［校園/歡喜冤家］火星撞地球,撞撞下就有火花㗎啦: 第十四章「可能啦？？」
嗰晚我哋四個練完就喺運動場上面休息
攤喺跑道上面閒談，唔理身上面有幾多汗唔理地有污糟..
「我有啲口渴吖！你哋飲唔飲嘢？我去買」
「呀！呀玥你去運動場出面間7仔買啦,條路冇咁黑又冇咁貴,我要能量飲品」
「蜜桃茶呀！唔該呀玥」
「好吖,梓允呢？」
「陽光檸檬茶」
「陽光檸檬茶？」
「都話我知你㗎啦~我好快番㗎啦」
「小心啲唔好跌親呀！」
呀玥走咗之後，得番我同龍哥佢哋...成個氣氛靜咗好多...
「心玥...幾好呀可」
龍哥咁問...唔通...
我都係如實答啦
「佢好努力又好聰明，係呢...其實點解佢要轉入C班嘅？唔會係比人欺凌卦！」
「傻啦，佢以前係D班出咗名嘅小公主嚟㗎，不過聽人講佢係想放低嗰個人...」
「嗰個人？」
「佢叫秦俊，冇記錯應該係科學部部長」
原來...係想放低心入面嗰個人...
唔知點解有啲難受...係咪因為我代入咗龍哥嘅思想...
「龍哥....咁你點解唔去追？」
「追？追邊個？」
「你唔係想抒發你對佢嘅感情，先講呢啲嘢㗎咩」
「....我係同緊你講呀梓允...」
「我？我唔鐘意呀玥呀...我當佢係朋友咋」
「戀愛呢啲嘢，我經歷得多過你啦...有啲嘢局外人一眼就睇得出...唔好否定自己嘅感情」
「但係我....」我真係鐘意呀玥咩？
「算啦，你依家咁我點講你都唔聽入耳㗎啦，當比個機會自己，信龍哥一次，呢個月唔好否定對心玥嘅感情，或者你就揾到個答案比自己....」
聽到龍哥呢一番肺腑之言，或者我真係要feel下我個心係想點....
我到底係唔係真係鐘意余心玥呢一個人
「同樣比個結局我...」
「咩話？」
「呀...冇，心玥去咗好耐啦你去睇下佢啦」
___________________________________
（龍哥視覺）
「你真係有必要咁幫佢咩？」
「見到梓允...好似見到以前嘅自己....一直唔知自己內心嘅感覺...到頭來錯過咗時機都錯過咗佢...」
「咩話！麥凱龍先生既然講啲咁感性嘅嘢？」
佢用佢好瘦嘅手搭起我膊頭上面，明明佢矮我一半咁濟，仍然好牽強靠過嚟...我真係完全輸晒比你...
「...李子盈！其實我....」
「叮嚀嚀...」
「唔好意思吖！喂？呀B？冇呀我練跑咋....」
望到佢依家咁幸福嘅樣...我冇咩可以再強求
要怪就怪當初我冇主動...有啲嘢錯過咗就係錯過咗，個天唔會比你重嚟...
或者...成全佢哋就當係對自己嘅拯救啦...
「得啦....你啱啱想講咩？」
「冇嘢啦...」
李子盈...就等你成為我心底入面嘅一個回憶啦...
「話說聽日跑接力之前你得唔得閒？我有嘢同你講..關於...我男朋友㗎」
由我否定自己感情嗰一刻...就注定有呢個結果
「可以呀」
__________________________________
因為余小姐佢好耐都未番嚟，所以我去咗揾佢....但係就比我見到呢幕...
一個着我哋校服嘅女仔比一班細路圍住，嘢飲散落喺周圍...佢手上面係...一個紙箱？
「你哋快啲走吖！唔好再過嚟！」
佢好惡咁對住啲細路大叫，我跑住過去搵佢結果見到紙箱入面嘅...係一隻貓仔？
「呀玥！」
班細路見到我就即刻走曬...或者我唔讀書轉行做黑社會收下保護費都有錢賺
「梓允...呢隻貓...呢隻貓」
近睇先見到佢應該喊過嚟，手上面嗰隻喺紙箱嘅貓仔同佢有幾分相似...
呢一刻我好想將佢抱住....或者...？
「唔好意思吖...等咗我好耐吖？啲嘢飲跌晒落地㖭，我再去買過...」
「對唔住吖...我唔可以幫你...我要一班好重要嘅人...」
佢抹走面上嘅眼淚..仲震緊嘅手放低手上面嘅紙箱，又擺番平時嘅笑面...
我鼓起咗勇氣...
「妳係咪想養佢...？」
佢呆咗望住我，過咗三四秒之後又點下頭示意
「咁又唔係唔得嘅...我自己一個人住又都有少少幾鐘意貓...或者...？」
佢一下子好似由落雨變咗出太陽咁，笑得好燦爛，比起以前任何一個笑容都更加真實，或者我咁做係...啱嘅？
「真係㗎！梓允你肯養佢呀？放心啦~我每個月會幫你照顧佢一兩個星期㗎，仲會幫零食！」
「真係太好啦~意意！快啲多謝哥哥啦」
「意意係...佢個名？」
「係...係吖！佢好似意大利粉吖嘛...唔好講咁多啦，我哋番去搵龍哥佢哋先啦」
「我諗唔使啦，佢哋WhatsApp咗我，話要番去啦，我都送你番去啦？」
「原來十點咁晏㗎啦！唔使啦，我仲要去一轉醫院，你番屋企啦」
既然佢咁講...好啦
反正我仲要番去幫呢位新成員沖涼同安置佢
「聽日見！」
就係咁，我屋企就多咗位新成員啦
第二日朝早，因為我係其中一個班代表，所以要好早去到運動場準備
總之，希望今日5C依然光彩！
［第二十九屆莊記運動會正式開始！］
［我代表全體學生的名義保證，為咗體育的光榮同班級的榮譽，我們將以真正的體育道德精神參加本屆校際運動會，尊重並遵守運動會各項比賽規則，致力於一個友誼第一，比賽第二嘅運動會。］
［男子一百米第一次召集］
［女仔跨欄最後召集！］
「5C班！加油」
___________________________________
（龍哥視覺）
今年嘅運動會唔知係咪因為多咗嗰兩個人，所以今年大家特別努力...
終於到咗午膳嘅時間，喺今朝早子盈叫我午膳去跑道揾佢
喺揾佢之前，我去睇一睇自己班嘅總分
「點解會咁㗎！我哋班得30分？」
望到我哋班嘅分表簡直難以置信，明明大家都好努力...點解會仲少過以前...
如果知到呢個分數...佢哋一定會好唔開心
我慢慢咁行去跑道...等子盈同...佢男朋友
去到跑道上面，我見唔到子盈嘅身影...佢係咪已經走咗啦...
突然我聽到一聲大叫
「麥凱龍！你最愛嘅女人依家係我手上！如果你要得到佢就接受本魔女嘅挑戰啦！」
我拎轉頭一望，見到心玥拎住個大聲公喺看台上面對我「宣戰」
喺佢隔離嘅...就係子盈
「點吖！仲猶疑吖？咁你就同佢講拜拜啦！」
「講明先吖呀哥！我只會接受盈盈呢個吖嫂㗎！」
係呀悠...或者...
「我接受你任何嘅挑戰！」
或者我唔應該再放棄呢個機會
「好啦！依家5C班落後緊~如果你可以拎我哋班拎第一，我就將李子盈交比你！」
我發誓，無論任何挑戰，我都會試！
下晝嘅比賽好快來臨，因為我參加嘅係田賽，所以要拎第一都唔係冇可能，只要我贏晒大會記錄...就
子盈....
的確...我開頭嘅比賽都好順利
［5C班麥凱龍同學跳遠破大會記錄！］
［5C班麥凱龍同學標槍破大會記錄！］
但係一去到班際接力...
「龍哥你點呀...你面色唔係好對路...不如我代你跑」
「唔使啦...我撐到...我一定要贏晒佢」
或者係我太高估自己...我根本撐唔住
真係比賽開始嘅時候我已經雙腿無力，跑第四...唔得愈嚟愈落後啦...
或者...個天真係玩緊我，比緊假希望我....
我開始見到幻覺...係天使？子盈....
我好似掂到佢隻手...將手上面嘅嘢同我個人...交曬比佢啦...
係昏迷之間...我感覺到一絲好温暖嘅吻感....
___________________________________
今次幣啦，跑第一棒嘅龍哥落後咗咁多...就算靠田徑隊嘅子盈...都唔會追到咁多
我同呀玥又唔跑開...或者要放棄啦
我聽到隔離班嘅跑手笑緊我哋...
「果然C班都係得個樣」
「仲以為多個余心玥會好幾多」
「一早睇余心玥唔順眼，今次抵佢死」
或者C班都係....
「你班狗眼看人低嘅垃圾冇資格睇小我哋呀呀呀呀呀呀呀呀呀呀呀呀呀呀！！！！！！」
一鼓好強嘅衝力向我嚟緊...係呀玥！佢跑得仲快過隔離嘅田徑隊...或者...呢個世界有奇蹟
佢由最後一名追過咗第四名，第三名！
佢依家同第一名只係差兩米！
「譚梓允！之後就交比你啦！」
佢成個人向咗我仆過嚟，手上面嘅接力棒仲充滿住呀玥嘅温度...交比我啦！
我同第一名已經由兩米到平排，但係似乎我哋都超越唔到對方...極限啦已經...
「果然余心玥都係貪求名利嘅人...D班逃脱咗佢嘅魔爪，佢就去搞C班」
...哈
「咁多嘢講，唔驚冇氣咩」
「咩話？」
突然我發現自己隻腳可以再快到...或者我見證到我自己嘅奇蹟...
［5C班第一名！］
其實跑完之後我只係快咗隔離線兩三秒...不過
「估你唔到...」
「我同你講，呀玥唔係想控制我哋班，如果咁叫控制，我寧願比佢控制一世！」
「兄弟...你係咪鐘意余心玥？」
「可能啦....」
我笑住咁答佢
呢刹那嘅太陽照咗落嚟，一段屬於青春嘅複雜情感可能由呢刻正式開始緊..
［級際總成績公布：
第一名5C班230分
第二名5A班190分
第三名5D....］
「點解會咁嘅...就算我後面破記錄都冇咁多分...」←龍哥
「可能因為入分嗰個出錯啦...」←呀玥
「但係入分嗰個唔係你咩...」←龍哥
「唔好理啦！依家有子盈做你女朋友仲唔夠？」←呀玥
「即係你一早就知...無論點我哋都會贏㗎啦...」←龍哥
「梗係啦，我淨係要盈盈一個呀嫂咋！」←麥芷悠
「咁琴日你電話個呀B係...」←龍哥
「其實嗰個係推銷電話嚟...」←李子盈
「如果唔咁做邊激發到你去追子盈！如果唔係呀袖要求我幫你我先冇咁得閒，呀龍哥哥！」←呀玥
「得喇，多謝你喎心玥妹妹！」
我依家就好似一個局外人誤入咗人哋啲家庭聚會咁...
「妹夫...要多謝你添..」
「咩話..？你叫我咩呀...」
「冇嘢啦！記住我哋嘅約定」
「今晚食打邊爐！我請~」
「你啱啱先中完暑仲打邊爐？去食冰啦，我請呀悠」
「係係係！老婆大人！」
「多謝呀嫂~」
「係呢其實點解你早唔同我講...」
「因為我一開始係度驚緊...直到琴日先確定你嘅心意，龍哥嘅女人應該光光彩彩咁同你一齊㗎嘛係咪」
「傻瓜！我哋錯過咗咁耐...」
「所以幫下佢哋啦？」