［校園/歡喜冤家］火星撞地球,撞撞下就有火花㗎啦: 第十三章 「否定？？」
咁解法嘅話就解得通點解我見到呀玥有一種心跳加速嘅感覺！
原來我只不過當咗佢係呀魚....
當我仲諗緊呢樣嘢嘅時候，我部電話叮咗聲...
係呀魚..聽講如果你諗起一個人嘅同時嗰個人都諗起你咁即係你哋對對方嘅思念足夠強大，咁唔通...呀魚你都有掛住我？
［梓允梓允！Halo~對唔住吖，呢排多嘢忙咗,冇時間揾你玩( ≧Д≦)]
［唔緊要啦，我呢排都冇點上線］
呢排顧住練班際祭啲嘢都冇乜點打過機，咁計法可能都有成兩個幾禮拜
［係咩係咩？咁啱嘅~你忙咩吖？］
［我哋學校有個比賽，為咗唔好辜負我一個朋友嘅努力所以我都好比心機練］
［哦~你朋友？女仔嚟㗎？］
趁呢個時候問埋佢呀玥係唔係佢個妹啦？但係唔得唔得，如果唔係咪尷尬，都係算啦有啲嘢自己知好啦....況且呢個只係推測
［八卦妹！唔話畀你知］
［唔講咪唔講ಠ﹏ಠ，係呢依家得唔得閒？陪我打一陣機吖！］
就係因為咁，我就同呀魚玩咗成日....
佢依然係好犀利，完全咁carry咗全場
如果所有女仔都好似佢咁或者有佢一半就應該唔會做成咁多分手又或者「二奶慘殺案」
如果佢係我女朋友嘅話....
咁諗起上嚟，我對呀魚算係一見鍾情？但係自從同呀玥相處之後我對感情呢樣嘢亂咗好多
果然...呢種咁唔實在嘅「機友」關係果然唔可以穩定呢段感情...如果要同呀魚發展落去，朋友又好再進一步又好都要同現實嘅呀魚都接觸過...或者？約佢出嚟？
［呀魚不如揾一日一齊食飯？］
［估唔到你大膽咗咁多喎(´⊙ω⊙`)！，不過我屋企好嚴所以...遲啲先再算啦(｡•́︿•̀｡)］
係喎！呀！！！到底我係到做咩
不過佢咁樣講一講，我先發覺自己好似對女仔冇咗嗰種恐懼感...同一個月前比已經冇因為諗點樣覆信息而心跳加速...呢一個月發生咗啲咩事呢...唔通係因為識咗阿玥？
跟住喺無意間,我發現咗一個測試....測試下自己究竟係唔係真係鐘意嗰個人
唔知點解望到呢個測試，我腦入面諗住嗰個竟然係呀玥...係咪因為呢排同佢相處得太多...
1.多餘的事沒有必要知道
的確我想知道多啲關於呀魚嘅嘢
（呀玥就有啲嘢唔想知都知道咗...早知唔搞禍佢）
2.會願意多分享自己的事情給對方
係吖！我想同呀魚分享自己嘅故事我想佢注意我多啲！
（呀玥聽完一定會串我囉）
3.幻想和對方有一段親密身體關係
我想摸下呀魚個頭...
（諗起佢瞓喺我隔離...以後都唔想去camp）
4.對方說什麼都好
的確，呀魚講咩都啱嘅！
（如果我認同佢講嘅嘢，我哋就唔會成日嗌交啦）
5.喜歡吃的東西和聽一樣的音樂
咁我又唔知呀魚鐘意咩喎
（陽光檸檬茶....呢個只係個巧合）
6.寬容度極高
就算阿魚幾日唔搵我都冇所謂！
（唱安眠曲..佢迫我㗎！先唔係冇所謂呀！）
7.想要被保護和保護對方
係呀！我好想保護阿魚唔想佢畀對面射手殺
（游泳池...救佢上水？嗰次係因為佢爭啲浸死所以我先幫佢，呢個係出於人性嘅善良...）
8.覺得對方是可以信任的
當我玩射手嘅時候我都係十分相信打輔助嘅呀魚！
（用30分鐘就練好一首歌..仲上台唱？嗰次都係佢夾硬嚟，如果我唔信佢信邊個）
9.想笑或者開心
同阿魚一齊打機就好開心㗎！佢wts我嘅時候我開心到好似個心有蜜糖咁...
（同佢一齊好舒服好似可以做都真嘅自己咁...咁呢啲唔算開心掛？）
10.為毫無興趣的事作出回應
我同阿魚嘅興趣好似，所以呢題計唔到喎...
（佢要搵人教佢游水...嗰陣係因為我反應唔嚟先亂應承佢）
11.想戲弄對方
係呀！呀魚怕醜真係好得意㗎！佢會連平時嘅顏文字都唔記得咗用
（成日學佢講嘢又或者同佢鬥嘴？咁係因為佢惹我在先呀嘛！）
12.感到非常有吸引力
我連見到呀玥都諗起呀魚，應該算係啩？
（佢啲吸引力又抵我第一日識佢已經冇曬喇...
應該每一次都係我將佢當咗做呀魚，先至會畀佢吸引）
13.會像對小動物一樣呵護
相比起呀玥呢隻小野貓，我都係覺得我隻兔仔魚得意啲
14.想要知道對方所有一切，無論是好是壞
想知道佢隻腳傷成點係因為出於善意啫，同埋之前睇佢練舞都係因為班際比賽嘅關係...
15.為佢而努力
咁係因為全班都睇好我先至會努力，唔係因為佢 ...應該
16.為佢打氣
咁係因為...為咗班際先至會幫佢打氣
17.你現在仍想著那個人
....到咗呢一題我諗緊嗰個人已經由呀魚變咗做呀玥...
仲有我發覺自己又啱開始嘅一直喺度否定緊呀玥嘅答案...一定係因為我唔鐘意佢啦~
呢啲咁樣嘅測試唔準嘅！睇埋個答案先
→友情的喜歡
能毫無顧忌的在對方面前展現自己，
雙方可以無話不談，可以互相玩笑、也可以互相抱怨，
彼此有許多的共通點，這樣或許成為情人也是不錯的，
但是要思考多一些，就僅僅是這些還是這種喜歡是可以給你帶來未來的幸福？」
... 果然我一早都話我對佢淨係得友情㗎啦， 呢個測試真係準...
至於呀魚， 雖然差唔多都係圍繞住打機，不過佢中曬咁濟...果然呀魚先係最好！
而家約唔到咪慢慢嚟囉~反正住咁多時間佢，又住我隔離屋！
自從覺定自己對阿玥淨係得朋友係感覺之後，雖然有陣時都仲係會心跳加速但係已經好咗好多
諗返起過咗班際之後下一個環節就係運動會，舉行日期喺今個禮拜五，一樣都係分班制嘅比賽不過今次係以正統嘅運動會形式
「喂！梓允你去參加男女接力賽啦？」
「吓！點解又係我呀」
「我哋班啲運動細胞冇人哋班咁好，你係運動好嗰幾個㗎啦！去啦去啦~都係落場當行下咁樣做下樣啦，反正我哋唔會贏」
「唔得呀！難得上次我哋班際祭攞到咁好嘅成績，我哋一定要繼續威落去呀！如果唔係到最後我哋班就會畀人睇死㗎啦！」
「呀玥吖...雖然大家都想贏！但係上次班際祭就話可以靠其他嘢晚返啫張,係我哋運動細胞真係唔得㗎嘛...何況我哋對嘅仲要係A班...」
「今年嘅情況唔同我哋有新嚟嘅插班生！仲有上年幫A班贏嗰個女仔已經轉咗校喇~所以我哋今年係有勝算啦！」
係呀因為佢嗰個該死嘅好勝心我又要繼續練跑啦我諗今年嘅肌肉一定會多咗好多不過唔緊要啦難得呢啲青春嘅回憶
最後決定咗，第一棒嘅全力衝鋒係交畀氣場龐大嘅龍哥，跟住第二棒跑係由身形比較細小嘅子盈，第三棒係呀玥，而第四棒係我
為咗呢一個比賽，我哋四個喺星期四嘅準備日已經練咗一次又一次傾好咗策略希望，今次我哋依然可以贏啦...