港女穿越記: 5

但佢唔會幫寨中其他人做決定，所以佢喺晚飯前集合全部人，但只係提到有商隊會去南邊，如果邊個想去，可以搵佢，不論男女老幼都可以得到3兩(另外2兩會交比商隊，作為車馬費同食宿，比佢哋去南邊生活。)
 
眾人爭相討論，唔少上咗年紀的人，都係由南邊逃難過嚟，當年行路大約2個月，而家知道有機會落葉歸根，都決定跟住商隊返去。而有D幾歲的小朋友，知道會有人做佢哋的養父母，都希望去過新生活。
 
最後決定留喺寨內的人只有30人，大約三成，其他人會分批跟隨商隊出發。月兒問咗留低的人，發覺部分人係唔想去南邊，但想離開山寨的。於是趁著所有去南邊的人都出發後，佢就提出想走的人，可以得到五兩。結果部份已有婚約，或者青壯年，都決定拎錢走人。錢，任何時候都係放喺自己身邊最好，雖然而家靠住提供物資比萬花樓而有唔錯的收入，但環顧寨內的人，剩低的都係老弱殘兵，但大家的回報都差唔多，變相要養埋佢哋，都係拎錢走啦。

剩低的人有：
三個年過五十的老人（1男2女）
一個年約四十，有嚴重長短腳的男人
兩個十八歲的少女


三個十六歲的少年
四個三十至五十歲的寡婦，其中一個帶住三歲的仔
兩個八至十歲的小女孩

留低的人比月兒預算中多，但佢非常慶幸，除咗三歲的小孩，其他人都有自理能力，而小孩子有親生母親照顧，唔駛寨內的人幫忙。


佢再次將眾人聚集，道：「而家寨內只有我哋十七人，大家都各有長處短處，我哋只要互補不足，一定可以喺呢個亂世中安穩度日。」隨即拿出早已準備的碎銀分發：「今次每人分五兩，之後的收入就各自處理。寨內會提供住宿同每日三餐，其他就要靠你哋各自的努力喇。」

「其實大家一齊出力，不分彼此，效益會最大。但所謂親兄弟，明算帳，我唔想大家日後會爭拗邊個做多，邊個冇做。所以跟住落嚟，每個幫寨內工作的人，都可以得到工錢，每月結帳。另外後山的田，除咗糧食地之外，每人都可以獨自打理一塊半畋地，種菜、種糧或者種棉都可以。」



眾人都有點興奮，年壯的當然唔想供養其他人，老弱的亦唔希望再受到白眼或冷言冷語，呢段日子離開的人，好多都會冷嘲熱諷，覺得佢哋只可以喺寨內等死。而家聽到寨內提供三餐，自己又有半畋地，種d蔬菜去換錢換布料，都算係自給自足啊。而且退一步嚟講，手上有五兩呀，買粗糧都可以食兩年。


 
跟住月兒就公佈每項工作的工錢：例如種糧食、除草煮食、洗衫洗碗之類。

「以我哋目前的人手，唔可以繼續為萬花樓提供串燒肉食喇。我會同季大娘商量下其他賺錢的方法，大家有意見可以提出。而寨內暫時唔可以再收人入嚟喇，招個壞心腸的人，我哋都要受罪；招更弱的人，我哋又冇能力照顧。

「另外呢，寨入面以前最高峰時住咗百幾人，而家只有我哋十七人，所以我決定重新分配住所。我哋就當係生活喺同一個小村莊，每戶一間屋，其他空置的房，留低五間，其他全部拆哂，有用的木料就修補我哋的新家。免得空屋風吹雨打腐爛哂。」



正當杜月兒呢個穿越者在亂世中求安穩時，另一個穿越者正在失聲痛哭。


亞傑一覺瞓醒，就發覺喺一個陌生地方，隨即一陣記憶湧泉而來，佢知道自己「穿越」了，而且附身喺一個太監身上。作為一個宅男，佢都有睇過d穿越題材的小說、戲劇，但冇諗過會發生喺自己身上。但佢知道而家只可以接受現實⋯⋯⋯做好一個太監，否則必會受盡痛苦、折磨，甚至喪命。

化身為小夏子的亞傑而家係一個小小貴人的三等太監，主要負責灑掃花園，同埋去井度打水。幸運的係殿外不遠處就有個井，雖然係附近幾個宮殿共用，但只要早d出嚟打水，就唔駛排隊。有時仲可以聽到宮中的其他消息，在辦公室打滾多年的亞傑深知道一兩個唔起眼的消息或傳聞，背後其實包含好多嘢，關鍵時刻可以救人一命。

亞傑的主子係李貴人，因為當今皇上仲係皇子時，佢已經嫁入皇室，直至十年前皇上登基，將佢封為貴人，算係「宮中的老人兒了」,其實李貴人16歲嫁比皇上，18歲時被封為貴人，而家都未夠29歲，可惜喺後宮已經算係老，但皇上偶爾諗起，隔幾個月都會嚟一次，不過唔係每次都會做，好多時都只係瞓覺，話哂對住後宮眾多青春少艾，要留力呀。

靠住皇上呢少許舊情，李貴人的生活都算唔錯，至少皇后同寵妃們唔會計較佢呢丁點恩寵，又未至於做個透明人被宮中其他人欺負。但亞傑根據電視劇同其他太監的分享，明白李貴人仲爭個小孩，不論男女，只要生育有功，就多一份保障。

本來想安穩度日的亞傑，在半個月後卻遇到一件事，令到佢決心扭轉命運。




*因為只有一個港女太孤單了,所以加多個港男,嘻嘻