《毒L和初戀相識的日子》: 第八十章 海邊「漫」步

第八十章 海邊「漫」步

到咗十二點，我行落去Winnie佢地間房出面。等咗一陣，佢就出嚟喇。

我地落到去，行到去樓下嘅長洲東灣。我地手拖手咁一路行。

「做咩搵我落嚟行嘅~？」我問Winnie。

「人地想見你多啲吖嘛~」





「做咩好似講到我地之後冇得見咁...」

「點會喎，你唔好亂諗啦~」

其實自從打牌戈日之後，我覺得Winnie好似有啲心事咁。不過，會唔會只係我諗多咗呢....

「其實呢，妳最近係咪有嘢唔開心呀~？」

「少少啦，都係屋企戈啲事啦...」





「可唔可以講嚟聽吓呀~？」

「同你一齊唔想講啲唔開心嘢呀~」

「好啦，咁如果有嘢要幫手記得同我講呀...」

「得啦~」

凌晨嘅長洲東灣，空無一人，非常寧靜。聽倒嘅只有沙沙嘅海水聲同埋風嘅呼呼聲。黑夜嘅天空，遠離鬧市，冇咗光污染，什至可以隱約見倒一粒星星。





「妳睇唔睇倒戈粒星呀~？」

「咦，係喎，都幾閃吓~」

「好耐都冇喺天空見過星星喇~」

「我都係呀~」

「咁不如影張相吖~？」

「好呀~」

雖然現場環境好黑，不過都隱約影倒。

「我想問你一個問題阿，男班長。」





「問囉~」

「你試過最唔開心嘅一件事係咩~？」

「我八歲戈陣老豆因為病走咗，戈陣唔開心咗好耐...」

「對唔住呀...」

「我已經接受咗，冇嘢呀~ 做咩咁問嘅~？」

「冇呀，我想了解你多啲吖嘛~」

「我地之後仲有好多時間互相了解啦~」我捉住咗Winnie隻手。





Winnie喺度笑得好燦爛。

「送份禮物比你吖，男班長~」

「妳想送咩比我呀~？」

突然之間，Winnie錫咗我塊面一吓。一時之間我比唔倒反應，個心跳得好快。

「我地番去囉~」Winnie講。

「好呀，行囉~」

我地拖住手咁沿路行到番去。

「咁聽朝見啦~」我喺Winnie房外面講。





「嗯，早抖喇~」

「早抖~」





番到去梳洗之後瞓覺，我個心仍然砰砰、砰砰咁跳，原來第一次kiss係會有咁嘅感覺。