《突然有條女同我同居》(冇甜): 46

「抱我返去~」

我驚訝咁望住佢塊面,無紅到,應該無醉,然後再伸手摸下佢額頭,都無發燒...

「真係?」

「嗯!」，佢用力點頭。

「咁好啦...」



於是我同佢一齊企起身,再用一隻手擺係佢背脊,一隻手放係佢小腿,用一個公主抱嘅動作離開。

「好輕...」

因為佢實在係太輕,所以我行到𨋢口嗰陣忍唔住咁講。

「口花花~嘻嘻~」

雖然佢講係咁講,但可以明顯咁見到佢流露住好甜嘅笑容。



之後我就一直保持住呢個姿勢返到屋企,途中都免不了俾一啲經過嘅鄰居用出奇嘅眼光望住。

返到去之後,可能係頭先等咗咁耐都有啲攰,所以我地好快就沖好涼準備訓覺,因為瞓醒之後就係簽書會。

大概七至八個鐘之後,即係早上嘅八點半,我就俾猛烈嘅陽光仲有憶奇踩醒咗。

好快咁煮好咗個早餐仲有餵埋野食俾兩位主子之後,我同愛盈就換好曬衫準備出門口,目的地同琴日相同。

我著咗一件全黑嘅恤衫,再係外面搭件黑色嘅衛衣,而下身就著條西褲再加對板鞋,令自己望落斯文咗好多,而愛盈就著咗一件白色嘅連身裙,仔細精緻嘅縫紉令呢條裙同愛盈搭配得十分完美,誘惑我喺途中係咁忍唔住望向佢。



「做…做乜係咁望住我呀...」，佢臉上開始泛起紅暈

「你好似隻公仔…」,我伸出左手摸一摸佢個頭講。

「好可愛…」，我接住淺笑道。

「咁就要錫多啲我喇~」,佢有啲怕醜咁講。

「隨時。」,講完之後我就輕輕錫咗佢塊面一下,唔知點解我有啲奇怪,但係凈係對住愛盈先會咁做。

係車上打鬧咗一陣之後就到咗站,唔知點解我硬係覺得現場會好少人,而且我仲緊張到隻手有啲震…

愛盈感覺到我嘅緊張之後,就緊緊咁握住我隻手。

「我陪住你,唔好緊張啦~」



我聽到之後只係用一個微笑回答佢...

一個帶有自信嘅微笑。