《我的MK妹同桌》: 2
見到咁樣，個心好酸，雖然好唔想承認，但內心真係好提子個MK仔。
唔通佢係牙哲？唔會啊，無理由無自己條仔MSN㗎。
一張Icon竟然可以令我聯想到咁多嘢，甚至諗咗成晚，係我短短十幾年人生入面，都係第一次。
跟住落嚟，我無再搵過呀詩，亦都無再上過圖書館搵佢了，喱一切就似一部鬧劇，嘈完就散場。
當然呀詩亦都唔會搵我啦，加完個MSN傾咗幾句就無再傾過。
好快，就踏入暑假，就放暑假嘅時候，係一個好矛盾嘅時間，姐係放暑假前有大考，就算考完要返學，我哋都係放飛咁㗎啦，【考完＝放暑假】喱個概念一直深深地印係學生心目中，不過老師卻不這樣認為。
就算之前幾hea都好，我考試之前都會溫下書，基本上時間都過得好快，我都無乜再諗起佢。
放暑假後，就係我同班兄弟嘅廿一世紀殺人網絡。
每日都係網絡上面游走，廝殺。
然後中間例牌同屋企人去個旅行，但我連去旅行都唔係幾想，只係想留係屋企打機。
大個咗先知幾戇鳩，有時間梗係出去玩下啦，放工都已經係返屋企打機啦。但細細個唔係咁諗㗎嘛，係咪？
好快，一閃眼暑假又過去了，今年我已經升中三了。
因為仲未分班，唔洗揀科住，所以我哋都仲係隨機抽，除咗A班喱個精英班之外，咁好老實，我並唔係精英。
今年我被分配到最最最尾嗰班，通常最尾嗰班都係比較邊緣啲，因為係走廊嘅盡頭，而我之前係C班，一落堂會走去隔離班搵下其他人又或者其他人會過嚟我哋班搵人。
咁E班就好少人去搵，通常就去搵人多，而我每次經過E班，小息嗰陣都係空空蕩蕩。
重點係！頂佢個肺，我班兄弟幾乎無人分到E班，淨係得返健三一個。
而健三又有佢嘅青梅竹馬陪住佢，換句話說，得返我一個人。
我開始對我喱一個新學期感到擔憂...…
暑假嗰陣，我每日都係電話同埋兄弟埋怨，無咗佢哋學校仲有咩樂趣，而佢哋嘅解決方法就係小息多啲去他哋班房搵佢哋。
我諗應該淨係得喱個方法。
開學當日，我千祈求萬祈求，就係希望班上面啲人都係正常人！
我一入班房，基本上有大半班人都係唔識嘅，不過！
俾我發現到坐係角落位嘅佢，差啲就唔記得咗佢。
無錯，就係呀詩。佢好獨僻咁坐係一角，無他，因為佢一向都我行我素，係學校都無幾個朋友。
我諗都唔諗，就行過去，坐係佢無人會坐係隔離嘅位置。
「嗨！」我對佢笑了笑，一種好有緣份嘅笑容。
但係，依家對住呀詩好像無咗當初想溝佢嘅感覺，更有一種他鄉遇故知嘅感覺。
「乜又係你啊陳生？」佢都對住我笑了笑，唔再好似之前咁冷傲。
今日嘅佢，無再係圖書館披頭散髮，綁咗馬尾嘅佢反而少咗份MK妹。
「我哋今次真係有緣份啦，唔係扮㗎。」
Sad咗成個暑假，一開學就同到呀詩一班，都算好彩。
「係呢，你後尾做咩唔再嚟圖書館啊？」
突然間問咁尷尬嘅問題，我搔搔頭，道：「嗯......嗰排要考試溫書啊嘛！」
「哦...咁姐係你睇曬本書啦？」估唔到佢仲記得。
「咁...我話睇曬，你係咪會講你叫咩名先？」
佢淺笑，說：「你仲執著緊我叫咩名啊？我哋都同班啦，你遲早都會知㗎啦。」
「我想要你親口講，咁先有意思㗎嘛，我唔想咩都要遲下先知喎！」
佢又擺出一副無我咁好氣樣，接住打開枱面上嘅筆袋，拎咗支筆出嚟。
「伸隻手出嚟啊。」
「下？」
「叫你伸就伸啦。」
我遞我隻手俾佢，佢就係我隻手上面寫咗個「詩」字。
「你叫我呀詩得啦。」
「屌你！劃花我隻手。」我好嫌棄咁講，儘管如此，但其實心入面覺得幾溫暖。
我都唔知點解自己成個女人咁，會口是心非，我諗係因為唔想俾佢知自己心入面點諗掛？
個詩字雖然第二日就無再刻係手入裡面，但呀詩佢有能力將佢個名刻係我心入面。
開學日無幾耐就放學，同呀詩嘅相處時間好短暫。
中午就放學，我哋幾個兄弟當然唔會錯過喱個如此早放嘅開學日，計劃就係去網吧一路戰鬥到原本嘅放學時間。
上咗中學嘅回條全部都係自己簽，無再俾過家長簽名。
所以我哋好有默契咁同屋企人講放原本嘅時間，喱段時間就梗係走出嚟玩啦。
我哋幾個去隔離區嘅I-one，聽講之前有訓導去學校附近嘅網吧捉啲著住我哋校服嘅學生，所以去其他區比較安全。
我哋連Lunch都係網吧解決，我哋幾個坐係近門口位，正當我哋打得興起嘅時候，一個頗係熟悉嘅人影出面係我嘅餘光入面。
一身全黑嘅打扮，黑色短褲配上一對全黑嘅厚底鞋，上身著全黑，除咗膊頭位有蕾絲，若隱若現嘅肩膀。即使全黑嘅打扮，都遮唔住佢白晢嘅膚色。
佢同一個男仔入嚟，拎咗個，就係我哋對面嘅對面，一開始覺得佢好熟口面，直到我去廁所返嚟，望到佢先知，仲差啲認唔到佢。
呀詩總係不期然，無預告咁出現係我生命入面，殺我一個措手不及。
佢同一個MK仔一齊，唔難知道佢哋咩關係，我淨係行過姐，都feel到男人望住呀詩啲目光都係不懷好意嘅。
如果女人識得睇女人啲心機，咁男人就識得睇男人對女人嘅不懷好意。
呀詩佢玩得好入神，隔咗一陣先察覺到我係度。
「咦，咁啱嘅？估唔到你會嚟喱度喎。」佢似乎幾驚訝。
「我先估你唔到啊，男仔會嚟網吧有幾出奇姐？」
「玩緊咩啊？」我偷睇下佢玩啲咩，一睇：勁舞團，真係MK仔女會玩嘅嘢。
「真係啱......」我都未講完，呀詩隔離個男仔已經打斷咗我。
「按準備啦，佢哋等緊。」
然後呀詩乖乖地聽佢講，跟住我同個男仔講咗句：「嗨。」
佢理都無理到我......
我當下除咗感到尷尬，好撚柒之外，仲對佢咁無禮貌嬲嬲地。
「咁我唔阻你玩啦。」我只能夠笑笑口咁講，跟住走返去自己位。咁大個仔，真係未試過咁柒。
事過境遷，如果當初我無鐘意上呀詩，我諗我會少咁好多痛苦。
「好啦。」呀詩簡短地回應咗我後，就投入遊戲了。
我碰了一鼻子灰返埋去打機，班機友問我邊個嚟，我通通都無理，只係想發洩下。
本來諗住嘲笑我嘅佢哋，見到咁都即刻收曬皮，原本歡樂場變咗認真破關場。
我甚至嬲呀詩，點解揀咗個咁嘅仔，點解咁無品味，揀咗條On9 MK仔。
玩CSO打到最後嘅大佬，合幾人之力終於打低最後嗰隻怪獸。我同佢哋講我走先，我無心情係度玩，唔想係網吧見到佢哋兩個。
我知我認真咗，我以為經過個暑假，我對呀詩可以無乜嘢，但我就係會對佢嘅嘢上心，個心會好介懷。
我甚至乎搵唔到介懷嘅原因。
出咗網吧，忽然間我唔知去邊好。最後都係返屋企打機解愁。
第二朝返學校，一入班房，我就見呀詩好攰咁趴係張枱度瞓，之前同枱嘅，見到佢哋瞓，我都會輕手輕腳，驚嘈襯佢哋。
但佢都醒咗，我下意識地say咗sorry。
我覺得同佢講嘢都因為琴日覺得尷尬，只不過佢唔係咁諗，反而問起我。
「乜你成日去開網吧㗎？」呀詩問我。
「喱句應該係我問你咋掛？」
「哈！你估唔到我會網吧，我都估唔到你會去啦。」
「下？男仔去網吧好正常姐，你幾何見到女仔去啊？」即使我覺得尷尬，唔係幾想理佢，但唔理佢又顯得自己好小氣。
「我都好想好似你哋咁，一大班人好瘋狂咁去打機。」然後呀詩好似條死屍咁趴係張枱度，一啲腰骨都無。
「你都同你條仔玩得好開心姐。」我羨慕佢就差唔多。
「都係因為呀豪佢鐘意玩，我先陪佢。」
呀詩斜斜地望住我，眼神閃爍著哀愁，短短幾秒，就坐返直個人。
「你自己唔鐘意玩做咩要陪佢姐。」
「唉，你唔明㗎啦！當你知道自己唔想失去一個人嗰陣，幾唔鐘意都無所謂。」
就算我唔明都好，我個腦只得一個問題，究竟佢條仔有乜好？
我唔識答佢喱個問題，佢亦都趴返係張枱度，不過今次就背住我，係佢頭髮度我都聞到成陣煙味。
喱班嘅班主任好似想放生我哋咁，連基本嘅調位，安排班長都無，淨係每日求其鳩點兩條友幫手就算數。
係無預兆底下，呀詩就成為咗我同桌。
平安過埋咗幾日開學日，就正式上堂，我對呀詩係鐘意嘅，但感覺唔似啱啱相識咁。越了解落去，就覺得鐘意佢係一件辛苦嘅事。
有乜嘢辛苦過鐘意上一個MK妹？
就係鐘意上一個有仔嘅MK妹。
係班上面無乜朋友嘅佢，我好自然咁成為佢唯一可以傾訴嘅對象。
「好悶啊。」呀詩用鉛筆係書枱上面寫著。
佢真係一個估唔撚到嘅人，我以為佢係一個唔讀書，放廢學業嘅爛蒲MK妹。
但佢讀書真係唔差，上堂認真，專心。甚至乎佢手字都寫得幾靚下，最勁係數學，計數仲快過我。
坐佢隔離，我仲期望會教下佢數，做返個優良學生俾佢睇，等佢迷途知返。
直到佢做好曬堂課，教返我條數點計嘅時候，喱一切都被幻滅了。
而佢最唔想上嘅就係中史堂，見佢一上中史就趴係度，仲要寫字仔同我好悶。
「你唔係學霸嚟嘅？上中史就悶？」我無寫返字俾佢，因為我啲字太樣衰。
「屌，我哋係香港人，點解唔學香港歷史，而係要學中國歷史？」
我頓時啞口無言，只能勉強回答佢：「因為中國歷史入面都有香港歷史囉！」
依家諗返起，原來呀詩抗爭意識咁早已經扎根係佢心入面。
我唔知佢悶得制定係點，佢竟然係櫃桶拎咗包煙出嚟，當下真係扣曬分。我對食煙真係好厭惡，不分男女。我對呀詩嘅感覺就好似坐過山車咁，時高時低。
「好想食煙啊。」我呆咗咁望住佢包煙，好似呀詩咁嘅女仔，好應該係學校嘅女神，好應該係所有男仔都想J嘅對象，好應該係清純無瑕嘅學生妹。
偏偏佢係一個MK妹。
「你唔係掛？俾人捉到你周身蟻啊。」我唔敢直接屌鳩佢死煙摌。
「乜你咁生人唔生膽㗎，帶包煙返嚟有咩好驚姐？」呀詩真係夠膽死諗住攞煙出嚟，我即刻捉住佢隻手。
「你咪啊，我唔想奶嘢啊。」我已經無心情理係咪摸到佢隻手，佢真係好危險。
「超！無乜用。」最後佢乖乖地收埋包煙。
「專心讀書啦你，只係見到你唔想上嘅就話悶，就話想食煙，你先無鬼用啊。」
「唔洗你理啊。」呀詩好認真咁講，亦都好任性。
佢嬲爆爆咁睇本中史書，不停翻書，而每翻一下書都大大力，亦都好大聲。搞到前面啲人忍唔住擰轉頭望過來，然後睇到火爆嘅呀詩，都紛紛嚇到擰返轉頭。
好明顯地發緊脾氣，我更覺得無言以對，前面嗰兩個嘅眼神......
彷彿話俾我聽：「你仆街啦，激嬲佢。」
變相好似係我做錯咗咁，但明明又唔係我錯，黃河水都洗唔乾淨啦我。
跟住成堂佢都無同我講過嘢，一落堂，佢就自己走咗。
我亦都無理到，因為我都抄功課。
我抄抄下唔小心跌咗支筆落地下，我自然咁伸個頭落去搵筆，隻筆跌咗係呀詩個位附近。
我係地下見到一個灰色正方形包裝嘅嘢，上面寫住：durex......
我第一次見喱啲嘢，根本唔知咩嚟，就放係櫃桶，一陣間再俾佢。
呀詩返嚟後，佢身上嘅冷衫都係煙味，冷衫係最吸味㗎啦，見到佢成個人好似爽返曬咁，我不禁嘆一口氣。
真係好想佢變好。
佢返嚟之後精神咗，之後啲堂佢都好認真咁上，我小心翼翼咁問佢：「仲嬲緊啊？」
明明唔係我錯，但我都怕佢嬲。
「嬲咩啊？」佢臉無表情地問道，那張臉表達咗佢嘅真心。
「頭先以為你嬲啊嘛...」
「我咁......咁易......哈痴！」
「你又真係幾易哈痴嘅，哈哈。」我笑佢，因為呀詩喱個哈痴大聲到嚇醒前面瞓緊教嘅同學仔。
「Sorry......」呀詩一臉嬌羞地道歉。
佢係冷衫袋入面搵緊包紙巾，而身為暖男嘅我一早準備好張紙巾俾佢，但佢神色凝重，最後都有拎我張紙巾嘅，仲有禮貌咁講咗句唔該。
「咦......」佢處理完之後，剎有其事咁問：「我個condom呢？」
即使我無見過condom，但我都知condom咩嚟嘅。
「咩樣㗎？」咁直接？
「杜蕾絲㗎，頭先明明仲係度㗎......」呀詩佢摀底身搵。
「係咪喱個啊？」我將頭先執到嘅嘢俾佢睇。
「係啊？乜係你度嘅？」呀詩帶著猜疑嘅眼神望住我。
「我咁啱係地下見到咋，定你想俾其他人執到啊？」佢個眼神詭異到我都知佢想點。
「真係？」佢都仲係唔信。
「真係唔係啊頂你！我連佢係condom都唔知！」我終於都講出口，講出口啊頂！仆街了。
「姐係......你仲係...青 頭 仔 ？」佢驚訝得嚟而不失禮貌之餘，仲帶點竊笑。
「係啊仆街。」我大方承認嚟試圖掩飾我嘅尷尬。
「睇唔出喎，無拍過拖啊？」呀詩個表情囂張到想即刻將佢就地正法！
「咁...又點，我係唔想拍拖咋嘛。」
「唔想拍拖同拍唔拍到拖係兩回事喎。」
「咁...你嗰陣又咁句膽話溝我？搞到我仲以為你係啲溝女果手添。」呀詩笑笑地道，坦白講，佢笑起上嚟真係幾迷人。
「我係溝女高手啊，溝女無數添！」
呀詩佢個樣好驚歎，整咗個「哦」嘅表情，姐係O咀。
「溝唔到咋嘛！」講完之後，呀詩就笑咗，笑到趴係張枱度，完全唔記得咗佢自己仲拎住包condom。
等佢笑完，佢就繼續問我：「咁你當初做咩溝我姐？定玩㗎咋？」
唔知點解，我喱一刻淨係諗到佢男朋友，覺得MK仔都係玩玩下，但我唔想做MK仔，我想做一個特別嘅人，至少要係佢心目中係一個特別嘅人。
「咩玩啊？我認真㗎。」我望住佢，亦都好認真。
呀詩佢打咗我一下，好似認真咗。
「咁你成日都帶住condom㗎？」個心俾人插咗刀咁，會情不自禁咁諗起嗰個畫面。
我諗嗰個畫面唔係幾多個男人可以承受得到。
點解高登啲人會成日話要搵處女做老婆，係因為佢唔洗想像自己條女俾其他男人屌過嘅畫面。
「帶住以防萬一啊嘛。」呀詩淡然地道。