［校園/歡喜冤家］火星撞地球,撞撞下就有火花㗎啦: 第十六章 「同性戀有咩問題？」
之後係鬼屋...
其實本身成件事係唔恐怖嘅，因為鬼屋入面本身就有光，而且扮鬼嘅同學冇化妝係完全睇到佢哋個樣，不過呀玥依然係捉實我背脊唔放
「唔好吖...」
我望向佢驚嘅方向，嗰度放嘅係一張手術枱嘅佈置...
枱上面嘅道具雖然唔夠迫真，但係喺呢個燈光下都的確有幾分真實感
「你如果驚嘅話...就捉實我啦」
本身我係諗住拎轉頭同佢講，結果佢成個人撲咗埋嚟，佢個頭啱啱好喺正我胸口嘅位置。
「喂！唔使開燈啦？呢兩條友咁閃」
「呀...唔好意思呀... 我依家去做任務」
「其實如果余同學驚嘅話，佢係可以出去先㗎，不過譚同學你要做埋佢份任務」
係黃浩輝同...呢個人冇記錯好似係隔離班嘅，好似叫...秦咩話
「呀俊你帶余心玥同學出去先啦。」
係吖，我記得佢啦，佢叫秦俊係科學部嘅人
冇記錯...之前龍哥好似話呀玥係因為佢先轉班，即係呀玥之前話鐘意嘅人係佢啦？
呢條友雖然唔樣衰，但係都唔靚仔，仲人如其名蠢蠢地咁...點解呀玥會鐘意佢㗎，計我話呀男都靚仔過佢
呀...我咁比呀玥走咪即係益咗呀玥？心情有啲煩躁㖭
「譚梓允，你可以繼續做你嘅任務啦。當然你都可以選擇放棄，不過嗰位一定好嬲。萬聖節任務佔全年3%㗎」
「浩輝，我哋班少咗個人，可唔可以鬆少少...」
「譚同學，請公平競爭。任何意義上」
~~~~~~~~~~~~~~~~~~~~~~~~~~~~~~~~~~~~~~~~~
「俊...秦俊...唔使送我出去啦，我喺度等梓允」
「睇嚟，你又搵到第二個目標」
乜嘢又，明明一開始就係你拒絕我先。
仲用個咁嘅理由，真係咪當我冇腦啦... 係人都知你鐘意佢鐘意咗五年啦
「係吖！我恢復能力好高。你唔使驚我諗唔開」
「唔係呀，呀Moon....」
「得.㗎.啦」
「我好好，你如果都想我好就從此唔好再出現喺我眼前。」
鐘意一個人，真係好痛苦。尤其係你知自己冇機會仲要笑面迎迎咁對住佢。sorry吖，我做唔到...你比我忘記你啦......
梓允....到底我應唔應該繼續對你...
~~~~~~~~~~~~~~~~~~~~~~~~~~~~~~~~~~~~~~~~~~
「呢個就係你將一個怕黑嘅女仔抌喺鬼屋嘅理由？」
原本諗住做完任務就番去揾呀玥，結果聽人講先知佢冇番過嚟。
死啦，我仲將佢怕黑講埋出嚟，佢會唔會斬死㗎..
「劉芷韻，你唔知呀玥怕黑㗎咩！你仲叫佢去？」
「我都唔知...佢自己就唔識推嘅咩！一定係我錯㗎？」
「咩呀！本身就唔係搵佢嘅，係你話唔使表演先...」
「得啦，呀男唔好嘈啦。呀玥都係喺學校啫，唔會點嘅。最驚係秦俊同佢講咗啲咩啫」
「我去搵佢啦...件事係因我而起」
「叫老師開咪，咪一了百了囉」
唔知點解，佢哋愈講我愈擔心呀玥。聽佢哋講呢個秦俊當年傷得佢好深。
我已經ready好比佢鬧㗎啦。
「唔使搵啦，我冇事」
雖然已經平復咗，但係睇得出佢喊過嚟。
秦俊對你嚟講，真係咁重要咩？
佢番嚟之後我將全部人都佢怕黑講咗出嚟，佢都冇乜反應好平常女仔咁，但就係太平常啦！平時嘅佢一早已經鬧咗我...
但係，我冇點表示出嚟。始終...我自問冇資格再提呢件事。
放學嘅時候，除咗啲唔該，傳過去呢啲必要嘢，我同佢冇傾過計...直到...
「連亞聽日番嚟，佢叫你同我去接佢」
佢show咗佢手機嘅對話內容比我，
［HiHi~玥玥我聽日番嚟啦！你同新嚟個新生熟唔熟？我一陣send張相比你。你聽日同佢一齊嚟接我啦！］
連亞，呢個人喺我以前啲朋友。性格極其開朗，而且用依家啲女仔嘅語言去形容，佢應該係一隻小奶狗。不過表面嚟㗎咋，實際上佢可以做得粗口專家。而且如果個女仔唔啱佢眼先，佢可以鬧到人哋喊 。呢條友喺9月嘅時候去咗日本交流，依家過咗兩個月終於番嚟啦。
「咁聽日十二點喺機場等啦」
呀，就係咁我就約咗呀玥啦。
話說今次都係我第一次同女仔行街，雖然係機場不過都叫第一次吖。我都係快啲發個好夢，聽日唔好再遲到。
第二日因為早咗少少出門口，於是我就行過巴士站唔搭小巴，結果比我見到個頭髮長長帶眼鏡加口罩嘅女仔....
「呀魚？」
佢望到我之後好怕醜咁遮住咗塊面，之後又扮偷睇咁揮咗一揮隻手
當我諗住行過去嘅時候佢已經跑咗去後樓梯走咗啦...
果然比起陰晴不定嘅小野貓我都係鐘意無辜嘅小白兔
去到機場，已經見到呀玥等緊我。佢話連亞班機delay所以我哋喺機場行咗陣
「你...冇事啦嘛」
「冇事~我會有咩事」
「但係琴日...」
「你話我同秦俊？冇嘢呀，純粹係我單戀佢咁簡單。」
「係呀...愛情呢啲嘢過咗去就算啦...何況你咁好...」
「係咩，既然你覺得我好咁不如我哋拍拖啦」
我明知佢講緊悔氣說話，我明知係假嘅...我明知㗎
但係....
「講笑咋，連亞到啦」
「亞亞~我好掛住你吖~」
「玥玥bb~我都好掛住你」
吓，發生咩事啊！我唔get喎...咩料？問號問號？
「喂喂！ 男女授授不親！」
「唔緊要啦~亞亞係姊妹」
姊乜嘢妹，男㗎！條友男㗎！你唔好見佢得意就當佢女嘅先得㗎！
「對唔住吖允允，係咪我冷落咗你。」
「呀玥話晒都係個女仔嚟㗎，你條麻甩佬唔好癡過去！」
「人哋邊忽麻甩！不過叫得呀玥~估唔到你哋咁快熟咗~呀~我好肚餓吖~去食嘢啦」
係呀，係呀點熟都唔夠「亞亞」你同「玥玥」熟啦
原本呢，係就係plan好咗同佢哋食完嘢行街嘅，結果呀玥食食下飯收到個電話話有忽事就走咗
依家好啦，得返我同連先生兩條友。
「喂，兩條友生咩街呀？返歸打LOL啦」
「譚梓允呀...其實呢我呢...屋企人去咗旅行吖...可唔可以借你屋企住一晚」
「吓...唉是旦啦，一晚咋。」
呀係啦，跟住我就帶咗呢隻嘢返屋企。
巴士沿途佢都揸住部電話，同唔知邊個傾緊計
「唔好話比佢知？吓點解」
「唔好話比邊個知啲咩」
「呀~冇嘢」
...古古怪怪
「吓~~~佢居然係？」
喂點呀，自言自語咁
本身諗住偷望下邊個，點知我淨係見到一個動漫icon同聯絡人set咗做戰友嘅人，等陣個icon咁熟嘅。
好似係呀魚㗎喎！
唔通...呀亞識呀魚？
「喂，呢個icon係咩動漫嚟，我好似有個friend都睇」
「呀！呢套嘢叫地縛少年花子君。好hit㗎！你嗰個咩friend嚟㗎~咁識貨嘅」
「呀魚...」
「呀玥？」
「魚呀，一條條嗰啲魚個魚」
「咩呀，呀....呀魚...哦~好」
er...係呀，講完呢句我哋就靜到落巴士啦。
之後我哋返咗我屋企，沖咗涼，打咗陣機，食埋晚飯，準備瞓覺。
「好啦！譚梓允~真心話時間！」
「咩真心話，女仔咩，臨瞓前講下八卦」
「你兩個月冇見過人哋唔通冇嘢想問嘅咩~」
呀...咁啱都有啲嘢想問你，雖然唔關呢兩個月事
「問題一 ，你呢兩個月發生咗啲咩
問題二，呀魚係邊個」
我就由開學撞到呀玥開始，到萬聖節嘅事講晒比佢知
連埋我覺得呀魚係呀玥家姐，連埋我將呀玥認錯係呀魚
「wow~你都幾多姿多采。咁所以係邊個」
「咩係邊個」
「你鐘意嘅人係你所謂嘅巴渣妹呀玥，定係嗰個咩呀魚」
吓，咁仲使問嘅，梗係...
係喎....係邊個呀
我本身九月開始嘅時候，好肯定自己係鐘意呀魚
到咗十月頭，我都仲覺得鐘意呀魚
十月中，龍哥叫我唔好否定呀玥之後我開始動搖
到咗依家...到底我鐘意嘅係...
「妖，你個死蠢唔想同你講嘢」
「喂公平啲，你問咗我一個問題我問番你」
「唉，問啦問啦。你條友都唔會問到啲咩」
「你同呀玥係咩關係？」
「呀~有啲意思。我同呀玥其實係地下情」
吓...咁唔怪之得佢哋咁親溺啦...原來我係電燈膽...
我唔比呀！我唔比我嘅公主同呢隻嘢一齊呀！
先唔係呷醋呢啲咁小氣嘅理由，係純粹我覺得呢隻嘢襯唔起佢
「講笑咋，我唔鐘意女仔。玥玥係我朋友」
「吓」
「我係同性戀者」
「哦~你係gay嘅？你...係 gay嘅，你....哦~」
「你可唔可以唔好咁冇禮貌，同性戀唔係一種病嚟㗎！」
「呀，唔係。係有啲突然啫，我唔反對同性戀嘅，放心啦。 但係我咁優秀你會唔會愛上我㗎」
「咁你放心啦，同你哋靚女一樣我哋都會睇靚仔」
_________________________________________
（連亞視覺）
我係連亞，我....鐘意男仔
雖然依家好多人都話支持gay，支持彩虹。不過...實際上喺生活大家依然係覺得我哋好奇怪， 好污糟。
喺呢一段日子入面，只有一個人係一直陪我，為我為我哋呢群人發聲。
「點解佢哋蝦你」
「因為...因為我鐘意男仔」
「吓，所以呢？你冇問題㗎。」
「佢哋話鐘意女仔嘅...先係正常」
「唔好理佢哋啦！我都鐘意男仔，我同你一樣，以後哋就係朋友！我叫玥玥」
由嗰日開始 ，我就認定咗佢永遠係我嘅朋友。所以，我想佢幸福。以依家我發現佢嘅幸福出現咗啦
「唔好話比佢知？吓點解」
唔好話比梓允知玥玥住佢隔離屋....明明講咗就有好多發展機會！
「唔好話比邊個知啲咩」
「呀~冇嘢」
呀 ，我太誇張啦，要細聲番先
［仲有你可唔可以幫我試下秦俊係咪gay］
「吓~~~佢居然係？」
秦俊...秦俊係gay嘅？？？
「喂，呢個icon係咩動漫嚟，我好似有個friend都睇」
「呀...呢套嘢叫地縛少年花子君...好hit㗎。你嗰個咩friend嚟㗎？咁識貨嘅」
「呀魚...」
「呀玥？」
「魚呀，一條條嗰啲魚個魚」
吓，咩呀呀魚咩即係玥玥囉。佢姓余㗎嘛。
「咩呀，呀...」
［唔好話比梓允知我住佢隔離］
係喎，啲街坊都叫玥玥做呀魚㗎喎
「呀魚...哦~好」
__________________________________________
第二日，我同連亞一齊番學 。
一番到去就見到呀玥喺操場同幾個好似D班嘅人嘈交。
又話冇曬交集嘅？
「同性戀又點！有咩問題！你哋好快啲del咗校園secret個post！」
本身諗住行近啲偷聽，結果好快我同連亞就比人啦走咗。
「sh...你哋唔好出聲先 ，全校都搵緊你哋兩個」
係麥芷悠 ...
「搵緊我哋？點解嘅。」
佢開咗部手機，將一個ig story show 咗比我哋睇
「琴日有人cap咗連亞個story同埋一張喺海寧閣偷影嘅相send咗出去，話你哋琴日搞嘢...」
個story張相的確係琴日影，不過隔離就加咗一大堆造謠嘅句子 。
「吓，只不過係去friend屋企玩同過夜咋喎」
「係吖...但係因為連亞你嘅性取向....而且你拎咗交流個機會，好多人睇你唔順眼」
「對唔住呀譚梓允... 我連纍咗你，我出去講清楚」
「唔好呀！呀玥依家啱啱幫你哋平息咗，你依家出去只會令佢哋繼續傳！」
呀玥....又係咁。為咗朋友自己去出面....
「總連亞就係污糟！你嘅朋友冇個好㗎！抵秦俊唔鐘意你！」
「啪」
「余心玥你打我？」
「打你唔起吖依家！」
弊啦！佢哋開始打起上嚟啦！呀！呀玥比人推跌咗。唔理啦，講就講啦！
「你哋做咩打交！邊班㗎。寫口供紙啦」
「5D葉翠翠
5D張家樂
5C余心玥 」
「5D嗰兩個跟我過嚟先」
佢哋終於走咗，我終於可以出去扶住呀玥。
「你冇事吖嘛」
「吓...梓允 ，冇呀..」
「謠言咪由得佢傳囉，使乜咁博」
「謠言有時可以害死人㗎，仲有我係唔抵得佢鬧我啲frd吖！」
我扶咗佢上班房先知，今次個謠言應該傳得幾大。
平時我同呀玥前後腳番佢哋已經起曬控，今日佢哋淨係靜靜咁望住我哋，唔出聲。
連呀男都只係行過嚟拍下膊頭細細聲話加油就走咗。
miss tang 廖sir都係用一個關心嘅眼神望住我哋，唔出聲。
今日嘅堂特別靜，上上下堂，外面傳嚟一陣喊聲。應該係隔離班嘅連亞。望去走廊見到佢同Miss Wong行過。
但係全部人都唔敢望，得呀玥一個好緊張咁望住佢。
「Miss我想去廁所。」
「唔得依家上緊堂」
...
「sorry miss」
佢冇理到老師嘅反對就出咗去。
平時就算老師唔比佢，佢都會用嗲個老師嚟達到目的。但係今次...
佢一出去就去咗半堂。返到嚟，佢眼裏已經失去咗光彩。
［5C班，余心玥請即到教員室］