《我的MK妹同桌》: 16
子晴就好似救命鐘咁，喺我需要嘅時候出現，彷如天使般的存在。
我將喱幾日嘅苦同曬佢講，而令我覺得最難得嘅係，子晴好認真咁聽曬我講嘅嘢，開解下我咁。
「乜你成個女人咁㗎。」其實調咗位唔係好耐，講嘅嘢唔係多，但因為嗰堂作文堂，已經發展到可以串嚟串去嘅地步。
「可以控制到我就唔洗咁難受啦。」其實我對子晴一啲感覺都無，只係我可能係其他人眼中係一個咁濫嘅人掛？我想。
「我自己覺得全部都係你自己諗多咗姐，好似你成個世界得佢咁，你自己要知道你係對自己無信心定係對喱段感情無信心。」
日後，子晴同埋呀詩都成為我重要嘅女仔。
我哋講咗好多事，而從子晴口中所聽到嘅，喺有用好多，好多女仔嘅想法，同埋感情觀，講完一輪個心好似前所未有地舒暢。
一路以嚟，將我禁錮嘅人，原來係我自己。
自此以後，我同子晴天南地北咁傾，但自己清楚明瞭，我對子晴嘅感覺，好似朋友般坦誠；而呀詩係我心中，可以隨時地牽起巨浪。
有啲人注定做唔成情侶；有啲人會令你莫名其妙地愛上。
「咁你同蕃薯仔呢？」其實我想問好耐，但我一路都唔敢問。
喺我同子晴熟絡一排後，子晴嗰日心情幾靚，我先提起勇氣問佢。
間唔時小息蕃薯仔都會用唔同藉口過嚟搵子晴，我亦都好識做咁行開一二邊。
「咩啊？」子晴臉上出奇地泛起紅暈。
「扮咩姐你？」子晴擺到明係明知故問。
「你知蕃薯仔對你點㗎。」可能我一嚟太咄咄逼人，得到嘅回應係佢兇我⋯⋯
「關你咩事姐！」
「Sor，Sor。」我連忙道歉，好似過火咗，然後我再補充返：「唔好嬲住先，我都係擔心蕃薯仔姐。」
見到子晴突然咁認真，我有啲怯。
「佢真係成舊蕃薯嚟㗎！」子晴輕輕力搥咗張枱一下。
我諗，蕃薯仔有機啦！
我止不住笑意地道：「係啊，佢真係成舊蕃薯咁啊，有名你叫。」
子晴彷佛壓抑自己咁，又將份感情藏起來。
「佢點蕃薯法啊？」當我想再問落去嘅時候，已經趕唔切了。
「無嘢啦！」顯然佢哋兩個之間仲有好多嘢我係唔清楚，甚至可能當時人都唔清楚呢⋯⋯
我都係抱住食花生嘅態度，隔岸觀火。
放心啦蕃薯仔，成個學期流流長，我實會幫你打探到啲咩嘅。
果不其然！好快俾我打探到一個重要嘅消息。
「喂！蕃薯仔！」一返到學校，我就即刻搵佢。
「做咩啊？」無啲精神嘅佢，好似一具屍體咁返學。
學校逢一三五都要企操場早會，成日要聽埋啲無撚聊聊嘅早會，我都唔明，講咪講囉，我哋又要企係度日曬但無雨淋咁，想點姐？邊撚個發明㗎？
「子晴佢就嚟生日啦喎！月尾！」
我都係琴日加子晴Facebook先留意到。
「係啊，我知啊⋯⋯」我恍然大悟，係喎，蕃薯仔有咩可能唔知。
「哦⋯咁⋯」我柒到應一應，唔知講咩好，個腦光速咁轉緊。
「咁你做咩唔搞大佢幫佢慶祝下姐？」我靈機一轉。
「下？我都唔識喎⋯⋯」唉，我有啲明點解子晴會咁谷鬼氣了。
「唉，我幫你搞啦，我同你約啦，唔該你今次醒醒定定啦！」我搭住蕃薯仔膊頭，「我真係幫到盡㗎啦。」
蕃薯仔仲一臉懵樣，真係傻得可愛。
喺上堂嘅時候，我要問咗主角先，但我唔知點樣開口問先好⋯⋯
「子晴。」我煞有介事地問道，平時我會「喂」佢。
「咩事啊？叫我個名。」乖乖女嘅佢，當我做緊今日要交嘅功課嗰陣，佢已經做緊聽日要交嘅功課了。
喱個係我同佢嘅分別。
「你27號得唔得閒啊？」我婉轉地問，希望能夠不著痕跡。
但冰雪聰明嘅佢，又點會唔知我用意啊？
「做咩啊？想同我講生日快樂啊？！」子晴陰陰嘴咁笑。
「挑！你扮下嘢唔得嘅？」
「哎呀，嗰日咩日子嚟㗎？」子晴浮誇地裝，好難想像調位前佢會係咁嘅樣。
「算數啦你。」
其實真係要多謝子晴，將我拉出嗰位無限loop嘅旋渦。我上堂少咗望呀詩同呀Ken，學佢咁話，我真係對佢太無信心。
信心，一向都係情侶嘅考驗，淨係喱一關都不知考死咗幾多人了。
我想通過喱一場考驗。
「咁嗰日得唔得姐？」我追問。
「我要睇下先喎，做咩姐？！」
「諗住幫你搞個生日會姐，我搞喎！係咪好有心先？」
「多謝喎！咁好心做咩啊？」
「蕃薯仔話想幫你搞㗎。」喱個時候，我將個波推俾蕃薯仔，希望幫到啦。
「真係咩？」子晴有啲唔係幾信，為咗要講到似層層，我就話：「咪玩啦，唔係佢我點知你生日啊？」
「我Facebook明明就有寫⋯⋯」子晴雙眼總能夠睇穿我咁，透視眼嚟？
「得鬼閒睇你Facebook咩，點姐，得唔得閒姐？」
「我唔知啊，有個男仔似乎都想約我嗰日出街。」我嚇一跳，唔係掛？
不過仔細一諗，又啱嘅，優秀嘅佢有人追都好正常，不禁擔心蕃薯仔，佢嘅對手真多。
「佢都係得一個約你姐，依家我哋成班幫你搞生日喎！喱啲機會唔多㗎咋。」我極力遊說子晴。
「我再諗下啦。」
最後我都俾時間佢諗，放學嗰陣，我將喱個計劃話俾呀詩知，呀詩一聽就十分興奮。
「好啊！搞啦！越多人越好。」
「你都要幫手㗎。」我彈彈佢額頭。
「做咩無啦啦幫佢搞生日嘅？依家一齊坐，fd啦下話？」呀詩扯住自己織俾我嘅頸巾，興師問罪。
「啊⋯你同呀Ken就fd得，我同子晴就唔fd得？」呀詩咁緊張我，我就食住上。
「啊⋯⋯依家識駁我嘴啦？」呀詩扭我耳仔，心裡甜了一下，彷彿去返我哋仲未一齊嘅日子。
「邊敢啊？」我吃吃笑說。
「總之我話唔得就唔得啦！」呀詩谷起雙臉頰，嬲爆爆個樣甚是可愛。
個結果係幾好嘅，可以見到呀詩呻醋嘅樣，儘管我當初並唔係有咁嘅打算，姐係我無咁嘅心機，無諗住做啲咩令呀詩呻醋，誤打誤撞到咁樣，都幾唔錯。
係我幾番催促底下，子晴都將正日讓俾我哋，而我同呀詩都落心落力搞今次生日會。
因為子晴喺班上人緣都好，好多人都應承話嚟參加，而本來算係班上邊緣人嘅呀詩，都因為今次活動同其他同學仔fd咗。
我哋幾個朋友仔拷問蕃薯仔，問佢有無咩表示，佢夠膽死話無⋯⋯
感覺上蕃薯仔好似打曬退堂鼓咁，已經去到唔爹唔吊，無曬動力咁。
「追女仔好攰啊⋯⋯」蕃薯仔吐出佢嘅心底話，「每次喱啲節日又要諗點樣安排，又要洗錢，我真係唔係啲好有諗頭嘅人，我唔知要點做啊。」
見住蕃薯仔，好似見到啱啱一齊無耐，提心吊膽嘅我一樣。
見住佢抱住頭咁，睇得出佢好苦惱同埋幾爭扎下。
其他人都係度，個個都屌佢無鬼用，女人係煩㗎啦。
我知道當下唔係一個好時機同佢講，於是當日我專登推曬其他朋友，同埋呀詩，拉住蕃薯仔同佢出去食lunch。
人大咗，就會少咗咁樣嘅衝動，少咗最美好嘅單純。單純地睇唔過眼，單純地想幫佢一把，不為什麼。
長大了，會問自己咁樣做有意義咩？會開始計算，繼而計較，做咁多嘢係咪真係有用。
我哋係聰明咗，識得計算效益。只但係，臉上嘅笑容慢慢變少，朋友越變越少。
我哋會無可避免地衡量咁樣做係咪值得，我哋希望可以做少啲嘢，獲得最大嘅效率；但同時內心深處，卻盼望著有一個人可以為我哋意無反顧地付出。
老實講，你問我依家仲會唔會咁樣為蕃薯仔做咁多嘢。我會答：唔會。
固中嘅原因，講不清，理還亂。
反唔到轉頭㗎，正如我哋中學無可能仲keep住小學咁，大學仲keep住中學咁樣。往事嘅美好，只能靠記憶嚟回味。
我同蕃薯仔去食M記，佢一路上都覺得好奇怪，個樣好不自然。
「做咩姐？唔想同我出嚟食飯咩？」好難忍得住唔屌下佢，真係㗎。
「只係覺得兩個麻甩佬咁樣出嚟好怪姐。」講到好似我哋基咁樣。
嗌好餐，M記平時都多人㗎啦，依家仲要一位難求，我哋決定轉外賣，拎去公園搵個位坐低食。
一坐低，就開始入正題，廢話不多說。
「喱啲話我真係只會講一次，我覺得我講出嚟都骨痺，但都好想你自己諗下，自己係咪咁鍾意子晴。」
「一世人，青春得一次，你想鵪鶉成世？定勇敢一次？」
「老兄，唔好俾自己後悔啦好無？」今次希望蕃薯仔聽得入腦。
「但我真係唔知點做好呢⋯⋯」
「其實有時女仔唔係想要你啲錢，又或者物質嘢，有啲女仔係好貪錢，但貪錢喱樣嘢係人性嚟，男仔就都可以貪錢㗎。但重要嘅係你拎唔拎到你嘅心意出嚟。」
「你重視佢喱份心意可以用好多樣嘢表達㗎，你之前用錢嚟表達，都係一種方法姐，只但係我覺得子晴唔一定鍾意囉。」
「你夠鍾意一個人，就自己想花心思落佢身上㗎啦，如果連喱啲心機都無，我諗都唔算好鍾意人姐。」
我嘗試平平穩穩，理性咁同蕃薯仔講。
「你至少都俾子晴感受到你緊張佢啊⋯⋯」我真係費盡唇舌了。
「我係咪唔識溝女啊？」蕃薯仔好挫敗咁講。
唉，喱啲時候我總係好難抉擇。究竟係要狠狠地同佢講係啊，定講下啲假嘅安慰說話？
幾秒間的思考時間，卻比我悟出驚人的回答。
「個個一出世就識咩？咪又係要學，睇你有無心學咋嘛。」
「要點學啊⋯⋯？」
「有時睇下啲女仔鍾意嘅劇，睇下啲言情小說，學下入面嘅橋段，問下自己點解入面嘅男主角溝到女。無人會咩都同曬你講㗎傻仔，但你唔好學到十足十，最後走火入魔變咗個MK仔。」
我想起呀彥⋯⋯睇怕佢嘅MK嘅出處係源自台灣偶像劇。
「你自己真係好好地諗下啦，無人會一路等你㗎，唔好遲下後悔啦。」
「你之前話咁就甘心啊嘛，到時子晴佢真係同其他人一齊，你日撚日望住佢同其他男仔卿卿我我，你真係可以甘心？」
蕃薯仔無出聲，一路頭耷耷，我要講嘅都講完，剩底都係要靠佢自己。
回去的路上，蕃薯仔都唔講嘢，好似俾人點咗穴咁。
「點啊你？」就嚟到學校，我忍唔住問佢。
喺喱個時候，好似電視劇般，我見到子晴同一個好似大過我哋嘅師兄有講有笑咁先過我哋步入學校門口。
本來我想踩多腳，想話：「你睇！我無講錯啦。」
但我唔忍心⋯⋯我吞返落肚。
「你啱嘅，我都唔想俾自己後悔。」蕃薯仔眼神一變，睇嚟終於識驚。
有時驚會令你諗清楚自己想要啲咩。
我同呀詩落心落力搞個生日會，約齊人都唔算最難，最難係唔知有咩搞好。
而出去玩開嘅呀詩好多諗頭，唱K、碌鈴、踩單車、左思右想之下，都係揀唱K比較適合。
蛋糕我哋一早準備好，亦一早去拎房，然後將個蛋糕放係服務枱度。
為咗就係想俾主角一個驚喜，我哋班人都無幫人慶祝嘅經驗，而呀詩有，之前幫班MK仔慶生，聽呀詩講佢哋好難服侍。
主角嚟到後，我哋都專登讓個位俾蕃薯仔同子晴，又點曬啲情歌俾嗰兩條友，小酒窩嗰啲呢，死都係做到個氣氛尷尬俾佢哋。
就算係門口啊，都會感覺得到佢哋兩個之間嘅冷空氣。
我哋唱K比嘅唔係咩歌喉，而係成大班人可以一齊唱啲識唱，耳熟能詳，開開心心嘅歌。
唱得最難聽嘅係呀Ken，但佢又成日爭咪唱喎，唱得又幾盞鬼搞笑，好識搞氣氛。
而到周杰倫嘅歌，呀詩一定要唱，唱下唱下好多人都跟住唱，杰倫嘅歌真係有唔識講嘅魔力。
彩虹、給我一首歌的時間、七里香、蒲公英的約定，淨係點周杰倫嘅歌都夠唱成粒鍾。
喺最後嘅環節，就係一定要點古巨基嘅勁歌金曲，因為首歌成10幾分鍾，係剩底嗰幾分鐘點，咁樣就可以唱多10分鍾。
唔知邊個天才諗到嘅，然後就變成去K房嘅傳統。
咁係離開之前，我哋派咗幾個代表扮去廁所，就係為咗拎蛋糕，而負責拎蛋糕嘅，實係蕃薯仔。
我哋喺門口等下一首歌之際，準備點蠟燭，然後等首生日歌。
首歌一嚟，我哋就開門入去，跟住入面嘅人一齊唱生日歌。
因為喱幾次活動，我哋班人嘅感情好咗好多，變到可以打打鬧鬧，同啱啱開學嘅唔一樣。
我哋插咗15支蠟燭係上面，點起上嚟真係好鬼辛苦。
唱完生日歌，子晴感動地講咗聲多謝。
「許願吹蠟燭啦！」呀Ken叫到。
「仲有切蛋糕啊。」
喺所有嘢都做完後，我哋各有各唱歌，而喺喱個時候，蕃薯仔拎咗份禮物出嚟，同子晴講咗句嘢。
因為我同呀詩坐係入面，係度點緊歌，加上啲音樂聲，我聽唔到佢講咗啲咩。
然後側邊嘅人係度起哄，又哇又WOW咁。
「做咩啊？」
「咩事啊？」
我同呀詩不停咁問發生咩事，但無人理我哋。
「嘴佢！嘴佢！嘴佢！」
只見子晴一臉尷尬，隔咗一陣就拎起啲嘢走咗出K房，我哋喺入面靜曬，亦都呆咗。
個個係度你眼望我眼，問點算好。
我同呀詩仲係搞清楚發生咩事，呀Ken今次真心醒目，佢出曬力咁屌蕃薯仔：「追出去啦！仲一碌木咁企係度。」
蕃薯仔手上面仲拎住份禮物，下一秒佢已經衝咗出去了，我哋係度商量緊好唔好跟埋出去。
最後係我同呀詩跟埋出去，睇下幫到啲咩手，其他人繼續係K房唱。
我同呀詩緊張地跟係後面，同蕃薯仔隔咗一段距離。
只見蕃薯仔徬徨地搵子晴，落到地下，人山人海咁款，我想衝上去幫蕃薯仔。
但俾呀詩一把拉住咗，擰擰頭，講咗句：「依家時候俾佢自己嚟啦。」
呀詩認真咁講，我都聽從佢勸導，靜靜地睇蕃薯仔造化。
蕃薯仔出去，熙來攘往，迷失喺喱條愛情路上，啊⋯⋯不，係彌敦道上。
今次真係街邊太多人與車。
搵咗一陣後，蕃薯仔係巴士站搵到子晴。
子晴吃驚地望住蕃薯仔，我哋聽唔到佢講咩，只能夠靜靜地等候。
呀詩好自然咁拎咗盒煙出嚟，口癢啦條仆街，我睥住佢。
「仲食？」難得地顯露出男子的霸氣。
呀詩笑笑口咁收返埋佢，講咗句Sorry，依家嘅佢都好乖，我睇得出佢係有慢慢改緊。
「好悶啊⋯⋯」呀詩無得食煙係度發脾氣扭計。
「乖啦，睇下佢哋有無事，無乜嘢咪返去囉。」我從後抱住呀詩，但喱度人多，無得亂嚟。
「唉，今次蕃薯仔真係凶多吉少啦。」呀詩少有地認真。
「點解咁講嘅？」
「女仔最怕尷尬，由其是感情事，就算條女幾冧你啊，都會走啦。」
「頭先搞到好似求婚咁撚樣喎大佬，唔係話你哋咁樣助攻唔好啊，但大佬啊，人群壓力咁大，一啲氣氛都無，點應承你啊？」
「之前已經想屌鳩你哋㗎啦，但你哋其實都係出於一片好心姐，而且我又唔想搞差大家嘅關係，依家好心做壞事啦。」
呀詩嘅一番說話，句句都是道理，我一直都將佢諗成低B MK妹，但其實佢比我成熟好多好多⋯⋯