《我的MK妹同桌》: 20
中二嗰陣，素來係學校獨來獨往嘅我，本來就無乜朋友，我淨係諗住好好地讀完自己嘅書，其他嘅嘢我唔想去理。
有個咁樣嘅老豆，你唔為自己諗，邊個為你諗啊？
直至有條傻仔出現，先改變自己嘅想法。
嗰陣時我唔多唔少都有啲憤世嫉俗吧？點解自己會有咁樣嘅屋企？咁樣嘅人生？
我都有諗過放棄讀書，出去玩飽佢咪算囉。
但到最後都係做唔出，返學啲同學仔唔會理我，上堂無嘢做嘅我咪專心聽書囉，同時都唔甘心咁樣吧？
唔知幾時開始，我會係圖書館搵到一刻屬於自己嘅寧靜。
個四眼哥哥又鬼死咁好人，一嚟嘅時候我成日都惡佢，可能係一種自我保護意識吧？
成日就將唔想做嘅嘢都俾佢做曬，佢咩怨言都無，雖然平時份人無聊啲同埋戇鳩咗啲，但真係好好人。
慢慢地，我都無對佢咁惡了，成日都會同佢吹下水，後來都互相交換下MSN。
佢係我喺學校唯一嘅朋友吧？
而且深知大家對大家都唔會有咩嘢，佢已經form7，聽講好似係最後一屆，過多幾個月佢就畢業唔係度了。
有一日，我拖住疲累嘅身軀返學，俾我遇上條傻仔。
前一晚，呀彥捉住我執咗好幾劑，但我一啲都感覺唔到舒服，只係感受到純粹嘅發洩⋯⋯
我下面係痛住咁返學⋯⋯
係我瞓得正香嘅時候，條仆街嘈醒本姑娘，話要借書，睇佢個眼神就大概估到佢嘅意思。
當你見慣見熟嘅時候，你好快就會明白㗎啦。
對於喱啲事思空見慣嘅我，並無將喱件事放係心，啊⋯⋯點知條友第二日又再嚟過。
第三日亦是如是⋯⋯
第四日也是⋯⋯
對於佢嘅毅力，我十分佩服，佢仲要準時第二個小息就嚟，而且借嚟借去，還嚟還去都係嗰幾本書。
「其實你係咪想溝我姐？」我坦白咁問佢，我以為佢嘅反應會係怕醜唔認啦，點知佢口快快咁答話：「係啊！」
通常啲男仔會俾我咁樣嚇疾，估唔到佢會咁直接，我偷偷地笑咗下，喱條友又幾特別喎。
佢不間斷地上嚟圖書館搵我，吹下水打發下時間都幾好。
而且仲要透過四眼哥哥拎到我個MSN，佢真係幾落心落力，佢嘅主動出奇地唔令我覺得討厭。
直至臨放暑假嘅時候，佢就突然無再上嚟。
本來每日都會實會發生嘅事，忽然間無咗，嗰日個小息唔知點解過得好奇怪，心入面有陣失落。做咩都好奇怪，睇書瞓教都好唔自然。
之後佢都無再上過嚟⋯⋯
不過好彩嘅係，好快就到暑假。我基本上都係無所事事咁跟住呀彥出去蒲，日日如是，佢去邊我就去邊。
暑假返嚟，估唔到嘅係會同係同一班遇返個傻仔。
對於佢嘅再次出現，我有啲期待。對於佢嘅感覺，係慢慢一點點累積吧？好似儲印花咁，儲夠一定點數就會換到什麼。
因為同班好自然知道佢叫咩名，睇下班表大約就估唔到，條傻仔仲係咁問我叫咩名，成個人傻裡傻氣咁，幾搞笑。
有一次放學，我如常同呀彥去平時去開嘅網吧，因為呀彥唔係係我學校附近嗰區，有一段距離，所以都係我去搵佢多。
俾我係網吧度遇到呀強⋯⋯
條友走過嚟同我say hi，我一陣尷尬⋯⋯熟又唔係到好熟，但又未到唔熟嘅尷尬。
只不過，唔知點解，我唔係幾想佢知我嘅過去，尤其是唔想俾佢知呀彥⋯⋯
如我所預料，呀彥無俾到咩好面色呀強睇。
完咗之後，呀彥問我頭先個男仔係邊個嚟，嬲爆爆咁問。
「無啊⋯⋯同班同學咋嘛。」我如實回答。
「條柒頭係咪冧你姐？」呀彥好用力咁捉住我隻手，捉到我好鬼痛⋯⋯
「我點撚知佢係咪冧我啊？」我真係唔知佢係真係想溝我定點，好多人都係講講下㗎啦，唔通人哋講下你都信咩？
「我唔撚理，你以後唔好同佢行咁鳩埋。」呀彥嘅無理，已經慢慢到達我嘅臨界點，我只係覺得我好似係佢嘅附屬品咁。
係喱個時候，咁啱傻強出現，巧合、緣份喱樣好似越係解釋，就越係解釋唔到咁，但又真實地發生係我哋生活入面咁。
上堂再專心都會有分手，覺得無聊嘅時候，呀強會陪我解解悶，會陪我戇鳩，係佢隔離，我唔洗去迎合佢，佢想去邊我都要陪佢去，我只要負責笑，負責開心就夠。
雖然條友成日都驚驚青青咁，淆曬底，但幾好笑，趣緻又盞鬼。
而且仲要俾我發現佢係青頭仔！！
睇佢正正常常，平時又幾幽默搞笑，應該都有溝過女，點知會咁⋯⋯
係呀彥身邊嘅男仔，一個二個一早就食過女啦。
不過見到呀強怕醜個樣，又覺得佢幾可愛，我係抱住玩下個傻仔嘅心態去挑逗下佢，佢又好易紅都面曬喎，哈哈哈！
平時會將condom帶係身上嘅我，為嘅咪又係滿足呀彥嘅慾望，有時會係後樓梯，有時又係殘廁⋯⋯
有一日，我老豆飲完酒之後係度發酒癲，打打殺殺咁，又打爛曬屋企啲嘢，佢乜都唔識，淨係識埋啲仆街嘢。
佢入廚房拎把菜刀係咁係度揮，我真係俾佢嚇壞⋯⋯
好驚⋯⋯佢酒紅嘅臉龐，酒氣加殺氣混雜一齊，係度破口大嗌，鳩叫。
我個腦閃過兩個念頭，報警同埋走佬。
人仔細細嘅我坦白講無咁嘅膽量去報警，人大咗有膽，唔會俾人蝦到上心口先會去報警。
「你老母啊⋯⋯雞嚟㗎！！仆街！！係雞啊！生出嚟嘅女都唔方好嘢啦⋯⋯嗝⋯嗝⋯⋯屌你老母！跟佬走？留低件佗衰家係度？」
「屌你啦！呀媽跟佬走係做得啱㗎，跟著你先仆街啊。」我唔忿氣地駁道。
我從來無怪過呀媽跟人走，就算心入面有一絲怨恨，恨呀媽做咩唔帶埋我走，但都無怪佢。
人往高處爬，係好正常嘅事，佢依家可能有美好嘅家庭，有我係度可能只會阻住佢。
我嘅出世彷佛就係一個錯誤，點樣揀都碌柒咁，可以嘅話我都唔想出生係喱個世界上。
「你個衰女包，仆你個街，咁樣話鳩你老豆？我無俾錢你洗啊？」佢舉手就想一刀劈落嚟，佢稍為酒醒咗少少，好似察覺拎住把刀好大件事，走入廚房放低把刀，拎咗個掃把出嚟，二話不說就揮落嚟。
間屋咁細，我避都避唔到，硬食咗一嘢，我大脾位即刻瘀咗一塊。
我心入面真係慌到一個點，夾雜著憤怒，但驚慌嘅情緒遠大於憤怒，眼淚一路係度打滾。
我大嗌咗一句：「你都唔知乜撚嘢老豆嚟！」
就衝咗出屋，去咗後樓梯喊，一直喊，一路喊。我都唔知喊到幾時，中間有聽到後樓梯有開門聲，我驚有人經過，時不時會上下張望，確認無人又再繼續喊⋯⋯
嗰晚我無返到自己屋企，去咗呀彥屋企，係喱個傷心嘅時候，我唯一諗起嘅依靠⋯⋯
就係佢。
我好想有人用力咁攬住我，然後同我講：「唔緊要，有我係度。」
簡單嘅一句說話就夠，只係想要返啲愛，一樣係我身上極少擁有過嘅嘢。
我去到呀彥度，佢掛住玩佢嘅勁舞團，部電腦勁大聲咁播緊「金鐘國」。
玩完之後咪理我囉，我係張床度瑟縮咗好耐，佢好似打到悶，打到眼瞓先過嚟搵我。
仲要熄曬燈，上床攬住我，然後將我拉落床到，我順勢就咁瞓咗落嚟。
我期待嘅似乎終於實現，但點知原來可以低處未算低。
佢開始摸我個胸，然後錫我條頸⋯⋯
一陣陣失落感打落嚟，我係度諗自己究竟係乜，女仔就係俾人發洩嘅工具？
從頭到尾都無關心過我，我想要嘅，只⋯只不過係想有人可以真係關心我姐，點解好似好難咁？
係我思考緊嘅過程中，我無出到聲，任由呀彥魚肉，彷如一具死屍，無任何反應。
我以為佢見到咁就會停低，問下我咩事，點知無，佢慢慢向我下面進發。
我推開咗佢，拎走啲嘢。
「喂⋯⋯做咩姐⋯⋯嬲啊？」係間房度傳嚟呀彥嘅叫吼聲，打開房門，叔叔係廳度睇緊波，彷似見慣般不聞不問。
曾經我以爲可以再次俾到溫暖我嘅地方，只不過係另一個地獄，只係一個係第十八層，一個係第三層嘅分別而已。
嗰晚我無返到屋企，去咗海旁吹風，成晚無瞓過教，第一次睇日出，仲要係自己一個。
係海旁嘅我，俾海風吹走曬啲睡意，我老早就返屋企，打算換返件校服返學。
但又要趁老豆未起身前搞掂曬所有嘢，點知我擔心係多餘，屋企空無一人，唔知佢死撚咗去邊。
我最後小睡個令鐘左右就返學。
心情極差嘅我仲要俾個戇鳩班長話我無交功課，我唔洗10分鐘就搞掂個功課，一早交咗出去，話鳩我無交？
加加埋埋嘅事已經夠我心煩，好想發洩，好想喊，我拼死咁忍住。
而我最估唔到嘅係，第一個關心我嘅人，係我隔離喱個傻仔。
係我背住佢趴係張枱嘅時候，佢無煩到我，然後坐返起身嘅時候，發覺枱面上多咗包紙巾。
一股暖意瞬間暖上心頭，好似就嚟爆咁，我覺得喱包紙巾好似包含著千言萬語咁，雖然咩都無講，但代表住一種默默嘅關心。
「你擺係度做咩啊？」我甜甜地笑，儘量唔俾佢察覺，明知故問地道。
「我驚你喊啊嘛頭先。」個傻仔擔心我⋯⋯
「你都傻嘅，我會喊？」我逞強，明明就好想喊，但就偏偏唔想俾佢咁易睇穿我，所以咪掩飾囉。
順勢就係一嘢打落佢度，我真係差啲喊係因為喱個傻仔。
唔知你哋明唔明，有時你積積埋埋唔開心，想喊想喊咁，但突如其來有人關心你，安慰你，好似關咗你一陣強忍住嘅情緒，終於有一個人可以令你放心落嚟咁樣。
只不過最後俾個傻強整到我笑出嚟，所以先無喊到。
心情算係好返啲，但到lunch time，我又係要「享受」住喱種「快樂」嘅孤獨時光。
當其他人都有朋友仔陪食飯嘅時候，我就只能夠自己一個，我甚至會行到好遠好遠嘅餐廳食飯，因為越近學校一定好多人排，只會更顯得自己孤單⋯⋯