《我的MK妹同桌》: 19
「就算分咗手，你都係我好好嘅朋友嚟⋯⋯」呀詩笑道，強顏歡笑。
佢就係啲咁嘅女仔，唔開心會收埋係心入面，嬲就反而唔理三七二十一爆咗先。
「如果你覺得見到我會好辛苦嘅話，我哋唔好搵大家會係好事嚟。」
「多謝你由一開始都對我咁好⋯⋯」
「我一直都好幸福。」呀詩發自心底咁講，我唔明啊。
咁明明係幸福嘅，點解都仲要分手？
「咁我哋一直都幸福落去囉？」講出嚟呀詩都唔會改變佢嘅心意，喱個係我嘗試嘅最後努力。
「掰掰啦。」呀詩最後係我臉上留下一個唇印。
佢無回答到我嘅問題，就離開咗。
我望住佢慢慢離開我視線，我唔甘心地追上去，只係單純地希冀著，呀詩能夠回頭，佢會後悔頭先做嘅決定。
傻仔地一路跟住佢，然後望住佢喱個熟悉嘅公屋大門，遠遠地望住佢離開。
佢無回頭。
我唔記得我點返屋企，我淨係記得我痛住咁返屋企，無傷口㗎，唔知幾時會好返。
好似今日發生嘅嘢都唔係真咁，不停地問自己點解今日咁黑仔？唔敢相信就咁無咗呀詩。
我返到去第一時間就係開facebook，MSN，有關於呀詩嘅所有嘢，我都打開曬，生怕會漏咗啲咩訊息。
無幾耐就見到呀詩嘅感情狀態由戀愛中變返為單身。
下面仲好多人留言問呀詩咩事，大部分都係仔嚟。
嗰晚係我人生第一次失戀，嗰種痛真係一世都記得，根本唔會瞓得著，唔甘心、傷心、一大堆唔明白嘅事混雜一齊。
好想大喊一場，但喊唔出，唔知點解，明明覺得傷心到隨時可以喊出嚟，但就係喊唔出。
直至半夜⋯⋯
瞓係張床度，望住個天光板，諗起同呀詩嘅往事，一件又一件事。
我部電腦仲開住，突然間傳嚟一把MSN訊息嘅提示聲，我即刻彈起身，飛奔過去，係咁搖隻滑鼠。
我期待嘅係呀詩會MSN我，無論佢手啲咩都好，只要佢搵我就好。
期待落空，並唔係呀詩，而係子晴。
子晴：你無嘢啊嘛？
見到佢喱句後，本來喊唔出嘅眼淚好似淚崩咁，望住佢喱句，所有心酸都湧上心頭。
除咗突然有人關心嘅感動外，仲有內心嘅委屈一下子爆曬出嚟，由心口衝上嚟，忍都忍唔住。
屈指一算，好似由我小學三年班俾呀媽鬧完嗰次之後，就無再喊過。
我喊到收唔到聲，失聲痛哭，我淨係諗住呀詩最後同我講嗰一番說話。
一堆內疚，自責，揼心口全部積係心入面，我發洩唔到出嚟啊仆街！
原來失戀可以咁痛⋯⋯
如果真係痛到咁，我真係唔想再拍咩拖啦。
我記得求其覆咗子晴一個「：）」咁嘅表情就由佢，我喊到攰就瞓，鬧鐘都無較，係呀詩入嚟叫醒我返學。
好似係夢入面先抖到氣咁，一瞓起，幾秒鍾就搵返你嚟現實，因為用幾秒鍾諗返起琴日發生嘅事。
中學拍拖係好開心，可以一齊係校園經歷好多事，但萬一分咗手，亦會係一個令你萬劫不復嘅地方。
所有嘢都有兩極，有好有唔好。
而我偏偏經歷曬兩樣嘢，我都唔知係好定唔好⋯⋯
返學校先尷尬，啲同學其實都知道咩事，但問呢又怕我會傷心之類嘅，唔知我會有咩反應。
介乎想問，但又覺得唔問比較好嘅矛盾。
真係，從佢哋嘅眼神就睇得出，我寧願佢哋單刀直問都好過咁樣，個氣氛勁尷尬，所有嘢好似一層層向上疊咁，一件未完又嚟一件，抖都抖唔過氣。
當所有都保持咁嘅態度嘅時候，有啲甚至避之則吉咁，係得蕃薯仔真係走過嚟問我：「你同呀詩搞咩姐？」
簡單一句，無咩思索，加上佢嘅性格，你會知佢真係關心你，並唔係想八卦啲咩。
「咪散咗囉。」講出口把聲我自己都嚇親，有氣無力到呢。
我心情仲好低落，可以唔出聲就唔會講任何嘢。
「你哋平時都好地地㗎喎，無啦啦做乜散先得㗎？」我估唔到會咁樣關心我嘅係蕃薯仔，之但係，對唔住啦蕃薯仔，依家嘅我咩都唔想講⋯⋯
「遲下先再講啦⋯⋯」我趴係張枱度，行屍走肉咁過成日，完全提唔起勁，生活好似失去咗目標，失去重心咁。
我甚至覺得我行路好似係漂緊咁㗎大佬，心口缺咗一塊。
而最慘，莫過於返學會撞到呀詩。
喱樣似乎成為必然嘅結果，唔洗估都知，自己唔多唔少都做咗心理準備。
但當真係見到面嘅時候，嗰種衝擊直闖你心底深處，勾起你一塊塊肉咁，即使你做好任何心理準備⋯⋯
都無鳩用。
今日全日為咗唔撞到佢，我小息無出過班房門口一步，小息就瞓囉。我只有瞓覺，發夢嗰陣可以逃避下喱個殘酷嘅現實，好可悲。
我好希望一直都發住夢，唔好醒過嚟。
要上廁所，就上堂嗰陣舉手話去廁所，我知條八婆Miss想屌鳩我話做咩頭先小息唔去，但好似見我唔多對路就收返無講，一副欲言又止咁款。
Lunch time我叫班平時飯腳去攞位先，我等到其他人走得七七八八我先出去。
食完lunch返嚟，我就去小食部避一避，之後再小心翼翼咁返班房，可以避嘅我都已經避。
我無勇氣搵返呀詩，追佢嗰時嘅勇氣，好似淨係可以用一次咁，之後攞唔返嚟咁。
我選擇咗一個最撚廢嘅方式——逃避。
真係好幼稚，係咪啊？
我都覺啊⋯⋯
但我真係做唔到，做唔到分手後強顏歡笑，仲扮到自己好似無事咁，好開心咁嘅樣。
然後當無人嘅時候，先可以偷偷地卸下自己嘅假面具。
光係幻想下都覺得辛苦。
甚至天真地閃過一絲咁樣嘅諗法，可能呀詩見到我咁樣，會可憐我，會心軟然後同返我一齊呢？
又或者佢會唔忍心呢？會想鼓勵我呢？
但當我哋真係碰面後，我知無可能會發生。
放學，我想第一時間衝出班房，比其他人快走，咁咪唔洗撞到佢囉，我心係咁諗。
最後都逃唔過命運，命運好搞笑㗎喎，你越係唔想見，偏偏就係俾你見到，越係想見，反而越嚟越遠。
我迎面撞正呀詩，佢似乎都係趕緊時間，有別於我，佢唔似係趕唔時間避我。
我同佢都呆係原地幾秒，琴日嘅事一瞬間塞曬係個腦度，我諗我個表情一定好尷尬吧？
呀詩好快反應過嚟，對我微微笑咗一下，點咗下頭。
那一記笑容，睇到我好痛⋯⋯
真係好種衝動想喊出嚟咁，但只可以忍住放係心入面。
嗰抹笑容，係由熟悉轉為陌生嘅笑容。曾經喱個笑容我日日都可以見，亦因為佢嘅笑容，我感覺到真真實實嘅幸福。
多少次因為呀詩嘅笑容，我發自內心地覺得甜蜜。越係真心、用心地付出過，分開之後嘅後勁就越勁。
感情無非好似一條橡筋咁，越係用力，反彈就越勁，打人就越痛。
依家呀詩對我嘅笑容，係一個對陌生人禮貌嘅微笑。而且今次意外嘅碰面，更加清晰咁同我講⋯⋯
琴晚發生嘅事，係真嘅⋯⋯
然後呀詩就咁走咗，眼神只係停留咗一陣，就擰轉頭走。
就係咁，一下咋，淨係見到一面咋，我都覺得撕心裂肺咁樣啦。
好多事，經歷過後先明白。我依家先明白點解啲人成日話放唔低，當時我仲覺得，男人老狗就梗係要拎得起放得低啦。
可以嘅話，我真係想一世都唔明白喱啲事。有時唔明白咁多嘢反而係一種幸福。
之後嘅日子，子晴同蕃薯仔都有輪流搵我，問我點。當然其他人都有啦，我知佢哋都係出自好意，但我真係好想靜下，唔想講嘢。
到依家我都覺得好似唔係真咁，用盡所有方法嚟呃自己，麻醉自己。
起身就同自己講發夢姐，臨瞓前都仲係諗住同呀詩以前拍拖嘅事嚟瞓。
咁樣嘅日子唔知持續幾耐，無了期咁，好似入咗個黑洞咁出唔返嚟，最恐懼莫過於此。
而過咗一排，有一套台灣電影好紅，咁啱係喱啲時候上，真係仆你個街⋯⋯
電視廣告都有賣啊，Youtube上面都有佢首主題曲，又有曬預告咁。
那些年，我們一起追的女孩。甚至有人已經睇緊書，兩樣都睇，對比下咁喎。
我俾個故事吸引住，不禁覺得自己好似那些年個主角咁，為咗呀詩做埋啲痴線嘢。
係啊，真係好青春。
不過呀詩唔係咩讀書嘅乖乖女，啊⋯⋯依家算係嘅，以前係MK妹。
我自己一個入場睇那些年。
第一次係戲院睇到喊，咁大個仔未曾試下過。
我唔敢同其他人睇，因為我覺得我會喊，而且咁啱撞正喱個時候，上套咁嘅嘢⋯⋯
而且聽聞喱個故事係真人真事。
當時睇那些年，覺得自己係柯景騰；若干年後睇那些年，已經係九把刀了。
會鍾意以前嘅自己，係真㗎。
其實我唔覺柯騰有咩錯，只係大家都錯過罷了。
我無辦法好似柯騰最後咁，話可以真心祝福對方，有人錫有人寵。
可以自己做到嘅，點解要假手於人？偏偏最諷刺嘅係，其實自己可以做到，但因為自己唔成熟，先搞到咁嘅田地。
正正因為自己做唔到，先至會俾其他人做啊仆街！！！！！！
係自己啊屌⋯⋯⋯
屌⋯⋯
嗚啊⋯⋯
一諗，啲眼淚就流落嚟，個心chock住chock住咁。
「大笨蛋。」喱句說話好似呀詩想同我講咁，其實佢都唔捨得柯騰，但偏偏佢要咁做去教柯騰成長⋯⋯
我覺得那些年好睇嘅原因，除咗佢道出好多人嘅青春遺憾之外，最重要嘅人佢道出大家青春時嘅唔成熟。
會忍唔住去屌鳩螢幕中嘅柯騰。
屌你！你去追返沈佳宜咪得囉！
佢都追出嚟同你講大笨蛋啦，你咁都唔明？你衝返去攬住佢咪搞掂囉。
佢會叫你唔好搞喱啲活動，都係擔心你咋，真係鍾意你又點捨得見到你受傷？
個個都會屌柯騰戇鳩，因為係入面見到曾經嘅自己。
喱啲說話其實係對自己講⋯⋯
如果我當初足夠成熟，係咪就唔會失去呀詩？
好多人慢慢習慣，然後將其視為理所當然，喱啲係我哋嘅通病。
我並無將呀詩對我嘅好視為理所當然，而係將呀詩唔會走，唔會離開我視為理所當然⋯⋯
當呀和拖起沈佳宜嘅手，我最擔心嘅就係邊個會成為呀詩嘅「呀和」。