港女穿越記: 6

事緣係亞傑如常咁樣去井邊打水，隔離宮殿的陳嬪的三等太監一嚟到就推開佢，將佢已經裝滿水的木桶拎走，隨手丟低幾個空桶就走。被推低的亞傑唔敢反抗，只係默默執起掉落的荷包，佢知道荷包內放住佢身上切落嚟的「寶貝」，如果遺失咗，他日將會「死無全屍」。檢查過後，發現有幾滴水喺布面，內裡應該冇影響。其實即使佢知道入面被水浸濕，佢都唔敢打開。

鼓起勇氣輕握了荷包一下，意外地發現好似有陣光芒，但再望真又冇咗，應該只係陽光底下眼花睇錯。
 
呢一刻亞傑先真切體會到，古代階級問題的可怕，尤其佢身處皇宮之中；連一個嬪位宮中的三等太監都可以咁樣欺壓佢，咁皇后、貴妃等等呢…目前的李貴人仲有少許恩寵，假使日後皇上唔再嚟，首先遭殃的一定係佢哋呢D「前線員工」。而根據辦公室生存法則，想要自保，除非老闆睇得起自己。
 
亞傑將自己的處境代入為現代的辦公室，皇上當然係公司的老闆，眾後宮佳麗就係部門主管，而佢呢，就係不受重視的部門內的最低層員工。要改變現狀，單靠自己努力上進係唔夠，要加埋亞頭﹝李貴人﹞都合作，爭取做老闆﹝皇上﹞面前的大紅人。
 
要上位，主要有兩個方法：
一、賺到錢，即係有生產力，亦即係生到仔，在後宮內，生育有功的妃嬪，吃穿用度都會大幅提升，而且係一世的保障。當然，如果有能力，梗係生仔最好。但以李貴人的能力背景，生個女會更安全，因為唔會對其他妃嬪構成威脅。


 
二、擦鞋，眾所周知，擦鞋仔通常都會喺公司享福一段長時間，直到換老細。以皇上目前的年紀同健康狀況，佢哋應該未有咁快「換老細」。
 
至於點樣令到李貴人配合佢的行動呢? 首先佢要成為李貴人面前的「紅人」。作為一個三等太監，佢當然唔可以直接討好李貴人，因為見面的機會都唔多。所以佢選擇向李貴人身邊的兩個大丫環：春桃、夏荷埋手。要討好呢兩個十八九歲的女仔，最好就係送花，因為冇咩女仔唔鍾意花。正好亞傑而家負責打理花園，又正好佢當年為咗買動漫的周邊產品，曾經上網自學用鮮花制作各式各樣的香水、香包等等。因為佢屋企附近有幾間花店，佢每晚都會去執被棄置的花，返屋企加工後放上網賣。呢門手藝而家可以好好發揮喇。
 
經過一番用心制作後，呢一日，亞傑趁住午休時間，走去春桃同夏荷偷懶的小屋，佢之前已經了解過，每日李貴人午睡時間，會由二等丫環喺房內呆坐等李貴人起身，而春桃同夏荷就會喺呢間小屋吹水，同埋接收「下屬」的孝敬。因為亞傑(小夏子)係第一次喺呢間小屋出現，所以兩個大丫環都有D意外。
 
「小夏子，你嚟呢度做咩呀?」春桃高傲地質問。
 
「回春桃姐姐的話，小人將之前盛開的桃花同荷葉制作咗兩種花露，想請兩位姐姐試試。」亞傑帶著討好的笑容，遞上兩個白瓷瓶。


 
夏荷滿面興奮咁接過，打開聞咗一陣，「嘩~真係有荷葉的香氣，好好聞呀。」春桃見到夏荷興奮的表情，表面上裝作不屑，但心裡萬分期待咁接過另一個瓷瓶：「我個係花香。」
 
「春桃姐姐手中的係桃花露，只要每日早晚洗面後，滴幾滴喺掌心搓幾下，再按摩面部，不出半月，就會白裡透紅。」正正適合你呢個面無血色的賤女人，做下人都做得你咁串! 呢兩句亞傑只係心裡想著。
 
「而夏荷姐姐手上呢瓶係荷葉水，只要每日三次搽喺長痘的位置，一般兩日內就會消除。」夏荷愛食煎炸食物，難免成日爆瘡，但佢性格爽朗，不拘小節，所以亞傑敢勇於直言。
 
見到兩個丫環滿意咁收起瓷瓶，亞傑就離開了，而家就要等佢兩個主動上門，佢有信心，試過呢D產品的女仔，一定會搵佢再拎其他。
 
果然，三日後夏荷親自去搵佢，表示尋日剛長痘，但搽咗荷葉水兩次就冇事，所以喺小廚房拎咗小點心比佢做謝禮。夏荷知道三等太監宮女們都係食唔飽，因為佢哋的伙食都係要去膳食房度拎，但通常二等都會將三等的飯菜夾走三分一，因為大家都唔夠食啊。夏荷佢哋呢D一等大丫環，就絕對唔會缺少伙食，但佢哋通常係職責在身，長時間冇飯食，一直餓住的。因為夏荷的呢點細心同善意，亞傑對佢的印象非常好，所以又送咗幾款美容產品。


 
再過咗幾日，春桃都冇主動搵亞傑，但每次偶遇都欲言又止，好明顯係想亞傑送上門啦。於是呢日中午，亞傑又帶住兩款美容產品上門孝敬佢兩個，總算得到兩個大丫環的信任，可以開始下一步了。