《毒L和初戀相識的日子》: 第一百四十七章 有點Lonely的Christmas

第一百四十七章 有點Lonely的Christmas

十二月嘅時間過得好快，話咁快今日已經係聖誕節。今個月我都係一個星期番三、四日part time咁度過。

最近我同Winnie都係咁啦。好彩有Skype呢樣嘢，我同佢先可以隔住個screen傾計。

之前Winnie話十二月放假應該會番嚟香港過，不過佢之後話伯母決定遲啲先番。究竟我同佢幾時先可以見面呢......

今日約咗阿Paul、晴晴、阿俊、Zoe同埋David食咗餐飯。Jenny要番工所以未能出席。





我哋約咗去一間韓式烤肉嘅餐廳食嘢，地點係位於旺角。

我搭車出去嘅途中，諗起原來舊年都係冇同Winnie過聖誕，因為佢番咗大陸。而今年，我都係冇得同佢過，心入面唔多唔少都會有啲失落感。

不過，早兩日同佢Skype戈陣佢都有鼓勵我，叫我唔好又再頹。佢仲話雖然佢唔喺我身邊，不過佢個心都會喺我度。

我哋約咗喺旺角中心嘅門口等，當我到咗戈陣離遠已經見倒阿俊。

街度上嘅聖誕氣氛好濃厚，好多人都戴上聖誕帽，唔少商舖內都有播放聖誕歌。





另外，街度上亦都見倒有好多情侶，令我不禁嘆氣咗一聲。

「做咩嘆氣呀？」阿俊問我。

「冇呀，覺得差咁啲嘢囉。」我回應。

「差咁啲咩呀？」

「唔知呢。咦，David佢哋到喇喎。」





「係喎。」

齊人之後，我哋出發去食嘢。由於一早訂咗位，所以都唔洗點等。

食完嘢後，我哋再去咗附近嘅一間甜品舖食糖水，之後先解散。

「咁我哋下個月見啦，Joseph哥。」阿Paul臨走之前同我講。

「好啦，拜拜。」

呢個聖誕同一班朋友過，我幾開心，不過始終都係覺得差咁啲。

幾日之後到除夕，我搵咗Leo同佢女朋友，再加Leo大學識嘅幾個朋友一齊去倒數。除夕日有15度，我戴咗Winnie送比我嘅粉紅色頸巾出去，雖然佢唔喺我身邊，不過我咪當睹物思人囉。

到咗大約夜晚十一點幾，我哋行咗去尖東海旁準備迎接新一年。





我哋傾咗一陣計，維港兩岸嘅大廈屏幕已經開始倒數。海旁嚟倒數嘅人都好投入。到最後十秒，大家都一齊嗌:「十、九、八、七、六、五、四、三、二、一，Happy New Year！！！」

踏進新一年，我嘅心入面有一個願望。願望同舊年一樣冇變過，就係可以一直同佢一齊。





不知不覺，一年又過去了。