［校園/歡喜冤家］火星撞地球,撞撞下就有火花㗎啦: 第十二章 「拗咗柴？？」
經歷朝早嗰段咁愉快嘅回憶之後
我唯有番房瞓多陣覺 ，奇怪嘅係一番到入房佢哋就用好欣慰嘅表情望住我...
差唔多八點我哋就刷好牙換好衫準備食早餐，因為諗住可以傾多啲策略，所以我哋男女就分開練自己嘅嘢，不過聽講學校好注重呢一場籃球比賽想提拔啲有潛能嘅人，而且今年加多咗個比賽項目係睇場外觀眾嘅反應，唔怪得之廖sir話要搞啦啦隊喇，原來佢唔係純粹想玩班女仔。
「我哋今次最大嘅強敵係A班，贏到籃球隊隊長嘅黃浩輝， 咁我哋嘅勝算就好高」
「 冇問題啦由細到大我都係同呀輝練打波嘅，可以的！」
的確開頭練咗幾場都發揮得唔錯，如果keep住呢個勢咁樣落去我哋係贏硬嘅，可惜....
「 今次弊啦！聽講女仔嗰邊阿玥佢拗柴呀...」
呢一刻唔知點解我好緊張,係緊張驚我會同佢一樣臨時失手然後輸呀...定係緊張我哋班同學嘅傷勢...定純粹其實我係緊張呀玥
「點解會咁㗎..佢點解會拗柴㗎！」
「你唔好咁急先啦...可能我聽錯嗰個唔係呀玥呢？又或者其實佢冇拗到柴之不過係唔小心跌親呢..」
冇錯我唔可以咁急...而家已經冇時間畀我諗其他嘢...我淨係可以諗住自己個比賽一定要贏！如果唔係就會辜負我哋班同埋呀玥佢嘅心意
但係點解會咁㗎...明明佢琴日仲話大家一定要一齊加油,齊上齊落一個都不能少..
原本仲諗住可以畀佢睇到我哋贏到最後一刻...佢而家一定冇得睇啦...
唔知係咪因為呢個消,息之後嗰啲練習全部都失晒手，唔係畀人搶波就係射唔到入籃
...點解會咁㗎,我要爭氣啲㗎！我應承咗阿玥一定贏個冠軍畀佢㗎...
的確呢個狀態根本就冇可能會贏， 去到真係比賽嘅時候，仍然都係咁樣...啦啦隊已經好落力咁跳緊舞,但係我依然搵唔到呀玥嘅身影
明明知佢自己唔可以再分心㗎啦...講好咗一齊上齊落㗎嘛，我唔可以因為自己就將成班嘅心意同埋呢班隊友嘅努力白費㗎...但係我真係專心唔到
「譚梓允！你同我打好啲！唔好心不在焉！輸咗嘅話我同5C班都一會斬死你！」
呢把聲...我想看台我見到一個坐咗喺輪椅上面，隻腳畀啲紗布包住嘅女仔... 佢呢一刻真係好耀眼， 就好似我嘅救世主咁樣....
冇錯！我係唔可以輸㗎... 我終於開始就中到精神，放心啦我會追返啲分㗎！
打氣嘅聲音遍佈咗全場，望到啦啦隊咁努力嘅舞姿， 隊友咁有信心嘅神情，仲有佢就算整親都過嚟幫我哋打氣
放心啦各位，5C必勝！
1分...2分...
「喂，兄弟終於番來咯...放心啦，你傾盡全力，認真咁贏畀你嗰班睇啦！ 但係我都唔會放水㗎， 5A都等緊我 」
最後，我哋用多一分嘅成績贏咗A班...佢哋全部都好開心，圍住我同埋我哋班隊員喺度大嗌，仲差啲想抱起我哋向上拋...
多謝你哋，多謝喺人生之中畀我遇到你哋...
如果唔係我唔會搵到咁強烈嘅歸屬感！
但係當我上番場嘅時候，呀玥已經唔見咗...到底啱啱嗰個係我幻覺呀...定係佢真係嚟過呢？
「喂兄弟！唔差喎,後期發力仲差啲打贏我呢個隊長」
「咁係因為有一班咁好嘅同學啫，仲有啱啱搶咗你個波搞到你跌親，對唔住呀」
「冇事喎...有啲嘢爭唔嚟，就係爭唔㗎啦... 個波我根本就控唔到， 所以你想到佢係理所當然㗎...」
「仲有比賽第二，友誼第一吖嘛， 不過我唔會放棄公平競爭㗎。 同埋呢，你有冇興趣入籃球隊？」
「 唔啦，其實我根本就唔係呢方面嘅材料... 今次贏係純粹因為佢哋嘅鼓勵太強咋嘛...」
到底佢啱啱嗰番說話，係真係講緊個籃球呀？定係想暗示第二啲嘢...
「 見到呀玥咁出力， 你要好好咁樣珍惜呀」
佢咁講法，即係呀真係有嚟過...？
唔知點解內心有一種好開心嘅情緒，最後我哋班如願以償咁樣攞到班制總冠軍，佢哋話我同阿玥係最大嘅功臣，遲啲一定要請我哋食返餐飯...原來拎到呢一個獎，唔單止係贏到其他人咁簡單仲係一種，屬於我哋嘅榮耀，象徵住我哋嘅默契....
結果返到屋企之後， 我好好咁樣沖咗個涼， 望住個獎盃，覺得自己是得到某啲嘢...
呢啲嘢唔係可以就咁形容出嚟，而係一種感覺唔通，呢啲就友情？
講起個獎盃我突然間醒起一樣嘢... 唔知佢...之後點呢..有冇返去好好咁養傷呢？
我打開咗個ig，搵到佢個帳號...諗咗一分鐘又一分鐘點樣問佢好先至合適...
「你點樣呀,有冇事呀,有冇好好養傷？」咁好似好阿媽feel喎...
「冇事？」咁好敷衍姐...
「我哋拎咗個獎呀，佢哋話想請你食飯...」 咁講到似唔關我事咁...
到底...要點講先啱呀
當我仲喺度煩緊要點樣問佢有冇事嘅時候,我已經hi錯制send咗出去喇...
「你有冇事？」
點解我好send唔send,send咗句一睇就知唔得嘅問候出去㗎...
「我還安好，起碼未死得啦」
佢覆咗我啦....睇佢嘅語氣仲講到笑真係冇事啦...內心突然間有種好安心嘅感覺
之後佢撳咗個ig視像通話畀我...
「醫生點講？」
「冇呀佢話我用力過度所以拉傷咗條筋,抖一兩個禮拜就冇事㗎喇,不過真係好唔抵，明明我練咗咁耐但係跳唔到...」
「咁你記住聽醫生話唔好周圍去啦， 仲有如果你想跳...咪搵日跳畀我睇囉」
唔小心將心入面嗰句講埋出嚟㖭...今次弊啦,佢一定搵位串我
「你想欣賞本小姐嘅舞姿,你係咪諗多咗啲嘢呀， 仲有個比賽最後點？」
「我睇你嗰啲又硬又唔優美嘅舞姿已經係畀盡面你啦， 仲有我哋最後贏咗總冠軍」
「不愧係我呀， 總冠軍呢啲嘢濕濕碎啦！」
「 邊忽濕濕碎嗰獎明明係我幫你攞嘅！」
「乜嘢你幫我攞，如果唔係冇唱歌嗰part咁多分贏到咩？」
「乜嘢唔係我幫你攞,如果唱歌比賽嗰part我冇幫你唱會有咁多分咩？」
「 唔準學我講嘢呀！ 不過anyway 多謝你...」
聽得出佢呢句多謝你係發自內心嘅， 其實我哋要多謝你,如果冇你咁樣出嚟打氣...我根本就唔會專心到...
唔知係咪因為呢個比賽特別盡力又發生咗好多事所以呢個禮拜六日我都瞓得好冧， 因為學校體裇我哋有個大型比賽所以我哋連續六日一都係放假...
不過我發現咗樣好奇怪嘅嘢，住喺隔離屋阿魚屋企門口有支拐杖,唔通佢都受咗傷定係佢屋企有人又咁啱整親？
仲有我發覺阿魚屋企門口嗰啲工作紙，係嚟自我哋學校嘅初中部唔通....佢其實係我師妹？
我有時仲會將呀玥同阿魚混淆， 可能唔係因為我嘅問題，而係佢哋真係有啲似樣...呀玥又係姓余...
我知啦其實呀玥係呀魚個妹！