【真人真事改篇】《有一種距離，是HKU和IVE仔的距離。》/《初戀2000天》: 第十六章上 「如無力挽回要懂得放手 逝別了的人再不可擁有」 〈無力挽回〉

第十六章上 
         陽光穿過百葉簾照射在Jessie身上，強行打開了她沉重的眼皮。
         Jessie揉了揉她不願張開的眼皮，嘗試坐起來的瞬間，發現頭重得彷彿也要掉下來，這是她第一次喝到斷片。
         我究竟係飲咗幾多先會咁痛⋯⋯Jessie摸著自己的額頭，努力回憶昨晚發生的事，只記得自己跟著Bonnie和Michelle走進了一間夜店，然後有一個男人請他喝酒，還吻了她，接著她好像見到她的補習學生⋯⋯
         What the fuck!? Alan琴晚見到我著成咁嘅樣！？這刻，Jessie恨不得可以打爆昨晚的自己。
然後呢？我點返黎架？Jessie努力地回憶着。
         「你終於醒咗啦？」睡在對面床的Angel也被陽光喚醒了，瞇起眼睛看着Jessie說。
         「我琴晚係點返黎架？」Jessie驚奇地看着Angel問道。




         「哇，睇黎你真係好醉，你真係唔記得發生咩事？」
         Jessie搖搖頭。
         「琴晚我見你咁夜都未返就打比你啦，點知你死都唔聽電話，打比Bonnie佢剩係話你係唔知邊間Club就即刻Cut咗線。咁我一擔心起黎，咪走咗去搵Raymond，跟住佢就仆咗出去搵你，你都唔知你醉到成灘泥咁，好彩Raymond夠大隻，先可以抬住你行五層樓梯送你返房咋。」說畢，Angel忍不住打了個呵欠。
         「點解你唔黎搵我？我好傷心，嗚嗚⋯⋯」Jessie嘟起嘴巴，像個小孩地問道。
         「我都諗住跟住Raymond黎搵你架，但Jacky死扯住我，話嗰D地方好危險，唔比我去，又話D我出唔切設就殺咗我，我就比佢禁錮咗係到，做到今朝先訓，不知幾慘，嗚嗚⋯⋯」Angel用被子裹着自己的臉，假裝哭了起來。
         「係呀，係呀，最慘係你啦⋯⋯」Jessie笑着對Angel說，隨手拿起了手機。
         「話時話你琴晚做咩飲咁醉？」Angel問道。
         這讓本來暫時忘記了傷痛的Jessie又一次想起Kay和James的那張合照，想着想着，她又想起自己好像傳了則語音信息給James。
         Jessie連忙拿起被放在書桌上的手機，發現裏面有多通未接來電，包括Angel、Raymond、Alan，還有James和母親。
         點解James會打比我架？唔通佢黎過搵我？仲有我媽添，唔通佢知道咗我去咗蘭桂坊飲酒？ Jessie心想。




         點開WhatsApp，是鋪天蓋地的未讀信息，但只有一則吸引到Jessie的目光，那是James。
         Jessie連忙點開來看，發現有一張銀行轉帳的截圖，裏面顯示James轉帳了六千元給Jessie，還有一句信息：「對不起，我無法兌現我的承諾，你找Joey去吧。」
         看到這裏，Jessie頓時睡意全消，她難以置信地點開了那張截圖，仔細地端詳了好幾遍。雖然銀行帳號和名稱都全對，可Jessie還是不敢相信，又打開了E-banking來看，看到銀行確實多了六千元，才終於相信這是事實。
         Jessie再次點開WhatsApp，發現自己昨晚發了幾則語音信息給James，逐則點開來聽：
         「點解，點解你要同佢去日本？你明明應承咗我同我去架！」
         「你話過努力返工都係為咗帶我去日本，你話過今年嘅生日禮物係日本之旅，你話過要帶我食最好味嘅壽司⋯⋯」
         「你可唔可以兌現你嘅承諾，同我去完日本先分手？」
         ⋯⋯
         聽到這裏，Jessie很想殺死昨晚的自己，明明答應過自己不再找他，明明要找回自己的尊嚴，可是酒後還是見真章，原來她還是愛得那樣沒底線。
         努力掩埋的情感，三杯兩盞烈酒後，還是敵不過對他的思念，就像抑壓多時的火山，爆發出來的瞬間很爽快，過後卻滿目瘡夷，更添兩分蒼涼。




         Jessie不敢相信自己昨夜竟發了這麼多則信息給James。
         「睇咩睇到咁專心唔應我？」Angel看着呆呆的Jessie問道。
         「琴晚我見到James同嗰個人買咗機票，準備去旅行，忍唔住Send好多條Voice Message比佢，但我完全無印象。然後，我啱啱先見到，原來James琴晚打咗幾次黎，仲過咗6000蚊比我，叫我搵埋Joey去旅行⋯⋯你覺得係咩意思？」
         「吓？六千蚊都唔少架喎，佢傻咗呀？」Angel也驚訝得瞪大眼睛。
         「可能係怕我繼續煩住佢，哈。」Jessie冷笑了一聲。
         「驚你煩Block咗你就得啦，洗乜比錢你。佢係咪內疚咋？佢明明應承過同你去，所以依家比錢你去，諗住咁樣就可以減輕自己罪疚感咋？」Angel說。
         自那天James變了個樣對自己，Jessie已不再懷疑James已變了心這個事實，所以她很快就接受了Angel的解釋。
         「咁我如果接受咗，佢咪無咁內疚？咁我咪應該比返，等佢繼續內疚落去？」Jessie問道。
         Jessie覺得，既然已無法令James繼續愛自己，那麼讓他時刻保持着這份罪疚感，或許就不會忘記自己了。
         「我唔知你呀，但你地都分咗手啦，就算你咁做可以令佢更加罪疚，但咁又點？」Angel的話道出了事情的重點。
         即使讓James更加罪疚，那又如何？難道這樣他就會回到自己身邊了嗎？Jessie突然覺得自己很可笑，明明知道James已變了心，為何還會抱着一絲希望，覺得他還會回來？
         可是，Jessie雖然知道，Joey當時沒有把James的實話說出來，並不是有意欺瞞她甚麼，只是為了她好，可是知道了事實之後，還是不禁對Joey產生了芥蒂。加上James還特意叫她要找Joey去，像是有反叛心理似的，她更不想找Joey去。
         Jessie賭氣地對James發出一則信息：「咁我同Raymond去。」
         等了良久，仍舊是雙灰剔。
         唔通佢忙住拍拖，唔得閒理我？Jessie腦海裏浮現了James摟着Kay的畫面，心頓時涼了半截。




         「鈴！」手機鈴聲打斷了Jessie的思緒，是Jessie的母親。
         Jessie深呼吸了一口氣，終於鼓起勇氣接起了電話。
         「喂，寶貝你琴晚去咗邊呀？做咩唔聽電話？」Jessie的母親溫柔地問道。
         Jessie的母親是那種會把所有情感表露無遺的人，包括對女兒的關愛，但自小便慣了獨處的Jessie卻更像她那深藏不露的父親，總是受不了這樣嬌嗲的母親。
         雖然自小母親已經常是這樣，可Jessie還是忍不住打了個冷顫，回答道：「無呀，係Hall囉，做咩咁問？」
         「琴晚Alan打比我問我你返到屋企未，我都好奇怪，你唔係係Hall架咩？跟住打比你呀爸佢話你唔係屋企，打比你又無人聽，我幾驚你有事呀，琴晚我訓都無訓過咁滯，嚇死媽咪啦。」Jessie母親擔心地說道。
         Alan其實是Jessie母親朋友的兒子，而且經常上Jessie家補習，所以很自然就有Jessie母親的電話。
         「無呀，我無事喎，放心啦。」Jessie不敢告訴母親她失戀了，因為她不想被母親看扁。
         自他們第一天在一起，Jessie母親已非常反對，因為他家境一般，成績亦如是，現在還讀不成大學，Jessie母親恨不得他們馬上分手。
         可是，Jessie還是不顧母親的閒言閒語，堅持和James一起。
         「咁你今晚返黎食飯啦。」Jessie母親對Jessie的話半信半疑，而且早已好一段時間不見Jessie的踪影。
         「吓，但我今日⋯⋯」
         「Alan同我講咗啦，你今日要上佢到同佢補習，你唔係經過屋企門口都唔返屋企，咁唔想見到我吓嘛？你唔掛住我啦？嗚嗚⋯⋯」Jessie母親又開始撒嬌了。
         雖然Jessie的母親已搬了出去住，可是也許正因為這樣，和Jessie父親相見的時間少了，反而相處得好了，就像是老朋友一樣，所以Jessie母親偶爾都會出現在家裏，尤其是Jessie在家的時候，Jessie的母親還會特意回家煮飯給Jessie吃。
         「好好好，我今晚返黎食。」Jessie實在受不了她母親的嬌嗲。




         「咁我煲定湯，買定餸等你啦，你都好快D出門啦，就夠鐘補習架啦，順便問下Alan得唔得閒落黎食飯啦。」Jessie母親說道。
         「得啦得啦，我準備出門啦，拜拜。」Jessie終於找到了機會掛線。
         掛線後，看一看鐘，原來已經下午兩時了。
         「哇，我補習就遲到啦，我要起身啦。」Jessie馬上彈了起來。
         「你唔食埋早餐先去呀？」Angel爬起來問道。
         「唔食啦，遲到啦，幫我多謝Raymond啦。」Jessie拿起牙刷、面巾，衝了去洗手間。
 
         「叮噹！」Jessie按響了Alan的門鈴。
         「Miss，你次次都遲到嘅，去蒲到好夜呀？」Alan邊開門邊問道。
         「你仲好講！你做咩爆比我媽知！？」Jessie盯着Alan問道。
         「明明係你玩失蹤，我買完水返黎，你就唔見咗，又唔聽電話，我係嗰度搵咗你成個鐘，幾驚你有事！逼於無耐先打比你媽咋，真係好心着雷劈呀。」Alan無辜地說道。
         Jessie這才發現原來是自己不辭而別，可是從來不習慣和人道歉的她，甚麼也沒有說，就徑自踏進Alan家門，熟悉地走到飯桌前，從背包掏出練習。
         「我又無叫你搵我。」Jessie說道。
         「咁我會擔心你架嘛，成日上網見D女人比人執屍，幾驚你係下一個。」Alan關上門，走到書桌前。
         一如以往，Alan的家經常只有他一個人。




         「咁你琴日究竟去咗邊？又做咩出現係蘭桂坊？你真係落去蒲呀？」Alan問道。
         「關你咩事姐，快D揭開書啦。」Jessie邊說邊揭開練習。
         「你隻眼仲咁腫，喊過黎呀？」Alan猜道。
         Jessie沒有理會Alan的問題，自顧自地說：「上次比你份閱讀理解有無做呀？拎出黎我地對答案。」
         「你唔答我就唔做，你講，你係咪比仔飛！？」Alan的專注力全在Jessie身上，完全沒想過要打開書，繼續說：「所以你落去蒲，仲飲到咁醉！」
         「係咁又點，關唔關你事呀？」Jessie不耐煩地說。
         「唔係真係開口中呀嘛，你咁正，你男朋友竟然飛咗你？」Alan驚訝地問道。
         平日補習，口賤的Alan已經常嘲諷Jessie，這叫她無法分辨Alan是不是真心在稱讚自己。
         「你依家串我吓嘛？」
         「我真心架！你依家個樣咁西就爭D囉，平時你笑嗰陣都幾好睇架。」Alan認真地說，聽得Jessie不知究竟該生氣還是害羞。
         「已經過咗15分鐘啦，逐分鐘同你計緊錢架下！」
         「唔緊要啦，最多我加鐘啦。」Alan毫不在意地說道。
         「哇，平時你秒秒計到盡架喎，做咩突然咁闊綽？」Jessie驚訝地問道。
         「哇，乜你咁講野架，我關心你咋，Miss，萬一係真嘅你諗唔開咁點算？你答咗我先啦，唔係我唔上堂架下！」Alan竟威脅起Jessie起來。
         「你考衰咗又唔關我事嘅，你咪唔好上囉。」Jessie滿臉不在乎地說。




         Jessie以為平時分秒計盡的Alan會屈服，沒想到他真的沒反應，Jessie嘆了口氣：「係啦，你估啱晒呀，我比人飛咗啦，你滿意未呀，Alan同學？」
         「吓？佢盲咗呀？雖然你肥咗少少姐，」聽到這個敏感字眼，Jessie馬上瞄着Alan，Alan續說：「但你都幾Cute呀，佢咁都做得出？佢點飛你？咁你係咪好Hurt？」
         這是Jessie罕有地被人讚她可愛，頓時噁心得顫抖了一下。
         Jessie眼見Alan這樣追問下去不是辦法，突然心生妙計。
         「不如咁，公平D，你答啱我一條問題，我就答你一條問題，就由上次比你份Past Paper開始。」
         「好，殺你！」Alan答應了。
         「依題，依段係文章擺中間，有咩結構作用？」
         「總結全文！」Alan自信地回答道。
         明明答案錯得離譜，卻總是能臉皮十尺厚地說出來。
         這叫Jessie想起James，
 
         那時候，也許是表現太「出眾」，James經常被老師點名答問題，而根本沒有在聽書的他自然每次也不會答。
         「吳生，依題答案係咩？你讀你個答案黎聽下。」中文老師故意叫James答問題，因為金光火眼的她能看出James根本沒在聽書。
         實際上，James其實在偷看女同學。
         那是Jessie。
         James的視線馬上從Jessie的臉上移回投射屏幕上，可是他根本不知道老師在問第幾題。
         「咁呢，個答案就緊係⋯⋯」James的腦在高速運轉，想着如何忽悠眼前這老女人。
         「喂，係B，小人呀！」後座的同學悄悄地提醒James，還把自己的答案遞到James手上。
         「就緊係B小人啦，咁簡單仲洗問嘅？」得到死黨的提醒，James馬上自信地說出回答道。
         「個作者作咗咁長篇文，就係想話自己係個小人？」看着中文老師滿臉怒氣的樣子，James才逐漸意識到自己好像答錯了。
         「係咪有咩誤會呀？」James猶䂊地問道。
         「你答咗上一題嘅答案呀，吳生！個Powerpoint係前面，你成日都拎轉後面望，望望望究竟望緊D咩？」中文老師生氣地問道。
         「佢𥄫緊女呀，Miss。」James的後座繼續出賣James。
         「𥄫女？𥄫邊個？」
         「errr……」看着James準備殺了他的眼神，他怯了，不敢說出來。
         「唔講唔緊要，你兩個一陣小息一齊拎埋本書落黎搵我！」中文老師突然微笑對着二人，那詭異的笑容很是恐怖。
         就是因為James的厚面皮，才叫Jessie留意到他。
 
         「Hello Jessie？ Are you still here?」Alan見Jessie沒反應，便站了起來，翽漸靠近Jessie的臉。
         「哇，你哄咁埋做乜！？」看到Alan突然放大的臉，Jessie馬上回過神來。
         「我講咗三次總結全文啦，你都無反應，諗緊個Ex呀？」Alan見Jessie有反應了，便坐回椅子上。
         Jessie不想承認這事實。
         「大佬呀，擺中間點總結全文呀？依個係承上啟下呀，講咗好多次啦。」Jessie無奈地解釋着，「下一題呢？⋯⋯」
         結果，一如Jessie所料，整份past paper，Alan只答對了兩題最簡單的選擇題。
         「好，你有兩次問我嘅機會。」Jessie說。
         「佢點解飛你？」
         Jessie想了想，雖然很不願回答，但一諾千金，還是如實答了：「佢鍾意咗第二個。」
         「咁你覺得我點？」
         「成個白癡仔咁囉。」Jessie不假思索地回答道。
         「認真D啦。」
         「睇在你琴晚咁努力搵咗我成個鐘嘅份上，如果可以少D串我、笑我，都應該係一個唔錯嘅男仔黎嘅。」Jessie想了想說。
         「咁如果⋯⋯」Alan還想繼續問下去，Jessie卻打斷了他，說：「你已經問咗兩條啦，而且都夠鐘落堂啦，返去做埋後面嗰D啦，今日黎到依到。」Jessie開始執拾書本。
         「但我仲有野唔明喎，可唔可以加鐘？」
         「乜你咁好學架咩，以前唔覺嘅？」
         「身為你學生點敢影衰你，仲要對住你，緊係好學架。係呢，除咗依日，其實你仲有邊日得？不如我地每星期補多一日呀？同埋呢，你補唔補通識呀，數學呀嗰D？不如你同我補埋呀，我好廢架。」
         Jessie心想不用再去找James，時間剛巧多着，倒不如趁機多賺點外快，也免得自己太閒會經常想起James。
         「好呀，我數學同通識的都有5架，你想補邊日呀？」Jessie爽快地回答道。
         「愈快愈好，就聽晚你屋企？」
         「無問題！」