［校園/歡喜冤家］火星撞地球,撞撞下就有火花㗎啦: 第十五章 「公主殿下？？」
「呀玥你...唔跟佢哋去？」
「唔啦，啱啱用錯力好似扭親腳...」
「其實你唔使咁博命㗎...」
「我唔想輸比佢哋班衰人睇...我唔想...你哋比佢哋笑！」
「佢哋唔係你嘅前隊友咩？」
「係吖...或者可能唔係...
我一直都好想佢哋可以好耀眼...不過可能我太執著呢一點，到最後放得太多心機落去，佢哋厭倦咗我嘅執著...
最後...佢哋冇再同過我講嘢，仲開始嫌我麻煩嫌我多事...
結果我因為成日諗住呢樣嘢，期未考試考衰咗...仲比佢哋討厭咗..」
「但係...你以前唔係D班小公主嚟㗎咩？」
「一開始可能係嘅 ，但係因為佢哋大家都有自己主見...而我只係想快啲做嘢所以要佢哋聽我講...
結果呢個小公主因為太任性所以比人除去咗身份得番公主病...
然後佢又去咗第二班...禍害其他人..」
「唔係㗎」
「梓允呀...其實我知我好難頂...」
「唔係㗎！雖然你余心玥係好任性又好麻煩...
但係你係第一個因為流浪貓而喊嘅人，為咗我哋嘅尊嚴跑到腳跛，就算前途有幾多風雨都不顧一切咁衝過去嘅奇蹟少女！
所以公主殿下...你已經衝咗好耐喇，跟住落嚟就交畀騎士團嘅我哋啦！你已經唔係一個人㗎啦你有我，有呀男，有呀悠...有5C班。呢度嘅每一個人都好鍾意你㗎！所以就安心咁將背後交畀我哋啦！
公主殿下...」
「梓允...」
佢塊面已經同曬好似個蘋果咁，因為我講得太直白所以...但係我係真心㗎我係真心讚佢㗎
「對唔住呀我講到好似表白咁但係呢啲嘢都係發自我嘅內心...」
「我明㗎喇，咁今日起你就係我嘅專屬騎士！譚梓允」
結果運動會就咁樣告一段落，我同呀玥嘅關係都越嚟越好，因為我好想守護呢個小公主嘅笑容...
「今個禮拜嘅星期五係萬聖節日喎！」
唔記得介紹我哋學校有一個有萬聖節日嘅活動，我哋學校好特別會有鬼屋比學生玩，雖然我對呢啲嘢冇乜興趣不過始終都係有少少期待嘅！
「呀Sun，你代我哋班去鬼屋有冇呀得唔得呀？班友仔平時鬼咁大膽，一聽到去鬼屋就全部都走曬」
「可以呀冇問題！」
「但係仲要多個女仔喎...心玥啦不如」
「但係呀玥唔係要表演咩？」
表演？原來萬聖節活動有表演㗎..
原本我諗住問下我隔離嘅呀玥，結果佢只係對住呀男猛咁點頭...
「呀moon表演嘅時間同鬼屋嘅時間係唔同㗎所以佢可以去㗎！」
我聽到心碎嘅一下...再望一望呀玥我見到佢垂頭喪氣咁趴咗張枱度
「既然係咁就心玥你去啦得唔得呀？」
佢勉強咁做咗個ok手勢...
之後小息我先知發生緊咩事
「頭先你點解唔救我呀~你明知我最驚就係鬼屋㗎喇！」
佢捉住呀男係咁喺度嗲，就好似貓仔嗲主人咁樣...
其實我有一樣嘢想問好耐㗎啦...點解呀男同呀玥好似咁friend咁嘅...雖然話佢哋當對方係姊弟嘅存在但係都男女授受不親㗎嘛...
我咁係...呷醋？
「鬼叫你自己又要懶叻咩，你唔好嗲我呀你靠梓允啦！」
「梓允~你係騎士嚟㗎嘛！你要保護我㗎嘛！咁...做任務就靠你啦我淨係負責呢埋眼！」
又係咁...都話咗你唔好咁搏命㗎啦...上次游水又係咁，到最後個游水比賽因為個場封咗嘅關係所以取消咗
如果唔係...
「公主騎士...咦~你哋又玩咩呀」
話說呢條友 ，初初識佢嗰陣明明好正常，依家就成日串人，乜你哋啲反差咁大㗎
「我唔想同你講嘢吖 ，梁學男！我去練表演啦！」
「請盡情愚弄我啦！oujo sama！（王女大人）」
「請收埋你污穢嘅宅男思想...」
據聞萬聖節嗰一日，話劇社都會表演以德古拉伯爵做主角嘅故事，作慶節。今年都唔例外，不過聽人講個故事內容除咗佢哋內部嘅人知道講咩之外，其他人係唔知道嘅，因為要保持神秘感。所以我都幾期待！總覺得嚟咗呢到之後每一樣嘢都會引發到我嘅期待感。
「梓允！你記住一定要認真咁樣睇個表演！」
係呀，話咁快就到萬聖節啦！話時話覺得呢一排時間過得特別快，係咪呢啲就係所謂嘅大咗之後硬係覺得輕鬆嘅時間特別少呢...
話劇社嘅表演係喺上完英文堂嘅之後嗰一節，但係作為表演嘅呀玥同埋劉芷韻一早就走咗，我而家先知原來呀男喺後台嘅人，睇佢個樣又唔擔得又唔抬得個樣似嗰啲毒男多啲
「邊個係譚梓允呀！！！」
「我係？」
「啱啦！跟我嚟啦。」
就係咁我人生第二次比個女仔拉走咗？第一次係呀玥...問佢而家要做啲咩佢又唔答我就係一尾咁樣拉我去禮堂嘅方向。
「行快啲啦你再唔化妝就趕唔切㗎啦！」
「化妝？化咩妝呀」
我而家成個腦都係黑人問號
「你唔好理啦！總之你因間配合返你嘅partner就得㗎喇」
「喂！唔係呀~聽我講埋先啦」
行行下我先發覺自己去咗... 學校化妝間？
「呀！梓允你到啦，佢嗰妝我化喇你去幫其他人」
我面前嘅係一個著住女巫衫嘅女仔，聽佢把聲...係呀玥呀
但係唔同嘅係佢面上面畫咗嘅成熟妝容，同佢本身清純嘅樣完全唔夾。咁樣嘅呀玥我都係第一次見
「對唔住呀本身做呢個角色嗰個人冇返到，臨時臨急要搵到個同佢差唔多高著到佢套衫嘅人，所以幫下我呀」
其實佢都仲未等到我答覆，已經著喺我塊面係咁搽粉...唉算啦，邊個叫你係公主咩
「其實你個角色好簡單㗎咋冇對白，淨係要喺最尾嘅時候出嚟拎住把銀劍斬落我度，放心啦後台會比指令你㗎啦，你跟住啲指令做得自然啲就得」
因為佢幫我化妝嘅關係，佢將佢塊面貼到我好近...我估呢個距離我可以睇清楚佢有幾多條眼睫毛...佢身上面有一陣好香嘅香味...係噴咗香水定係啲化妝品嘅味呢？我分唔清....但係唔知點解我想維持喺呢一刻...
「幣啦我將底粉當咗胭脂搽！但係明明呢到冇胭脂㗎喎..」
望到鏡入面嘅我，我先見到我塊面好紅...
呀玥以為佢搽咗胭脂落我度其實得我一個先知...我係因為佢而面紅
唔通...唔會嘅唔會嘅！一定係因為佢靠得我太近我一時唔慣先會面紅嘅啫...
[唔好否定自己嘅感情］
我又諗起龍哥嘅說話...或者可能我真係...
「唔得呀嚟唔切啦！叫後台就一就啲燈光喇，呢度係劇本你一陣間睇下自己嗰part啦，我要出去先啦」
呀...佢走咗
諗返去啱啱講嘅嘢佢話我個角色係要喺最尾嘅時候斬佢，即係話我應該係做佢嘅仇人之類啦？等我練一練憎恨嘅情緒先...
我對住份劇本嘅對白（其實都係嗰幾句）連咗幾次嗰幾句嘅感情，已經將憎恨嘅呢種感覺發揮得淋漓至盡呀。既然係咁，一於去後台嗰度睇佢哋表演啦..真係去體驗一次個劇情都好
「喂！梓允未到你出場㗎喎」
「唔係呀男，我出嚟睇下嗰個故事發展咋」
「哦~咁好啦。呢場係第二場嘅中間位，係魔女啱啱識你嗰個角色嘅時間，soundtrack ready！music go~light ready」
見到呀男咁忙我都唔好意思再同佢講嘢，唯有靜靜咁樣睇個故事發展啦。
舞台上面嘅呀玥我識嘅佢完全係兩個人，喺呢個表演上面佢冇曬我平時嘅佢嗰份任性同埋可愛，淨返低嘅只有佢嗰個角色即係魔女嘅嗰種成熟同埋妖媚。
「係咪只要殺咗德古拉，我就可以得到解決啦！」
喺劇本上面角色設定嗰版，冇記錯嘅話呀玥呢個角色就係要殺德古拉伯爵嘅反派，但係其實佢係因為想得到自由，唔想再畀吸血鬼嘅呢一個身份束縛想同佢鍾意嘅人一齊，先至不禁殺死吸血鬼嘅首領去獲得人類嘅身份。
都唔知話佢化妝化得好定係佢演技好，佢講嘅每一句對白喺邪氣之中又帶點可憐，明明佢係反派但係令人覺得佢好慘，喺故事嘅最後呢個魔女畀我殺咗硬係覺得有啲可惜
「諾諾點解你要咁傻，你明知道你係冇可能殺到我！」
「哥哥...或者愛情係可以令人覺得有奇蹟嘅可能...」
（魔女倒下了，手心裏持著屬於愛人的指環）
「或者應該由佢殺你，你先會真正心息」
魔女真係可憐呀，為咗嗰個人付出咗咁多仲要畀佢殺
佢...？之後嗰場係終場嚟㗎喇喎，等陣咩話？愛人？
呢個時候先恍然大悟，我嗰個角色其實一直就係魔女嘅愛人...
我一直以來以為自己係佢嘅仇人....結果...
諗到...呢度我隻眼充滿咗淚水，作為一個觀眾我諗我會毫不猶豫咁喊出嚟，但係而家我仲點出去呀...
如果我仲用返好憎佢嗰種感情去做...
「喂！梓允出啦！道具ready啦！！」
聽到呀男嘅呢聲指令，我個腦已經空白咗
我淨係可以用我嘅本能，好似個機械人嘅行咗出去用番原本嗰一套嘅感情，冇辦法緊張到完全控制唔到自己...
「呀承？」
「魔女受死啦！」
我本能咁樣一刀斬咗落去，本能咁樣攬住佢，本能咁樣喊...
「多謝你，畀我喺呢幾百年入面遇到你」
［mic mute ! Soundtrack go!]
「白雪公主玻璃棺材入面畀王子錫醒，真係好浪漫」
「你知唔知點解你叫呀承呀！因為我會承諾用我呢一整生嚟陪你」
［劇終］
呀玥...呀玥！
套劇完咗喇，個幕已經慢慢咁閂咗
台下觀眾嘅喊聲同埋長些已經佈滿咗全場，而我依然仲抱住緊瞓喺玻璃棺材入面嘅呀玥
「喂...我返嚟啦~傻佬」
「呀..對唔住呀，入咗戲添」
套劇完咗之後我哋都落番妝，換返校服，喺上去嘅過程之中不斷聽到學校嘅人話呢一套劇係呢幾年裏面最好嗰套，亦都唔少人喺度讚魔女嘅演技好好又或者場景好靚
但係聽到最令我震驚嘅一樣嘢係，最後出場嘅呀承將嗰份曾經嘅愛意同後悔仲有憎恨，三種複雜嘅感情加埋一齊表現出嚟，做得好好。而且最後攬住魔女喊嗰下好催淚。
「喂！估你唔到喎，咁好劇嘅完全拿捏到觀眾嘅觸動」
「睇到我哋全部都喊曬出嚟呀！」
一返到班房我就係咁畀同班嘅同學讚，仲有唔少人叫我轉過去話劇社幫手
但係呢啲嘢都係唔好搞我啦，入戲咁深好容易就出唔返嚟
諗起啱啱以為魔女就係呀玥嗰種心痛，果然呢一行都係唔啱我
「女主角返緊嚟喇！」
「預備321！」
「恭喜曬呀！」
佢哋一見到呀玥返嚟，就好開心咁喺度同佢慶祝。又有花炮，又畫曬白板咁。
「喂~幾時開始㗎」
「多謝呀，咩幾時開始吖？」
「你同梓允囉，嗱，唔好推呀出pool飯都係要請㗎」
「咩開始呀冇開始呀，只係咁啱我partner冇返所以我先搵佢替咋」
「冇拍拖都咁真？頭先你哋嗰段感情戲真係睇到出曬眼淚」
啲人開始以論人頭先嗰段劇，仲有各種嘅劇情
佢哋仲幫我同呀玥改咗個名叫承諾cp？
「對唔住呀叫你好好咁樣睇表演結果叫咗你去做表演，搞到你冇得睇添...下次再補返啦
同埋你啱啱做得好好呀...我差啲就動咗真情啦」
...
［我差啲就動咗真情啦］
呢個動咗真情係咩意思呀...唔好咁樣折磨我啦公主殿下！
我個心而家好亂呀！！！