《我的MK妹同桌》: 3
雖然我好想追問，但佢由熱情轉變為冷淡嘅速度太快，我都唔敢再問落去。
佢嘅故事，我又知道幾多先得㗎，儘管我幾好奇都好，佢想講就自然會講，我驚問落去佢只會以為我係啲變態毒撚。
同佢同桌，時以瘋狂時以認真。
不過今日見證住佢對我哋班長嘅不滿。
何解呢？事關我哋班長係一個好特別（戇鳩）嘅人，有幾特別？就正如黃子華所云，特別到你實會記得佢，姐係勁過講嘢會加標點符號。
就係條友仔講嘢係講書面語。
事源係咁嘅，呀詩佢幾蒲，食煙又好，出去亂搞嘢又好，都唔會欠交功課，喱個似乎係佢做mk妹嘅原則。
咁今日班長收唔齊功課，發覺少咗呀詩嗰本硬皮簿，於是佢就走嚟問呀詩。
「還欠你的功課沒交。」
我咁大個仔，除咗啲人朗誦之外，真係未見過有人咁樣用書面語講嘢，今天真的是長知識了。
「我頭先班會明明就交咗。」呀詩一開頭語氣都好好。
而班長傻仔智喱個怪癖全世界都知，就連老師都習慣了，喱個人由以前中一就因為喧好多人都識佢。
中學會出名嘅人離離去去一唔係啲好優秀嘅人，一唔係就係啲奇撚怪怪嘅人。
但呀詩佢向來少管學校嘅嘢，見佢一臉訝異咁望住眼前嘅怪雞，似乎係唔敢相信自然耳仔。
「但課本上沒有你的，你是不是沒有交啊？」
「點會無啊戇鳩仔？我頭先明明就交咗。」呀詩佢即刻串佢，呀詩啲脾氣話嚟就嚟，唔清楚嘅人真係會俾佢嚇親。
「你說粗口！」班長搞錯曬個重點，真係戇鳩到我都想屌柒佢。
「我屌你個老味，你煩唔煩啲啊！？」呀詩拍曬抬起身，大聲喝佢，全班嘅人都望住佢，俾呀詩嘅勢嚇親。
「你...你....」班長口窒窒咁，明顯嚇傻咗，跟住就跑走咗。
「唔好嬲，坐返低先。」我試著安慰佢，但睇嚟效果不大，佢係嬲爆爆咁坐低，大力咁將個筆袋拍係枱面度。
「你話係咪戇鳩，今朝早收功課嗰陣我明明有交囉！你都見到㗎。」呀詩向我抱怨道。
聽佢咁講，我又醒起今朝佢真係有交喎，如果頭先我有醒起，幫佢講說話咁咪唔洗搞到咁囉。
「係喎，我都記得你有交。」
但又有咩用呢，件事都發生咗，都挽回唔到啲咩。
無幾耐，教數嗰個陳sir嚟班房，係門口大叫呀詩出嚟。
呀詩佢心裡有數，但佢唔係度嗰陣，我都好擔心佢。
因為我知佢並唔係啲咩壞學生，甚至因爲頭先無幫佢澄清而感到內疚。
最後佢係黑住面咁返嚟，果然估中咗，呀詩二話不說就趴係度瞓。
之後佢上堂都係趴係度，平時佢上堂都好認真，今日成堂都無上過咁制。
我諗緊佢會唔會喊，所以擺咗包紙巾係佢隔離。
「你擺係度做咩啊？」就嚟放lunch嘅時候佢就醒咗，佢額頭成個紅印，頭髮散亂，嘴角仲有啲口水跡，睡懵懵嘅樣映入我嘅眼簾，真係好可愛，加上佢頭先嘅真性格，我覺得自己好似又鐘意上佢幾分。
「我驚你喊啊嘛頭先。」
「你都傻嘅，我會喊？」呀詩一野打埋嚟，熟咗之後佢就係咁打鳩我，好暴力。
我望住佢，硬係覺得佢係度扮堅強。
因為我見到佢個笑容。
笑得好牽強。
呀詩嘅笑容令我笑唔出，好想佢將所有唔開心嘅嘢都同曬我講，想同佢一齊分擔。
到咗放lunch，我隔離班啲死黨一早係出面等我。我哋學校中三就俾出去吃飯，所以一開學嗰陣我哋勁興奮囉，超期待出去食。
終於唔洗係學校食埋曬啲垃圾活力午餐，我哋出去食飯嘅第一餐，就係麥當勞.......
我哋幾個男仔一路行一路傾食咩之餘，仲傾一陣放學去打機啦。
忽然間小二好興奮咁講：「喂喂喂，隔離條女幾正喎！」佢細細聲咁講。
所有人預備好曬咁款，即刻問：「邊個邊個！」
小二指咗指隔離斜對面嗰個女仔，睇背影同呀詩有幾份相似。
「屌行前啲，但要扮下嘢唔覺意咁喎。」佢哋係度討論緊點樣行前啲昅女得嚟仲要唔覺意，仲要不失霸氣。
「真係幾正喎，乜我哋學校有啲咁正嘅女仔咩？」呀牛發出讚嘆嘅聲音。
而我企係最側邊， 姐係條女隔離，無得好似佢哋明目張膽咁昅。
我左手突然間傳來一陣劇痛。
一個好熟悉嘅感覺。
「喂！」果不其然。
「咦，你自己一個嘅？」我勢估唔到呀詩會自己一個人，同埋我問完之後，發覺我問咗個唔應該問嘅問題。
呀詩面色一沉，然後笑笑帶過：「我...啲朋友今日唔得閒同我食啊嘛。」
呀詩揮揮手便快步向前行去，本來佢見到我幾興奮㗎，但後尾好似好尷尬咁。
接住落嚟，我感受到背後一眾羨慕嘅目光。
「李建強！」我俾人呼叫。
「你幾時識到條咁正嘅女啊？！」佢哋嘅手搭曬上我個膊頭度，平時又唔見佢哋咁熱情。
「佢坐我隔離喎。」
「係呢？佢咩台啊？」其中一個問道。
以前溝女，好講天時地利人和，如果能夠同自己心儀嘅女仔同一台，係一種緣份，甚至會因為同台而多個籍口接近佢。
就算你夠鐘意一個女仔，願意每條msg都曬一蚊咁sd，人哋都未必願意啦。
「我無問喎，我諗應該係中國移動啦。」我求其講咗個比較偏門嘅，其實唔想佢哋追呀詩，自己係有私心嘅。
「屌！我以為佢MM地K，應該實係3台添。」所以話，同台係幾咁緊要呢。
「MSN得啦掛？」佢哋鍥而不捨地追問。
「我邊度知姐，先坐得嗰一陣。」我講咗個大話，
後來佢哋就無再理到，不過唔知點解，我幾享受佢哋對我投以羨慕嘅眼神，係幾爽嘅。
佢哋諗住去雙餸飯前面，諗住買飯返學校操場食，我眼尾見到呀詩行咗入間茶餐廳度，於是乎我即刻有個諗法。
「你哋係咪返學校食啊？！」
「係啊。」健三講。
「我今日唔係幾想返學校食，咁我今日就唔同你哋食啦！」我講完，最怕就係佢哋問長問短。
但佢哋反而好爽快咁答：「Okay啦！」
男人係爽快啲嘅，哈哈！
我快步行去間茶餐廳度，我好快就係人群中搵到呀詩，見到呀詩自己一個人係度睇緊餐牌。
我好瀟灑咁坐係佢對面，呀詩佢抬頭望一望我，好驚訝咁望住我，佢嘅表情一早出現係我腦海入面，繼而崇拜我！
「你做咩啊？」呀詩佢不滿地道。
「無，佢哋諗住買返學校食，但我今日諗住出嚟食啊嘛。」
「我慣咗自己一個人食飯喎。」呀詩嘅反應有點出乎我意料，我以為佢會多謝下我之類......
依家佢冷淡到我唔知點應佢。
「我咁啱都係自己一個人食姐。」氣氛瞬間冷到一個點。
「其實我真係慣咗一個人，我唔需要人哋陪，更加唔需要人哋覺得我可憐。」
「我邊有覺得你可憐姐。」我反駁道。
「你真係覺得無咩？」呀詩再一個反問，就如一塊透視鏡般，直照我內心。
我頓時無言以對，我會無言以對，係因為事實就如呀詩所講咁。
「如果係以前，我會趕你走，一係你走，一係我走。」
「但今日唔同，我......」佢將自己個餐牌擺係我前面。
「我今日真係想有個人陪我。」
我無答佢，只係靜靜地咁望餐牌，除咗嗌嘢食，我同呀詩接住落嚟一句聲都無講過。
我見住佢可以喊住咁食曬成餐飯，我就知道依家唔係講嘢嘅好時機。
同時間我都諗咗好多嘢，我對呀詩真係一啲都唔了解，我諗我會鐘意上佢，係佢俾我嗰種神秘感吧？儘管辛苦，但會唔甘心咁想試下。
係行返學校嘅路上，我見佢好返啲，就問佢：「點啊你，心情好返啲未啊？」
「嗯，好返啲啦。」
呀詩佢輕輕捉一捉我衫角，我想行前嘅時候，俾佢硬生生留係原地。
「做咩啊？」我問佢。
「不如我哋唔好返學囉？」
「下？」我真係俾佢嚇親，佢講啲嘢成日都超乎我想像，估都估唔到。
「你認真咩？」
「認真啊。」佢好認真咁回應我嘅認真。
「你成日逃學㗎？」以呀詩咁MK嘅性格，成日逃學並不出奇。
「唔係㗎，我上堂咁認真點會逃學啊，今次我都係第一次逃學。」
「咁你又......？」
「你咪咁婆婆媽媽啦，走唔走，一句咁多，咪咁多廢話。」呀詩惡到呢，唔難feel到佢唔開心嘅心情。
唉，死就死，預咗返屋企會俾呀媽屌撚死。
「咁你想去邊啊？」我哋首先扮去7-11買嘢，然後商量對策。
「唔知㗎，我只係唔想返學。」
最後，我同佢買咗兩支可樂係公園坐。
屌，點解可以咁戇鳩......
我仲以為好似私奔咁好浪漫，又或者好型之類嘅，點知係兩條傻鳩唔知去邊好，求其買啲嘢飲去公園坐......
我有提議話不如買酒，不過俾佢屌話著住校服點買酒。
我哋知附近公園有個鞦韆，平時係啲情侶放學後嘅好去處，依家兩個鞦韆都無曬人，正合我倆意。
青春就係咁樣不計後果，哪怕只有青春過一次都好，足以令你覺得無憾。
就算幾柒，幾樣衰都好，將來喱啲柒事絕對會係令你開懷咁笑嘅原因。你會記得邊個邊個啲柒嘢，自己啲戇鳩，喱啲嘢過咗好多年你都仲會記憶猶新，反而你邊次考試考得好，考咗幾多分，你唔會上心。
我會記得呀詩佢係公園度一開可樂搞到自己成手都係；我會記得佢推我個鞦韆搞到我向前仆，成日飛咗落街；我會記得佢除低個馬尾，頭髮飄逸嘅嗰一刻，佢頭髮嘅香氣，同埋靚到爆嘅畫面。除咗令我有心理反應之外，仲令我有生理反應......
「好舒服啊...」呀詩慢慢盪住鞦韆，一邊飲可樂，原來快樂可以咁簡單。
我真係好想好想呀詩做我女朋友，喱個係我當下嘅想法，我覺得我哋仲可以更幸福。
「係啊。」我附和道。
「你心情點樣啊？好返啲未啊？」
「多謝你啊，我好返好多啦。」今次個笑容係真嘅，我感覺到。
「 Sorry啊，頭先咁話你，不過呢......」
「你真係好好人！對我真係好好。」佢照舊拍拍我膊頭。
「咁我同你條仔，邊個對你好啲啊？」我問出嚟都驚啊真係。
「咁梗係你啦。」呀詩一啲猶豫都無，衝口而出嘅說話，大多數都係真嘅。
「咁你又同佢一齊？你明明知我對你點㗎。」
嗰陣時，情竇初開嘅我，天真地以為只要邊個對邊個好，就好應該一齊，做咩要同一個對你唔好嘅人一齊姐？係咪？
「你都唔明真係鐘意一個人係點。」
佢成日都係講喱句，我以前係唔明啊......
係我未鐘意你之前。
我哋係公園玩咗一陣，忽然間落起大雨，我哋避無可避，附近連一個涼亭都無，我哋就成隻落湯雞咁跑到去附近商場。
商場入面無乜人，我同呀詩已經濕到無一個地方係乾，本來美好嘅逃學經歷就咁俾一場大雨摧毀咗。
但係呀詩佢一身純白嘅校服因為雨水嘅關係變得又貼又透透地。
呀詩嘅胸型因為咁而變得明顯，而佢嘅bra帶都浮現出嚟，妙曼嘅身材好難令人唔想注目。
呀詩感覺到我異樣嘅眼光，罵道：「望咩望啊？咸濕仔！」
我即刻怕醜地別過臉去，但內心又有股衝動想去望多兩眼，喱個係天使與惡魔嘅選擇。
「快啲去廁所抹下先啦。」呀詩提議。
我哋去完廁所執一執，都唔係乾好多，出到嚟呀詩件衫都係咁透。
我今日著咗件冷背心，我係廁所已經盡力將佢整乾，雖然仲係有啲濕濕地，不過我都係遞俾呀詩。
「你著住佢啦，如果唔係俾啲人睇蝕曬。」
呀詩毫不客氣咁接住，然後半玩笑地罵道：「都蝕曬俾你啦！」
唔知點解，對佢喱種不滿無半點唔開心，反而心裡面有啲甜絲絲嘅感覺。
「咁依家點算好啊？」呀詩反問我。
我以為佢逃學有好曬計劃，但照頭先佢咁問法，好明顯佢係咩諗頭都無。
「去網吧？上次見你係網吧都玩得好開心啊。」
「係呀彥鐘意玩，我先陪佢咋，我自己本身麻麻地。」
相信呀彥就係佢男朋友，我同呀詩之間嘅距離，中間總係插咗個呀彥係度。
大個咗諗返起，其實我依家係明目張膽咁做緊第三者嘅角色，換句話講，姐係我都係仆街。不過當時我好有自信，覺得我先係俾到幸福呀詩嘅人，天真啊呢？
正當我哋邊行邊係度諗緊接住落嚟去邊好嘅時候，前面冒出一間冒險樂園。
我望一望呀詩，呀詩又望一望我。
跟手佢就衝咗入去，仲係門口手舞足蹈咁叫我行快啲。
感染，一定係感染力！
如果唔係我點會俾佢戇居居嘅行為搞到笑出嚟啊？
不過喱個MK妹真係痴撚線㗎喎，佢入到去冒險樂園，嘈到拆天不特止，仲要痴線到同細佬仔玩認真，同呀婆鬥耐性。
企係籃球機面前，有個好矮嘅死肥仔，圓圓地咁幾可愛，望落去好趣緻。
「望咩望。」
就咁聽落，會以為係呀詩串個肥仔。不！係個肥仔同我哋講先。
「望你有罪啊？」呀詩都唔係好惹嘅人，尤其是佢依家生人勿近。
「行開啲啦，喱度我㗎！」肥仔毫不客氣，十分帶種。
「你贏到我咪行開囉。」呀詩佢爽快地入咗金幣落部籃球機度。
「喂......唔好同個細路認真啦。」我試圖阻止悲劇嘅發生。
「咁細個就咁柒惡，一啲禮貌都無，依家呀姐我要教佢做人啊！你走開啲啦。」呀詩火爆嘅脾氣控都控制唔住，我唯有替個肥仔祈禱。
最後係呀詩險勝。
「點啊死肥仔？玩咁耐都贏唔到。」
但個死肥仔都唔執輸喎，臨尾仲送咗個金句俾呀詩：「大蝦細，俾屎喂！」
然後就走鬼咗去，完全唔俾呀詩回話嘅餘地。
呀詩仍然為頭先個細路生氣，不過頭先個細路又幾黑人憎嘅，但呀詩佢真係好直，如果我有佢咁勇敢，我一早表咗白lu。
呀詩玩完一陣之後，見佢瘋瘋顛顛咗一輪之後，佢問我做咩唔玩。
「我學唔到你咁癲囉。」雖然我把口咁講，但係開心嘅，就算見住佢玩，我都開心。