《我的MK妹同桌》: 1
依家回想起以前中學年代嘅事，開始倍感遙遠，甚至乎記憶都開始模糊不清。
但關於我同佢嘅故事，間唔中都會湧上心頭。
放工有時經過啲鋪頭，播緊中學嗰陣啱啱新出嘅歌，屈指一算，幾年幾年咁過去。
尤其是播周杰倫啲歌，基本上首首都識，首首都識唱，但每個人聽嘅故事都唔一樣。
我今日上巴士都專登拎個耳機出嚟，依家連耳機都無埋線。時代變得太快，快到我哋連懷緬嘅時間都無。
我同佢嘅相識，係我Form2嗰陣，故事嘅開端奇奇怪怪咁。
書我就唔係點讀，但學校有樣好戇鳩嘅嘢，就係要做咩讀書報告，姐係睇完書要寫心得嗰類啦，焗你要睇書，要吸收下啲文化氣息。
身為一個稱職嘅中學生，點可以唔欠交功課？所以我當然係無交啦。
我都拖咗班主任成兩個月，而我班主任又係啲好長氣嘅女人嚟， 每日返學校都催我交讀書報告，我一拖再拖，最後連脾氣溫和嘅佢都頂我唔順。
「李、建、強！你今日再唔交份讀書報告，你除咗唔洗止意返屋企之外，我仲會叫你屋企嚟。」Miss Chan係早會上面當住全班面前同我講，語氣強硬。
「哦。」我敷衍地道，我俾面佢，我欣賞Miss Chan嗰份鍥而不捨嘅精神。
於是乎我小息嗰陣就去學校圖書館嗰度借書，中午求其做完佢就算。
我同呀詩嘅相遇就係喱度開始。
我一入圖書館，發現櫃臺嘅當值員就咁扒係度瞓教，重點係佢無扎到辮，學校規定女仔係要扎辮。
心諗喱個女仔都幾夠薑喎，好似唔怕俾人捉咁喎。
我都無理到佢，我行入去搵咗本天航嘅愛情小說，以我吹水嘅功力，睇兩睇，吹幾句搞掂就算。
跟住我就去櫃檯借書，我將書擺係檯上面，個管理員毫無反應，我輕輕敲下檯面，而佢仍然好似死咗咁。
「唔該！我要借書。」我不耐煩地道。
仲係無反應，究竟佢係暈咗定係死咗？
「喂！」我開始提高聲線。
「我要借書啊！」
「醒啦喂！！！」
最後我決定抬起佢個頭，睇下佢咩事啦，一抬起佢個頭，佢清秀精緻嘅臉龐即刻映入我眼簾。
幾靚女喎，而且係我鐘意嗰杯茶，只不過佢嘴角上面仲殘留住佢嘅唾液。
一樣咁核突嘅嘢，配係佢美麗嘅容貌上面，一下子轉變為可愛了。
我溫柔地拍打佢水潤嘅臉龐，柔聲道：「喂，起身啦。」
Sorry，男人就係咁，如果今日起身嗰個係隔離班嗰個恐龍王肥欣，說話就唔係咁講啦。
「嗯…？」佢終於有反應，我再打多幾下，佢先識睜開雙眼。
「我想借書。」
「哦……你，等我一陣。」佢揉了揉自己隻眼，求其係隔離抽咗張紙巾，抹下自己嘴角啲口水。
然後粗聲粗氣咁講：「借幾多本啊？」
把聲係幾甜，幾好聽，但態度完全係惡劣評級。
「兩本。」我笑笑口咁講。
「學生證！」冷淡得嚟，又帶點煩躁。
我乖乖地拎出學生證，係佢唔耐煩嘅態度下，好快趣咁借完兩本書。
然後我行出圖書館嗰陣，我有專登回頭去望下佢，佢帶俾我嘅興趣遠遠大於書本上。
跟住佢好快就趴返落張枱度繼續瞓。
拎住兩本書落返去，我求其問附近嘅男仔，我同班上面嘅男仔都幾熟絡下，大家都玩埋一堆，都無話邊個同邊個最fd，我求其問坐我後面嘅小二。
唔好問我點解佢會叫小二，我識佢嗰陣已經個個都叫佢做小二，如果佢叫咩小三嘅話我會叫佢死返大陸。
「你知唔知圖書館嗰個靚女係邊個嚟㗎？」我轉個頭問小二。
「邊撚個啊？」佢好努力咁抄緊功課。
「算鳩數。」
我四周圍去問喱個女仔嘅底細，比我做功課更加勤力！
最後，為咗佢，我做咗一份報告。
入面有曬佢中一入嚟嘅詳細資料，但奇怪嘅係，好似佢咁靚嘅女仔，應該好受歡迎，理應係好多男仔心目中嘅一等一女神。
綜合各位咸濕老友嘅觀點，發現到一樣共通點，就係佢係一個MK妹，而且係一個四圍蒲嘅MK妹，對於學校嘅事，佢都係不聞不問。
「你唔係諗住溝佢呀？」健三問我。
我都唔知拿來嘅健三，我諗應該係佢小學三年班嗰陣隔離有個女同學問佢借擦膠啦。
「係咁又點姐！」我回應道。
「聽講佢出面個朵臭曬啦喎，而且聽講佢已經唔係處。」我哋成班男仔放學打完波去買嘢飲嗰陣，健三走過嚟問我。
「我理得佢係咪姐，佢係第一個令我會周圍問佢根底嘅女仔，到依家我都仲記得同佢嘅第一面。」
「做朋友嘅，我勸過你啦，你自己決定啦。」
「咁你幫唔幫我先？」我搭住佢膊頭說道。
「咪搞，我唔想攞屎上身。」
「無義氣！」
跟住落嚟，我都係度盤算緊點樣識到佢。
為咗每日都可以見到佢，我每日都會上去圖書館借書，只不過有一點我唔係好明，好似佢咁嘅MK妹，俗稱曳學生，點解會做圖書館管理員呢？
「又係你啊陳生？」經過兩三日嘅幫襯，佢已經認得我。
「係啊，又借書啊。」我笑面迎靚女。
「你喱本書已經借咗兩次啦喎。」佢目無表情地道，語氣帶點囂張，喱啲都係身為一個MK妹應該有嘅特質嚟，佢都算係一個合格嘅MK妹。
「我未睇曬啊嘛，咪…再借囉！」
「你借咗一日就嚟還，梗係未睇曬啦。」
「又無人規定話一定要睇曬先嚟還。」我耍無賴，心諗：你咁鬼串，我串下你又合理姐。
望住佢無我咁好氣，但又逼於無奈咁幫我借，個樣有啲嬲爆爆咁，幾可愛。
有一種征服嘅感覺，覺得自己贏咗一杖咁。
於是乎，我第二日又再去還書，再借返上一次我還嗰書，咁樣就可以做一個無限循環。
真係無返咁上下面皮嘅人係做唔出。
「又嚟借書？」佢白咗我一眼，絕望地道。
「還咗書再借囉。」
基本上無乜人會嚟圖書館，除咗高form嗰啲之外，好似我哋喱間爬唔到上游嘅中學，無邊幾個會蒲圖書館，所以暫時成個圖書館都係得我同佢。
「其實你係咪想溝我姐？」我估唔到佢咁直接，彷彿我只要後退一步就係懸崖，跌到乜都無。
「係啊！」
「咁我俾你溝啦，你唔好嚟煩我啦。」洗唔洗咁直接啊？
「其實我都係想搵個方法接近你姐，如果煩親你嘅話，唔好意思……」我想溝你姐，但我唔係痴漢。
「咁你唔嚟借啦？」佢好似有啲心太軟。
「做咩啊？可憐我啊？」
其實有時諗返起，都唔知點解當其時咁大膽，好怕輸咗咁，但其實鐘意一個人，唔應該著緊於輸打贏要。
如果唔係，我諗我哋都會有唔一樣嘅結局吧？
「你成日咁樣嚟借書，阻住呀姐我瞓教啊！我好鬼眼瞓啊……」
「上堂都可以瞓啦，落堂喱啲鐘數竟然唔去玩，你真係第一個。」
「乜原來你嘅玩係指落堂周圍去玩啊？」佢笑咗出嚟，乜喱啲唔係再正常不過嘅事嚟嘅咩？
「唉，你真係呢……放咗學嗰啲先係真正嘅玩，成個夜晚有得你玩啦戇鳩仔！」
「咁我放咗學都有去玩啊，落網吧囉！」
「超！」佢喱下真係勁大聲，充滿回音嘅鄙視。
「我喱啲出去玩得嚟成績又唔會差，我老豆老母又無我辦法，用成績塞住佢哋把口就得啦，反正佢哋著緊嘅，只不過係我啲成績，又唔係我個人變成點。」
剎眼間，我覺得眼前喱個女仔並不簡單，到依家我都仲未知佢姓甚名誰。
「你蒲到咁成績都唔差？」
「你又知我蒲？你起我底嚟啊？」俾佢咁樣問一下，個心虛到呢。
即刻兜：「咁出得去唔係蒲仲有咩姐？」
佢慢慢收返起個戒心，續道：「我上堂好專心聽書㗎，落堂咪上嚟瞓囉，以前本來會係班房瞓嘅，但班房啲仆街嘈到拆天咁，點瞓姐？咪上嚟瞓囉，你睇下，都無人咁制，仲唔啱嚟瞓教？」
「只不過呢！自從有條蛋散出現咗呢，就阻鳩住本姑娘瞓教。」
好明顯佢講嘅蛋散就係我啦。
「咁我唔阻你瞓教囉，我……我……」我一時之間答唔出。
後尾俾我諗，好鬼佩服我嘅聰明才智姐！
「我上嚟睇書得啦掛！？」
佢笑咗出嚟，無可奈何地說：「得，點會唔得？」
「係喎，仲未知你叫咩名？」
「唔……唔話你知！等你心思思下啦。」至少佢無頭先咁反感，算係成功咗一小步啦。
「喂啊，講個名都唔得？」我死chur。
「等你真係睇完本書先啦。」佢指一指我嗰本書，天航嘅書蟲的少年時代。
「幾好睇，幾感人㗎。」
「真係！？睇完就肯同我出街？」我得寸進尺。
「痴線啦你，想同我出街無咁易啊！」
可惜，中間嘅小息太快過，都未傾完就打鐘。
因為喱一下鐘聲，本來傾得好地地嘅，忽然間靜咗落嚟，一陣尷尬。
「打鐘啦，仲唔去上堂？」係佢首先打破尷尬。
「哦……好！」只好不捨地離開圖書館。
不過為咗佢，我好認真咁睇喱本書，連上堂嗰陣都偷偷地放係櫃桶睇。
到依家，我都仲記得本書嘅內容，佢真係無講錯，真係好好睇。
一睇就好似上咗癮咁，好似追電視劇咁，停唔到落嚟，好奇妙嘅感覺。
總之有時間就會拎出嚟睇，放學搭車返屋企嗰陣都會係車度拎出嚟睇。以前我會覺得喱啲人係度扮曬嘢，搭個車洗唔洗拎本書出嚟姐。
依家我明啦。
佢哋一定好似我咁，為咗溝女。
平時無睇開書嘅我，依家忽然間睇書，每一隻字我都要慢慢吸收。
當我開始為佢嘅事開始上心嘅時候，我就察覺到自己係鐘意咗佢，但我估唔到嘅係，原來鐘意一個人係可以咁快。
我用咗成晚嚟睇喱本書，家母自然倍感安慰，佢唔理我睇緊乜書，總之係一本書就覺得我好俾心機㗎啦。
第二日一起身，返學最期待嘅就係小息，喱種興奮嘅感覺，好想同人分享。
我昨晚終於係臨瞓前睇完本書，就連發夢都好似夢到類似情節，夢到到依家仲未知咩名嘅佢。病重，然後寫低封信叫我唔好等佢，我記得我好傷心，流曬馬尿咁。
起身仲覺得喱一切係真咁。
小息一打鐘就好開心咁衝上圖書館，一到圖書館嘅時候，空無一人。
我入到圖書館好似踩咗落懸崖咁，個心。
我唔死心，決定係圖書館等佢，於是乎我去架上面搵其他天航嘅書嚟睇，打書釘。
後未嚟當值嘅並唔係佢，而係另一個男仔，我心情好不爽咁同個男仔講：「還書的！」
「哦，好啊。」佢似乎無察覺到我嘅不滿。
「琴日嗰個女仔呢？」
「哦，今日我當值啊嘛，我唔知佢幾時當值喎，我哋三個人輪班㗎。」
喱個四眼超，睇佢唔順眼。
「定係我俾佢MSN你？你有咩事就自己搵佢？」
哇！個四眼靚仔咁好人？
「真係㗎？？？但……但你咁樣佢會唔會嬲㗎？」
「呀詩邊會咁易嬲啊？你唔好睇佢個樣好似好惡咁，其實不知幾好人。」四眼仔笑起上嚟都好有讀書味，真係好啱係度讀書。
原來佢叫呀詩，睇唔出個名又幾好聽喎。
「咁好啦，我都係親自搵佢好啲嘅！」我露出虛假嘅笑容，但四眼讀書仔好受落。
「咁咪好囉，拿，如果佢問係邊個俾你，你就話係圖書館嘅四眼靚仔就得啦。」
「梗係會啦，放心啦！唔該曬你啊，幫咗我好大忙。」頓時因為四眼仔喱個MSN拉返我上嚟。
心情好似過山車咁。
唔知睇我故嘅人仲知唔知咩係MSN呢？不過都係循例解釋下，係遠古時代手機仲未咁普及嘅時候，人們嘅通訊軟件除咗單純地打電話之外，就係依靠MSN。MSN稱霸咗好長一段時間先到手機短訊，8蚊同台無限send，再嚟先到WhatsApp。
雖然成日都見唔到佢，但拎到佢MSN已經好夠，放學就衝返屋企，細細個真係心口得個勇。
依家？我連send個WhatsApp問佢近排點樣啊？都問唔出口。
究竟係我慢慢無咗當初嘅勇氣，定係喱種勇氣只能夠用一次？
返到屋企，係電腦面前準備好曬！
Add咗佢之後，就係等佢通過我驗證了。
一路等就一路打機，以前小學嗰陣鐘意打Heat Project，上咗中學之後就開始轉玩CSO，嗰期時好興玩喪屁模式，拎住個重機就入去掃人，我哋班啲男仔就組團玩。
以前打機仲未有用skype，後來轉玩LOL先用，嗰陣仲用緊電話幾人連線咁樣打。
咁我一轉咗用全屏，MSN啲訊息就跳唔到出嚟，我哋打機都打到天昏地暗。
直到打到娘親叫我食飯先收手。
當我開返MSN嘅時候，呀詩就傳咗好幾個震動過嚟，劈頭就問我係邊個，點解會有佢MSN。
「你估下？」我諗住玩下佢，鬼叫佢嗰陣叫我心思思啊嗱！
「你系牙哲？」
「唔係啊。」突然彈出一個我唔識嘅名，發現我對佢嘅了解真係好少。
「咁你係邊個姐。」
「係圖書館成日問你借書嗰個囉～」
「屌！你點解會有我MSN㗎？」佢好似好驚訝咁，而佢MSN個名叫牙詩，前後都仲有啲唔知咩符號，充滿藝術的韻味。
「有個四眼靚仔俾我㗎。」再加「XD」，更能突顯句子的趣味性，就好似中文作文加啲排比句會篇文章更有深度一樣。
「頂，條仆街真係呢……」
「我依家唔得閒同你講住，出有個兄弟俾人挖緊。」跟住呀詩就落咗線，頭像由綠色轉為透明。
而我，依家先留到呀詩個Icon……
係同一個男仔嘅合照，一張貼子相嚟，個背景就係貼紙相牆，仲加咗唔少效果。
張Icon睇唔清，無辦法放大張Icon，但隱約見到個男仔同佢幾匹配，因為對方明顯係一個MK仔，留住遮到隻眼嘅陰，個頭Gel到無雷公咁高。
MK妹配返MK仔，就好似鄧麗欣配方力申一樣。