[愛情走糖故]兩個人心底中不為人知嘅秘密,成為兩個人間嘅牽引: 152.你憑什麼？

「學謙已經大個仔，所以由學謙決定…」媽媽望向夏學謙

「你憑咩要我認番你？」夏學謙完全冇婉轉嘅打算，直接冷漠地問道

沈偉晉愕然咁望住夏學謙，佢冇諗過夏學謙會咁樣問佢

「我知道當年係我不負責任，但…當年嘅我真係照顧唔到你地兩母子…」沈偉晉一臉內疚，「我一年之後有番過嚟，有諗過搵番你地，但…我冇諗過美娜會睇唔開…」

「本來佢都唔會睇唔開，但因為你…」夏學謙沉着氣，明明佢並非由楊美娜養育成人，但佢見到沈偉晉嘅時候莫名其妙地火冒三丈，「一走了之、不負責任嘅行為，佢先會睇唔開！如果唔係我媽養我，我今日仲會企喺度？你呢啲不負責任嘅人，我最討厭。」





「但你唔可以否認我係你親生阿爸，呢個係事實。」沈偉晉嘗試對夏學謙講道理

呢個時候夏巧莘喺外面洗好生果行番嚟，見到夏學謙已經完全板起臉

「我唔會否認你係我親生阿爸，但係我冇打算叫你一聲阿爸。」夏學謙冷靜地講道，呢句說話冷酷又無情，「如果你覺得我無情，咁當年嘅你咪仲無情？」

「對唔住，係我對美娜唔住，你原諒我啦好唔好？」沈偉晉對住夏學謙彎腰低頭

曾經嘅沈偉晉都係一個愛面子嘅人，但事到如今，佢願意低頭道歉已經係一個好大嘅改變





喺呢個私家病房中，只有佢地4個人，但或者就算喺大庭廣眾都好，沈偉晉亦會咁做

「我每日都去美娜嘅墳前獻花，希望佢原諒我…或者我宜家先後悔已經太遲，但你原諒我好唔好？」沈偉晉嘅眼眶已經紅起嚟，「我唔係話要爭啲咩撫養權，亦唔係嚟爭仔，我嚟只係想向秀怡講聲多謝同道歉，同埋想你原諒我…」

夏學謙冇再出聲，眼見眼前嘅男人紅了眼眶，佢心中有啲心軟，但佢亦知道如果咁輕易就原諒呢個男人，對唔住過咗身嘅媽媽美娜

「始終係老豆，唔通真係唔認？咁樣我又算唔算係不孝？」夏學謙望住呢個男人撫心自問，「但…當初係佢錯在先…我宜家唔輕易原諒佢，係要為我親生媽媽出番啖氣…」

夏學謙冇再出聲，沈偉晉大概知道夏學謙嘅答案





「晉，我諗學謙需要時間考慮，你都係番去先啦…」媽媽對沈偉晉講道

「嗯，好…好…」沈偉晉擠出笑容點點頭

望住沈偉晉落莫離開嘅背影，夏學謙喺心中多咗一份心酸

「學謙，媽媽只係想講一句…」媽媽溫柔咁捉住夏學謙嘅手腕，「佢係生父，呢個係事實。」

「我知道。」夏學謙回答

「細佬，你真係唔原諒佢呀？」夏巧莘都覺得有啲難過，畢竟惻隱之心人皆有之

「會原諒，但唔係宜家…」夏學謙有自己嘅打算，佢知道要原諒呢個男人，因為內疚嘅感覺已經跟咗佢好多年，但宜家呢一刻佢唔原諒呢個老豆，係因為嬲佢冇做個負責任嘅男人

夏巧莘同媽媽對望，媽媽無奈地微微一笑；夏巧莘望向夏學謙，心中有啲好奇到底夏學謙諗緊咩





「細佬一直以嚟都好成熟，比我呢個家姐更成熟…」夏巧莘望住夏學謙嘅背諗，「到底佢諗緊啲咩…我真係睇唔透佢…」

喺夏巧莘嘅心中，夏學謙呢個細佬比起自己更成熟，夏學謙對自己嘅要求好高，每一樣嘢都好優越

好感情嘅兩姊弟，但夏巧莘從來都睇唔清夏學謙嘅想法，但夏學謙卻好容易估中夏巧莘嘅心事

「或者有咁樣嘅差別都係好事…」夏巧莘默默地揚起了嘴角微笑着

望住夏學謙同媽媽有講有笑，心中都覺得好溫暖，係一家人先會有嘅感覺

因為係一家人，所以感覺格外親切，格外溫馨

喺夏巧莘眼中嘅夏學謙，總係以家人為首，屋企有事，夏學謙總係第一個企出嚟，為屋企人擔心





媽媽住院後，夏學謙幾乎每日都會嚟探望，一直陪喺媽媽嘅身邊；夏巧莘喺酒吧番工，夏學謙一定會去接夏巧莘

冇咩特別嘅原因，只係因為佢地永遠都係夏學謙最珍惜嘅家人，比咗夏學謙一個開心嘅童年，亦冇因為佢係養子而對佢唔好

夏學謙對家人嘅珍愛，比其他人更多，全因為呢個家救咗佢…




IG Link: https://www.instagram.com/nd_cotttoncandy/?hl=zh-tw

回應link: https://docs.google.com/forms/d/e/1FAIpQLScB_-FcIiKv9bnDe_pWTFd9B7sEtdiGEnKZoJeq5rjmK9JUZA/viewform?usp=sf_link