《我的MK妹同桌》: 21
我打算照舊去食嗰間好遠嘅茶餐廳。
我不停咁諗緊琴日嘅事，頭先俾呀強搞到我無再諗，去返一個人嘅時候，就又再嚟料。
忽然間隔離個男仔係咁望住我，然後扮若無其事咁繼續行，側邊仲有一大班男仔係度，望落似係同form，見佢哋仲低聲細語咁講：「喂喂喂，隔離條女幾正喎！」
真係方死我聽唔到咁。
然後一個接一個咁望過嚟，眼神十分之猥瑣，昅還昅啊，唔好昅到咁猥瑣，有啲人係望住你帶有欣賞，賞識嘅眼神，覺得你靚。
有啲望住你嘅眼神只不過係想同你搞嘢。前者會覺得無乜嘢，後者係會令人反感。
係嗰一群人入面，我望到個熟悉嘅背影。
望多幾眼後，幾乎肯定係佢，下意識地上去打咗佢一下。
諗住無聊吹幾句水，點知問埋啲唔撚識答嘅問題，當場無曬引，就走咗去。
諗住就咁算，我都無放係心，點知個傻仔跟埋嚟，不禁令我覺得，佢係咪以為我頭先咁樣嬲咗佢？
定還是可憐我？
而我最唔想嘅，就係要人可憐，唔需要啊！
「我邊有覺得你可憐姐。」
我望住佢，由佢表情睇得出，唔似講假，我信咗。
依家嘅我，確實唔需要人可憐，但⋯⋯
我需要人陪。
當我講完我想有人陪嘅時候，我啲眼淚就忍唔住了。
連自己都覺得可憐嗰陣，先係真正嘅可憐。
不過我都好多謝呀強最後真係成程無講嘢，默默地陪我食曬成餐飯。
而且佢都好關心我。
唔知點解，俾佢咁樣關心法，瞬間嘅唔開心爆曬出嚟咁，一個大膽嘅念頭出現係我腦入面。
「不如我哋唔好返學囉？」
呀強嘅反應俾我嚇親咁，而且係我預料入面。
佢遲疑了，仲嚇到呆咗咁。
「下？認真咩？」
我未曾咁肯定過，今日……我想好好地癲一日！
而我最估唔到嘅係，佢又真係肯應承我，我亦都唔知係咩原因令到佢陪我癲，但慢慢我感覺到嘅，佢對我嘅鍾意……
係真。
有啲人，口講到幾愛幾愛，好鍾意你咁樣，但真正為你做嘅，又有幾多？
甚至只會大難臨頭各自飛。
呀強佢係傻仔咗啲，但有時嘅舉動幾令我感到窩心……
喱次逃學，真係話走就走，個回憶幾深刻。
兩條友唔識逃學，鳩fing fing咁買兩支可樂就咁坐係附近公園。
但又出奇地開心。
可以癲下咁，將所有煩惱一掃而空。
雖然成日都係得我一方面玩佢，但佢又肯俾我玩，一個願打一個願捱咁。
大個先明白，原來著住校服係公園做喱啲嘢，係特別唔同。
當遲下你已經唔再著住校服，路經公園，見到班著住校服嘅哥哥仔妹妹仔，係度玩得好放縱嘅時候，真係會好懷念，即使口裡面會屌佢哋班中學生戇鳩鳩。
自己遲下著得再靚，去返公園同同一個人做返同樣嘢事，都唔會再好似以前咁。
仲要驚自己著住校服周圍走會俾人發現，但又膽粗粗咁乜都去做、去試。
嗰陣時嘅心態就係又要驚又想威，要俾人知自己乜柒都唔驚！
一陣過雲雨經過，將我同呀強嘅興致打散，瘋癲完成個下晝，再次去返熟悉嘅海旁，雖然風景唔一樣，但一去返，今朝早嘅心情就湧上心頭。
呀強佢乜都無問，靜靜地坐係度陪我，明明喱個時候唔想出聲，但又想有人陪。
佢對我真係好好⋯⋯
好特別，特別到我都唔知點形容喱一種特別，佢⋯⋯就係獨一無二嘅人，無人取替到。
我都唔知自己有啲咩值得佢去鍾意，又MK、又爛口、又咁嘅身世、仲要有個MK仔男朋友。
於是乎我將心入面嘅問題講出嚟。
我並唔係想要一個咩標準答案，亦都好多個男仔講話鍾意你靚啊，夠索囉之類。
我只不過係想確定，佢係咪同其他男仔唔一樣姐。
我俾佢講嘅說話感動到。
可能有啲人一直想要嘅係要心動嘅感覺，但其實我想要嘅係想溫暖我心嘅感動。
望住佢嘅眼睛，我知佢頭先講嘅嘢係發自內心，可能我就係喱一刻鍾意上呀強吧？
我一直都覺得我會咁樣成日遷就呀彥，係因為我足夠愛佢，我都無問過自己想要啲咩愛情。
但原來我只係需要愛佢。
喱一刻我其實好混亂，我知自己有男朋友，我唔應該對呀強咁樣，而且我都擔心呀強會點睇我嘅過去。
我猶豫片刻，就決定將自己所有嘢都同呀強講。
當作係交俾佢決定，我亦都唔想對佢有咩隱瞞，竟然佢真係話鍾意我，就睇佢有幾鍾意吧。
我將所有嘢和盤托出，我唔知佢會係咩反應，亦都唔知佢會唔會接受咁樣嘅我。
我自己親口講出嚟都需要好大勇氣，啲眼淚又想流想流咁，喱幾日用唔少眼淚啊⋯⋯
我習慣地拎支煙出嚟，熟悉地用打火機點煙。
點知俾呀強一手拎走我支煙，拋撚咗落海，我呆撚咗，佢做乜鳩啊⋯⋯
正當我無名火起嘅時候，呀強用力地將我擁入懷。
我再次呆咗。
我期待已久想有個人可以攬下我，希望我重視嘅人俾啲溫暖我，但偏偏我重視嘅人咁樣對我，而最令我估唔到嘅係，一個鍾意我無幾耐嘅人做得到。
我都終於忍唔住我啲眼淚⋯⋯
但今次係因為感動。
女仔，唔係想搵個有幾叻幾叻嘅男仔，只不過係想搵個錫佢嘅男仔，可以做佢一個人嘅公主。
就算個男仔幾有錢，幾成功，佢唔願意去錫你，其實都幾悲哀下。
我只係想有個人可以攬下我，同我講：「有我係度，唔洗驚。」
呀強將我堅守咗好耐嘅保護甲打破，我一路都同自己講要堅強，唔可以軟弱，依家好似有呀強係度，我終於可以唔洗再扮堅強⋯⋯
佢嗰一份溫柔，值得我去記一世⋯⋯
有人可以讓你柔弱，誰想堅強？
我諗，我係嗰一刻開始，真正鍾意上呀強吧？
總有某一刻，會令你記住係點樣鍾意上嗰個人，呀彥如是，呀強亦都如是。
之後我哋難免會俾人罰，不過罰俾人留堂班真係濕濕碎，記大過我都未驚過，更何況喱個留堂班？
總感覺之後好似成日都同呀強一齊咁，我哋好自然咁多咗好多時間相處，坐埋一齊，又一齊去留堂班，仲要一齊放學。
我哋一路閒聊至小巴站，今次好似係我哋一齊放學，我記得我哋大家住唔同地方，喱個車好明顯係唔同路，所以就講咗句掰掰就上車。
我坐低無幾耐，就見到個傻仔都跟埋上車。
我O咗⋯⋯呆咗咁住佢，心諗佢上車做乜撚。
本來我坐係走廊，佢上嚟逼我坐入窗口位，見到佢傻傻戇戇嘅樣，心入面甜咗一下，佢嘅機動再明顯不過。
佢上車前問咗關於呀彥嘅嘢，我直覺以為佢追上嚟係問呀彥啲事。
「做咩姐？咁想知呀彥啲嘢？」我原本以為佢會死口唔認，點知佢大方承認，今日嘅佢係幾有型有款，同平時傻更更嘅佢唔同。
「係啊，只要佢一日仲係度，我就無辦法完完全全追到你。」呀強講完後，直勾勾地望住我雙眼，我霎那間俾佢散發出嚟嘅霸氣所感動。
有啲說話會令人心動，係因為好聽，但你明知會做唔到。
有啲說話會令人感動，除咗因為好聽，而佢仲會做得到。
呀彥曾令我心動過，卻無令我感動過。
呀強係一直感動緊我，最後先令我心動。
接住落嚟，呀強嗰一番說話，真係一字一句走入我心入面⋯⋯
我好似第一次感受到溫暖咁，由體內散發出嚟嘅溫暖，成個人都有啲熱。
呀強講嘅嘢並唔係啲好聽到甜出嚟嘅說話，只不過係再普通不過嘅嘢，但就係有股說不出嘅溫柔。
我唔想再喊，係呀強面前，我已經喊咗好多次，但我越係去諗頭先呀強講嘅嘢，就越想喊，最後都係忍唔住。
除此之外，因為呀強咁鬼直白，搞到我反而有啲怕醜，唔敢直望佢嘅眼神。
我怕我直望佢嘅眼神，鍾意佢嘅感覺會更加強烈，變成愛上佢，所以努力壓抑住自己嘅情感。
所以最後落車，我都無俾到回應呀強，喱一刻我自己都好亂，我需要整理下自己⋯⋯
所以草草就同呀強道別，返屋企。
返到屋企，我瞓係張床入面，我早以習慣喱個安靜到不得了嘅屋企。
但奇怪嘅係，今日一啲都唔安靜。
原來唔安靜嘅人⋯⋯係我。
呯呯⋯呯呯⋯呯呯⋯⋯呯⋯
個心仲一路亂跳個不停，唔瞞自己，就連呀彥都未曾咁樣心跳加速過，我個腦不停重複緊呀強頭先好型咁上車，行埋嚟嘅畫面。
聽人講話，如果你真係鍾意一個，你合埋眼，第一時間出現係你腦海入面嘅，就係你鍾意嘅人嚟。
無論我合埋幾多次眼，腦入面嗰個都唔會係呀彥嚟。
思索咗好耐，自己嘅感覺究竟係點，最後得出一個結論。
於是我決定打開電腦，MSN呀強，覆返佢今日同我講嘅嘢，但我嗰晚一路等，都等唔到呀強on MSN，平時佢成日都會上線㗎嘛，今日全晚都係透明。
我打嗰篇嘢嘅時候心情好鬼忐忑，1516咁，一方面覺得想矜持，另一方面又想呀強自己gag到。
最後都係衝動打完，又衝動咁sd埋出去。
一sd出去就後悔啦，啊⋯⋯係咪唔應該sd呢？女仔係咪應該矜持啲呢？
跟住我就成日都睇住個MSN，睇下呀強幾時on，為咗俾籍口自己分手，就去玩下facebook，但其實心不在焉。
就連玩跑online都係，落地同埋DJ jump都無咁順。
第二朝返到學，呀強佢黑口黑面咁，完全唔知佢咩事，我仲諗住問佢做乜琴晚唔on MSN添。
然後我問佢嘢，佢都完全唔睬我，對我不瞅不睬，視若無睹。
感覺佢似係嬲咗我咁⋯⋯我隱隱約約聞到陣火藥味。
心入面難免有啲驚，係咪我做咗啲咩激嬲咗佢？我放lunch嘅時候就寫咗張紙仔俾佢，放咗係櫃桶。
我會怕。
原來呀強係我心目中，佔嘅地位越嚟越重要，我會怕佢就咁唔理我，就咁離開咗我。
我承認我係一個成日亂諗嘢嘅女仔，同埋好無安全感，而且又缺乏家庭溫暖，係得呀強先會對我咁好⋯⋯先會俾我恰⋯⋯先會可以咁樣做返自己。
所以我先想千方百計咁令呀強同我講返嘢。
點知最後呀強睇完都係唔理我！真係有點火大！做到咁都仲係唔理我啊？
我睥咗佢一眼，但瞬間又收返起個憤怒，佢會唔會反而仲嬲㗎？
放學嗰陣，我見呀強好快脆就收好書包，等都唔等埋我。
我一陣心慌，道：「唔一齊去留堂班啦？！」
呀強冷冷地道：「唔啦。」
然後就真係自己去，dum低我係度。
我真係好唔鍾意，好唔想俾人dum低，嗰陣滋味真係唔好受⋯⋯
更顯得孤苦伶仃。
明明琴日呀強仲好溫柔，仲好鬼死man，做咩事今日就咁冷淡？我百思不得其解。
明明之前係佢追我先，依家反而到我俾呀強牽制咁，俾呀強嘅一舉一動影響自己。
正衰人！大仆街！
於是乎我成個留堂班都諗點樣可以整蠱佢，點知佢最後會咁小氣，真係嬲⋯⋯
無意間俾我逼到佢講點解會嬲我，全日都咁冷淡。
原來係我琴日咁樣無理到佢，就咁走咗去，我俾佢嘅傻下傻下咁逗笑，乜有人會咁樣嬲人嘅咩？
仲要咁樣出咗個誤會出嚟，都唔知好嬲定好笑。
喱種曖昧嘅感覺確實美好，似有若無嘅感覺，但又會成日借啲意去關心對方，雖然笨拙，但好可愛。
但我同佢之間，仍然存在住呀彥係度，我想等我同呀彥嘅事解決後，先同傻強一齊。
一件事係有好多種方法解決，但應該點解決，就要自己去思索。
因為呀強對我係認真嘅，所以我都想認真咁解決我同呀彥嘅事，咁樣先對得住傻強。
本來我哋可以一齊先再算，但我覺得最後呀彥會嚟搵麻煩，為免咁嘅情況，忍一陣唔係啲咩壞事嚟。
因為呀強嘅關係，我同班上面嘅關係越嚟越好，個天好似收咗你一扇窗，幫你開另外一扇窗咁。
係嗰一場班會活動入面，我識咗呀Ken，子晴喱啲朋友，所有嘢都巧妙得過份，而我其實一直都好擔心⋯⋯
擔心自己咁MK，會同佢哋格格不入，會好似以前咁俾人排斥，但原來只不過係我諗太多，佢哋似乎無咁樣諗過，仲玩得好融入。
因為喱種落差而高興，本來你期待最差嘅結果，依家反而帶咗你上天堂，有種坐過火車嘅刺激同埋喜悅係入面。
儘管呀Ken佢過份熱情，但其實佢好關心人，成日周圍問人食得飽唔飽，夠唔夠食。
佢只係為每一個嚟嘅人都開開心心而努力。
只係有一刻令我感到寂寞，就係呀強去咗佢朋友嗰邊吧，忽然間我好似失去咗重心咁⋯⋯