沒有事。
         「定係你同James鬧交？」Jessie母親裝作漫不經心地問道。
         提起James這個名字，Jessie剛夾起的象拔蚌竟掉在桌上。
         「做咩咁唔小心呀，傻瓜。依舊污糟咗我食啦，你夾過舊新嘅食啦。」Jessie母親趕緊把象拔蚌夾到自己碗裏。




         雖然Jessie母親臉上沒甚麼特別的反應，可是看到這樣的Jessie，心裏早已猜到了些，也知道愛逞強的Jessie大概不會說，便沒有問下去，開始談起家常話。
         整頓飯，Jessie沒怎說話，只不時回應一下母親，免得母親像是一個人在演獨腳戲。
 
         晚上，Jessie母親在洗碗的時候，Jessie回到房間，拿起手機來玩。
         「叮！」這時候，手機傳來James的信息，但竟不是用WhatsApp傳來，而是Facebook的Messenger，Jessie馬上按開來看，寫着：「唔得，你要同Joey去。」
         「點解？」Jessie馬上回覆。
         「總之唔可以同男人去。」James也秒回Jessie的信息。
         「你都同第二個女人去啦。」
         「嗰D係我嘅錢，我話唔得就唔得。」
         「你D錢都係因為我幫你搵到Part-time先有！」




         這次，James沉默了。
         Jessie見James沒反應，又發了則信息：「我唔同佢去，你都唔好同嗰個女人去好無？」
         「但我已經比晒錢，訂晒機票酒店。」
         「幾錢？我比返錢你呀，你比我嗰六千蚊夠唔夠？唔夠我再貼。」Jessie繼續輸入：「我唔想你同佢去旅行。」
         James繼續沉默。
         Jessie見James沒反應，竟有一個瘋狂的想法，又輸入：「一係我地早過你同佢去，我地下個月就去好無？我想你嘅第一次係同我，而唔係其他人。」
         「你唔好咁啦好無？我已經應承咗同佢去啦。」
         「但你都應承咗我！」
         James不斷輸入又刪除，過了良久，卻只發了一句：「對唔住。」
         傳送完這句後，還未待Jessie回覆，James便已下線了。
         點解你要咁做？明明你地識咗幾個月都無，我地咁多年，但你最後竟然揀同佢去？點解連同我去咗先都唔肯？⋯⋯Jessie拿着手機，看着James的Icon，那張出她替他拍的相片，眼眶開始濕潤起來。
         Jessie忍不住點開James的頭像，向左滑，是James和自己在Grad din時拍下的合照；再滑下去，是二人在中學參加交流團時，在台灣拍的照片；再滑下去，是二人初中時，一起拍的貼紙相⋯⋯
         所有的照片，幾乎都有Jessie的存在。
         「寶貝我走⋯⋯」這時，Jessie母親拉開了Jessie的房門，準備和Jessie說再見，卻發現Jessie在哭，「你做咩喊呀，寶貝？」
         Jessie的母親趕緊放下手袋走到Jessie床邊。




         倔強的Jessie連忙抹掉臉上的淚水，說：「無野呀。」
         就像小時候，Jessie跌倒在地上後，明明痛得快哭了，卻還是強忍着淚水。
         「你真係無事？無事做咩喊得咁傷心？」Jessie母親心疼地看着Jessie。
         可是，儘管Jessie再努力抹，眼淚還是不斷往下掉。
         「乖，寶貝唔好喊啦，媽媽會心痛架。」Jessie母親坐在Jessie床邊，把Jessie擁入懷裹。
         聽到這句話，Jessie終於忍不住，也伸出手抱着母親，說：「點解，點解佢唔要我？明明佢地識咗無耐，我地一齊咗咁耐⋯⋯」
         「乖，媽媽係到，媽媽永遠都要你。」Jessie母親沒有說太多的話，只默默地抱着Jessie，雙手輕撫Jessie的髮絲。
         就像小時候，Jessie還在襁褓時，每當Jessie哭鬧起來，Jessie母親都會溫柔地輕摸着她的頭，唱着搖籃曲哄她。
         只是，小小的Jessie已長大了，不再需要搖籃曲，可她還是需要母親那唯一能使她安心的懷抱。
         這時，Jessie才發現，母親的懷抱才是她的避風港，儘管她走再遠，只要回頭，母親永遠都在。
         Jessie開始後悔當初不聽母親的話，還為此多次與母親吵至臉紅耳赤。
         「對唔住⋯⋯」要面子的Jessie竟和母親道起歉來。
         「傻豬黎嘅，對住媽咪唔洗講對唔住架喎，無論發生咩事，媽媽永遠都會係你身邊。」雖然Jessie母親的口好像很溫柔地安慰着Jessie，但實際上，當她看到自己女兒哭得那麼傷心時，她的心都痛了，像突然被人在身裏割了塊肉出來一樣痛。
         要知道，她可是自小就視Jessie如掌上明珠一樣寵着，只要看到好看的衣服、手袋，都會買給Jessie，還讓任性的Jessie手機一部接着一部換⋯⋯
如今，卻被別的男人這樣傷害。




         Jessie母親好像突然明白，當年自己父母如此反對自己和Jessie父親在一起，但卻堅持要和他在一起，結果還哭着離婚時，她的父母該有多心痛。
         「媽媽今晚留係到同你訓，好似細個嗰陣，攬實你好無？」Jessie母親像哄小孩似的拍着哭得抽搐的Jessie的背。
         Jessie沒有說話，只默默地點點頭。
         由那刻起，Jessie母親就告訴過自己，不會容許James再傷害自己的寶貝女兒。
          「鈴鈴鈴！⋯⋯」第二天早上，早上約七時，Jessie的鬧鐘便響起了。
         雖然昨天哭到半夜才睡的Jessie還是疲憊得很，但她還是選擇了起床，趕着八點鐘要到補習的地方。
         「起身啦，寶貝？我煮咗早餐呀，你快D出黎食啦。」Jessie母親在客廳對Jessie喊道。
         「黎啦！」Jessie一臉睡眼忪的樣子說。
         當Jessie拿起手機，準備踏出房時，發現手機多了則信息。
         是James母親傳來的，寫着：「Jessie你最近好嗎？好久不見你了，有空和我吃頓飯嗎？」
         Jessie想了想，不知道應不應該答應。
         畢竟現在她不再是James的女朋友了，她還憑什麼去見James的母親呢？可是，想起James母親昔日常常煮她最愛的菜給她吃，新年又總是包最大封利是給她，送她親手造的年糕、蘿蔔糕⋯⋯就像對自己的女兒一樣好，又覺得應該見一見她。
         「當然好啊，我們吃下午茶好嗎？」Jessie回覆。
         Jessie掙扎了一番，良心驅使下，還是選擇去見James母親，或許，讓她訓斥一下James也好。
 




         「Jessie，依邊呀。」James母親不斷朝Jessie揮着手。
         來到嘈吵的酒樓，Jessie找了好久，才在人潮中找到James母親揮動着的手，走過去，才不發現不只有James母親，他的父親也在。
         「Hi，Auntie、Uncle，到咗好耐呀？」
         「唔係呀，我地都係啱啱到咋嘛，啱啱補完習呀？想食D咩呀？」Jessie剛坐下來，James母親便在她的茶杯裏加上熱茶。
         「唔該晒，無所謂呀，我咩都食。」Jessie微笑着說。
         「我地嗌咗D燒賣、鳳爪，仲有叉燒包，你食唔食蝦餃呀？」James母親親切地問道。
         「好呀。」Jessie輕輕呷了一口茶。
         然後，James母親便把點心紙遞給侍應。
         「琴晚訓得唔好咩？隻眼咁腫嘅。」James父親突然開腔說。
         James母親用手肘撞了James父親一下，示意他閉嘴。
         「補習係咪好攰呀？瘦咗咁多嘅。」James母親問道。
         「係咩？少少啦，都慣咗。」Jessie依舊微笑道。
         「係呢，我今朝買咗D鮑魚、龍蝦、象拔蚌，諗住今晚返去整龍蝦伊麵，你黎唔黎食呀？」James母親熱情地邀請Jessie。
         就算我想黎，佢都唔會想見到我⋯⋯Jessie心想。
         「唔洗啦，James應該唔會想見到我。」Jessie苦笑道。




         「你地最近發生咩事呀？」James母親擔心地問道。
         其實James母親早就想問Jessie了，可是又怕會觸及Jessie的傷心事，才不敢主動問。
         「佢⋯⋯鍾意咗第二個女仔，我地分咗手啦。」說着，Jessie朝James母親的茶杯斟了點茶。
         「吓，佢咁衰仔？佢點可以咁架！？你有無同佢傾過？」James的母親驚訝地問。
         「有呀，但⋯⋯佢都係揀咗佢。」
         「其實男人嘅野，你氹下佢就無事架啦，你有無氹過佢呀？」James父親突然插入一句。
         Jessie聽到這句頓時呆了，以為自己聽錯了，心想：明明佢唔啱，點解我仲要氹佢？
         「真係架，男人嘅野係咁架啦，你去氹下佢，佢就會返黎架啦。」
         「癡線架，明明係你個仔唔啱仲叫Jessie去氹佢？」James母親忍不住對James父親罵道。
         幸好，James母親沒有因為那是他兒子而偏頗，倒心疼起Jessie起來。
         「係James衰，返去一定幫你狠狠咁鬧佢。但係⋯⋯你地真係無希望啦？」James母親懷着最後一絲希望問道。
         我都想我地仲有希望⋯⋯Jessie心想。
         「James有新女朋友啦。」說到這句話時，Jessie的心好像被甚麼輾過似的。
         「對唔住呀，Jessie，James竟然咁對你⋯⋯我知係佢唔啱，雖然我好想你地係返埋一齊，好想你黎我到食飯，但係⋯⋯」說到這裏James母親開始哽咽起來，「Jessie，你咁靚女，又叻女，一定可以搵到個比James好嘅人。」
         聽到這裏，Jessie的眼睛頓時霧氣氤氳，雖然James母親真的很好，但她沒想過James的母親會和自己說這些話，就好像多了個疼愛自己的母親。
         「就算我唔黎食飯，我地都可以出黎飲茶架嘛。」Jessie拿起茶杯輕輕碰了碰James母親的茶杯說。
         「好呀，我地兩個去飲茶，唔好理嗰個衰仔！」James母親拿起茶杯，也喝了一口，又語留心長地對Jessie說：「唔好再唔食野啦，瘦晒就唔好睇架啦，知唔知呀？唔好比個衰仔搞到你咁唔開心。」
         Jessie感動地看着James母親點點頭。
         看着這樣關心自己的James的母親，叫Jessie想起昨夜母親對自己說過的話，突然覺得雖然自己失去了James，但卻好像得到了更寶貴、更值得她用心珍惜的人和事。
 
         由於昨晚答應了Alan加堂補習，Jessie早就坐了在客廳，玩着手機等Alan。可是，等了良久，Alan都還未來，疲憊的Jessie不自覺地在桌上睡着了。
         「叮噹！」
         Jessie被突如其來的門鐘聲嚇醒了，連忙抹了抹嘴角的口水，跑去開門。
         「Sorry呀，遲咗少少。」Alan抱歉地搔了搔頭髮說。
         「少少？依家九點嗱，Alan哥！你搞咩搞咁耐呀？」Jessie不悅地說。
         「我都唔想架，我係為咗買你最鍾意嘅甜品先遲到架咋。」Alan拿起手上的膠袋，「我記得你話過依間糖水鋪嘅芒果燉蛋白好好食。」
         Jessie驚訝地看着Alan手上的甜品，沒想過平日補習都分秒算盡的Alan竟然會花錢買甜品給自己吃。
         「你個樣做咩咁驚訝，快D開門比我入黎啦。」Alan說道。
         聽到這句，Jessie才馬上打開鐵閘讓Alan進來。
         「本來我好早就去咗買架啦，點知佢漏我單，搞到我等咗好耐先遲到咋。不過睇在野食嘅份上，你唔會嬲架可？」Alan把甜品放到桌上，戰戰兢兢地問道。
         「無啦啦做咩買野食比我？一定有蠱惑，講，有咩事？」Jessie盯着眼前的糖水，卻碰都沒有碰過，總覺得眼前是個深不可測的陰謀。
         「哇，乜你咁諗我架，想買下野食比你食唔得嘅？」Alan一臉受傷地說。
         「真係無？你係咪想用依碗甜品賄賂我，等我收平D你可以補多兩堂？」Jessie還是一臉懷疑地看着Alan。
         「哇，你咁諗我嘅，雖然我平時係慳咗少少，但我唔係D咁嘅人黎架囉，唉，好Hurt囉，算啦，我自己食返。」
         Alan以為Jessie會說不好，然後奪回去吃，豈料Jessie真是靜靜地看着自己吃。
         「乜你咁架？」看着Jessie一臉平淡的樣子，Alan又放下膠勺子。
         「咩呀？你話你食，咁我咪睇住你食囉，有咩問題？」Jessie不解地說。
         「我特登用零用錢買比你食，成40蚊架。」Alan不爽地說，「唔得，你要食呀。」
         看着像小孩似的Alan，Jessie終於放下介心，笑了出來，說：「唉，好啦好啦，睇在你份上，我就食少少啦。」
         事實上，Jessie也很想吃，只是怕會欠了Alan些甚麼，畢竟他是自己的學生。
         然而，當Jessie吃了第一口，所有的疑慮就像燉蛋白一樣，漸漸化在舌頭上消失不見，只留下一股甜滋滋的味道。
         不知道是母親昨夜的擁抱溫暖了自己，還是James母親的話使自己醒覺了，又或是眼前的甜品實在太好吃， Jessie竟忍不住一口接着一口吃起來。
         看着Jessie臉上甜滋滋的表情，Alan也跟着笑了，剛才的不爽頓時化作雲煙。
         「其實你食野個樣真係好可愛。」Alan托着下巴看着Jessie的吃相說道。
         聽到這句，Jessie差點沒吐出來，心想：我究竟邊忽可愛！？
         「你唔好再串我啦下！」Jessie突然停下了手，看着Alan說道。
         Jessie總覺得自己和可愛完扯不上邊，倒覺得Alan是在諷刺自己的吃相。
         「我講真架，幾Cute呀，睇你食搞到我都好想食。」
         「你唔識買多碗嘅？」Jessie還是不太相信Alan的話。
         「兩碗就80蚊，幾乎可以補到半個鐘習啦！我要留返D錢黎補習。」
         「有無咁好學呀你？」Jessie狐疑地問道。
         「我不嬲都好好學架喎，我每次都好期待上你堂架。」Alan的眼神在閃爍着光芒，「係呢，你仲想食咩糖水或者甜品？或者其他野都得架，下次上堂我買比你食呀。」Alan繼續一臉甜滋滋地問道。
         「我想食⋯⋯」Jessie準備說出口的瞬間又把話吞回了，說：「都係唔洗啦，諗諗下我都係無咩想食。」
         事實上，Jessie只是不好意思要學生買東西給自己吃。
         「無可能！你咁為食，邊有可能無野想食，唔緊要，你唔講，我都可以照買，你一定鍾意食。」
         「做咩係都要買野食比我食姐？」Jessie不解地問道。
         「因為我鍾意睇你食野囉，個樣好滿足，好可愛。」
         Jessie翻了個白眼。
         「你唔好翻白眼啦，聽人講翻得多會翻唔到落黎架！」Alan認真地說。
         這次換Jessie忍不住笑了，說：「邊個話你知架傻仔？」
         「真架，我嗰次睇⋯⋯」
         「算啦，我唔想知你邊到睇返黎，我食完啦，快D拎筆記出黎上堂！」Jessie沒興趣繼續Alan說廢話。
         「唔係呢，你聽我講埋先啦。」
         「唔要。」Jessie拿出筆記，準備上課。
         「唔係呢，我講埋依個就上堂。」Alan按着Jessie準備翻開筆記的手說。
         「你講還講，唔好禁住我隻手呀下。」Jessie瞪大眼睛盯着Alan的手說道。
         「你聽我講埋先，我上次⋯⋯」
         就這樣，兩個小時的補習，Jessie有大半時間都是在聽Alan胡說八道，剩下的時間即使在說筆記，Alan也總能有意無意地把話題拉到Jessie身上，叫Jessie的白眼翻了又翻。
         救命，算，為咗儲多D錢，我忍你⋯⋯Jessie心想。