《突然有條女同我同居》(冇甜): 45

我哋喺入面睇咗陣之後，就出返去，坐咗喺地下上面。

我哋一齊抱膝，抬頭望向漆黑一片，唔似電影入面，只得一兩粒星星嘅夜空，仲有一個大概得番四分之一嘅月亮。

儘管呢個景觀一啲都唔浪漫，但我反而覺得幾有意義，因為咁樣先係香港，唔靚嘅夜空，唔靚嘅一大班「人」，有陣即使係都市中都可以感受到大自然，但最緊要嘅係，照耀呢個地方嘅嘢，唔係燈光，係一種精神，信念。

「希希～」

愛盈打斷咗我嘅思考。



「你覺唔覺得呢...有少少凍呀？」，佢攬住自己雙臂咁講。

因為頭先我突然拉佢上嚟，所以佢本來着緊嘅外套仲係樓下，而佢身上只係得一件單薄嘅衛衣，明顯比唔到溫暖佢，但我都唔可以好似啲電影男主角咁，比件衫佢著，因為我都淨係著咗一件衫，而且而家都十一點，肯定會越夜越凍。

但係我突然又醒返起，大叔留咗個紙箱係度唔記得咗拎走，所以我索性拎佢過嚟，將佢整成一個長方形，然後我哋兩個就可以坐入去，雖然正面都係無嘢遮住，但係一定程度上都可以保到下暖。

之後我就用咗三分鐘完成咗呢個計劃。

搞掂之後我哋就二話不說坐咗入去先，果然幾有用，比起頭先暖咗好多。



跟住愛盈就成個人挨落嚟，兩個人一齊等到新嘅一年，唔需要刻意展開話題，只要陪住對方，就足夠。

經過一段短暫嘅等待，終於嚟到咗十一點五十九分，得番十秒果陣，愛盈就興奮咁開始倒數。

「十！九！八！六！五！四！三！二！一！一？」

佢係咪數漏咗個七....

「新年快樂！生日快樂！」，佢好興奮咁攬住我講。



「新年快樂」，佢可愛嘅反應令我忍唔住笑咗出聲。

「你知唔知...同愛人一齊迎接新嘅一年係咩感覺？」

我突然諗起我老豆講嘅一句嘢，儘管我而家都仲係唔鐘意佢，不過，佢竟然講過啲有意義嘅嘢。

我唔知點解抬高咗頭，望住果個唔完整嘅月亮，心中浮現出一個問題。

「你個腦...其實諗緊啲咩？」

呢個係我一直都好想問佢嘅嘢，唔係鬧佢，真係只係一個問題。

我竟然會覺得可惜，因為我再無機會問佢...

愛盈突然吻向我嘅嘴唇，將我嘅焦點拉回佢身上。



「抱我返去～」