《我的MK妹同桌》: 24【結局】
失去呀詩後，我睇咩都係灰色。
當晚嗰一幕點樣都揮之不去，我曾經諗過不擇手段咁去追返呀詩。
去佢嘅補習社度一齊補，每日都等佢放學，每日都SMS佢之類嘅。
但諗諗下，冷靜落嚟，知道咁樣做呀詩只會越行越遠，如果我自己受到咁樣嘅待遇，我都會走夾唔唞。
只會越逼越緊，然後令呀詩抖唔過氣，真正愛一個人，係應該令對方覺得舒服，而唔係將自己嘅愛強加係對方身上。
教識我喱樣嘅，竟然係蕃薯仔。
係一次放學打波，打到天色都暗落嚟，我同幾個波友去男更衣室吹下風扇，抖下先再走。
抖到咁上下，差唔多個個都走曬啦，我先走。
自從失戀過後，我更加習慣自己一個，因為當自己一個嘅時候，先可以好好地沈澱自己嘅感情，思緒會更加透徹。
係，同朋友一齊歡樂，係會令你忘記傷痛，好似打咗暫時嘅麻醉針一樣。
但你返返去自己一個嘅時候，左右兩旁嘅空虛感會四面環繞地襲擊你。
反而自己一個嘅時候，有時諗起呀詩嘅時候會痛，但可以好好地反省返我哋之間嘅問題。
而我諗深一層，令我覺得最苦嘅回憶，莫過於呀詩所講嘅一字一句，佢希望我去做嘅嘢，全部都係啱嘅。
佢想我讀好啲書，我反而吊兒郎當，我根本⋯⋯
根本無為過我哋兩個諗。
甚至最可恨嘅，係連我自己都無為過自己諗。
我行出更衣室，天色已經漸暗，仲殘留著些許藍天，美如畫。
依家喱個時候仲有人晏過我走？
係我前面嘅係一男一女，兩個一前一後咁離開，我跟隨其後。
兩個都係有啲熟悉嘅身影⋯⋯
尤其是個女仔，熟下熟下就浮現一個人樣，前面個男仔亦是。
仆你個街，蕃薯仔同子晴？
唔撚係掛熊出現了。
我靜俏俏咁跟係佢哋後面，佢哋似乎無察覺到我嘅存在。
雖然佢哋依家咁樣睇落無乜嘢，但我覺得事有蹊蹺，咁樣仲要兩個同時出現係學校？咁啱咩？！
於是乎就一路跟係尾，直至佢哋去到一個平時我同呀詩都會去嘅商場度，我走到一個角度去偷望佢哋，係幾刺激嘅，好似做緊狗仔隊咁。
無幾耐，佢哋依然係前後腳，但見四下無人，放鬆警惕後，蕃薯仔放慢腳步等子晴行過嚟，然後兩小無猜地拖起手。
見到喱一幕我呆咗，個口得個窿，真係同我估嘅一樣！頂你哋，神神祕祕咁拍拖，搞地下情！？仲要唔同我講！
但我都係嘴上嫌佢哋不是，但心入面都係祝福佢哋，佢哋都係好唔容易先一齊。
但子晴唔係之前先拒絕完佢咋咩？轉個頭就一齊？但⋯⋯又好似唔係轉個頭啦喎，好似都已經有一年啦喎。
時間就係你忽然間察覺，然後先驚覺咁快㗎啦？
過程中佢哋無任何交流，就算拖完之後，就係一路拖住啦⋯⋯
我同呀詩嘅話，會打打鬧鬧咁。
唉⋯⋯無論去邊，做咩，都會諗起呀詩，原來我周邊都充滿住呀詩嘅影子，早已形影不離了。
不不不！睇返喱度先，蕃薯仔同子晴尷尷尬尬？怕怕醜醜咁？之前子晴坐我隔離嘅時候都唔係唔講嘢㗎。
總之佢哋兩個嘅氛圍好怪異，但好有初戀嘅甜氣，甚至有啲小學生拍拖咁，好得意。
我嘅話會同呀詩十指緊扣，但佢哋就輕輕咁觸碰對方嘅小手，與此同時，我心入面有股莫名嘅酸味，而且澀澀地⋯⋯
喱個商場我熟到乜咁，根據佢哋依家行緊嘅路線，我兜個圈就可以去到佢哋面前。
我跑去嗰個轉角位，氣喘喘咁，仲要顧一顧個背包，係個轉角位等待著。
我偷偷瞄佢哋兩個，兩個人都唔係望住大家嘅。我算好個距離同埋佢哋嘅步速，我都捉返個距離，扮係咁啱行喱個商場，轉角遇到愛咁樣。
佢哋係個轉彎位，撞到人之後，好自然嘅反應就鬆開對方嘅手，個樣無得再尷尬。
我努力忍住笑意。
「咦！咁啱啊？」佢哋仲未load到係我。
「呀⋯呀強？」蕃薯仔好明顯口疾疾，思考緊點樣兜。
「你⋯⋯你兩個⋯⋯收收埋埋啊？」
子晴選擇沈默不語，彷彿等緊蕃薯仔開口般。
好似當初呀詩係海灘上面，等我開口一樣⋯⋯
「我頭先都睇到啦。」我相信我個樣奸到出曬汁，我無非都係想逼蕃薯仔承認。
但佢都遲遲都唔開口，呆咗係原地。
變到我好尷尬。
「好啦好啦，當我無睇到啦⋯⋯」
此時我見到子晴扁扁嘴，打咗蕃薯仔一嘢，蕃薯仔先會過意來。
「睇到就睇到啦，都唔瞞得好耐啦，」蕃薯仔講完後，又細細聲同子晴講咗句：「都話唔瞞得好耐㗎啦⋯⋯」
「好彩係傻強咋，佢見到咪由佢見囉。」又有邊個估到，女神般嘅子晴就咁俾蕃薯仔溝到，實叫全級毒撚咬牙切齒。
「咩傻強啊⋯⋯」喱個花名睇怕已經傳開去了。
「話時話，你哋幾時一齊㗎？收得咁埋？」
子晴個樣好似醒起某啲嘢咁，然後chock一chock蕃薯仔手臂，蕃薯仔都知道了。
「咁話時話，你同呀詩做乜事分手？」
我都估唔到佢會咁樣一問，直接戳中我心中最介懷嘅位。
「嗯⋯⋯性格不合掛，我都唔知。」忽然間有個路人行過，我哋霸咗個轉角位，意識到係喱度傾唔係咁好。
「搵個地方坐低傾下啦。」子晴提議到。
今次，佢哋兩個無放開彼此嘅手。
諷刺嘅係，之前蕃薯仔仲問我點樣溝到女，依家已經風水輪流轉啦。
「去呀詩間KFC？」蕃薯仔問道。
換嚟嘅就係子晴一下大力嘅搣手臂，然後狠狠地睥佢一眼。
「無嘢啊，你哋想去咪去囉。」我強裝出一副無所謂嘅樣，喱幾日⋯⋯我都唔知扮過幾多次啦。
最後我哋都係搵咗間M記食個廿蚊餐，依家已經漲到21蚊嚕。
我將我哋所有嘢都講曬出嚟。
子晴率先嘆氣，「你自己又唔爭氣嘅，你都唔明呀詩佢想要啲咩。」
「咁其實佢想要啲咩姐？」我已經諗咗好耐，諗到失眠，晚晚好夜先瞓得著。
嗰種失去嘅滋味，係會令你久久不能釋懷。
「呀詩佢有同我講你啲嘢⋯⋯」
「下？佢講咗啲咩？？？」我有點激動地問，我好想知有關佢嘅所有嘢。
不論係佢依家點啊，佢點諗，我通通都想知。
子晴個樣欲言又止咁款，一定係諗緊同唔同我講好，唔洗問啦。
「你講啦，我接受到，我又唔會同佢講返嘅。」
子晴再猶豫一會，先講：「其實我哋所有人都知你有幾愛呀詩，甚至你唔同其他狗公同埋MK仔，你份人好單純，一鍾意就會放曬心機心力落去。」
「老實講，我都唔識咩情情愛愛嘅嘢，好似睇我好多人追咁，但查實我根本唔知咩係愛情。」
「係喱條呆蕃薯先令我學識少少。」子晴一手捉住蕃薯仔隻蕃薯耳。
「佢想要嘅唔係淨係單純地同你談情說愛，呀詩亦都因為鍾意你，先想同你有將來，雖然喱啲嘢佢無親口同我承認，但我feel到佢係咁諗。」
「如果佢唔想同你行落去嘅話，佢就唔會同我講話其實佢都想大家一齊去下自修室溫書，一齊去返補習社，一齊為入同一間大學而努力。」
「但你唔鍾意讀書啊，你唔想啊嘛。」子晴講喱句嘅時候，好用力，亦都好惡。
我都未曾見過子晴佢咁惡，咁嬲。
「如果將來要一齊入大學嘅話，你覺得洗唔洗讀書啊？」子晴將隻手放係枱底，我見到蕃薯仔個表情都變了一變。
相信喱一番說話亦都係同緊蕃薯仔講⋯⋯
「點解你唔好好珍惜佢呢？」子晴真誠地問我。
喱一句說話深深地刺入心裡面，其實我已經有，但就好似點做都唔夠咁⋯⋯
係咪我用錯方法呢？我不禁問自己。
但原來係人哋眼中，我係未夠珍惜佢⋯⋯
「我有⋯⋯」灰機到我講出嚟已經無力咁制。
頃刻，子晴從嬲嘅情緒中放緩落嚟，道：「Sorry⋯⋯我只⋯⋯只係覺得你兩個好可惜⋯⋯」
又再次刺中，哈哈！
正常人咁樣俾人插兩嘢應該都死啦，但喱種心痛並唔會，插幾多下都會痛，並提醒著你「這是現實」。
係囉，我都覺得可惜。
可惜在，我自己一個去自修室溫書嘅時候，見到有啲學生哥，同條女一齊出雙入對咁樣嚟溫書。先不論係咪一齊啦，同條女嚟已經令人好羨慕啦。
每次見親喱啲畫面，就覺得⋯⋯原本自己都可以。
係一早，呀詩已經期待緊喱個畫面，我總係遲一步先感受到佢嘅溫柔。
嗰段日子儘管難捱，但時間唔會因此而停係度，一樣會向前行，我都想同呀詩嘅時間可以一路停係以前。
我都唔知過咗幾耐，無一定時間或者規則，但就真係如其他人所講，時間會慢慢沖淡傷感。
而「其他人」就係指班高登仔。
之所以會慢慢沖淡，因為慢慢唔會再點樣「記起」。
其實所有事，從來無忘記過。只要有某啲事勾返起，所有嘅回憶都會出返曬嚟，代表嘅係，根本你就無忘記過。
只係無乜特別事，你唔會再去想記起。
除此之外，我個心無再住過其他人。係自修室度見到靚女，反應無以前咁激烈，起碼會一路行注目禮。依家只會望完，係喎，幾靚女喎，就算。
高登有啲故事，話俾女飛之後，就淪落到周圍玩女、撩女，到最後先發覺自己都係放唔低之前條女。
相信喱啲故事係現實生活中大有人在，我做唔出⋯⋯
我更加唔想傷害第二個女仔，甚至有無第二個女仔我都唔知⋯⋯
慢慢地，我都習慣回復單身嘅日子。今個聖誕，我感受到嘅，只有巨大嘅落差感。
當然，我唔係無改變，我都開始追返我以前失去嘅嘢，上堂專心，放學努力溫書，同埋補習。
日復日，時間亦都好快過去，成績唔會一下子就突飛猛進，然後擠身全級前幾名，但至少唔會包尾墊底先，已經慢慢去到中間。
最重要嘅係，其實係學校都好多機會會見到呀詩，佢都慢慢變得成熟起嚟，佢永遠都行係我前面咁，我點都追都追唔上。
早上班會嘅時候，佢哋班嗰條隊就排係我哋班嘅隔離，喱個小小嘅時刻，我覺得係我同佢距離最近最近嘅時候⋯⋯
根據男仔企前面，女仔企後面嘅規矩，我成日都無辦法向後望下呀詩。
因為佢哋班企係較出，我哋比較入面，所以佢哋班會行先。
只有當佢哋行先，成條隊慢慢一個接一個係我前面經過嘅時候，呀詩都會係我前面經過。
喱個時候，我先能夠偷偷地望下呀詩⋯⋯
之後有一次，仍舊係子晴生日，但同當時嘅我哋已經有好大分別。
當時尷尬嘅係蕃薯仔同子晴，依家尷尬嘅係我同呀詩。
依家佢兩個拍拖嘅事已經通曬天，個撚個都好提子蕃薯仔，唯獨我哋以前中三嗰班有種守得雲開見月明嘅感覺。
中學地下情喎，瞞得幾耐啊？
嗰日，我都係被通知嘅一員，齊齊係學校小食部出面啲長枱度幫子晴慶生。
難得我哋仲成班人聚埋一齊，搞氣氛嘅呀Ken依舊無變，周圍R嘢講。
無乜驚喜，只係大家約好一齊慶祝食蛋糕，平凡得嚟幾珍貴。
呀詩都在場，我哋分手已有半年，依家仔細睇，以前嘅MK味唔再纏繞係佢身上，更添了幾分成熟的美感，輪廓更深邃了。
個心依舊有點戚戚焉，坦白講。
本來我諗今次係一個好機會，可以同返呀詩有接觸，但感覺佢好似係度逼緊我咁，所以我只好同佢保持一段距離吧。
後來子晴條友好似想還返上年K房單嘢俾我哋，叫我同呀詩去小食部拎刀叉。
我哋呆一呆，各自都無拒絕，靜默了一會，彷彿等待啲咩咁。
最後係我先轉身去拎，就算呀詩唔嚟我都無問題，自己一個都可以拎。
但呀詩最後都有跟嚟，除咗愕然，更多嘅係開心。
即使彼此間無任何交流。
除咗喱次，有一次我同呀詩係自修室撞到，我自己一個人去自修室溫書，大家亦都開始操mock卷，慢慢好多人都會結伴成群咁樣去自修室。
我間唔時都會同健三班死黨一齊去自修室，但發覺有時自己溫仲有效率啲，所以間唔時都會自己一個。
有次我放低咗個書包，諗住出去大廳度買罐雀巢咖啡飲下醒下神，係電梯口度撞到呀詩同另一個男仔係電梯行出嚟。
我同呀詩都對望咗一眼，佢本來同個男仔有講有笑，見到我之後笑容就慢慢停咗落嚟。
但就係咁樣一眼，足以讓我夢魂縈繞。
同時亦令牽起心中嘅漣漪。
全部舊記憶 這刻重遊
然後喱一瞬間一閃而過，呀詩目光無係我身上停留，然後就入去自修室度搵咗個位座，一齊同個男仔係度溫書。
重拾舊愛都或太荒謬
我最後換咗個地方溫書，我心入面都仲係好怕，甚至面對唔到。
怕見到呀詩會同個男仔係度卿卿我我，我只會⋯⋯都係逃避吧？
咁樣嘅日子，過得真係一啲唔開心⋯⋯
讀書又有壓力，返學見到呀詩又有壓力，真係好想出走一下，遠離塵囂。
嚟到last day，我同呀詩已經大幾一年幾無講過嘢，好似隨住時間越耐，就越難去搵返呀詩咁。
啱啱分手嗰段時間，我好多次想搵返呀詩，但我都壓抑住。
今日已經嚟到last day，我再唔搵⋯⋯睇怕再無機會。
好多老師係喱一日已經無上堂，我哋今日個個都把握去留低更多更多嘅回憶。
不知不覺，我已經企咗係呀詩嘅班房門前，躊躇著入唔入去好。
「喂！想入去啊？」子晴失驚無神出現係我後面。
「嗯⋯」我怕醜地支吾以對。
「驚咩啊？最後一日啦都，你記得一陣過嚟搵我影相啊！」子晴今日睇起嚟特別興奮。
子晴就入咗去，我都係晏啲過嚟再去搵呀詩。
同咗幾個相熟嘅朋友影完相後，我總算做好啲心理準備，就衝咗去隔離班搵呀詩。
呀詩見到我，睇落並不感到奇怪，一臉處之泰然嘅模樣，好似一早知我會嚟咁。
女人心，真係海底針。
我好老尷咁行過去，可想而知我個樣有幾咁僵硬。
「點啊？大老遠嚟搵我？」係我諗緊點樣嘅開場白嘅時候，呀詩已經遠遠地同我講，說話嘅語氣好似見返老朋友咁。
「邊度遠啊？隔離班咋嘛。」我打趣地道。
「係囉，隔離班，依家先嚟搵我囉。」我當堂語塞。
我見佢係度寫緊人哋俾佢嘅紀念冊，我自己都留咗張俾佢，道：「依家咪嚟搵你囉！」
「幫我寫返張得唔得啊？」感覺好耐⋯⋯好耐無同呀詩傾偈，就連佢嘅聲音都無乜印象，有啲脫曬線。
「實好㗎！」我以為會迎來尷尬嘅氣氛，誰不知會如此輕鬆，仲帶點調皮。
「咁你都要幫我寫返張。」
我哋互相交換完張紀念冊，我件校服都有俾其他人簽過名，我當然亦都想呀詩係我身上簽名。
我將筆遞俾佢，只見佢笑了笑，好爽快地係我身上一個空白位置簽咗個名。
「唔洗幫你簽咩？」佢身上嘅校服都係白雪雪，我專登整個色瞇瞇嘅眼神。
「簽囉！我帶咗衫嚟俾你哋簽。」哇！乜仲有喱招？用第二件衫簽名？
我佩服得五體投地。
最後我要求同佢影張相，呀詩亦都應承。
我同呀詩之前嘅事，大家都唔再提起，當無事發生過咁，可能佢真係已經放低我啦，但我仲依然記係心。
呀詩拎部手機出嚟，仲係2年前我送俾佢嘅生日禮物。
「你仲用緊啊？都出到5s啦喎。」我取笑佢，但我係故意嘅。
「仲用得啊嘛。」
影完張相後，我哋簡單道個別，祝大家畢業快樂，就走咗。
相比起分手嘅時候，今次離別好似無咁痛。
頭先我專登chock下呀詩，睇下佢有無可能仲對我有一絲留戀⋯⋯
但由佢最後嗰句，我都判斷唔出佢對我點⋯⋯
但我好想話俾佢知，我有改，我有好努力咁改啦⋯⋯
我只係想你好好地睇下當初以你為中心嘅呀強，唔鍾意讀書嘅呀強，都努力起嚟啦，我自己都學識咗好多嘢啦。
但喱啲事呀詩都無機會知就散了，之後亦都唔會再返學校。
一諗到喱度，就感概良多。喱幾年，甜酸苦辣都經歷曬，我覺得自己因為喱啲經歷成長咗。
但原來，好難同自己心愛嘅人一齊去成長，因為大家嘅步調好難一致。係要失去嘅時候，先至令你上了一課。
到最後我去考DSE嘅時候，感到一陣莫名空虛感，唔知為咩拼命咁。
好幾場考試，我都上山去考，要係炮台山上面嘅學校考，我有幾次同呀詩同一個考場，但佢同幾個朋友一齊，我只好遠遠地望下佢。
直至最後一場考試，係英文口試，緣份巧合地令我哋再次相遇上。
「做乜咁多場考試都見到你？」我哋依家嘅相處模式，只能靠老友嘅模式維持落去？
「都唔知陣時洗唔洗同你考添！」呀詩笑笑口，我見佢仲拎住補習嘅notes係度溫，都最後一科英文oral啦喎，都咁俾心機？
「你好緊張咩？」我指一指佢手上嘅筆記，問道。
「緊張啊⋯⋯我口試好易緊張。」其實唔係幾睇得出佢有幾緊張。
我諗緊有咩方法可以令呀詩無咁緊張，我突然醒起考試前呀媽俾咗樣嘢我。
我從荷包度拎咗個符出嚟，係我媽幫我求，但我一向信奉實力派，所以對我嚟講無乜用。
「俾你拎住啦。」
「下⋯⋯」呀詩先是一片愕然，「咩嚟㗎？」
佢仔細一看先發現係符嚟，然後講：「唔好啦，喱啲嘢係俾你㗎嘛。」
「唉！你拎住啦，你知我不嬲都唔信喱啲嘢㗎，我都係擺係度咋嘛，不如俾你買個安心仲好啦。」我塞落呀詩隻手度。
係曾經熟悉嘅手⋯⋯
我以為自己好灑脫，以為自己放低咗。但有啲嘢就係會咁樣再次牽動你身上每一條神經。
「喂⋯⋯」呀詩輕輕呼喚我。
「我要去考啦，你都係唔放心嘅就考完還俾我啦！」我求其搵個籍口，就離去。
同時我都唔想阻住呀詩溫習。
考完最後一科，我係出面個門口度等呀詩。
因為今次佢無再同朋友一齊嚟考，而且我都遇唔到其他識嘅同學仔，睇嚟要嚟喱間學校考嘅，得我同呀詩。
等到天都黑埋，呀詩先出嚟，我離遠見到佢，佢一出校門四處張望，然後好似有啲失望咁？我睇唔清楚。
我係漆黑中突然出現係佢面前，搗蛋地問：「搵緊我啊？」
呀詩俾我嚇咗一跳，用力地打咗我一下，多麼熟悉的場景。
「搵你個頭啊！」
如果⋯⋯
如果我仲可以上前拖住佢、攬住佢，你話幾好呢？
「仲要俾返你啊嘛。」呀詩佢真係將個符還返俾我。
「咁個符係保佑你啊嘛，又唔係我。」呀詩最後硬生生將佢放係我背包度。
「咁你頭先有無咁緊張啊？」
呀詩扁扁嘴，輕挑地說：「無喎！」
「都話有用㗎啦。」
「關咩事姐，根本係我有實力囉好無？」
我哋就係咁你一言我一句咁沒完沒了地打鬧著，時間好似倒數返去舊時光。
我哋頭先傾緊一唔一齊去食個飯，傾下傾下變咗買嘢去海旁食。
去返嗰個熟悉嘅海旁，有著好多我哋嘅回憶。
「WOW！考完啦！」呀詩失驚無神大嗌，喱種大癲大肺嘅個性咁多年都無變。
「WOW！」我都跟住嗌。
「有啲掛住以前⋯⋯」呀詩感概地說。
「以前啲咩啊？」依家咁樣兩個人相處嘅日子，好似變得稀有。
「以前同你一齊嘅日子囉。」呀詩忽然間講得咁白，令我打咗個突。
「下⋯？點⋯⋯點解嘅？」我有點啞口無言。
「同你一齊嗰段時間係我中學入面最開心嘅時間。」今日喱度，終於可以講返以前嘅心底話。
如果，當其時講出嚟，係咪會唔同曬？！
「咁點⋯⋯點解仲⋯要分手？」我講出嚟都口窒窒，好唔甘心啊你知唔知？
「因為當時自己衝動囉，又大壓力，但其實之後好後悔。」
「咁⋯⋯唔搵返我？」看來未釋懷嘅，係我。
「因為覺得要女仔要矜持，你唔搵我就唔會搵你嘛，哈哈。」我聽得出，最後嘅笑聲，係一陣苦笑。
「如果我哋可以放低啲面子，無尊嚴咁去愛，我諗我哋依家唔會搞到咁啊呵？」
「唔怕㗎！依家仲嚟得切㗎！」我輕輕捉起呀詩隻手，我都唔理瘀唔瘀，柒唔柒啦。
「過去只能夠係過去，依家就算再一齊返，難保我哋第日唔會再分手。」
「心入面點都會有條刺，會比起以前更害怕分手。做錯咗決定就係做錯咗，俾我嘅懲罰可能就係要令帶住遺憾過日子吧？」
「比起復合，我依家更加想同你做好朋友。」
「起碼咁樣可以一世。」
我聽到後，心口chock住chock住咁，好難受。
呀詩將佢第二隻手放係我手上面，然後再將自己第二隻手抽走，我同佢唔再拖住手。
「但我仲未可以忘記到你，我根本無辦法對其他女仔動心，不如你教我點樣放低啊⋯⋯」
「無人教得到你點樣放低，正如當初我慢慢放低你嘅時候，都無人教識我。」
「真係忽然間，一瞬間，你釋懷咗，個人好似突然間諗通咗，覺得再咁樣執著都唔係辦法嘅時候，就放低咗咁。」
「我唔想⋯⋯唔想再經歷多一次嗰種痛，亦都唔想再傷害多你一次，你⋯明唔明啊？」
我咬著唇，細嚼呀詩頭先講嘅嘢，仍然絕望嘅感覺，同時更覺得殘酷。
好難令人接受。
之但係，呀詩係為咗我哋兩個好，所以選擇犧牲⋯⋯
但我仲係好唔甘心，我仲好想好好地為呀詩努力多次，就算再痛一次我都心甘情願。
再諗深一層，原來我嘅諗法好自私，我只係顧住自己，我無為呀詩諗過⋯⋯
我同2年前嘅我一樣。
「但我真係唔想淨係做朋友咁簡單⋯⋯」
「你估做朋友簡單啊？」呀詩笑得好甜，我唔明佢喱句咩意思。
「下？唔明喎⋯⋯」
「你之前送俾我份生日禮物，嗰堆心心，其實我一早就已經知，入面啲嘢我都睇曬添。」
「咩話？你睇曬？」
「咪⋯咪住先，你點知啊？」
「傻仔，照兩照就知有寫嘢啦。」呀詩輕力地拍打我個頭。
「仲要寫埋曬啲肉麻嘢。」呀詩明明就好受，好冧咁樣。
「你知我有幾愛你㗎。」愛喱個字，對真男人嚟講真係好少會講出口，但一講就表示係認真。
「我知，所以先覺得做朋友都好難。」
「咁一齊返啦好無？」我再乞求多次，「明明你對我又唔係無曬感覺，做咩成日都要壓住自己姐，我哋都就畢業啦，想愛就去愛，趁自己仲愛。」
其實我並唔係想要係呀詩面前型返次，威多次，我只係想係佢面前，唔理用咩方法，都想搶佢返嚟我身邊。
「而且我都無同過你講分手，係自己要講咋嘛，要痛嘅咪俾我痛，我由一開始都係想俾幸福你。」
我已經再捉起咗呀詩隻手，我已經下定決心，如果呀詩唔係堅決要鬆開我，腥我兩巴掌，話我流氓無賴，我係唔會放手。
我唔會再俾佢用模棱兩可嘅態度離開我身邊，唔俾佢係我面前扭扭擰擰。
「只要你話唔分手，我就唔會俾你再咁樣痛多次，好無？」
「我先唔要咩做朋友做成世，做朋友先無得咁樣拖住你隻手成世啊，咁先唔甘心啊！」
「俾多次機會我⋯⋯」
「俾多次機會我哋好無？」
我已經捉住呀詩隻手，佢輕輕地想爭扎，但我都捉到實一實。
我用半成力去攬住佢，我驚我做得太多，佢真係會打我，會死人㗎。
我留返一著，俾佢真係用盡全力爭扎，到時我就知，我應該死心。
慶幸嘅係，呀詩無爭扎開我嘅懷抱。
「你啊⋯⋯唔好以為咁易就俾返個機會你啊！」呀詩嬌柔嘅語氣返曬嚟！
YES！！！！
哇個心情興奮到，今晚好似搭過山車咁！
「真係嘅！？」
「真係㗎！？」
「真係咩！？」
我興奮地，再加用力地係呀詩嘅額頭上印上一吻，無乜嘢比失而復得更加珍貴。
無錯，再一次一齊返，係會有條刺，一路係度擔心會唔會好似上一次咁。
同時亦係一種好好嘅警剔，睇你心態係點嘅姐。
「你知唔知我好掛住你？」呀詩仲趴係我懷抱度。
「我知啊，因為我都好掛住你囉！」
「用個衣架嚟掛住你。」
「白痴仔⋯⋯用衣架，我頂，又幾好笑喎⋯⋯」呀詩又喊又笑咁，有幾個瞬間我以爲會就咁一路同呀詩做朋友⋯⋯我自己都好怕，到依家個心都仲「呯、呯、呯」咁跳。
「咁上次自修室嗰個男仔又係邊個嚟？」
「追我好耐嘅男仔，成日要約我溫書⋯⋯」
「咁你又俾佢約？」
「仲好講，我搵曬成個場都唔見你啊！衰人！」
「你都唔知我幾專心，幾俾心機溫書⋯⋯」
「哼！我知啊！」
「子晴成日同我講，話你成日問佢功課⋯⋯」
「咪又係為咗你⋯⋯」