《毒L和初戀相識的日子》: 第七十九章 長洲之夜

第七十九章 長洲之夜

我地去到東堤，原來晴晴訂咗兩間房咋。呢邊規定每間房最多可以容納三個人。

「唔好意思呀Joseph~ 我book房戈陣冇諗咁多...」晴晴對我講。

「有乜所謂吖~」我回應。

我地兩間房都係對住個海同埋沙灘嘅，仲係喺同一幢。我地分別上去放低個袋，再休息吓。我同阿Paul、阿俊一間房，佢地三個女仔一間房。





我地一打開房門，大家覺得都算ok，有一張大床，一部細電視，細枱等設施。

三個男人喺間房係冇咩搞嘅，大家都喺度討論吓打機嘅話題。

好快時間已經去到七點喇，晴晴打比阿Paul叫我地落去食晚飯。而我地都即刻行落去。

「大家想食咩~？」晴晴問。

「冇所謂呀~」阿Paul回應。





大家都點頭。

「咁不如去飯店食？」晴晴問。

「好呀~」大家回應。

行去飯店都有一段距離，我拖住Winnie行。佢地望倒都喺度笑。我同Winnie行最後，佢地喺前面。

「不如今晚陪我去沙灘散吓步吖？剩係我地兩個人。」Winnie突然問我。





「好呀~」

「唔好走數呀~」

「我又點會走妳數吖~」

「哼，算你啦。」

入到飯店，我地坐低咗。經過一番討論之後，我地決定叫四個餸，分別係魚香茄子煲、椒鹽鮮魷、海皇什菜煲同埋生炒排骨，再加白飯。

味道都算幾好，不過價錢就貴咗少少。

食飯嘅中途有人打比Jenny，叫佢聽日番part time，所以佢聽朝十點前要走喇。當然阿俊都會跟埋。

食飽之後我地慢慢行番去東堤，入夜後嘅長洲人流少咗好多，大部份嘅店舖已經收咗喇。





行到去東堤，Winnie約我準時十二點去佢房門口接佢。我亦都爽快咁應承咗佢。

番到房之後，阿Paul先沖涼，得番我同阿俊喺出面。

「我一陣同Winnie落去下面沙灘散步。」我講。

「咁咪幾好囉~ 可以促進吓感情~ 有冇kiss過呀你地~？」阿俊回應。

「痴線... 我同佢都唔係啲咁主動嘅人...」

「加油啦~ 遲早都會發生㗎啦~」

「唔好講我喇。咁你同Jenny又kiss過未先？」我反問阿俊。





「點會未吖，其實係好正常嘅事~」阿俊笑笑口咁講。

「你都做得幾好㗎喇，敢喺我地面前手拖手~」阿俊補充。

「係咩...」

「所以我同Jenny都睇好你地㗎~」

「多謝你地~」

之後，我睇住部細電視，而阿俊就㩒電話，阿Paul就仲喺廁所未出嚟。











心入面期待住同妳喺沙灘散步。