《我哋已經到達終點站⋯⋯》: 第二十一章

因為放咗幾日假，喺屋企瞓足幾日，所以精神咗唔少，而做兼職最開心嘅就係可以隨時請假。

放完假第一日返工就係返88R，所以又要去西九龍車廠攞車。

「噢，係5頭豪呀。」我睇睇張功課紙。

可能架車啱啱重新翻油嚟，亞記車身配鮮明嘅黃色，加上紅藍間條，喺太陽照耀下係幾咁靚。

但係架車泊喺露天車廠，太陽長期曬住架車係真係幾熱，所以出街載客前特登兜一兜去洗車機過一過水，慕求為架車降溫。





由西九龍車廠出車，經連翔道上青沙公路，話咁快嚟到沙田第一城總站。

好似返咗咁耐都無乜點介紹88R哩條線，88R係城巴非專利搞嘅居民巴士線，喺沙田只停第一城總站，之後就直出港島，走線直接係的確吸引唔少人揀佢出港島。

廢話講住咁多先，我就嚟夠鐘開車，調較好八達通機同路線牌，就開前門上客。

嘟～

嘟～





嘟～

非繁忙時間搭車嘅人得小貓三、四隻，揸咁大架車其實有啲浪費資源。

「師傅可唔可以開一開冷氣？」個乘客有禮貌咁問我。

「唔～開咗啦，不過架車曬咗好耐，一陣會好少少㗎啦。」

「好，唔該曬。」





正當我閂好曬門，啱啱好出總站，有人跑緊埋嚟追車。我視察四周環境，確定無危險，同埋加上等緊紅燈，就開門比佢上。

【注意：正常情況下巴士離站後係唔會再開門上落，所以唔好老奉要人比你上，比你上係人情，唔比你上係道理。】

「呼～呼～好彩趕到～」

「坐低先啦。」

「好。」

Rachel坐喺車頭嘅導航位，喺度搵佢張八達通。

嘟～

「又會咁啱係你揸嘅。」





「哈～見係你喳，第二個我唔開門比佢上㗎啦。」

「唔該曬你呀～」

襯又要停燈，四周圍望下有咩睇。

「喂，Charlie。」

「唔？」

「你睇吓～」Rachel指一指我送嗰條頸鏈。

「好襯你呀，好好睇呀。」





「嘿嘿，多謝。」

架車果然不負所望，啲力話嚟就嚟，喺觀塘繞道同東區走廊飛係好爽。

「係呢，你去香港嗰邊有咩做呀？」

「我去返學呀。」

「哦，好勤力噢。」

「講哩啲。不過你今晚收幾點？」

「我？」

「係呀。」





「八點幾啦，做咩咁問？」

「無呀，今晚無人同我食飯，睇你得唔得閒啫。」

「我得閒呀。」

「咁你收工之前Whatsapp我啦，我上你車。」

「Ok。」

不經不覺架車已經嚟到金鐘，Rachel就喺哩度落咗車。