《我的MK妹同桌》: 5
呀詩踩咗我隻腳一下，態度依然係咁差。
去到留堂班，我同佢好自然咁坐埋一齊，我嚟留堂班已經係家常便飯，學校對於欠交功課唔知幾多次，又或者遲到嘅同學仔，就係罰佢哋去留堂班。
我係學校除咗唔交功課，都係一個好學生嚟，唔煙唔酒唔打飛機（男仔話唔打飛機一定係呃人）。
而呀詩就係除咗交功課，成績好之外，其他衰嘢都係出面學曬返嚟。
去留堂班，最尷尬就係隔離左右都坐住啲你唔識嘅同學仔姐。
我將今日要做嘅功課都做一做，有咩唔識就問呀詩，佢咩都答到我，我見佢已經係度預習緊聽日要教嘅課本。
預習⋯⋯
一個小時做幾份功課就完咗，我都好自然咁同呀詩放學，諗到喱個星期都可以咁樣一齊放學，就覺得好幸運，亦因為咁樣嘅幸運而感到開心。
覺得我哋兩個好有緣。
「唉，我屋企罰我一個禮拜無得打機啊⋯⋯」我向呀詩抱怨道。
「我仲以為你一個禮拜無得打飛機添。」佢開玩笑。
「咁你點啊？你屋企無理你咩？」我好奇地問。
「無喎。」回答得快到我完全感受唔到溫暖，冰冷到一個點。
「咁呀彥呢？」我小心翼翼地問。
呀詩低著頭，一聲不響，喱樣沉默令到我哋放學嘅路變到好短。
「我已經好幾日無搵佢。」呀詩臨到小巴站嘅時候講。
而依家係小巴站就停咗一㗎小巴，準備開車。
呀詩無再多講啲咩，留咗句「bye」，然後快步上咗㗎小巴。
我都知應該喱度stop，但係⋯⋯
係呀詩上咗小巴無幾耐，我都跟埋上去。回過神來，我已經拍咗卡了。
我迅速坐咗係佢隔離。呀詩再一次呆咗咁望住我，唔知點解，我幾鐘意佢呆咗，覺得好意想不到嘅模樣，好有成功感。
而且接住落嚟，佢會笑，我就更喜歡。
「做咩姐你？你上嚟都唔同路。」
「唔會啊，我同你屋企都算近啊，幾個地鐵站咋嘛。」我都傻笑著。
「做咩姐？咁想知呀彥啲嘢？」佢挑釁地道。
「係啊，只要佢一日仲係度，我就無辦法完完全全追到你。」
而我知道「溝」女同「追」女仔唔同。我鐘意追女仔多過溝女。
溝女，你可以同時間溝好多個，可以好唔認真；而追女仔，通常都係認認真真咁去追佢，想認認真真咁佢同一齊。
我對呀詩都係認真。
呀詩別過臉，眼神飄咗去窗外，小巴關門，慢慢向前駛去。
「我覺得我同呀彥已經唔同以前啦，我都慢慢唔想過嗰種生活，以前會覺得呀彥係一種希望，但原來我心入面想要嘅並唔係咁，我亦都唔係想要喱啲咁嘅生活。」
「我只不過由另一個地獄去咗另一個地獄。」
「唔知係咪識咗你之後，我就察覺到我同彥其實唔啱，所以我依家都好亂。」
「因為你同佢一齊已經無之前嗰種開心，拍拖就好應該開開心心㗎啦，唔開心仲拍嚟做咩？」
車上嘅人唔多，我哋傾偈都可以肆無忌憚。
「我將所有嘢講係前面俾你知咗先。」輪到我了，既然呀詩都講咗佢啲真心俾我聽，我都好應該要咁樣做返。
「我係越嚟越鐘意你，鐘意你夠坦率，夠直，但你個心都會收得好埋，我知如果我唔行係你前面，我係唔會追得到你，我都好清楚。只不過⋯⋯我唔想做第三者，所以你同呀彥之間點解決，我管唔到，我亦都唔會咁自私逼你分手，人生係你嘅，你係有得揀，唔會無得揀。」
「可能你覺得自己之前嘅人生無得選擇，但由喱一刻起，你係有㗎。」
「如果呀彥佢仲係咁唔識珍惜你，仲係對你咁差嘅話，我會搏命追到你。同埋，我會等你，等你肯回頭為止。」
「喱番說話我琴晚諗咗好耐，咁大個仔都未曾咁認真過，而且我琴晚返到去真係好開心，成晚都開心緊，因為你終於肯同我講你嘅嘢。」
係我講到一半嘅時候，呀詩佢都喊起上嚟，有一刻我好慌亂，唔知點做好，但我都想將剩底嘅講埋佢。
因為難得嘅係我股起全身嘅力氣同埋勇氣，一講完成個人軟曬咁無曬力，剩底嘅就係可怕嘅等待唔知點樣嘅回應。
做乜咁撚型棍啊李建強！屌，我覺得我係女真係會俾我冧死，我都唔怕同你哋講我點諗啦。
對於喱番說話，我係幾有自信㗎，覺得唔多唔少都俾我感動啦？
而我都成功令到呀詩喊，所以我都好順理成章咁等緊佢俾回應我。
一個站⋯⋯
「司機有落！」
兩個站⋯⋯
「轉彎有落啊唔該！」最後一個乘客都落埋車。
總站⋯⋯
你知唔知頭先程車，我個心臟係跟住車速嚟跳，你知啲小巴開得幾撚快㗎啦，㗎小巴有幾快，我個心就跳得有幾快。
我仍然得唔到任何回應。
都到總站啦，我只好逼住落車。
一落車，正當我想回頭問呀詩洗唔洗送佢返屋企嘅時候，呀詩講：「我走先啦，多⋯⋯多謝你，掰掰。」
今鋪呆係原地嘅⋯⋯係我。
呀詩無等我回應，就走咗。
What the fuck?
乜撚⋯⋯？
我搞唔清楚啲女究竟係度諗緊咩，我安慰自己呀詩可能係有事？可能係怕醜？
天啊！！！！有無人可以話個答案俾我知啊？？
我除咗sad住咁行返屋企，我仲有咩揀？沿路我諗咗好多可能性，同自己講帽事的。
心都淡鳩埋。
我真係嬲得制好想講，好巴閉咩依家？我鐘意第二個唔好？
做唔到呢⋯⋯話唔愛就唔愛？話放手就放手啦喎？
我個頭就嚟俾我R到爆，我都諗唔明咩原因。
嗰一晚，我俾我自己嘅心跳聲嘈到瞓唔到教，你有試過就明白嗰種感覺，個心無得安寧，就好似自動波識數咁樣，一、二、三、四⋯⋯
第二朝返學，呀詩若無其事咁行埋嚟，對我好好笑容，反而我唔知點樣面對佢。
一諗起我琴日講咗咁多嘢俾佢，就覺得好柒，柒到尷尬，甚至嬲佢。
嬲佢點解可以無動於衷，嬲佢點解可以無視自己，好似自己講嘅嘢係一個笑話咁樣，而自己原來係咁可笑。
鐘意咗一個MK妹，可笑。
鐘意咗一個有仔嘅MK妹，可笑。
以為可以感動到MK妹，可笑。
以為可以改變到個MK妹，可笑。
以為可以俾到幸福MK妹，可笑中嘅可笑。
「喂⋯⋯」呀詩佢叫我。
「你做好曬功課未啊？」
「琴日多謝你送我返屋企啊。」
「做咩唔理我喎⋯⋯」
對於呀詩佢對我講嘅嘢，我一句都無理。
我就係想佢知道返，俾一個你好重視嘅人無視係咩滋味。屌鳩我小學雞都係咁話㗎啦，你點對我，我就點對返你，好公道姐？
今日過得好漫長，上堂嘅時候我有偷偷地望下呀詩。佢清純嘅臉容略帶憂愁，只見佢低著頭，沉思著。唔見佢平時專心聽講嘅模樣，好明顯佢係心不在焉。
我呢⋯⋯係唔會咁易心軟的！
中午食飯嗰陣，我望都無望到佢就衝咗出班房，成朝我都無同呀詩傾過偈。
而今日同健三佢哋食椰林閣，佢哋終於問我。
唔係⋯⋯係盤問我。
「喂！強哥，你前日下就去咗邊嚟啊？」一行幾人，其中一個問我，我估係佢哋商量完派出嘅代表。
「逃學囉。」直接了當。
「你嗰日同趙完鬆一齊下就消失咗喎⋯⋯」健三同我同班，佢會知都唔出奇，不過邊個係趙完鬆？
「趙完鬆？」有人幫我提問了。
「趙盈詩啊，個個都幫佢起個花名叫趙完鬆，聽聞佢仲有援交添，只個花名咪好襯佢囉。」健三解釋得眉飛色舞。
只不過我團火開始燃燒，好彩嘅係佢無繼續講，如果唔係我都唔知會唔會爆，今日我心情都唔多好。
「咁你真係同佢一齊逃學啊？」一個接一個地問道。
我真係唔係幾想講啲咩，於是乎冷冷地道：「係啊。」
換嚟嘅就係一聲唔知為咩嘅歡呼聲。
「咁你哋去邊姐？去爆房啊？」
「強哥大個仔啦！」
「咩樣㗎？有無圖啊？」
「咪上次同強哥傾偈嗰個囉」健三幫忙解釋，真係多謝佢幫手。
「WOW！係⋯係咪一齊𥄫嗰個？」
「係啊。」健三比我更興奮。
「哇！你就識食啦，咁撚正。」
對於佢哋咁樣講呀詩，我只係覺得好唔尊重，團火都著著地。
「夠啦，我唔想再講佢。」加上今日心情又麻麻，認真唔想講嘢。
佢哋聽完之後，靜咗陣，好快就轉走咗個話題。
男人嘛，好多時都快來快去。
食完飯返學校中途，健三都走過嚟，搭曬膊頭咁問：「你無嘢啊嘛？」
我完全感受到男人間嘅友情，就係咁簡單，男人老狗有咩好收收埋埋？
就算健三頭先幾口臭都好，喱一下都知道佢其實關心我，男人會關心一個男人，真係好fd㗎啦；女人會關心一個女人，大多出於純粹嘅八卦。
而我亦知如果我再擺款，盞fd都難做嘅姐。
「無乜嘢啊，無事喎我。」
「有咩事都好，仲有我哋撐你！」三哥用力地拍拍膊頭，佢頭頂上散發著光芒，彷如耶蘇降世。
「知啦。」我知我仲有班兄弟係度。
返到學校後，我心情好返好多，好似稍為諗通咗，咁我生活又唔係淨係得拍拖，我仲有班fd。
我一返班房坐低，我察覺到櫃通有異樣。
係櫃通入面，多咗一張我從未見過嘅紙仔。
張紙仔入面寫住：你嬲我牙？
我真係好唔爭氣，李建強你係咪男人嚟㗎？一張紙仔就搞到你笑啦？
仲要寫都寫得咁MK。
只不過一時之間，心軟咗都好，都唔知點樣面對呀詩。而且件事都仲未完，我都唔知佢點諗。
呀詩食完飯返嚟，佢似乎都係自己一個人食lunch，回來後留意到枱面上嘅紙仔。
佢下意識地拆開嚟睇，一模一樣嘅，望一望我。問我點解？因為我餘光一直都係佢身上。
呀詩快速咁將個紙仔拋入櫃通度。
跟住我成個人驚起上嚟⋯⋯係由背脊傳上大腦嘅心寒。
我留意到佢嘅眼神由今朝早嘅唔開心，變為兇狠⋯霸氣⋯銳利。
屌你⋯⋯我下就課一刻都專心唔到，時刻防備住呀詩，兇狠嘅人有時都唔算太可怕，如果你知佢會去到幾盡嘅話，你仲有得計有得避。
最可怕嘅係既兇狠，又估你唔到嘅人。
呀詩⋯⋯
直到放學，原本係要一齊去留堂班，但我要自己去，所以我提早執好書包。
「唔一齊去留堂班啦？！」呀詩嘅語氣有點強硬，feel到佢想強硬啲，但又克制住自己。
吱嗱吱嗱，就爆啦就爆啦。
「唔啦。」我賭氣地。
我好霸氣地離開班房，一出班房就後悔，其實好想同佢一齊行落去留堂班。
今日留堂班人唔多，成大半個班房都吉咗。
我求其揀咗一個位，呀詩尾隨我，無幾耐就到。佢坐係我對面，中間隔咗個走廊，我哋都相安無事咁做功課。
留堂班完結後，我正準備拎起個書包⋯⋯
呀詩一手搶走咗個書包，頭也不回地走咗去，揮一揮手，不帶走一片雲彩。
仆你個街⋯⋯我仲有個筆袋同埋啲書未執落去。
我狼狽地執好啲嘢狗衝咗出去，一出去，人影都無。
去咗邊？？？
我行到出學校門口都見唔到呀詩嘅人影，我開始覺得唔妥⋯⋯
難道喱個先係佢報仇大計？
同埋佢究竟係匿埋咗係學校啊，定出咗去啊？15定16啊大佬⋯⋯
我等咗15分鐘，除咗急我仲可以做啲咩姐？我部電話又係書包度。
半個鐘過去⋯⋯
最後我決定返屋企，咁樣等唔係辦法。
係我行去搭車嘅途中，係一間麥當勞入面，見到呀詩。
佢就坐係靠窗嘅位置，食緊麥旋風，食得津津有味。
「喂，做咩拎咗我個書包姐。」對於我頭先呆等咗半個鐘，發火都合情合理掛？
「乜你咁慢㗎，我都就嚟食完個麥旋風啦。」對於佢咁鳩屎嘅態度，只會火上加油。
我連書包都諗住唔要就返屋企。
呀詩見狀，急急腳咁問：「喂！你書包都諗住唔要啦？」
「咁唔係你想點姐？你咁想要咪俾你囉。」我都唔係好惹㗎，俾個真心你，你無視完都算啦，仲要玩返我？
「咁⋯邊個⋯邊個叫你成日都唔理我姐。」呀詩一臉無辜咁款，乜唔係最無辜嘅係我咩？
「咁琴日係邊個唔理我先？唔通我今日要好開心咁同你講嘢啊？」
「我琴晚返去有MSN你囉。」
「⋯⋯？」
「你自己無覆我咋喎。」
「⋯⋯」
頂！我琴日真係返到去無心情開電腦，本來返屋企開電腦係我指定動作嚟，但我琴日咁啱係我唯一一日無開到個電腦。
⋯⋯⋯⋯⋯
「下⋯⋯真係咩？」我有點懷疑。
「你話呢⋯⋯？」呀詩個「呢」字拖長咗嚟講，略帶殺氣。
「咁你講咗啲咩？」講出口先知自己白痴。
「自己返去睇啊！」佢用力地打我，喱種力道，我再熟悉不過。
但難得嘅係，呀詩竟然會怕醜，怕醜到用手擋住自己嘅半邊臉。
原來MK妹都係女仔，都會有怕醜嘅一面，並唔係咩都咁麻甩。
「你⋯你怕醜啊？」本來應該怕醜、尷尬嘅我，因為呀詩嘅怕醜，令我有返一線生機。
「無啊⋯⋯俾返個書包你啦！」佢又衝咗出去，佢真係好鐘意成日衝出去。
而我又要成日追佢，無論係咩意義。
辛辛苦苦追上佢之後，氣喘喘咁問佢：「咁你唔同我講你寫咗啲咩啦？」
佢人仔細細，睇唔出咁鬼跑得，我都跑到件底衫都有些少汗啦。
「你睇完再覆返我啦！但我同你講啊，唔準再嬲我啦！如⋯如果⋯唔係，我嬲⋯⋯嬲返你㗎！」呀詩抓住我個衣領，留低咗喱句之後，就上咗小巴了。
今次，我無再坐上嗰架小巴。
而係選擇用9秒9嘅速度跑返屋企。
衝鋒21咁衝入人群，Z型咁跑嚟跑去，係公園啲呀伯大大聲咁屌柒我行路唔帶眼。
心急咁返到屋企，但坐係電腦面前，竟然唔心急了，反而開始驚驚。
至於驚嘅原因，就係驚唔知呀詩會打咗啲咩俾我，以頭先呀詩嘅表情、態度、語氣推斷，應該唔會係直接拒絕我嘅嘢。
我隱約覺得，呀詩對我係有感覺的！
我懷住忐忑嘅心情開部電腦，真係生平從未試過會打開電腦會咁緊張，手都震撚埋。
開機、登入密碼、一登入就自己連上MSN。
都有好幾個人搵我，嚟嚟去去都係打機嗰班，好幾個問我打唔打機之類。
到最後跳出嚟嘅先係呀詩。
夜晚11點傳過嚟，一大段嘢，縱使好多MK字，一睇落去就知會睇得好辛苦，但會首先俾佢喱一大段感動。
傻強⋯⋯
今晚多謝妳同我講甘多，我都feel到妳對我既真心，你今日衝上車嘅時候，覺得你型咗一秒㗎，一秒咁多，哈哈！我亦都知你關心我同呀彥，但我同佢唔係三言兩語講得清，我對佢好似無乜反抗力。老實講我都唔知應該點做好，甚至我都想你俾啲勇氣我，只不過依家我哋都好似未去到咁。我頭先係忍住自己唔俾自己喊⋯⋯我好怕你見到我喊，覺得我係啲大喊包嘅女仔，所以先至咁樣走咗去，好對唔住。我知道自己唔係啲咩好女仔嚟，我係一個壞咗嘅人，咩都學壞曬，甚至連第一次都俾埋人，唔俾人珍惜都好應該。直至你出現⋯⋯
相遇好奇怪，你會奇怪點解會咁樣遇到呢？但可以一直維持落去先係實力。我第一次係你身上感受到愛，我同呀彥嘅頂多係鐘意，同埋年少輕狂。我唔介意俾你知道我嘅過去，如果你真係如你所講係認真嘅，咁我嘅過去你遲早都會知，亦都係我對你嘅考驗吧？最後我睇到啦，睇到你個傻仔死人頭。
好多人都標籤我係MK妹，但其實我唔係幾想做MK妹，明明我就係想要喱啲生活，我係MK，但我唔係無腦，而嗰埋人除咗MK之外，都好無腦下。我由細到大都無乜朋友，我都好想好似其他人咁，有群好姊妹一齊返學放學食飯。我好羨慕你㗎其實，有一班對你好好嘅兄弟。我好想改變自己，但現實係咪自己諗嘅咁易？從來都唔係。
至於我同你，我係有啲鐘意上你。好多人都話鐘意我想溝我，明知我有仔都會咁講㗎，叫我飛咗條仔佢啦。但無一個人會似你一樣，用行動證明俾我睇。
你知嗎？你上咗車嗰一刻我幾感動？
你知嗎？我思考咗幾耐先決定打喱篇嘢俾你？用咗幾多勇氣啊？
你知嗎？我對呀彥已經唔係以前嗰種感覺啦，我以為咁樣係一生一世，但原來都會變。
俾啲時間我哋啦好嗎？等我哋都有足夠勇氣去面對⋯⋯
大家係咪睇得好辛苦呢？佢打過嚟嘅時候就係無隔行無標點符號，仲要夾雜一堆火星MK字，你哋依家已經睇得好輕鬆啦。
就係唔知點解，咁難睇嘅文都會感動到喊⋯⋯
係囉⋯⋯唔知點解⋯⋯
我後悔今日對佢咁差，自己諗埋一邊，我一路以為我係最無辜嗰個，但依家諗深一層，呀詩都好無辜。
我都思考咗好耐，我諗足夠同呀詩一樣咁耐了吧？
「我當然可以俾啲時間大家啦，依家係我追你，決定係你度，唔通要逼你接受我咁咩？但竟然你對呀彥無嘢，我都會俾時間你哋⋯⋯同我哋。畢竟所有事都需要時間，我亦都講過，我會等，係咪？我會證明俾你睇㗎。」
唔打咁多啦，因為我一諗起今日就覺得好柒。
我係喊完，感動完先覆佢，當中呀詩係on過msn，而且係有輸入中㗎！不過都無嘢sd過出嚟，炎炎夏日，我開住冷氣都可以起曬雞皮。
而我，好似釋懷咗咁，亦打從心底相信呀詩，相信MK妹係真的。
之後我同呀詩都恢復到之前咁，甚至仲要好咗添。
間唔中我都會同佢食lunch，因為仲有功課留堂班，我基本上都係同呀詩一齊放學。
有一種感覺，就係呀詩好似係我女朋友咁，但其實又唔係。我同佢之間有一層薄薄地，透明嘅膜，我哋互相睇到大家，但一觸碰，個膜就會穿，只係依家，我哋都有共識唔想個膜穿。
今日係留堂班嘅最後一日，我哋好有默契地淨係做咗一樣功課，然後無無聊聊咁hea到夠鐘。因為每日留堂班都會有唔同老師，今日個老師正正係我哋班主任，姐係都唔會理我哋。佢仲忙過我哋啊，改卷仲辛苦過我哋啲功課。
呀詩已經無聊到係張枱度亂畫嘢，畫咗隻哆啦A夢出嚟。
我忽然諗起我之前嘅疑問，細細聲咁問呀詩：「係呢⋯⋯點解嗰陣時你會傳紙仔俾我嘅？」
「Er⋯⋯姐係我嘅意思係，點解嗰⋯嗰陣咁驚我嬲？」