《我的MK妹同桌》: 23
係人海茫茫入面，我好似搵唔返自己咁，像極一個迷路嘅小朋友。
行到下一個巴士站，我以為佢會係下一個巴士站等我，但無出現到。
再下一個巴士站⋯⋯
再下下一個巴士站⋯⋯
我依然傻更更地期盼著，仲驚佢會唔會係人堆入面搵緊我，焦急地搵我，但搵唔到我。
所以我會四圍望，想搵返呀強。
仲行得特別特別慢，我搵到隻眼酸曬，嚟迎接我嘅，係一次又一次嘅失望。
直到補習社樓下，都係唔見佢身影。
係我最需要呀強嘅時候，剩底嘅，只有自己。
一種孤獨感，無人愛嘅感覺湧上心頭，今次我無俾到眼淚留出嚟，亦決定咗要自己堅強。
就算啲眼淚係眼眶打轉都好，我都唔可以俾佢流一滴落嚟，我同自己講。
我遲到，今堂我都無心機上，只係將啲嘢照抄就算，返去再溫。
難捱嘅兩個鐘嘅補習，已經搾乾我最後一絲力量，攰上加攰嘅身體，再嚟感情打擊，我唔知點樣先可以提得起勁。
一出補習社，見到呀強已經係門口等我。
今次，我再無好似頭先咁需要佢嘅感覺。
喱個時候先發覺⋯⋯
原來當一個人好需要你嘅時候，你無出現。係點樣補償都補償唔返，失去咗嘅感覺，係好難再搵得返。
之後再出現嘅時候，已經係我唔再需要你嘅時候。
見到呀強，我從佢身邊走過，心中除咗一丁點生氣嘅情緒之外，就係失望。
但其實怪唔到呀強，因為呀強已經愛我好多好多，如果佢係唔夠愛我嘅話，我又點會察覺唔到？我仲會好似依家咁？
我諗我會一早嬲咗佢，甚至乎唔會在乎佢點諗吧？
但依家，我真係嬲唔落，而且仲好在乎佢感受。
即使對佢再失望，都去唔到嬲。
就算我唔向後望，我都知道呀強會一路跟係我後面。
坐地鐵嘅時候，我同呀強分別坐係對面，明明曾經咁熟悉，卻搞到好似陌生人咁。
我都唔知此時此刻點樣做先好⋯⋯
就咁拖下拖下咁等時間過，回過神來，已經去到屋企樓下，但呀強仍舊緩慢地跟係我後面，同我保持一段距離。
「仲跟住嚟做咩姐？」我停下腳步，我明知故問，以我對呀強嘅了解，佢係一定會跟到我屋企樓下，由我出補習社就知道。
佢就係會咁傻仔，當鍾意上一個人就會愛到底。
只係佢太愛了，只係識得緊張我，而忘記咗自己嘅大傻瓜。
我寧願佢多放啲心思係自己身上，為自己前途思考一下。
我覺得喱度就係我哋落車嘅地方，去換下一班地鐵。
我哋彷佛置身係中環站，我哋一同坐藍色港島線嚟，一個要去荃灣，一個要去東涌。
「頭先係我唔啱，我知錯啦。」呀強係後面抱住我。
熟悉嘅溫暖又再一次出現，我個心軟曬。但喱個擁抱差咗半天。
如果呀強佢係巴士上追落嚟，我諗我再辛苦都會同佢捱落去，依家係唔同咗就唔同咗。
同一樣嘢，唔同時機出現都可以係有差天共地嘅分別。
頭先返屋企嘅中途我左思右想，都唔夠喱一瞬間俾我嘅感覺來得堅定。
因為頭先我仲係度猶豫緊係咪應該提分手，但依家因為一個擁抱，所以猶疑嘅事好似有咗結果，突然從複雜嘅思緒當中劈開一條路。
「不如我哋分手啦？」
我用盡全力爭脫呀強嘅擁抱，即使心有不捨。
然後道出分手一句。
拍拖咁耐，我都未曾講過分手兩隻字，亦因為咁，我哋都知道喱兩隻字當講出嚟嘅時候係幾咁有分量。
甚至會覺得「分手」係幾咁絕望嘅詞語。
呀強到分手嘅最後，都仍舊咁溫柔。
我凝望那張熟悉嘅臉龐，時而帥氣，時而稚氣，呀強唔係咩靚仔，但對我嚟講卻有說不出嘅魅力係度，獨一無二。
覺得佢隻手大到可以包住我，係一個好可靠嘅靠山。
之後要再搵個好似佢咁愛我嘅人，相信唔會再有第二個⋯⋯
最後我都係將分手講咗出口，我就無得比自己後悔。
我望一望呀強手上嘅手錶，好耐以前，佢已經慢慢無將手繩一路帶係手。
只有間唔中條手繩先會出現係佢手上面。
每次望到條手繩，我都會諗起呀強當初為咗買俾我，大費周章咁跑去旺角再買俾我，嗰一刻嘅感動彷似昨日一般。
我哋只不過係經歷每對情侶會經歷嘅事，再普通不過嘅事，由濃濃的愛，轉為淡淡的情。
呀強只係懶得戴係身上，但唔可以因為佢唔再戴係身，而質疑佢唔愛我。
只⋯⋯只係⋯⋯一種再無以前咁重視嘅感覺罷了。
就好似今日咁，佢仍舊愛我，出現係補習社樓下，只係以前佢好好重視，會跑上車搵我。
「都已經唔同咗，我哋之間都唔同咗，我唔再係以前嘅MK妹，你都唔再係以前為我努力嘅李建強。」
原來我哋都不知不覺唔同咗，長大了。
我可以俾佢嘅，只有最後嘅溫柔，我知道咁樣會唔好，大家都會有留戀。
但我都係忍唔住內心嘅衝動，最後都係喺佢臉上留下唇印。
佢唔會明我最後一吻係幾咁不捨，對唔住，我未去到唔愛嘅地步，只不過我哋再咁樣一齊落去，最後只會大家辛苦，然後不歡而散。
我唔想我哋要嘈到不可開交先分手，咁樣分手好肉酸。
「都已經唔同咗，我哋之間都唔同咗，我唔再係以前嘅MK妹，你都唔再係以前為我努力嘅李建強。」
「就算分咗手，你都係我好好嘅朋友嚟⋯⋯」
「如果你覺得見到我會好辛苦嘅話，我哋唔好搵大家會係好事嚟。」
「多謝你由一開始都對我咁好⋯⋯」
「我一直都好幸福。」
「掰掰啦。」
你唔知嘅係⋯⋯
我話唔好搵大家，其實係口是心非，我真正並唔係想咁，但現實除咗殘酷，仲有無奈。
你唔知嘅係⋯⋯
轉身離去嘅時候，我隻眼已經紅曬，臉上有俾眼淚𠝹過嘅痕跡。
你唔知嘅係⋯⋯
我因為不捨而唔俾自己回頭⋯⋯
返到屋企，我係間房度唔知喊咗幾耐，我仲忍唔住打開第一年呀強送俾我嘅嗰盒心心，拆開佢嘅心一個一個咁重溫一次。
真係自虐嘅行為，喊得仲更加犀利。
然而子晴係喱個時候MSN我⋯⋯
子晴：同你講樣嘢啊～
我：？
子晴：我同蕃薯仔一齊咗！
我睇到喱句暫時將我嘅情緒拉出嚟，我嚇咗一跳，失驚無神就一齊？
不過我知我勸都唔會勸得掂，子晴佢一早有自己想法。
我：啱啱一齊？
子晴：係啊，我第一時間就同你講啦。
我：咁⋯⋯我都同你講樣嘢。
子晴：？
我：我同呀強分咗手。
子晴：下？
子晴：點解嘅？唔係一路都好地地嘅咩？
我：好多原因啦
我都唔想講太多，原因複雜到我都唔想講，打開Facebook，入面有好多地嘅回憶，我嘅Icon係我同呀強嘅合照。
望住張Icon覺得痛，同埋辛苦。
思考幾秒，就狠下心換咗張Icon，同埋將自己嘅感情狀態轉返single。
心中仍餘有陣陣後悔感。
嗰晚我都喊咗好耐，個心好痛，呀彥嗰一次都唔覺得咁傷心。因為我知道失去呀彥，我仲有呀強係度錫住我，但今次⋯⋯
失去呀強，我覺得失去咗全世界、失去所有。
再無人會咁樣錫我，寵我，咁愛我。
Facebook底下嘅留言，我唔係太想理，而且我唔多唔少感覺到，呀強並唔會主動搵我，我哋會咁互相唔理，一直持續下去吧？我估。
果然，返到學校，我哋都無再碰面，可以話，成個世界變曬咁。
然而子晴同蕃薯仔好似有啲好微妙嘅氣氛，如果唔係我知道內幕，應該都唔會察覺吧？
我有好奇過佢哋又點解無啦啦一齊？但依家我嘅狀態，根本無暇理會。
就算心情再唔好，都需要將眼前嘅嘢處理好，今日嘅小測，我完全寫唔出啲咩。
第一次交白卷⋯⋯
Econ啲小測多之餘，仲要背佢啲概念，係識就識，唔識你都無得靠估靠吹水。
我今日全日都係度失魂落魄，放學又有補習，身上嘅壓力未曾減輕過，真係好辛苦⋯⋯
壓到你抖唔到氣咁。
放學就要衝去補習，補習用嘅全部都係自己錢，一丁點都唔可以浪費。
一出門口，就撞正勿勿忙忙出班房嘅呀強，再一次見到，心入面就算幾辛苦，幾難過，我都唔想俾佢見到。
向呀強扮出一個可以呃到自己嘅微笑。
只要呃到自己，呃到呀強，就夠。
自己成日笑呀強係傻強，但原來自己都係一個笨蛋。
一個大笨蛋。
無幾耐就出現一套女主角冒著雨鬧男主角「大笨蛋」嘅電影。
——那些年，我們一起追的女孩。
我俾佢似層相識嘅情節，同埋青春熱血吸引，喱一套有別於以往台劇MK嘅風格。
我隻身一人去戲院自己睇，之前都未曾試過自己一個去睇戲，今次真係破曬例了吧？
兩個人互相錯過喱一part好似我同呀強，如果我哋都係足夠成熟嘅時候相遇，我諗唔會有咁多問題吧？
睇喱一套嘅時候，只有滿滿嘅感觸，但無喊到，係感動嘅，可能主角係男仔，無咁多身同感受吧？
係離場嘅時候，我係太古城UA度睇，要行樓梯出返去，我見到呀強行係我前面，估唔到咁都會撞到⋯⋯
而且佢似乎係自己一個人嚟睇，我哋頭先一齊係同一個場，睇住同一套戲。
唔知大家係咪諗同一樣嘢呢？我不禁感慨起來。
我哋又巧妙錯過一次相遇，我默默地苦笑。